ស.រ.អា.​ប្រកាស​ផ្ដល់​ជំនួយ​ដល់​ប្រទេស​ក្នុង​តំបន់​ទន្លេ​មេគង្គ​ក្រោម

រដ្ឋមន្ត្រី​ក្រសួង​ការបរទេស​ស.រ.អា. បាន​ប្រកាស​ផ្ដល់​ជំនួយ​ដល់​ប្រទេស​ដែល​ទន្លេ​មេគង្គ​ហូរ​ឆ្លង​កាត់ រួម​មាន​កម្ពុជា ថៃ លាវ និង​វៀតណាម ដើម្បី​ឲ្យ​ប្រទេស​ទាំង​នោះ​ត្រៀម​ខ្លួន​ទប់ស្កាត់​ឥទ្ធិពល​នៃ​ការ​ផ្លាស់​ប្ដូរ​បរិយាកាស ទាក់ទង​នឹង​ប្រភព​ធនធាន​ទឹក សន្តិសុខ​ស្បៀង និង​ការ​ចិញ្ចឹម​ជីវិត​របស់​ប្រជាជន។
ដោយ យន់ សាមៀន
2010-07-23
អ៊ីម៉ែល
មតិ
Share
បោះពុម្ព
២២-កក្កដា-២០១០: រដ្ឋមន្ត្រី​ក្រសួង​ការបរទេស​សហរដ្ឋ​អាមេរិក លោកស្រី Hillary Clinton ក្នុង​អំឡុង​ពេល​ធ្វើ​សន្និសីទ​កាសែត នៅ​ក្នុង​ទីក្រុង​ហាណូយ ប្រទេស​វៀតណាម
២២-កក្កដា-២០១០: រដ្ឋមន្ត្រី​ក្រសួង​ការបរទេស​សហរដ្ឋ​អាមេរិក លោកស្រី Hillary Clinton ក្នុង​អំឡុង​ពេល​ធ្វើ​សន្និសីទ​កាសែត នៅ​ក្នុង​ទីក្រុង​ហាណូយ ប្រទេស​វៀតណាម
AFP PHOTO

ការ​សន្យា​ផ្ដល់​ជំនួយ​នេះ​ធ្វើ​ឡើង​ក្រោយ​ពេល​ដែល មន្ត្រី​ជល​ផល​កម្ពុជា​បាន​សម្ដែង​ការ​ព្រួយ​បារម្ភ​ចំពោះ​ការ​ស្រក​ចុះ​កម្ពស់​ទឹក​ទន្លេ មេគង្គ​ដែល​បណ្ដាល​ឲ្យ​ផល​ត្រី​មាន​ការ​ថយ​ចុះ​ជា​លំដាប់។

មន្ត្រី​រដ្ឋាភិបាល​កម្ពុជា​បាន​ស្វាគមន៍ ចំពោះ​ការ​ប្រកាស​ផ្ដល់​ជំនួយ​របស់​រដ្ឋមន្ត្រី​ក្រសួង​ការបរទេស​សហរដ្ឋ​អាមេរិក លោកស្រី ហ៊ិលឡឺរី គ្លិនតុន (Hillary Clinton) ដែល​បាន​ធ្វើ​ការ​សន្យា​នៅ​ឯ​ទីក្រុង​ហាណូយ ប្រទេស​វៀតណាម ថា​សហរដ្ឋ​អាមេរិក​នឹង​ផ្ដល់​ជំនួយ​ដល់​បណ្ដា​ប្រទេស​ក្នុង​តំបន់​ទន្លេ​មេគង្គ​ក្រោម ដែល​ប្រភព​ធនធាន​ទឹក​របស់​ប្រទេស​ទាំង​នោះ កំពុង​ទទួល​រង​ការ​គំរាម​កំហែង​បណ្ដាល​មក​ពី​ការ​អភិវឌ្ឍ និង​ការ​កើន​ឡើង​នៃ​ចំនួន​ប្រជា​ពលរដ្ឋ​យ៉ាង​ឆាប់​រហ័ស។

ការ​សន្យា​ផ្ដល់​ជំនួយ​របស់​សហរដ្ឋ​អាមេរិក​នេះ ធ្វើ​ឡើង​បន្ទាប់​ពី​មន្ត្រី​រដ្ឋាភិបាល​កម្ពុជា​សំដែង​ការ​ព្រួយ​បារម្ភ​ចំពោះ​ការ​ស្រក​ចុះ​នៃ​កម្ពស់​ទឹក​ទន្លេ​មេគង្គ ដែល​បាន​បង្ក​ឲ្យ​មាន​ ការ​ថយ​ចុះ​ផល​នេសាទ​ត្រី​ទឹក​សាប។

លោកស្រី ហ៊ិលឡឺរី គ្លិនតុន កាល​ពី​ថ្ងៃ​ព្រហស្បតិ៍ ទី​២២ កក្កដា បាន​ប្រាប់​រដ្ឋមន្ត្រី​ការ​បរទេស​កម្ពុជា វៀតណាម ថៃ និង​លាវ ក្នុង​កិច្ច​ប្រជុំ​មួយ​ថា សហរដ្ឋ​អាមេរិក​នឹង​ផ្ដល់​ជំនួយ​ឲ្យ​ប្រទេស​ទាំង ៤​ប្រទេស​នេះ ដើម្បី​ឲ្យ​មាន​ការ​រៀបចំ​ប្រភព​ធនធាន​របស់​ខ្លួន និង​ការ​ការពារ​ប្រឆាំង​នឹង​ការ​គំរាម​កំហែង​ពី​ការ​ផ្លាស់​ប្ដូរ​បរិយាកាស។

សេចក្ដី​ប្រកាស​ព័ត៌មាន​របស់​ក្រសួង​ការបរទេស​សហរដ្ឋ​អាមេរិក​ចេញ​កាល​ពី​ថ្ងៃ​ព្រហស្បតិ៍ បាន​ឲ្យ​ដឹង​ថា សហរដ្ឋ​អាមេរិក​នឹង​ចំណាយ​លុយ​សរុប​ប្រមាណ​ជាង ២២​លាន​ដុល្លារ​ក្នុង​ឆ្នាំ​២០១០ ទៅ​លើ​កម្មវិធី​បរិស្ថាន​ក្នុង​តំបន់​ទន្លេ​មេគង្គ។ ចំពោះ​ផ្នែក​សុខភាព សហរដ្ឋ​អាមេរិក​នឹង​ផ្ដល់​ជំនួយ បើ​គិត​មក​ត្រឹម​ឆ្នាំ​២០១០ បាន​កើន​ទៅ​ដល់​ជាង ១៤៧​លាន​ដុល្លារ ដោយ​ផ្ដោត​លើ​ជំងឺ​ឆ្លង។

ប្រតិភូ​រដ្ឋាភិបាល​កម្ពុជា​ទទួល​បន្ទុក​ជលផល លោក ណៅ ធូក មាន​ប្រសាសន៍​ប្រាប់​វិទ្យុ​អាស៊ី​សេរី នៅ​ថ្ងៃ​សុក្រ ទី​២៣ ថា លោក​មាន​ការ​ព្រួយ​បារម្ភ​ចំពោះ​ផល​ប៉ះពាល់​នៃ​ការ​ផ្លាស់​ប្ដូរ​ធាតុ​អាកាស។ លោក​ថា នៅ​ឆ្នាំ​នេះ ផល​នេសាទ​បាន​ធ្លាក់​ចុះ​ពី ៥២៥​ពាន់​តោន​ក្នុង​ឆ្នាំ​២០០៨ មក​ត្រឹម ៥១៥​ពាន់​តោន​នៅ​ឆ្នាំ​២០០៩ ដោយសារ​ទឹក​ទន្លេ​មេគង្គ និង​បឹង​ទន្លេ​សាប មាន​កម្រិត​ទាប។ ការ​ស្រក​កម្រិត​ទឹក​ទន្លេ​មេគង្គ​នេះ បណ្ដាល​មក​ពី​ការ​ខ្វះ​ទឹក​ភ្លៀង។

អ្នក​នាំ​ពាក្យ​របស់​ក្រសួង​ការ​បរទេស លោក កុយ គួង មាន​ប្រសាសន៍​នៅ​ថ្ងៃ​សុក្រ​ថា លោក​នៅ​មិន​ទាន់​បាន​ព័ត៌មាន​លម្អិត​ពី​រដ្ឋមន្ត្រី​ការបរទេស​កម្ពុជា លោក ហោ ណាំហុង ដែល​កំពុង​ស្នាក់នៅ​ប្រទេស​វៀតណាម​នៅ​ឡើយ​ទេ អំពី​ជំនួយ​សហរដ្ឋ​អាមេរិក​នេះ។

ទីភ្នាក់ងារ​សារព័ត៌មាន​បារាំង AFP បាន​ផ្សាយ​នៅ​ថ្ងៃ​ព្រហស្បតិ៍​ថា មាន​មនុស្ស​ប្រមាណ ៦០​លាន​នាក់​បាន និង​កំពុង​ពឹង​ពាក់​អាស្រ័យ​ទន្លេ​មេគង្គ​នេះ ដែល​ជា​ប្រភព​ផល​ត្រី​ធំ​ជាង​គេ​នៅ​លើ​ពិភពលោក។

គណៈកម្មការ​អន្តរ​រដ្ឋាភិបាល​ទន្លេ​មេគង្គ​បាន​ព្រមាន​ថា ការ​សង់​ទំនប់ និង​ការ​កើន​ឡើង​នៃ​ប្រជាជន បាន​គំរាម​កំហែង​ទន្លេ​មេគង្គ។ ប្រទេស​ចិន​មាន​គម្រោង និង​បាន​សង់​រួច​ហើយ​នូវ​ទំនប់​ចំនួន ៨ ក្នុង​ទន្លេ​មេគង្គ។ សកម្មជន​បាន​អះអាង​ថា ទំនប់​ទាំង​នេះ​បាន​ធ្វើ​ឲ្យ​ទឹក​ទន្លេ​មេគង្គ​ស្រក៕

ព័ត៌មាន (0)
Share
គេហទំព័រ​ទាំងមូល