ពលរដ្ឋ​៣២៥​គ្រួសារ​នៅ​សង្កាត់​ព្រៃស​តវ៉ា​ពី​រឿង​ដី​ធ្លី

ប្រជាពលរដ្ឋ ៣២៥​គ្រួសារ​រស់​នៅ​ភូមិ​ប្រការ សង្កាត់​ព្រៃស ខណ្ឌ​ដង្កោ បាន​រួម​គ្នា​ធ្វើ​បាតុកម្ម​នៅ​លើ​ដី​ទំនាស់ ដោយ​ដើរ​ដង្ហែ​ក្បួន លើក​បដា ដុត​កង់​ឡាន និង​ស្រែក​តាម​មេក្រូ ចោទ​ប្រកាន់​ថា មន្រ្តី​ក្រសួង​មហាផ្ទៃ​មួយ​រូប និង​អតីត​ចៅ​សង្កាត់​នេះ បាន​ឃុបឃិត​យក​ដី​រួម​របស់​ពួក​គេ​ធ្វើ​ជា​កម្មសិទ្ធិ។
ដោយ ខែ សុណង
2010-02-27
អ៊ីម៉ែល
មតិ
Share
បោះពុម្ព

អ្នក​ស្រី ម៉ោង សូលី ដែល​អះអាង​ថា​ជា​តំណាង​ប្រជាពលរដ្ឋ បាន​ឲ្យ​ដឹង​ថា ពួក​គាត់​តវ៉ា​សុំ​ឲ្យ​មន្រ្តី​ក្រសួង​មហាផ្ទៃ​ឈ្មោះ អ៊ិន សាម៉ុន ចេញ​មុខ​មក​ដោះស្រាយ​ប្រគល់​ដី​រួម​ចំនួន ១០​ហិកតា​ឲ្យ​ប្រជាពលរដ្ឋ​វិញ។ ដី​នោះ​កន្លង​មក​មន្រ្តី​ក្រសួង​កសិកម្ម និង​អតីត​ចៅ​សង្កាត់​ជា​អ្នក​ធ្វើ​ប្លង់​ឲ្យ​មន្រ្តី​ក្រសួង​មហាផ្ទៃ​នោះ​ធ្វើ​ជា​កម្មសិទ្ធិ និង​បើក​កសិដ្ឋាន​ចិញ្ចឹម​ត្រី និង​មាន់។

អ្នក​ស្រី ម៉ោង សូលី បាន​បញ្ជាក់​ថា ៖ «តវ៉ា​ហ្នឹង​ចង់​ទាមទារ​ដី​មក​ចែក​ប្រជាជន​វិញ។ ទាមទារ​ពី អ៊ិន សាម៉ុន គាត់​ជា​អនុ​រង​របស់​លោក ស៊ុន សេន មន្ត្រី​ក្រសួង​មហាផ្ទៃ។ គាត់​ហ្នឹង​លួច​ធ្វើ​ប្លង់​ថ្មី​ជាមួយ​មេ​ឃុំ​ថ្មី​ទៀត។ មេ​ឃុំ​ចាស់​មុន​ស្លាប់​ទៅ ដល់​ហើយ​ឡើង​មេ​ឃុំ​ឈ្មោះ ម៉ៃ សេង ហ្នឹង គាត់​ឃុបឃិត​គ្នា​ធ្វើ​ប្លង់​តែម្ដង។ ឈ្មោះ ងួន ផាន មួយ​ទៀត គាត់​ផ្នែក​ខាង​កសិកម្ម ឃុបឃិត​ជាមួយ​លោក ម៉ៃ សេង ហ្នឹង ប្រគល់​ដី​ទៅ​ឲ្យ​លោក អ៊ិន សាម៉ុន ហ្នឹង។ ដល់​ពេល​មក​ឆ្នាំ​២០០៧ ប្រជាជន​មក​កាប់​ប្រឡាយ​បង្ហូរ​ទឹក គាត់​ថា "កុំ​មក​ប៉ះ​ប្រឡាយ​អញ! ប្រឡាយ​នេះ​ហើយ​ដី​នេះ​ជា​ដី​របស់​អញ​ទេ!"។ គាត់​បង្ហាញ​ប្លង់​បង្ហាញ​អី ប្រជាពលរដ្ឋ​គាត់​ខឹង​ក៏​ចាប់ផ្ដើម​បបួល​គ្នា​ប្ដឹង»

ស្រ្តី​អ្នក​ភូមិ​ម្នាក់​ទៀត​បាន​រៀបរាប់​ថា កាល​ពី​ឆ្នាំ​១៩៨៥ មាន​មន្រ្តី​ក្រសួង​មហាផ្ទៃ ៣​នាក់​ក្នុង​នោះ​មាន​ឈ្មោះ​លោក ស៊ុន សេន ដែល​បច្ចុប្បន្ន​បាន​ស្លាប់​បាត់​ទៅ​ហើយ, លោក យ៊ិន គា និង​លោក ងួន ផាន ដែល​បាន​ចេញ​មុខ​ជា​អ្នក​ខ្ចី​ដី​រួម​នេះ​ដើម្បី​បង្ក​បង្កើន​ផល​ចិញ្ចឹម​បុគ្គលិក​ក្នុង​ក្រសួង​មហាផ្ទៃ និង​មាន​ការ​ឯកភាព​ពី​អាជ្ញាធរ​ភូមិ ក៏​ប៉ុន្តែ​នៅ​ពេល​បច្ចុប្បន្ន​នេះ​បែរ​ជា​មាន​ប្លង់​កាន់កាប់​ដោយ​មន្រ្តី​ក្រសួង​មហាផ្ទៃ​ម្នាក់​នោះ​ឈ្មោះ អ៊ិន សាម៉ុន ទៅ​វិញ។

ស្ត្រី​អ្នក​ភូមិ​ដដែល​បាន​អះអាង​ថា ៖ «ឥឡូវ​អ្នក​ខ្ចី​ហ្នឹង​ក៏​គេ​នៅ​រស់ គេ​ព្រម​ធ្វើ​សាក្សី​ឲ្យ​ប្រជាជន​ហើយ។ តវ៉ា ខ្ញុំ​ប្ដឹង​អស់​កន្លែង​ហើយ! បើ​អាជ្ញាធរ​ជាតិ​គេ​នៅ​ចោទ​ថា ប្រជាជន​អត់​ឯកសារ! ប្រជាជន​គាត់​មាន​ឯកសារ​ពី​ណា​មក? មេ​ឃុំ​ចាស់​គាត់​ស្លាប់​បាត់​ទៅ​ហើយ​ហ្នឹង! ហើយ​មេ​ឃុំ​ថ្មី​ក៏​ឃុបឃិត​គ្នា​ចេញ​ជា​ប្លង់​ឲ្យ អ៊ិន សាម៉ុន។ តើ​គាត់​បន្សល់​ទុក​ឯកសារ​នៅ​ឯ​ណា?»

វិទ្យុ​អាស៊ីសេរី​បាន​ព្យាយាម​ទាក់ទង​មន្រ្តី​ក្រសួង​មហាផ្ទៃ​ដែល​រង​ការ​ចោទ​ប្រកាន់​ពី​ប្រជាពលរដ្ឋ​នោះ​មិន​ទាន់​បាន​នៅ​ឡើយ​ទេ​នៅ​ថ្ងៃ​នេះ។

អភិបាល​ខណ្ឌ​ដង្កោ លោក គិត សុផា បាន​បដិសេធ​មិន​ធ្វើ​អត្ថាធិប្បាយ​វែង​ឆ្ងាយ​ឡើយ ប៉ុន្តែ​លោក​ថា បាន​ចាត់​បញ្ជូន​ក្រុម​ការងារ​របស់​លោក​ឲ្យ​ទៅ​ធ្វើ​ការ​ស៊ើប​អង្កត​លើ​ករណី​ទំនាស់​នេះ​ហើយ ៖ «ខ្ញុំ​ឲ្យ​មន្ត្រី​ខ្ញុំ​ទៅ​ធ្វើ​អស់​ហើយ!»

ប្រភព​ពី​ប្រជាពលរដ្ឋ​បាន​ឲ្យ​ដឹង​ថា ពួក​គាត់​បាន​ដាក់​ពាក្យ​បណ្តឹង​ទៅ​អាជ្ញាធរ​សង្កាត់ ខណ្ឌ និង​អាជ្ញាធរ​ជាតិ​ដោះស្រាយ​វិវាទ​ដី​ធ្លី ក៏​ប៉ុន្តែ​ពុំ​មាន​ដំណោះស្រាយ​នោះ​ទេ ដោយ​ប្រភព​ពី​ប្រជាពលរដ្ឋ​ដដែល​បាន​អះអាង​ថា អាជ្ញាធរ​ជាតិ​ដោះស្រាយ​វិវាទ​ដី​ធ្លី​ថា ប្រជាពលរដ្ឋ​ពុំ​មាន​ប្លង់​កម្មសិទ្ធិ។

ចំណែក​មន្រ្តី​អង្គការ​ឃ្លាំ​មើល​ការ​រំលោភ​សិទ្ធិ​មនុស្ស​និង​ដី​ធ្លី​បាន​ឲ្យ​ដឹង​ថា ភាគី​ជម្លោះ​គួរតែ​ចេញ​មុខ​ដោះស្រាយ និង​ប្រគល់​ដី​ឲ្យ​ទៅ​ប្រជាពលរដ្ឋ​វិញ ដោយសារ​តែ​ប្រជាពលរដ្ឋ​មាន​ឯកសារ​ខ្ចី​ដី​រួម និង​សាក្សី​ដឹង​ឮ​គ្រប់គ្រាន់៕

ព័ត៌មាន (0)
Share
គេហទំព័រ​ទាំងមូល