ការប្រើប្រាក់ដុល្លារ គឺជួយប្រទេសមួយអាចធ្វើសមាហរណកម្មសេដ្ឋកិច្ច និងហិរញ្ញវត្ថុចូលក្នុងតំបន់ និងពិភពលោកកាន់តែប្រសើរ និងឆាប់រហ័ស។ ហើយការប្រើប្រាក់ដុល្លារអាមេរិកត្រូវបានគេប្រើយ៉ាងទូលំទូលាយនៅក្នុងការធ្វើពាណិជ្ជកម្មអន្តរជាតិ ក្នុងការកាត់បន្ថយការប្ដូរប្រាក់រៀលទៅជាប្រាក់ដុល្លារ។
នៅប្រទេសកម្ពុជា ទំនាក់ទំនងពាណិជ្ជកម្ម និងហិរញ្ញវត្ថុ ជាមួយប្រទេសប្រើប្រាស់ដុល្លារមានចំនួនកាន់តែច្រើនឡើង ហើយក្នុងនោះដែរកម្ពុជាមានការកាត់បន្ថយហានិភ័យនៃអត្រាប្ដូរប្រាក់ ដែលជំរុញឲ្យការធ្វើពាណិជ្ជកម្មអន្តរជាតិកាន់តែខ្លាំងឡើង។
របាយការណ៍របស់ធនាគារអភិវឌ្ឍអាស៊ី នៅឆ្នាំ២០១២ បានបង្ហាញថាលុយដែលធ្វើចរាចរលើកលែងតែរូបិយប័ណ្ណបរទេសនៅក្រៅធនាគារ កើនឡើង២១.៥% នៅឆ្នាំ២០១១ ដោយសារតែមានការកើនឡើងនូវចំណូលពីការនាំចេញ និងមានការជំរុញពីកំណើនការតម្កល់រូបិយប័ណ្ណបរទេស។
ជារួម ការប្រើប្រាក់ដុល្លារ ធ្វើឲ្យវិនិយោគិនបរទេស មានជំនឿទុកចិត្តលើស្ថិរភាពម៉ាក្រូសេដ្ឋកិច្ច តាមរយៈការលុបបំបាត់ហានិភ័យនៃអត្រាប្ដូរប្រាក់ ជាពិសេសហានិភ័យទាក់ទងនឹងការផ្ទេរប្រាក់ចំណេញទៅក្រៅប្រទេស។ ហើយការប្រើដុល្លារក៏ជួយកាត់បន្ថយគ្រោះថ្នាក់ចំពោះឥទ្ធិពលនៃវិបត្តិរូបិយប័ណ្ណ និងស្ថានភាពរាលដាលនៃវិបត្តិផ្សេងៗ ជាពេលមានវិបត្តិរូបិយវត្ថុអាស៊ីឆ្នាំ ១៩៩៧ជាដើម។
អ្នកវិភាគសេដ្ឋកិច្ចយល់ឃើញថាក្នុងរយៈពេលមធ្យម ការប្រើប្រាស់ដុល្លារ អាចជួយជំរុញការអភិវឌ្ឍទីផ្សារហិរញ្ញវត្ថុក្នុងស្រុកផងដែរពីព្រោះការប្រើប្រាក់ដុល្លារជួយសម្រួលដល់ការធ្វើសមាហរណកម្ម ទីផ្សារក្នុងស្រុក ជាមួយនិងទីផ្សារពិភពលោក។
ផ្ទុយទៅវិញ ការប្រើប្រាក់ដុល្លារក្នុងពិភពលោកធ្វើឲ្យសហរដ្ឋអាមេរិកទទួលនូវផលចំណេញយ៉ាងខ្លាំង ដោយគ្រាន់តែបោះពុម្ពក្រដាសប្រាក់សម្រាប់ចាយ ដោយគ្មានអតិផរណាឡើយ។ នាពេលបច្ចុប្បន្ននេះ ប្រាក់ដុល្លារអាមេរិកចំនួន ៧៥% កំពុងចរាចរក្រៅសហរដ្ឋអាមេរិក។ តាមការប៉ាន់ស្មានការប្រើប្រាក់ដុល្លារធ្វើឲ្យរដ្ឋបាត់បង់ចំណូលពីការបោះពុម្ពក្រដាសប្រាក់រៀលប្រមាណជា១% ទៅ១.៥% នៃផលិតផលក្នុងស្រុកសរុប ក្នុងមួយឆ្នាំ។
ប្រធាននាយកប្រតិបត្តិនៃធនាគារអេស៊ីលីដា លោក អ៊ិន ចន្នី បានឲ្យដឹងថា រដ្ឋាភិបាលត្រូវតែប្រើគោលនយោបាយមួយដើម្បីធានាឲ្យមានកំណើនសេដ្ឋកិច្ចជានិរន្ត ការងារធ្វើច្រើន ប្រជាជនមានប្រាក់ចំណូលខ្ពស់ និងជំរុញឲ្យរូបិយវត្ថុជាតិដែលជាប្រាក់រៀល និងមានតម្លៃ ហើយពេលនោះសាធារណជនទាំងនិងចូលរួមប្រើ ៖ "កាលណាបង្ខំគឺបង្កើតផ្សារងងឹត គេអត់ដែលបង្ខំទេ ខ្ញុំជឿថារដ្ឋាភិបាលយើងមិនប្រើវិធានការបង្ខំទេ កាលណាបង្ខំគឺកើតការលក់ដូរនៅក្រោមតុ ខាងក្រោយប្រពន្ធផ្លូវការ កើតមានអត្រាពីរ អត្រាមួយគឺផ្លូវការ មួយទៀតមិនផ្លូវការ ។ អញ្ចឹងរដ្ឋយើងមិនបង្ខំទេ គឺរដ្ឋយើងប្រើវិធានការសេដ្ឋកិច្ច វិធានការទីផ្សារ ដើម្បីបង្កើនការជឿជាក់ ហើយបានចេញវិធានការច្បាប់ក្រោយ"។
លោក អ៊ិន ចន្នី មានប្រសាសន៍បន្ថែមទៀតថាការលើកទឹកចិត្តឲ្យមានការចូលរួមរបស់សាធារណជនក្នុងការទទួលយកប្រាក់រៀលនិងចំណាយប្រាក់រៀល គឺជារឿងសំខាន់សម្រាប់លើកកម្ពស់តម្លៃប្រាក់រៀល នៅកម្ពុជាព្រមទាំងការធានាឲ្យមានអត្រាអតិផរណាទាបផងដែរ។
សេដ្ឋវិទូថ្នាក់ខ្ពស់ នៃធនាគារអភិវឌ្ឍអាស៊ី លោក ភីតធើ ប្រ៊ីមបល (Peter Brimble) មានប្រសាសន៍ថាការលុបបំបាត់ការប្រើដុល្លារនៅប្រទេសកម្ពុជា គឺទាមទារយៈពេល និងមានការចូលរួមពីអ្នកដែលពាក់ព័ន្ធនិងរដ្ឋាភិបាល ដោយលោកបញ្ជាក់ថានាពេលបច្ចុប្បន្នការប្រើប្រាក់រៀលមានការវិវដ្ដម្ដងបន្តិចៗ ព្រមទាំងរដ្ឋាភិបាលត្រូវមានគោលនយោបាយសម្រាប់កាត់បន្ថយការប្រើប្រាស់ប្រាក់ដុល្លារអាមេរិកនៅក្នុងសកម្មភាពសេដ្ឋកិច្ចកម្ពុជា ឬហៅថាបដិដុល្លារូបនីយកម្ម មានន័យថាជាការដកប្រាក់ដុល្លារអាមេរិកចេញពីចរាចររូបិយវត្ថុនៅលើទីផ្សារ ៖ "ខ្ញុំគិតថាត្រូវមានគោលនយោបាយមួយដើម្បីគាំទ្ររដ្ឋាភិបាលនិងរដ្ឋាភិបាលវិញក៏ត្រូវមានគោលនយោបាយដើម្បីបង្កើនការប្រើប្រាស់ប្រាក់រៀល ដែរប៉ុន្តែយន្តការនេះមិនអាចធ្វើឲ្យលឿនពេកទេនៅក្នុងដំណើរការធ្វើបដិដុល្លារូបនីយកម្ម នោះ មានន័យថាត្រូវមានវិធានការមួយចំនួនសមស្របដែលធនាគារជាតិអាចមានសមត្ថភាពគ្រប់គ្រងបានក្នុងការប្រើប្រាស់ប្រាក់រៀល។ ខ្ញុំគិតថាឥឡូវនេះមានភោជនីយដ្ឋានមួយចំនួន បានដាក់តម្លៃអាហារជាប្រាក់រៀល ដែលពីមុនមកខ្ញុំមិនបានឃើញទេ ហើយឥឡូវនេះមានទីផ្សារហិរញ្ញវត្ថុដែលបានអនុញ្ញាតឲ្យចរាចរជាប្រាក់រៀលនិងប្រាក់ដុល្លារតែយើងឃើញមានការចរាចរភាគច្រើនជាដុល្លារ ព្រោះវាជាដំណាក់កាលដំបូង ហើយត្រូវមានការអន្តរាគមន៍ពីរដ្ឋាភិបាលអំពីរឿងហ្នឹង"។
តាមផែនគោលរបស់រដ្ឋាភិបាល (Financial Blue Print) បានឲ្យដឹងថា រដ្ឋាភិបាលកំពុងតែប្រើគោលនយោបាយរយៈពេលវែងដើម្បីឲ្យអតិថិជន ឬ សាធារណជនជឿទុកចិត្តប្រាក់រៀលម្ដងបន្តិចៗ ហើយបន្ទាប់មករដ្ឋាភិបាលចេញជាវិធានការច្បាប់ដោយកំណត់ឲ្យប្រើប្រាក់រៀល។
របាយការណ៍របស់ធនាគារអភិវឌ្ឍអាស៊ីបានបង្ហាញថាកំណើនសេដ្ឋកិច្ចកម្ពុជាក្នុងឆ្នាំ២០១២មានអត្រាប្រមាណ៦.៥% ហើយការកើនឡើងនូវតម្លៃអាហារនិងប្រេងឥន្ធនៈជាសកលបានជំរុញឲ្យអតិផរណាកើនឡើងពី៣.៣% ក្នុងខែមករា ឆ្នាំ២០១១ ដល់៧.១%នៅក្នុងខែមិថុនា និងខែកក្កដា ។ អត្រាអតិផរណាប្រចាំឆ្នាំជាមធ្យម៥.៥% កើនពី៤% នៅក្នុងឆ្នាំ២០១០។
ក្នុងរបាយការណ៍ដដែលបានបង្ហាញថារូបិយប័ណ្ណជាង៩៥%គឺជារូបិយប័ណ្ណបរទេសភាគច្រើនជាដុល្លារអាមេរិក និងអត្រាលុយរៀលឡើងតម្លៃប្រមាណ៣%ធៀបនិងដុល្លារអាមេរិកនៅក្នុងឆ្នាំ២០១១៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។