ប្រភពពីប្រជាពលរដ្ឋតវ៉ាបានឲ្យដឹងថា ប្រជាពលរដ្ឋនៅក្នុងភូមិស្វាយព្រៃនោះ ត្រូវការស្រះទឹកនោះមកវិញជាចាំបាច់ដើម្បីជីកស្តារតម្កល់ទឹកប្រើប្រាស់នៅរដូវប្រាំង ពីព្រោះតំបន់នោះខ្វះទឹកប្រើប្រាស់ជាខ្លាំង ហើយស្ថានភាពដីមិនអាចជីកអណ្តូងប្រើប្រាស់បាន។
លោក ឡឹង ម៉ៅ តំណាងប្រជាពលរដ្ឋខែ្មរចំនួន ៤០០គ្រួសាររស់នៅក្នុងភូមិស្វាយព្រៃ ឃុំសណ្តែក ស្រុកបាធាយ ខេត្តកំពង់ចាម បានមានប្រសាសន៍ប្រាប់វិទ្យុអាស៊ីសេរីថា លោកកំពុងតែប្រមូលស្នាមផ្តិតមេដៃពីប្រជាពលរដ្ឋបានចំនួនជិត ២០០គ្រួសារក្នុងចំណោមគ្រួសារសរុបដើម្បីយកញាតិនោះ តវ៉ាទៅអភិបាលស្រុកបាធាយ និងអភិបាលខេត្តកំពង់ចាម នាពេលខាងមុខនេះ ឲ្យជួយដោះស្រាយ។
លោកបន្តថា ៖ «ឥឡូវហ្នឹង ប្រើប្រាស់អត់បានផង គេបូមប្រើប្រាស់តែខ្លួនគេ ធ្វើស្រូវក្នុងហ្នឹង។ ប្រជាពលរដ្ឋគ្រាន់តែថា ចង់បានយកមកដាក់ជារួមគ្រាន់ប្រើប្រាស់ទាំងអស់គ្នាវិញ។ នៅឃុំសណ្ដែកនេះ វាខ្វះខាតទឹកណាស់ដែរ ធ្វើអណ្ដូងធ្វើអត់ចេញ។ យើងនាំគ្នាកសាងស្រះហ្នឹងទៅ គ្រាន់ប្រើប្រាស់ដល់ខែប្រាំង»។
ផ្អែកតាមប្រភពពីប្រជាពលរដ្ឋបានឲ្យដឹងថា ស្រះទឹកនោះជាកម្មសិទ្ធិរួមរបស់អ្នកភូមិតាំងពីឆ្នាំ១៩៨០ មកម្ល៉េះ ប៉ុន្តែស្រះទឹករួមនោះ នាពេលបច្ចុប្បន្ន ត្រូវបានអាជ្ញាធរភូមិបានលក់ឲ្យគ្រួសារឯកជនមួយដើម្បីកាន់កាប់ផ្តាច់មុខដើម្បីចិញ្ចឹមត្រី ហើយគ្រួសារនោះហាមមិនឲ្យប្រជាពលរដ្ឋប្រើប្រាស់ទឹកស្រះនោះឡើយ។
ប្រភពបានឲ្យដឹងថា ប្រជាពលរដ្ឋអ្នកភូមិចំនួនជាង ១០០គ្រួសារ ធ្លាប់បានតវ៉ានៅមុខសាលាឃុំសណ្តែក កាលពីថៃ្ងទី១៧ ខែធ្នូ កន្លងទៅនេះ ដើម្បីឲ្យជាដោះស្រាយនៅគ្រាដែលពាក្យបណ្ដឹងរបស់ពួកគេត្រូវបានអាជ្ញាធរឃុំសណ្តែកផ្អឹបទុកមិនដោះស្រាយ។
លោក ឈួន ឆាន ជាមេភូមិស្វាយព្រៃ ឃុំសណ្តែក ស្រុកបាធាយ ខេត្តកំពង់ចាម បានមានប្រសាសន៍បំភ្លឺថា មេភូមិនិងមេឃុំចាស់គឺជាអ្នកដោះដូរស្រះទឹកនោះឲ្យទៅឯកជនវិញ រីឯរូបលោកមិនអាចដោះស្រាយបានទេ។
លោក ឈួន ឆាន មានប្រសាសន៍ថា ៖ «កាលដែលដូរហ្នឹងបានធ្វើសំបុត្រអីពីមេភូមិ មេឃុំអីរួចហើយ។ ដូរហ្នឹង មនុស្សហ្នឹងស្លាប់បាត់ហើយ»។
ទាក់ទងនឹងការតវ៉ារបស់ប្រជាពលរដ្ឋខាងលើនេះ លោក អំ សំអាត ប្រធានផែ្នកស៊ើបអង្កេតរបស់អង្គការសិទ្ធិមនុស្ស លីកាដូ បានមានប្រសាសន៍ថា នៅតំបន់ដាច់ស្រយាលដែលគ្មានប្រភពទឹកនោះ ដូច្នេះស្រះទឹកមួយគឺមានតម្លៃខ្លាំងណាស់សម្រាប់ប្រជាពលរដ្ឋ។
លោក អំ សំអាត ថ្លែងដូច្នេះថា ៖ «បើសិនជាអ្នកមាន ឬក៏អ្នកដែលមានទ្រព្យស្ដុកស្ដម្ភ ឬក៏អ្នកមានធនកណ្ដាលអី ស្រះទឹកមួយដ៏តូចហ្នឹងគឺជារឿងកំប៉ិកកំប៉ុកមួយសម្រាប់គេ វាគ្មានផលប៉ះពាល់អីសម្រាប់គេទេ ប៉ុន្តែបើចំពោះប្រជាពលរដ្ឋក្រីក្រ ហើយនៅតំបន់ដាច់ស្រយាល ស្រះទឹកមួយគឺជាគ្រាប់ពេជ្រសម្រាប់ពួកគាត់ បានន័យថា មានតម្លៃណាស់»។
លោកបានសន្យាថា នឹងបញ្ជូនភ្នាក់ងាររបស់លោកទៅស៊ើបអង្កេតជុំវិញការតវ៉ារបស់ប្រជាពលរដ្ឋខាងលើនោះនាពេលខាងមុខ៕