បទ​វិភាគ៖ តើ​ការ​ចាប់​ខ្លួន​តំណាង​រាស្ត្រ​បក្ស​ប្រឆាំង​ធ្វើ​ឲ្យ​រដ្ឋាភិបាល​ចំណេញ​ឬ​ខាត?

ដោយ ទេព សុរ៉ាវី
2014-07-17
អ៊ីម៉ែល
មតិ
Share
បោះពុម្ព
មន្ត្រី​ជាន់​ខ្ពស់​គណបក្ស​សង្គ្រោះជាតិ ថ្លែង​ទៅ​កាន់​បាតុករ​នៅ​ទីលាន​ប្រជាធិបតេយ្យ កាល​ពី​ថ្ងៃ​ទី ១៥ ខែ​កក្កដា ឆ្នាំ ២០១៤។
មន្ត្រី​ជាន់​ខ្ពស់​គណបក្ស​សង្គ្រោះជាតិ ថ្លែង​ទៅ​កាន់​បាតុករ​នៅ​ទីលាន​ប្រជាធិបតេយ្យ កាល​ពី​ថ្ងៃ​ទី ១៥ ខែ​កក្កដា ឆ្នាំ ២០១៤។
RFA/Sek Bandith

បន្ទាប់​ពី​មាន​ការ​ចាប់​ខ្លួន​តំណាង​រាស្ត្រ​ជាប់​ឆ្នោត​គណបក្ស​សង្គ្រោះ​ជាតិ ដាក់​ពន្ធនាគារ​ហើយ​នោះ រាជ​រដ្ឋាភិបាល​កម្ពុជា ហាក់​នៅ​មិន​សុខ​ទេ​ពី​រឿង​នេះ។ តាំង​ពី​ថ្ងៃ​អង្គារ ទី​១៥ កក្កដា មក រាជ​រដ្ឋាភិបាល​កម្ពុជា ប្រើ​គ្រប់​វិធីសាស្ត្រ​ទាំងអស់ ទាំង​ការ​ធ្វើ​សន្និសីទ​កាសែត កិច្ច​ប្រជុំ​ជាមួយ​មន្ត្រី​ទូត​នានា​ប្រចាំ​កម្ពុជា រហូត​ដល់​ឲ្យ​មន្ត្រី​ជាន់​ខ្ពស់​រាជ​រដ្ឋាភិបាល ពន្យល់​ច្រើន​លើក​ច្រើន​សា​តាម​កញ្ចក់​ទូរទស្សន៍​ទៅ​ដល់​មហាជន អង្គការ​ជាតិ​អន្តរជាតិ និង​មន្ត្រី​អង្គទូត​នានា ឲ្យ​យល់​ពី​ព្រឹត្តិការណ៍​ប៉ះ​ទង្គិច​គ្នា​ដោយ​ហិង្សា​រហូត​ឈាន​ដល់​ការ​ចាប់​ខ្លួន​បេក្ខជន​ជាប់​ឆ្នោត​គណបក្ស​សង្គ្រោះ​ជាតិ។ ប៉ុន្តែ ភាព​ស្រពេចស្រពិល​នៅ​តែ​មាន។

តើ​រាជ​រដ្ឋាភិបាល​កម្ពុជា ជ្រើស​រើស​វិធី​ចាប់​ខ្លួន​តំណាង​រាស្ត្រ​គណបក្ស​ប្រឆាំង​នេះ ជា​ការ​ចំណេញ ឬ​ខាត?

ស្ទើរ​តែ​មិន​គួរ​ឲ្យ​ជឿ​ទេ ដែល​បេក្ខជន​ជាប់​ឆ្នោត​តំណាង​រាស្ត្រ​ត្រូវ​បាន​វាយ​ខ្នោះ និង​ជាប់​គុក នៅ​ពេល​ដែល​ប្រើ​តួនាទី​របស់​ខ្លួន​ក្នុង​នាម​ជា​តំណាង​រាស្ត្រ ដោយ​ការ​សម្ដែង​មតិ ឬ​យោបល់ ទាមទារ​ឲ្យ​បើក​ទីលាន​ប្រជាធិបតេយ្យ​ដោយ​សន្តិវិធី។

អ្នក​វិភាគ និង​អ្នក​ច្បាប់​ខ្លះ​គិត​ថា រាជ​រដ្ឋាភិបាល​កម្ពុជា កំពុង​ដើរ​ផ្លូវ​ខុស ដោយ​មិន​គោរព​ច្បាប់​រដ្ឋធម្មនុញ្ញ ដែល​ផ្តល់​អភ័យ​ឯកសិទ្ធិ​ដល់​តំណាង​រាស្ត្រ និង​តួនាទី​កាតព្វកិច្ច​របស់​តំណាង​រាស្ត្រ ដែល​ត្រូវ​តែ​ធ្វើ​ដើម្បី​ផល​ប្រយោជន៍​ពលរដ្ឋ​ម្ចាស់​ឆ្នោត។ តួយ៉ាង​ដូច​ជា ការ​ចេញ​មុខ​របស់​តំណាង​រាស្ត្រ​គណបក្ស​សង្គ្រោះ​ជាតិ ទាមទារ​ឲ្យ​បើក​ទីលាន​ប្រជាធិបតេយ្យ កាល​ពី​ថ្ងៃ​ទី​១៥ កក្កដា នោះ គឺ​ដើម្បី​ឲ្យ​ពលរដ្ឋ​អាច​ប្រើប្រាស់​ទីលាន​នោះ​មក​សម្ដែង​មតិ​បាន​ដូច​មុន បន្ទាប់​ពី​រាជ​រដ្ឋាភិបាល បាន​ហ៊ុមព័ទ្ធ​ដោយ​របង​ដែក​លួស​បន្លា​ជុំ​ជិត។

ដូច្នេះ តើ​ការ​ចាប់​ខ្លួន​តំណាង​រាស្ត្រ​គណបក្ស​ប្រឆាំង រាជ​រដ្ឋាភិបាល​ចំណេញ ឬ​ខាត?

អ្នក​វិភាគ​គិត​ថា ការ​ចាប់​ខ្លួន​អ្នក​តំណាង​រាស្ត្រ​គណបក្ស​សង្គ្រោះ​ជាតិ រួម​មាន លោកស្រី មូរ សុខហួរ លោក កែវ ភីរម្យ លោក ម៉ែន សុថាវរិន្ទ្រ លោក រៀល ខេមរិន្ទ្រ លោក ហូរ វ៉ាន លោក នុត រំដួល លោក និង​លោក ឡុង រី នៅ​ពេល​នេះ គឺ​រដ្ឋាភិបាល​កំពុង​លេង​ល្ខោន​ថ្មី​មួយ​ដែល​គ្រោះ​ថ្នាក់​ខ្លាំង តែ​បើ​ល្បែង​នេះ​អាច​ដើរ​ទៅ​មុខ​ដូច​ការ​គ្រោង​ទុក​នោះ ក៏​ចំណេញ​មិន​ស្ទើរ​ដែរ។ ចំណេញ​ត្រង់​ថា រដ្ឋាភិបាល​កម្ពុជា ដែល​ដឹក​នាំ​ដោយ​លោក​នាយក​រដ្ឋមន្ត្រី ហ៊ុន សែន នោះ អាច​បង្ខំ​ឲ្យ​គណបក្ស​សង្គ្រោះ​ជាតិ ទទួល​យក​អ្វី​ជា​សេនារីយោ​នយោបាយ​របស់​ខ្លួន ហើយ​បញ្ចប់​ភាព​ជាប់​គាំង​នយោបាយ ដែល​អូស​បន្លាយ​ពេល​ជិត​មួយ​ឆ្នាំ​ក្រោយ​ការ​បោះ​ឆ្នោត។

មួយ​ទៀត រាជ​រដ្ឋាភិបាល​កម្ពុជា ក៏​អាច​យក​បញ្ហា​ជួប​ជុំ​បង្ក​ឲ្យ​មាន​ហិង្សា ជា​មូលហេតុ​រាំង​ខ្ទប់​មិន​ឲ្យ​មាន​ការ​ជួប​ជុំ​តវ៉ា​នៅ​មុខ​ស្ថានទូត​វៀតណាម ដែរ​នៅ​សប្ដាហ៍​ក្រោយ ដើម្បី​កុំ​ឲ្យ​ប៉ះ​ពាល់​សតិ​អារម្មណ៍​របស់​ប្រទេស​មហា​មិត្ត។ ប៉ុន្តែ​ការ​ចំណេញ​ប៉ុណ្ណេះ ទំនង​ជា​រាជ​រដ្ឋាភិបាល​មិន​គ្រប់​នឹង​អាម៉ាស់​ក្នុង​ឆាក​អន្តរជាតិ​ផង។ អ្នក​វិភាគ​នយោបាយ​គិត​ថា រាជ​រដ្ឋាភិបាល​ដែល​មាន​អំនួត​ពី​ភាព​ស៊ីវិល័យ​ក្នុង​សង្គម​បច្ចុប្បន្ន ប៉ុន្តែ​រង​ការ​រិះគន់​ថា​និយម​ខាង​ប្រើ​អំពើ​ហិង្សា កំពុង​តែ​បំពាន​ច្បាប់ និង​ដោះស្រាយ​បញ្ហា​តាម​ឆន្ទៈ​នយោបាយ​ជា​ធំ។

ការ​ចាប់​ខ្លួន​តំណាង​រាស្ត្រ​គណបក្ស​ប្រឆាំង​នៅ​ពេល​នេះ គឺ​ស្មើ​នឹង​រាជ​រដ្ឋាភិបាល​កម្ពុជា កំពុង​ស្រែក​ប្រកាស​ជា​ឱឡារិក​រក​សត្រូវ​កាន់​តែ​ច្រើន ទាំង​មន្ត្រី​ការទូត អង្គការ​ជាតិ​អន្តរជាតិ បញ្ញវន្ត សិស្ស​និស្សិត និង​មន្ត្រី​រាជការ​ដែល​គាំទ្រ​គណបក្ស​ប្រឆាំង ពិសេស​ការ​ទំនាក់ទំនង​ផ្នែក​ការទូត​របស់​រាជ​រដ្ឋាភិបាល អាច​នឹង​មាន​ការ​រួម​តូច​ជាង​មុន។

រីឯ​អ្នក​ច្បាប់​វិញ​គិត​ថា ការ​អនុវត្ត​ច្បាប់ គឺ​ធ្វើ​ឡើង​ដោយ​រើស​មុខ។ ជាក់ស្តែង ក្រុម​សន្តិសុខ​ស៊ី​ឈ្នួល​របស់​ខណ្ឌ​ដូនពេញ មិន​តិច​ដង​ទេ​ដែល​បាន​វាយ​ពលរដ្ឋ និង​អ្នក​កាសែត​ឲ្យ​រង​របួស ប៉ុន្តែ​មិន​ដែល​ឃើញ​សមត្ថកិច្ច​ណា​ចាប់​ជន​ដៃ​ដល់​មក​ផ្ដន្ទាទោស​ទេ។ ផ្ទុយ​ទៅ​វិញ នៅ​ពេល​ដែល​ក្រុម​សន្តិសុខ​ទំនង​ភ្លាត់​ស្នៀត គឺ​ដូច​ជា​សត្វ​ខ្លា​ដែល​មិន​អាច​ចាប់​គោ​ស៊ី​បាន​ដូច​រាល់​ដង ហើយ​បែរ​ជា​ត្រូវ​គោ​ព័ទ្ធ​ស៊ី​វិញ​ម្តង​នោះ អាជ្ញាធរ​បែរ​ជា​ចាប់​តំណាង​រាស្ត្រ​ឲ្យ​ទទួល​ខុស​ត្រូវ​ទៅ​វិញ។

យ៉ាង​ណា មន្ត្រី​ជាន់​ខ្ពស់​រាជ​រដ្ឋាភិបាល​អះអាង​ថា ការ​ចាប់​ខ្លួន​តំណាង​រាស្ត្រ​គណបក្ស​ប្រឆាំង​ទាំង ៧​រូប​នោះ គឺ​អាច​ធ្វើ​ទៅ​បាន ដោយសារ​តែ​ពួក​គេ​មិន​ទាន់​មាន​អភ័យ​ឯកសិទ្ធិ ដោយ​មិន​បាន​ស្បថ​ចូល​កាន់​តំណែង។ ដូច្នេះ អាច​មាន​ន័យ​ថា បេក្ខជន​ជាប់​ឆ្នោត​តំណាង​រាស្ត្រ​ទាំង ៥៥​រូប​របស់​គណបក្ស​សង្គ្រោះ​ជាតិ មិន​មែន​ជា​តំណាង​រាស្ត្រ ហើយ​សំណួរ​សួរ​ថា បើ​មិន​មែន​ជា​តំណាង​រាស្ត្រ​មែន​នោះ ម៉េច​គ្រប់ ១២០​រូប​ដូច​មាន​ចែង​ក្នុង​រដ្ឋធម្មនុញ្ញ ដែល​អាច​បង្កើត​រដ្ឋសភា​បាន​នោះ?

បង្កើត​រដ្ឋសភា​មិន​បាន ឬ​រដ្ឋសភា​ខុស​ច្បាប់ គឺ​មាន​ន័យ​ថា រដ្ឋាភិបាល​សព្វថ្ងៃ​ក៏​ខុស​ច្បាប់​ដែរ។ ប្រសិន​បើ​ដូច្នេះ​មែន​នោះ ការ​អះអាង​ថា តំណាង​រាស្ត្រ​ដែល​ចាប់​ខ្លួន​មិន​មាន​អភ័យ​ឯកសិទ្ធិ គឺ​ស្មើ​នឹង​រដ្ឋាភិបាល​ប្រកាស​ជា​ចំហ​ថា ខ្លួន​ជា​រដ្ឋាភិបាល​ខុស​ច្បាប់​ដូច​គ្នា​ដែរ។

តាម​មើល​ទៅ ល្ខោន​ថ្មី​ដែល​រាជ​រដ្ឋាភិបាល​លេង​ម្តង​នេះ រាជ​រដ្ឋាភិបាល​ទំនង​ជា​ខាត​ច្រើន​ជាង​ចំណេញ ពិសេស​ពិបាក​ស្រង់​ប្រជាប្រិយភាព​មក​វិញ​ណាស់ ប៉ុន្តែ​បើ​ធ្វើ​ដើម្បី​តែ​ឈ្នះ និង​ដើម្បី​កាន់​អំណាច​បន្ត​នោះ ទំនង​ជា​អាច​ទៅ​រួច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (21)
Share

កូនខ្មែរ

ពី ភព

ចំណេញហើយមហាចំណេញទៀតផងព្រោះទី១-បានត្បកក្បាល
មេដឹកនាំបក្សសង្គ្រោះជាតិដោយមិនបាញ់បង់ថ្លៃ,ទី២-ធ្វើឱ្យសម រង្សី
និងកឹម សុខាក្បត់និងឆន្ទៈរាស្រ្ត,ទី៣-អាចឱ្យហ៊ុន សែនជិះសេះ
លែងដៃហើយគឺអាចបំផ្លាញជាតិដោយមិនមានការព្រួយបារម្ភពីអ្នក
ណាឡើយ។

Jul 23, 2014 02:06 PM

ជា​ សុភាព

ខ្ញុំមានសំនួរមួយ។តើអ្នកណារអ្នកប្រើអំពើហឹងសារ???

Jul 18, 2014 07:27 AM

អ្នក​អាន​អនាមិក

ខ្ញុំយល់ថាចំណេញ។ ពាក្យថារំដោះ មានន័យថាវាយដណ្តើមយក៖ ចំណាប់ខ្មាំង ទីតាំង ប្រទេសជាតិ....មកវិញដោយប្រើហឹង្សា មានដុំថ្ម តំបង កាំបិត កាំភ្លើង។ បើចាញ់ត្រូវគេ ត្រូវគេចាប់មេចូលគុកអញ្ចឹងហើយ។ តែបើឈ្នះគេវិញ មេគេនឹងល្បី។ តែល្បីលើគំនរទុក្ខអ្នកដ៏ទឺ។

Jul 17, 2014 11:43 PM

anonymous

Instead of gaining new support, Huynh Xen communist government is falling down more and more in its impopularity. All its recent acts signified it is in the dead-end and will collapse no longer time. Civilians in the whole country will waking up against Hunyh Xen by millions within ICC's verdict, and his destinity isn't not too far from Slobodan Mellosowick, Sadam Hussein and Gadafy...

Jul 17, 2014 11:38 PM

កូូនខ្មែរ

ពី កម្ពុជា

នេះជាល្បិចថោកទាប តែអាចទាញបក្សប្រឆាំងអោយចូលកាន់សភាបាន។ កុំថា ថោកប៉ុណ្ណឹង ទោះជាលើសនឹង១លានដង ក៏បងធំហ៊ានធើ្វដែរ។

Jul 17, 2014 11:09 PM

មើល​មតិ​ទាំង​អស់.

គេហទំព័រ​ទាំងមូល