បទ​វិភាគ៖ តើ​មន្ត្រី​រាជការ​ត្រូវ​ប្រឈម​នឹង​បញ្ហា​អ្វី​ខ្លះ​ក្នុង​ពេល​ផ្ទុះ​ជំងឺ​កូវីដ​១៩?

ដោយ ជុន ច័ន្ទបុត្រ
2021-03-31
Share
បទ​វិភាគ៖ តើ​មន្ត្រី​រាជការ​ត្រូវ​ប្រឈម​នឹង​បញ្ហា​អ្វី​ខ្លះ​ក្នុង​ពេល​ផ្ទុះ​ជំងឺ​កូវីដ​១៩? លោក ជុន ច័ន្ទបុត្រ អ្នករាយការណ៍ព័ត៌មានវិទ្យុអាស៊ីសេរី
Photo: RFA

ជំងឺ​ឆ្លង​កូវីដ១៩​បាន​ធ្វើ​ឱ្យ​ប៉ះ​ពាល់​ជីវភាព​មនុស្ស​ស្ទើរ​លំដាប់​ថ្នាក់។ អ្នក​ធ្វើ​ការ​ក្នុង​វិស័យ​ឯក​ជន​​ ទាំង​ក្នុង​ប្រព័ន្ធ​ និង​ក្រៅ​ប្រព័ន្ធ រស់​នៅ​ក្នុង​សភាព​លំបាក​វេទនា។ អ្នក​រកស៊ី​ឯកជន​ស្ទើរ​គ្រប់មុខ បាត់​បង់​ប្រាក់​ចំណូល ឬ​ក៏​ប្រាក់​ចំណូល​ធ្លាក់​ចុះ។ អ្នក​ធ្វើការ​ឱ្យ​គេ ត្រូវ​ក្រុម​ហ៊ុន​កាត់​ប្រាក់​ខែ រហូត​អ្នក​ខ្លះ​បាត់​បង់​ការងារ​ទៀត​ផង។

ចំណែក​មន្ត្រី​រាជការ​វិញ ទោះ​បី​ជា​ទទួល​បាន​ប្រាក់​ខែ ឬ​បៀវត្សរ៍​ពី​រដ្ឋ​ជា​ប្រចាំ ក៏​ពួក​គាត់​ប៉ះពាល់​ច្រើន​ណាស់​ដែរ ពី​ការ​រាតត្បាត​នៃ​ជំងឺ​កូវីដ១៩ ​នេះ។

​តើ​មន្ត្រី​រាជការ​ត្រូវ​ធ្វើ​ការងារ​ និង​រស់​នៅ​ក្នុង​ស្ថានភាព​បែប​ណា​ពេល​ដែល​ជំងឺ កូវីដ១៩ ​កំពុង​រាតត្បាត​នេះ?

បើ​មើល​ពី​ក្រៅ​ទៅ អ្នក​ស៊ី​ប្រាក់​ខែ​រដ្ឋ ឬ​ហៅ​ម៉្យាង​ទៀត​ថា មន្ត្រីរាជការ ហាក់​មាន​លំនឹង​លើ​ប្រាក់​ចំណូល​ណាស់ ដ្បិត​ពួក​គាត់ នៅ​មាន​ប្រាក់​បៀវត្សរ៍​ជា​ប្រចាំ ខុស​ពី​អ្នក​ធ្វើការ​ក្នុង​វិស័យ​ឯកជន ដែល​ជួប​វិបត្តិ​ដោយសារ​ជំងឺ​កូវីដ១៩។

រដ្ឋាភិបាល​បើក​ប្រាក់​ខែ​ជូន​មន្ត្រី និង​បុគ្គលិក​កម្មករ​រាជការ ២ដងក្នុង​មួយ​ខែ ​គឺ​បើក​ពាក់​កណ្ដាល​នៅ​កណ្ដាល​ខែ និង​ពាក់​កណ្ដាល​ទៀត​នៅ​ចុង​ខែ។

ថ្វី​ដ្បិត​តែ​មើល​មួយ​ភ្លែត មន្ត្រី​រាជការ​ហាក់​បំពេញ​ការងារ​ធម្មតា និង​ទទួល​ប្រាក់​បៀវត្ស​ជា​ប្រក្រតី​ តាម​ពិត​ក្នុង​សម័យ​កូវីដ​នេះ ​ពួក​គាត់​ភាគ​ច្រើន​ប្រឈម​បញ្ហា​ធំៗ​ មិន​តិច​ជាង​អ្នក​ធ្វើការ​ក្នុង​វិស័យ​នានា​ទៀត​ឡើយ។

បញ្ហា​ដែល​បុគ្គលិក​មន្ត្រី​រាជការ​ទាំងនោះ​កំពុង​ប្រឈម​មាន ​ដូច​ជា ទំហំ​ការងារ​កើន​ឡើង ​​ ប្រាក់​ចំណូល​ធ្លាក់​ចុះ​ និង​រង​ការ​រឹតត្បិត​សិទ្ធិ​សេរីភាព​កាន់​តែ​ខ្លាំង។

មន្ត្រី​រាជការ​មួយ​ចំនួន​ធំ ត្រូវ​ធ្វើ​ការងារ​ច្រើន​ជាង​មុន​នៅ​ពេល​ផ្ទុះ​ជំងឺ​កូវីដ​១៩។ នៅ​ស្រុក​ខ្មែរ គេ​ច្រើន​បែង​ចែក​ប្រភេទ​ការងារ​រដ្ឋ​ពីរ​កន្លែង​ជា​សំខាន់ ដោយ​ផ្អែក​ជា​សំខាន់​​ថា​តើ កន្លែង​នោះ​រក​លុយ​ក្រៅ​បាន​ ឬ​មិន​បាន។ កន្លែង​ដែល​រក​ក្រៅ​បាន គេ​ហៅ​ថា​ធ្វើ​ការ​ចំ​កន្លែង​ខ្លាញ់។ អ្នក​ធ្វើការ​ប៉ះ​ចំ​កន្លែង​ខ្លាញ់​នេះ មាន​ចំនួន​មិន​សូវ​ច្រើន​ទេ។

មន្ត្រី​រាជការ​ដែល​ធ្វើការ​កន្លែង​អត់​ខ្លាញ់​វិញ​មាន​ចំនួន​ច្រើន​លើស​លុប។ ពួក​គាត់​ជា​គ្រូ​បង្រៀន ជា​មន្ត្រី​សុខាភិបាល និង​កង​កម្លាំង​ប្រដាប់​អាវុធ​ជាដើម។

គ្រូ​បង្រៀន​ត្រូវ​ក្រសួង​អប់រំ ចាត់​តាំង​ឱ្យ​បង្រៀន​តាម​អនឡាញ ចុះ​ស្រង់​របាយការណ៍​សិស្ស ព្រម​ទាំង​តាម​ដាន​ការ​សិក្សា​របស់​សិស្ស​នៅ​ថ្នាក់​មូលដ្ឋាន បើ​ទោះ​ជា​គ្រូ​បង្រៀន​មួយ​ភាគ​ធំ មិន​មាន​ឧបករណ៍​សម្ភារៈ​សម្រាប់​បង្រៀន​គ្រប់​គ្រាន់​តាម​វិធី​ថ្មី​នេះ​ក៏​ដោយ​ចុះ។

ចំណែក​គ្រូ​ពេទ្យ​វិញ ត្រូវ​ប្រចាំការ​បន្ថែម​ដើម្បី​តាម​ដាន​ការវិវត្តន៍ របស់​អ្នក​ឆ្លង​ជំងឺ​កូវីដ​១៩ ពី​លើ​ការងារ​ប្រចាំ​ថ្ងៃ​ដែល​មាន​ស្រាប់។​ គ្រូពេទ្យ​រដ្ឋ​មួយ​ចំនួន ធ្វើ​ការងារ​យ៉ាង​តិច​ណាស់​២​កន្លែង​ជាប្រចាំ ដោយ​មួយ​កន្លែង​នៅ​ស្ថាប័នរដ្ឋ និង​មួយ​កន្លែង​ទៀត​នៅ​គ្លីនិក​ឯកជន។

ក្រៅ​ពី​ការងារ​ស្នូល​ប្រចាំ​ថ្ងៃ​ដែល​មាន​ស្រាប់ ក្រុម​គ្រូពេទ្យ​ត្រូវ​ដាក់​វេន​ជា​ប្រចាំ ​នៅ​ពេល​មាន​អ្នក​ឆ្លង​ជំងឺ​តាម​មូលដ្ឋាន​ម្ដងៗ​។ ក្រុម​គ្រូពេទ្យ​ទាំង​នោះ​រវល់​វិល​ក្បុង។ ពួក​គេ​ត្រូវ​ចុះ​យក​សំណាក  ប្រមូល​ទិន្នន័យ​អ្នក​ជាប់​សង្ស័យ​ពាក់ព័ន្ធ​នឹង​អ្នក​ជំងឺ​កូវីដ១៩។ គ្រូ​ពេទ្យ​មួយ​ចំនួន​ថ្លែង​ប្រាប់​អាស៊ីសេរី​ថា ពួក​គាត់​មិន​​ដែល​គេង​ពេញ​ភ្នែក​ឡើយ​ក្នុង​រយៈ​ពេល ១ឆ្នាំ​មក​នេះ។

ឯ​កង​កម្លាំង​ប្រដាប់​អាវុធ​វិញ ក៏​មិន​ទំនេរ​ដែរ។ កង​កម្លាំង​ប្រដាប់​អាវុធ​ត្រូវ​ធ្វើ​ការងារ​ស្នូល​រក្សា​សន្តិសុខ​សណ្ដាប់​ធ្នាប់​ជា​ប្រចាំ និង​ទី​កន្លែង​ធ្វើ​ចត្តាឡឺស័ក ជួយ​ការពារ​ទី​តាំង​មន្ទីរ​ពេទ្យ​ដែល​មាន​អ្នក​ជំងឺ​កូវីដ១៩​កំពុង​សម្រាក​ព្យាបាល​ជាដើម។ ក្រសួង​ការពារ​ជាតិ និង​ក្រសួង​មហាផ្ទៃ សុទ្ធ​តែ​មិន​អ​អនុញ្ញាត​ឱ្យ​កង​កម្លាំង​សុំ​ច្បាប់​ឈប់​សម្រាក​ទេ បើ​សិន​ជា​គ្មាន​ករណី​ចាំបាច់។

ប្រាកដ​ណាស់ ក្នុង​សម័យ​ឆ្លង​កូវីដ ឬ​ក្នុង​កាលៈទេសៈ​ណា​ក៏​ដោយ​ចុះ ក៏​តែង​មាន អ្នក​ដែល​ចាំ​កេង​យក​ប្រយោជន៍ ធ្វើ​ស្រែ​លើ​ខ្នង​អ្នក​ដទៃ​ដែរ។ មន្ត្រី​រាជការ​ខ្លះ បែរ​ជា​បាន​ដៃ​ជាង​មុន។ នោះ​គឺ​ក្រុម​មន្ត្រី​ខ្មោច ដែល​មិន​ទៅ​ធ្វើការ​តែ​បើក​ប្រាក់​ខែ​ជា​រៀង​រាល់​ខែ។ ពួក​មន្ត្រី​ខ្មោច​ទាំង​នេះ​មាន​មិន​តិច​នាក់​ទេ កំពុង​ជញ្ជក់​ញើស​ឈាម​រាស្ត្រ​បង់​ពន្ធ ហើយ​មិន​ចូល​ធ្វើការ​តែ​បើក​ប្រាក់ខែ ចូល​តាម​សែ​និង​បក្ខ​ពួក​របស់​ខ្លួន​នៅ​សំងំ​ពួន​នៅ​តាម​ស្ថាប័ន​រដ្ឋ​នានា គ្មាន​អៀន​ខ្មាស។

ងាក​មក​មើល​ទំហំ​នៃ​ប្រាក់​ចំណូល​មន្ត្រី​រាជការ​ស្អាតស្អំ​ទូ​ទៅ​វិញ។ ប្រាក់​ខែ​គ្រូ​បង្រៀន ប៉ូលិស ទាហាន តូច​តាច​ភាគ​ច្រើន ពួក​គាត់​សុទ្ធ​តែ​រក​ចំណូល​បាន​តិច​ជាង​មុន។

កន្លង​ទៅ ក្រុម​មន្ត្រី​រាជការ​ស្អាតស្អំ ពឹង​ផ្អែក​ផ្នែក​ជីវភាព​ទៅ​លើ​សមាជិក​ក្រុម​គ្រួសារ​ជួយ​រក​ស៊ី​បំពេញ​បន្ថែម។ អ្នក​ខ្លះ​មាន​កូន​ចៅ​ជា​ពលករ​ចំណាក​ស្រុក ឬ​លក់​ដូរ​កំប៉ិក​កំប៉ុក នៅ​តាម​ផ្សារ ដែល​ប្រាក់​ចំណូល​ពួក​គាត់​ធ្លាក់​ចុះ ដូច​ប្រជា​ពលរដ្ឋ​ដទៃ​ទៀត​ដែរ ក្នុង​ពេល​មាន​ជំងឺ​កូវីដ១៩។ ឧទាហរណ៍ គ្រូ​បង្រៀន​ដែល​មាន​ភរិយា​ជា​អ្នកលក់​បាយ​ឬ​ទឹក​កក​ឈូស​នៅ​ក្នុង​សាលា​គ្រាន់​បាន​ទិញ​ម្ហូប​ចំណី​ចិញ្ចឹម​កូន  បាន​បាត់​ចំណូល​​មួយ​ភាគ​ធំ​ដោយ​សារ​តែ​អាជ្ញាធរ​បិទ​សាលា​រៀន ដើម្បី​ការពារ​កុំ​ឱ្យ​មេរោគ​កូវីដ១៩ ​ឆ្លង​រីក​រាល​ដាល។

មិន​មែន​តែ​បាត់​បង់​ចំណូល​របស់​សមាជិក​គ្រួសារ​ខ្លួន​ទេ ប្រាក់​ខែ​មន្ត្រី​រាជការ​ទាំង​នោះ​ក៏​បើក​បាន​តិច​ជាង​មុន​ដែរ។ តិច​ជាង​មុន​នៅ​ត្រង់​ថា ប្រាក់​ខែ​របស់​ពួក​គាត់​មិន​ឡើង​តាម​ថ្លៃ​ទំនិញ និង​ម្យ៉ាង​ទៀត​គឺ​ប្រាក់​ខែ​តិច​ជាង​មុន​ដោយ​សារ​នយោបាយ​​ប្រជាភិថុតិ​កាត់​ប្រាក់​ខែ​ជួយ​ជាតិ​របស់​លោក ហ៊ុន សែន តែ​ម្ដង។

ក្នុងមួយឆ្នាំ២០២០​ កន្លងទៅ​​នេះ លោក​ហ៊ុន សែន ប្រកាស​កាត់​ប្រាក់​ខែ​ឧបត្ថម្ភ​ជូន​ក្រសួង​សុខាភិបាល ដើម្បី​ប្រឆាំង​កូវីដ​១៩។ មេៗ ស្ថាប័ន​ជាតិ​ពី​លើ​ដល់​ក្រោម​គ្មាន​អ្នក​ណា​ម្នាក់​មិន​កាត់​ប្រាក់​ខែ​ជួយ​ជាតិ​ទេ ពួក​គេ​នាំ​មុខ​ប្រកាស​ផ្ដល់​ប្រាក់​ខែ​ជូន​ក្រសួង​សុខាភិបាល។ ក្រុម​មេៗ ទាំង​នេះ​ក៏​បាន​រៀបចំ​បញ្ជី​ឈ្មោះ​អ្នក​ដែល​សុខ​ចិត្ត​កាត់​ប្រាក់​ខែ​ដើម្បី​ដាក់​ជូន​ទៅ​ក្រសួង​សាមី​ រួច​បន្ត​ទៅ​ក្រសួង​មុខ​ងារ​សាធារណៈ​ផង។

មាន​មន្ត្រី​រាជការ​តិច​ណាស់​ដែល​មិន​បាន​ផ្ដល់​ប្រាក់​ខែ​ជួយ​ជាតិ ហើយ​បើ​មិន​បាន​ជួយ​ជាតិ ពួក​គាត់​ទំនង​ជា​មិន​អាច​នៅ​ធ្វើការ​បាន​សុខ​ដែរ។ លើ​លោក​នេះ​ប្រហែល​ជា​មាន​តែ​មន្ត្រី​រាជការ​ខ្មែរ​ទេ ដែល​បាន​សុខ​ចិត្ត​អត់​ពី​មាត់​ពង្រាត់​ពី​ក​ កាត់​ប្រាក់​ខែ​ជួយ​ជាតិ​ក្នុងសម័យកូវដ១៩។ មើល​ពី​ខាង​ក្រៅ មន្ត្រី​រាជការ​ទាំង​អស់​ស្រុះ​ស្រួល​គ្នា​សម្បើម​ណាស់ សុខ​ចិត្ត​បេះ​ពី​មាត់​ពី​ក យក​លុយ​ជូន​ជាតិ តែ​ធាតុ​ពិត​នេះ​ជា​នយោបាយ ចូល​បុណ្យ​តាម​សទ្ធា​ទារ​តាម​កំណត់​សោះ។

និយាយ​ដល់​ការ​ប្រមូល​លុយ​ជួយ​ជាតិ​នេះ​មាន​ក្រុម​មន្ត្រី​មួយ​ចំនួន​ដែល​ធ្វើការ​ប៉ះចំ​កន្លែង​ខ្លាញ់​វិញ ពួក​គេ​មិន​ខ្វល់​ទេ។ ពួក​នេះ​មាន​ទ្រព្យ​សម្បត្តិ​ក្រាស់​ក្រែល​ណាស់ ទោះ​ជា​កាត់​ប្រាក់​ខែ​ ១០​ឆ្នាំ​ជួយ​ជាតិ​ក៏​បាន ព្រោះ​ពួក​គេ​នៅ​កន្លែង​ខ្លាញ់ រក​ក្រៅ​បាន​ហូរហៀរ​ទៅ​ហើយ។ អ្នក​ដែល​រក​លុយ​ក្រៅ​បាន​មាន​ដូច​យ៉ាង​ពួក​គយ កាំកុងត្រូល  ប៉ូលិស​សេដ្ឋកិច្ច មន្ត្រី​​តុលាការ អ្នក​ធំ​នៅ​អគ្គិសនី​កម្ពុជា អ្នក​ធំ​នៅ​រដ្ឋាករ​ទឹក​ជាដើម។

ពួក​នេះ​ភាគ​ច្រើន​ចាយ​សុទ្ធ​តែ​លុយ​ដុល្លារ មិន​សូវ​មាន​លុយ​ខ្មែរ​ក្នុង​កាបូប​ផង​ទេ។ ពួក​គេ​នៅ​តែ​ជិះ​ឡាន​ទំនើប​រស់​ក្នុង​វីឡា​ស្កឹមស្កៃ នាំ​គ្នា​បង្ហោះ​ហ្វេសប៊ុក បង្អួត​ពី​សន្ដាន​ចិត្ត​ធ្វើ​ការ​មិន​យក​ប្រាក់​ខែ​ហូរហែ​គ្រប់ៗ គ្នា។

បើ​ទោះបី​ជា​ការ​ធ្វើ​បាន​បង្ហាញ​តម្រុយ​នៃ​អំពើ​ពុក​រលួយ​ក៏​ដោយ​ចុះ ក៏​ពួក​នេះ​មិន​ញញើត​ដែរ។ ​ពួក​គេ​ដឹង​ថា​ឱ្យ​តែ​ស្មោះត្រង់​នឹង​បក្ស​ចង់​ត្របាក់​យ៉ាង​ម៉េច​ក៏​បាន ។

ការ​សិក្សា​ស្រាវជ្រាវ​របស់​អង្គការ​តម្លាភាព​អន្តរជាតិ បង្ហាញ​ថា កម្ពុជា​ជា​ប្រទេស​ដែល​មាន​អំពើ​ពុក​រលួយ​ខ្លាំង​ជាងគេ​បង្អស់​ក្នុង​ចំណោម​ប្រទេស​ក្នុង​តំបន់​អាស៊ីអាគ្នេយ៍ នៅ​ឆ្នាំ​២០២០​ កន្លង​ទៅ។ ក្នុង​នោះ​ស្ថាប័ន​ដែល​ពុក​រលួយ​ជាង​គេ​បំផុត​នោះ​ គឺ​ស្ថាប័ន​តុលាការ​និង​នគរបាល។ ទោះ​ជា​យ៉ាង​ណា​ក្ដី​ អង្គភាព​ប្រឆាំង​អំពើ​ពុករលួយ បាន​ច្រាន​ចោល​របាយការណ៍​នេះ។

ទន្ទឹម​នឹង​នេះ​របប​ក្រុង​ភ្នំពេញ​បាន​បិទ​សិទ្ធិ​សេរីភាព​របស់​មន្ត្រី​រាជការ​ ខ្លាំង​ណាស់​ដែរ​ក្នុង​ពេល​ផ្ទុះ​ជំងឺ​កូវីដ​១៩។ ក្រុម​មន្ត្រី​រាជការ​ទាំង​នោះ ត្រូវ​បាន​ផ្ដល់​ការ​ណែនាំ​ជា​ទៀង​ទាត់​ពី​វិធានការ​របស់​រដ្ឋាភិបាល​ក្នុង​ការ​ប្រយុទ្ធ​ប្រឆាំង​នឹង​កូវីដ​១៩​ តាម​រយៈ​បណ្ដាញ​នានា។

អ្នក​រាជការ​វ័យ​កណ្ដាល និង​វ័យ​ចាស់​ត្រូវ​ចូល​រួម​ការងារ​គណបក្ស​នៅ​តាម​ស្រុក​ឃុំ យុវមន្ត្រី​ក្មេង ​ត្រូវ​ល្បួង​ឱ្យ​ចូល​ក្រុម​យុវជន​របស់​បក្ស​ ឬ​យុវជន​របស់​លោក ហ៊ុន ម៉ានី ដែល​ធ្វើ​ការ​ឱ្យ​បក្ស​ដដែល។ ក្រុម​ទាំង​អស់​នេះ​មាន​នាទី​តាម​ដាន​អ្នក​មាន​មតិ​ជំទាស់ និង​ចូល​រួម​ផ្សព្វផ្សាយ​តាម​បណ្ដាញ​សង្គម ​ដើម្បី​វាយ​ប្រហារ​អ្នក​ណា​ដែល​ហ៊ាន​រិះគន់​របប​លោក ហ៊ុន សែន។

នៅ​ដើម​ឆ្នាំ​ថ្មី​នេះ​ មាន​មន្ត្រី​រាជការ ​២​ករណី​ទទួល​ពិន័យ​រួម​មាន​គ្រូ​បង្រៀន​ម្នាក់​និង​គ្រូពេទ្យ​ម្នាក់ ។ ក្រសួង​អប់រំ​បាន​ព្រមាន និង​ស្ដី​បន្ទោស​គ្រូ​បង្រៀន​នៅ​វិទ្យាល័យ​មួយ​ក្នុង​ស្រុក​ត្រាំ​កក់​ខេត្ត​តាកែវ ក្រោម​ហេតុផល​ថា​គ្រូ​បង្រៀន​រូប​នោះ​អនុវត្ត​ខុស​វិធានការ​សុខាភិបាល​ និង​ធ្វើ​ខុស​សេចក្ដី​ណែនាំ​របស់​ក្រសួង​អប់រំ តែ​ការ​ពិត​គ្រូ​បង្រៀន​រូប​នោះ​អះ​អាង​ថា ​ខ្លួន​មិន​បាន​ធ្វើ​ខុស​នោះ​ទេ។

គ្រូ​បង្រៀន​ម្នាក់​នោះ​បាន​បកស្រាយ​តាម​បណ្ដាញ​សង្គម​ហ្វេសប៊ុក​ដោយ​ដាក់​ភស្តុតាង​មក​ជា​មួយ​ផង ហើយ​ភស្តុតាង​ទាំងអស់​នោះ​បញ្ជាក់​ថា ​ក្រសួង​អប់រំ​ខ្លួនឯង ដែល​សម្រេច​ពិន័យ​បុគ្គលិក​ទាំង​បំពាន។​ ទោះ​ជា​យ៉ាងណា​ក្ដី​ គ្រូបង្រៀន​ម្នាក់​នោះ​បាន​លុប​សារ​របស់​ខ្លួន​ចេញ​ពី​បណ្ដាញ​ហ្វេសប៊ុក​វិញ ​ដោយ​ទំនង​ជា​បារម្ភ​ពី​សុវត្ថិភាព។

ករណី​មួយ​ទៀត គឺ​ជា​ករណី​ដែល​ចៅហ្វាយ​ខេត្ត​ប៉ៃលិន​អ្នកស្រី បាន ស្រីមុំ បាន​បណ្ដេញ​គ្រូពេទ្យ​ម្នាក់​ចេញ​ពី​ក្របខ័ណ្ឌ​ដោយ​ខុស​នីតិវិធី​ច្បាប់ ព្រោះ​តែ​គ្រូ​ពេទ្យ នោះ​ផ្សព្វផ្សាយ​ក្នុង​ហ្វេសប៊ុក​ពី​ការ​លំបាក​ក្នុង​ការងារ​របស់​គាត់​ក្នុង​នាម​ជា​ជួរ​មុខ​ម្នាក់​ចុះ​យក​សំណាក កម្មករ​ចំណាក​ស្រុក​ដែល​ត្រលប់​មក​ពី​ប្រទេស​ថៃ​តាម​ច្រក​ប៉ៃលិន។ ផ្អែក​តាម​នីតិវិធី​ច្បាប់​របស់​កម្ពុជា អភិបាល​ខេត្ត​គ្មាន​សិទ្ធិ​បណ្ដេញ​មន្ត្រី​រាជការ​ចេញ​ពី​ក្រប​ខណ្ឌ​នោះ​ទេ។ គ្រូពេទ្យ​ម្នាក់​នោះ​កំពុង​ប្ដឹង​ទៅ​ក្រសួង​ពាក់ព័ន្ធ​ដើម្បី​ស្វែង​រក​យុត្តិធម៌។

សរុប​សេចក្ដី​ទៅ ការ​រីក​រាល​ដាល​នៃ​ជំងឺ​កូវីដ១៩​ រឹត​តែ​ធ្វើ​ឱ្យ​ស្ថានភាព​ជីវភាព​រស់នៅ​របស់​មន្ត្រី​រាជការ​មួយ​ចំនួន​ធំ​ កាន់​តែ​យ៉ាប់យ៉ឺន​ពី​មួយ​ថ្ងៃ​ទៅ​មួយ​ថ្ងៃ។ ពួក​គេ​នឹង​មិន​រស់​នៅ​ថ្លៃថ្នូរ​ដូច​បុគ្គលិក​រដ្ឋ​នៃ​ប្រទេស​ដទៃ​បាន​ទេ ដរាប​ណា​ប្រទេស​កម្ពុជា​ពុំ​ទាន់​មាន​នីតិរដ្ឋ​ពិត​ប្រាកដ​ទេ​នោះ៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល