កម្មករទាំងនោះបានចោទប្រកាន់ក្រុមហ៊ុនថា បានលក់ពួកគេទៅឲ្យថៅកែថៃ ១នាក់ក្នុងតម្លៃ ២ម៉ឺនបាត។
បុរសឈ្មោះ ឈន សំណាង ជាពលករម្នាក់ក្នុងចំណោមពលករដែលមិនហ៊ានរត់ចេញពីកន្លែងធ្វើការ គាត់បានឲ្យដឹងតាមទូរស័ព្ទពីប្រទេសថៃ នៅល្ងាចថ្ងៃទី១២ កុម្ភៈ មកថា ថៅកែថៃ បានធ្វើបាបពួកគាត់យ៉ាងខ្លាំង តែពួកគាត់ចេះតែទ្រាំមិនហ៊ានរត់ចេញ ព្រោះខ្លាចក្លាយខ្លួនជាពលករខុសច្បាប់នៅប្រទេសថៃ នោះ។ ពលកររូបនេះបន្តថា ថៅកែជនជាតិថៃ បានប្រាប់ពួកគេថា ក្រុមហ៊ុនបានលក់ពួកគេទៅឲ្យថៅកែថៃ រួចហើយ តម្លៃ ២ម៉ឺនបាតក្នុង១នាក់ ហើយបើនរណាមិនព្រមធ្វើការ ត្រូវប្រគល់ប្រាក់ ២ម៉ឺនបាតមកឲ្យគេវិញ ទើបគេប្រគល់ប៉ាសស្ព័រឲ្យវិញដែរ។
ពលកររូបនេះ អំពាវនាវឲ្យរាជរដ្ឋាភិបាលជួយយកពួកគាត់ត្រឡប់មកស្រុកខ្មែរវិញផង៖ «នៅសល់តែពលករ ខ្ញុំ ៤នាក់។ ខ្ញុំអត់ហ៊ានទៅ ព្រោះខ្លាចខុសច្បាប់ ខ្លាចគេបន្តយកខ្ញុំទៅលក់កន្លែងផ្សេងទៀត។ ខ្ញុំសំណូមពរឲ្យរដ្ឋាភិបាល ឬអង្គការផ្សេងៗដែលអាចជួយបាន មេត្តាជួយយកពួកខ្ញុំទាំង ៤នាក់ដែលអត់ហ៊ានរត់ទៅណា ហើយកំពុងត្រូវគេប្រើច្រងាប់ច្រងិលនេះឲ្យបានត្រឡប់មកស្រុកខ្មែរវិញផង»។
កាលពីថ្ងៃទី២៩ មករា កន្លងទៅ ក្រុមហ៊ុនប៊ូរូខេមបូឌាន ប្រចាំខេត្តពោធិ៍សាត់ បានបញ្ជូនពលករចំនួន ១០នាក់ចេញទៅធ្វើការនៅប្រទេសថៃ។ លុះដល់ថ្ងៃទី៥ កុម្ភៈ ពលករទាំង ១០នាក់នេះបានទូរស័ព្ទមកសុំឲ្យឪពុកម្ដាយពួកគេជួយ ដោយពួកគេប្រាប់ថា ក្រុមហ៊ុនបានលក់ពួកគេតៗគ្នាពីម្នាក់ទៅម្នាក់។
ឪពុកម្ដាយពលករទាំង ១០នាក់នេះបានមកដាក់ពាក្យបណ្ដឹងសុំឲ្យអង្គការការពារសិទ្ធិមនុស្សលីកាដូ (Licadho) ឲ្យជួយពួកគាត់។ អង្គការលីកាដូ ក៏បានចាត់ចែងធ្វើអន្តរាគមន៍តាមនីតិវិធីរួចរាល់អស់ហើយ តែដោយមិនឃើញមានការលទ្ធផល និងដោយមិនអាចទ្រាំទ្របាននៅថ្ងៃទី១០ កុម្ភៈ កម្មករចំនួន ៦នាក់បានលួចរត់ ដែលឥឡូវមិនដឹងជានៅទីណា។ ឯ ៤នាក់ទៀត សម្រេចចិត្តរង់ចាំការជួយសង្គ្រោះ។
តំណាងក្រុមហ៊ុនប៊ូរូខេមបូឌាន ប្រចាំខេត្តពោធិ៍សាត់ លោក ឃឹម រ៉ុម បានពន្យល់ចំពោះបញ្ហានេះថា លោកកំពុងទាក់ទងជាមួយភាគីថៃ ដើម្បីសុំប្ដូរការងារឲ្យពលករដែលនៅសល់ទាំង ៤រូបនោះ តែមិនទាន់រកបានការងារនៅកន្លែងថ្មីនៅឡើយ។ យ៉ាងនេះក្ដី លោកសន្យាថា ប្រសិនបើពលករទាំង ៤រូបនោះ សម្រេចចិត្តវិលត្រឡប់មកវិញ លោកនឹងធ្វើតាមការសម្រេចចិត្តនេះ។ លោកថា លោកនឹងនាំពលករទាំង ៤រូបនេះមកវិញ ក្នុងពេលដ៏ឆាប់ខាងមុខនេះ។
លោក ឃឹម រ៉ុម៖ «អត់ទេ! ខ្ញុំអត់មានបញ្ហារឿងបញ្ជូនគាត់មកស្រុកខ្មែរវិញទេ។ ប៉ុន្តែ សំខាន់គឺគាត់មានលុយមានកាក់ដែរ ឬក៏អត់។ បើគាត់ទ្រាំធ្វើការបានត្រឹមកន្លះខែនោះ គេបើកប្រាក់ខែឲ្យហើយកុំឲ្យយើងធ្វើការបានប៉ុណ្ណឹងដែរ យើងអត់បានលុយសោះ។ អត់អីទេ ខ្ញុំនឹងប្រាប់ឲ្យគេប្រគល់ប៉ាសស្ព័រមកឲ្យពួកគាត់វិញ និងដាក់ពួកគាត់ឡើងឡានត្រឡប់មកវិញ»។
ដូចគ្នានេះដែរ អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តពោធិ៍សាត់ គឺលោក កុល ប៊ុនធឿន មានប្រសាសន៍បញ្ជាក់ថា មន្ទីរការងារខេត្តកំពុងដោះស្រាយបញ្ហានេះជាមួយក្រុមហ៊ុន ដោយជំរុញឲ្យក្រុមហ៊ុនទទួលខុសត្រូវដោយនាំពលករទាំង ៤នាក់វិលត្រឡប់មកវិញ៖ «បាទ! អាហ្នឹងមានតែវិធីហ្នឹង ព្រោះបើកាលណាមានបញ្ហា គឺត្រូវតែបញ្ជូនគេមកវិញ។ នៅពេលដែលគេមិនចង់ធ្វើការដោយសារវាខុសនឹងលក្ខខណ្ឌការងារដែលក្រុមហ៊ុនបានសន្យាពីស្រុកខ្មែរទៅ»។
ឯកសារនៃការផ្សព្វផ្សាយដែលវិទ្យុអាស៊ីសេរី ទទួលបានបង្ហាញថា ក្រុមហ៊ុនប៊ូរូខេមបូឌាន ជាក្រុមហ៊ុនមួយដែលទទួលបានអាជ្ញាប័ណ្ណពីក្រសួងការងារ និងបណ្ដុះបណ្ដាលវិជ្ជាជីវៈលេខ១៦៦ ចុះថ្ងៃទី២៦ ខែកក្កដា ឆ្នាំ២០១០។ ឯកសារក៏បានបង្ហាញពីអត្ថប្រយោជន៍ដែលពលករទទួលបាន គឺធ្វើការក្នុងមួយថ្ងៃ ៨ម៉ោង ប្រាក់ខែទទួលបានពី ១ម៉ឺន ២ពាន់បាត ទៅ ១ម៉ឺន ៤ពាន់បាត ទៅតាមការងារដែលរួមមានកម្មកររោងចក្រ និងកម្មករសំណង់។ ប៉ុន្តែ ជាក់ស្ដែងក្រុមហ៊ុនពុំបានអនុវត្តន៍តាមគោលការណ៍ដែលក្រុមហ៊ុនបានសន្យាជាមួយកម្មករនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។