អនុរដ្ឋលេខាធិការក្រសួងយុត្តិធម៌ លោក សេង សុវណ្ណារ៉ា បានមានប្រសាសន៍ថា ការរៀបចំវគ្គបណ្ដុះបណ្ដាលនេះ ក្នុងគោលបំណងផ្ដល់ចំណេះដឹងដល់មន្ត្រីយុត្តិធម៌ដូចជា ទី១ បំពេញនូវក្របខ័ណ្ឌច្បាប់ ដើម្បីការអភិវឌ្ឍឆាប់រហ័សប្រកបដោយចិរភាព ហើយនិងលើកតម្កើង និងការពារសិទ្ធិ។ ទី២ ពង្រឹងស្ថាប័នតុលាការ ដើម្បីធានាយុត្តិធម៌ដែលមានតម្លាភាព និងសមធម៌សម្រាប់ទាំងអស់គ្នា។
លោក សេង សុវណ្ណារ៉ា ក៏បានបញ្ជាក់ដែរថា នៅក្នុងអាណត្តិទី៣នេះ រដ្ឋសភាក៏បានអនុម័តយុទ្ធសាស្ត្រកំណែទម្រង់ច្បាប់ និងប្រព័ន្ធយុត្តិធម៌ ដែលមានគោលដៅជាយុទ្ធសាស្ត្រ ៧ចំណុច គឺពង្រឹងការការពារសិទ្ធិ និងសេរីភាពរបស់បុគ្គល ធ្វើទំនើបកម្មក្របខ័ណ្ឌច្បាប់ ផ្ដល់លទ្ធភាពឲ្យទទួលបាននៃដំណើររឿងក្ដី និងសេវាកម្មដែលពាក់ព័ន្ធ ពង្រឹងសេវាកម្មយុត្តិធម៌ គឺអំណាចតុលាការ និងសេវាកម្មផ្នែកអយ្យការ បញ្ចូលយន្តការដោះស្រាយវិវាទក្រៅប្រព័ន្ធតុលាការ និងពង្រឹងស្ថាប័នវិស័យយុត្តិធម៌ឲ្យបំពេញអាណត្តិរបស់ខ្លួនបានសម្រេចជាដើម។
គម្រោងសាកល្បងស្ដីពីសិទ្ធិទទួលបានយុត្តិធម៌ ក្រសួងយុត្តិធម៌ និងក្រសួងមហាផ្ទៃ បានបង្កើតកាលពីឆ្នាំ២០០៦ ដល់ខែមីនា ឆ្នាំ២០១០ ដែលមានចំនួន ២០ស្រុក នៅក្នុងខែត្រចំនួន៦ ដែលឧបត្ថម្ភថវិកាដោយកម្មវិធីសហប្រជាជាតិ ហើយនៅឆ្នាំ២០១២ ខាងមុខ ក្រសួងយុត្តិធម៌មានគម្រោងបង្កើតមណ្ឌលសេវាកម្មយុត្តិធម៌នៅទូទាំងប្រទេសកម្ពុជា តាមដែលអាចធ្វើទៅបាន៕