បទវិភាគ៖ ល្បិច​អូស​ក្រឡា​របស់​លោក ​ហ៊ុន​ សែន ​ក្នុង​ការ​ផ្ដាច់​ក្ដី​សង្ឃឹម​ចុង​ក្រោយ​របស់​បក្ស​ប្រឆាំង​

ដោយ មួង ណារ៉េត
2019-03-22
អ៊ីម៉ែល
មតិ
Share
បោះពុម្ព
រូប​ត្លុក​នយោបាយ​របស់​អាស៊ីសេរី ដោយអ្នកគូរូប​ត្លុកនយោបាយ Rebel Pepper
រូប​ត្លុក​នយោបាយ​របស់​អាស៊ីសេរី ដោយអ្នកគូរូប​ត្លុកនយោបាយ Rebel Pepper
RFA

ស្រប​ពេល​ដែល​ឱសានវាទ​នៃ​ការ​បិទ​បញ្ចប់​នីតិវិធី​ព្យួរ​ការ​អនុគ្រោះ​ពន្ធ​ EBA​ របស់​សហភាព​អឺរ៉ុប​កាន់តែ​ខិត​ជិត​ចូល​មកដល់​លោក​ ហ៊ុន​ សែន​ ហាក់​បី​ដូច​ជា​ចង់​បង្ហាញ​ថា ​លោក​នៅតែ​មិន​ខ្លាច​សម្ពាធ​នេះ​ទេ។ ចំណាត់​ការ​ថ្មីៗ ក្នុង​ការ​បង្ក្រាប​សំឡេង​ប្រឆាំង​បន្ថែម​ទៀត​នេះ គឺ​ជា​ផ្នែក​មួយ​នៃ​ការ​បន្ត​បង្ហាញ​រូបភាព​នៃ​ការ​ផ្គើន​នេះ។ ទោះ​ជា​យ៉ាង​នេះ​ក្ដី នេះ​អាច​គ្រាន់​តែ​ជា​យុទ្ធសាស្ត្រ​ដើម្បី​ផ្ដាច់​ក្ដី​សង្ឃឹម​បក្ស​ប្រឆាំង​តែ​ប៉ុណ្ណោះ ព្រោះ​កម្ពុជា​មិន​ទាន់​អាច​ត្រៀម​ខ្លួន​រួចរាល់ ដើម្បី​រស់​ដោយ​គ្មាន​ការ​អនុគ្រោះ​ពន្ធ​ផ្នែក​ពាណិជ្ជកម្ម​នៅ​ពេល​នេះ​នៅ​ឡើយ។

តើ​នៅ​ទី​បំផុត​លោក​ ហ៊ុន​ សែន ​អាច​ចៀស​ផុត​ពី​ការ​ព្រម​ធ្វើ​តាម​សំណើ​របស់​សហភាព​អឺរ៉ុប​ដែរ​យ៉ាង​ណា?

ក្នុង​ថ្ងៃ​ដែល​មន្ត្រី​សហភាព​អឺរ៉ុប​កំពុង​បំពេញ​ទស្សនកិច្ច​នៅ​កម្ពុជា​រយៈ​ពេល​ពីរ​ថ្ងៃ​ លោក​ ហ៊ុន​ សែន យក​ឱកាស​នេះ​ ថ្លែង​សារ​គំរាម​ចាប់​វ៉ៃ​ខ្នោះ និង​បង្ក្រាប​មន្ត្រី​បក្ស​ប្រឆាំង​នៅ​តាម​មូលដ្ឋាន ដែល​ចង់​ជួប​ប្រជុំ​គ្នា ដើម្បី​អនុវត្ត​សិទ្ធិ​សេរីភាព​ក្នុង​ជីវភាព​នយោបាយ​របស់​ខ្លួន។

ថ្លែង​នៅ​ចំពោះ​មុខ​កម្មករ​រោងចក្រ​នៅ​ខេត្ត​ពោធិ៍សាត់ ដែល​ជា​ឱកាស​លួង​ចិត្ត និង​រម្ងាប់​ចិត្ត​កម្មករ​កុំ​ឱ្យ​ជ្រួល​ច្របល់​រឿង​ទណ្ឌកម្ម​អន្តរជាតិ​កាល​ពី​ថ្ងៃ​ទី២០ ខែ​មីនា​ ស្រប​ពេល​ដែល​មន្ត្រី​សហភាព​អឺរ៉ុប​កំពុង​ជួប​មន្ត្រី​របប​ក្រុងភ្នំពេញ​លោក​ ហ៊ុន​ សែន​ ថា បើ​មន្ត្រី​បក្ស​ប្រឆាំង​មិនព្រម​សុំ​សិទ្ធិ​ធ្វើ​នយោបាយ​វិញ​ទេ​ លោក​មិន​អត់​ឱន​ឱ្យ​បាន​ឡើយ ​គឺ​លោក​បញ្ជា​ឱ្យ​ចាត់ការ​ឱ្យ​អស់៖ «ប្រាប់​ឱ្យ​ហើយ​ផ្ញើ​សារ​ឱ្យ​មួយ​ទូទាំង​ប្រទេស​ថា ​ឈប់​ទៅ​អាស​កម្ម​ភាព​គណៈកម្មការ​ចំពោះ​កិច្ច​ទាំង​នៅ​ភ្នំពេញ​ និង​នៅ​វាលវែង​ខេត្ត​ណាៗ គឺ​និយាយ​ឱ្យ​ត្រង់ ឃើញ​មួយ​វ៉ៃ​មួយ​ទៅ​ចេញ​បញ្ជា​អ៊ីចឹង

មិន​ខុស​ពី​ការ​ចោទ​គណបក្ស​ប្រឆាំង​ថា ​ក្បត់​ជាតិ​ និង​មានបំណង​ផ្ដួល​រំលំ​រដ្ឋាភិបាល ​ដែល​ជា​លេស​កាល​ពី​រម្លាយ​បក្ស​នេះ​ កាល​ពី​ឆ្នាំ២០១៧​ លើក​នេះ​ លោក​យក​លេស​ដដែល​នេះ​មក​ចោទ​អ្នក​ទាំង​នោះ​ថា បង្ក​បញ្ហា​អសន្តិសុខ​ និង​សង្គ្រាម៖ «តែ​រឿង​ខុសច្បាប់​ហើយ​គឺ​ដាក់​ហើយ​ កុំ​ខ្វល់​ពេក! រឿង​ចំ​កម្លាំង​ស្អី? អ្នកឯង​រៀបចំ​ធ្វើអំពើ​ភេរវកម្ម​អ្ហ៊ៃ​ត្រៀម​ប្រយុទ្ធ​អ្ហ៊ៃ

ឥឡូវ​នេះ​សូម្បី​តែ​ការ​ជួប​ជុំ​គ្នា​តាម​ហាង​កាហ្វេ​ ឬ​ហាង​គុយទាវ​ ក៏​មន្ត្រី​បក្ស​ប្រឆាំង​មិន​អាច​ពិសា​អាហារ​ត្រង់​មាត់​ដែរ​ ដោយសារ​តែ​លោក​ ហ៊ុន​ សែន ឱ្យ​មន្ត្រី​គាត់​តាម​ឃ្លាំមើល​ដូច​កង​ឈ្លប​តាម​យក​ការណ៍​សកម្មភាព​ពលរដ្ឋ​ក្នុង​សម័យ​ខ្មែរក្រហម​ដូច្នេះ​ដែរ។

លេស​ដដែលៗ ត្រូវ​បាន​តុលាការ​របប​លោក ហ៊ុន សែន ដែល​រង​ការ​រិះគន់​ថា ជា​ឧបករណ៍​នយោបាយ​សម្រាប់​ធ្វើ​ទុក្ខ​បុក​ម្នេញ​សំឡេង​ប្រឆាំង​មួយ​សប្ដាហ៍​មុន​ដំណើរ​មក​ដល់​នៃ​មន្ត្រី​សហភាព​អឺរ៉ុប​ ក៏​បាន​ចេញ​ដីកា​បង្គាប់​ឱ្យ​ចាប់​ខ្លួន​មន្ត្រី​ជាន់​ខ្ពស់​គណបក្ស​ សង្គ្រោះ​ជាតិ​ ចំនួន ៨រូប ដែល​សុទ្ធតែ​កំពុង​និរទេស​ខ្លួន​នៅ​ក្រៅ​ប្រទេស​រួម​ទាំង​ប្រធាន​ស្ដីទី​គណបក្ស​នេះ​គឺ​លោក​ សម​ រង្ស៊ី​ផង​ ដោយ​ចោទ​ប្រកាន់​ពី​បទ​រួម​គំនិត​ក្បត់​ និង​ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជា​អាទិ៍ ​ដោយសារ​អ្នក​ទាំង​នោះ​រៀបចំ​កិច្ចប្រជុំ​គណៈកម្មាធិការ​អចិន្ត្រៃយ៍​របស់​បក្ស​នៅ​ក្រៅ​ប្រទេស​ ដើម្បី​រៀបចំ​យុទ្ធ​សាស្ត្រ និង​ដំណើរ​វិល​ត្រឡប់​ទៅ​កម្ពុជា​វិញ​របស់​លោក​ សម​ រង្ស៊ី​ និង​មន្ត្រី​បក្ស​ប្រឆាំង​ឯ​ទៀត។

នៅ​ថ្ងៃ​ដែល​មន្ត្រី​សហភាព​អឺរ៉ុប​ធ្វើដំណើរ​ដល់​ស្រុកខ្មែរ​ភ្លាម​នោះ​ មេធាវី​លោក​ ហ៊ុន​ សែន​ កាល​ពី​ថ្ងៃ​ទី១៩​ ខែ​មីនា​ បាន​ដាក់ពាក្យ​ប្ដឹង​មន្ត្រី​ជាន់​ខ្ពស់​គណបក្ស​ សង្គ្រោះ​ជាតិ ​ដែល​កំពុង​និរទេស​ខ្លួន​នៅ​ក្រៅ​ប្រទេស​មួយ​រូប​ទៀត​ដែរ ​គឺ​លោក សោ ចាន់ដេត ពី​បទ​ប្រមាថ​លោក ហ៊ុន សែន និង​ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជា​អាទិ៍​ដែរ​ ដោយសារ​តែ​លោក​ សោ ចាន់ដេត សរសេរ​សារ​បញ្ចេញ​មតិ​តាម​បណ្ដាញ​សង្គម​ហ្វេសប៊ុក ពី​បញ្ហា​សុខភាព​ទ្រុឌទ្រោម​របស់​លោក ហ៊ុន សែន។ លោក ហ៊ុន សែន​ទារ​សំណង​ជំងឺ​ចិត្ត​ជា​ទឹក​ប្រាក់ ៤ពាន់​លាន​រៀល ឬ​ស្មើ​នឹង ១លាន​ដុល្លារ។

សារ​របស់​លោក​ ហ៊ុន​ សែន​ ទំនង​ជា​លោក​ចង់​បង្ហាញ​ថា ​លោក​មិន​ខ្វល់​នឹង​ការ​ព្យួរ​ការ​អនុគ្រោះ​ពន្ធ​នេះ​អ្វី​បន្តិច​សោះ៖ «ប៉ុន្មាន​ថ្ងៃ​ហ្នឹង ឮ​សូរ​ស្អី​គេ​បញ្ជូន​ឯ​ណា​មក​ដោះ​ស្រាយ​រឿង EBAអើ​មក៍​ដោះ​ទៅ! ហ៊ុន សែន ដើរ​ជួប​កម្មករ​នៅ​តែ​ដើរ​ជួប​កម្មករ​ កសិករ​នៅ​តែ​កសិករ​ អ្នក​ណា​ធ្វើ​អ្វី​ធ្វើ​ហ្នុង! រឿង​អ្នក​ឯង​ចូល​ទៅ​ជំនុំ​អ្នក​ណា​រឿង​អ្នក​ហ្នុង​ទៅ! តែ​រឿង​សម្រេច​ចុង​ក្រោយ​នាយករដ្ឋមន្ត្រី ហ៊ុន សែន​ តែ​ម្ដង! អា​ហ្នឹង​រឿង​វា​អ៊ីចឹង!»

ប៉ុន្តែ​សារ​ និង​ចំណាត់​ការ​របស់​លោក ហ៊ុន សែន ទំនង​ជា​មិន​មែន​ដើម្បី​បង្ហាញ​ពី​ភាព​ខែងរ៉ែង​របស់​លោក​ឡើយ។ វា​អាច​ដើម្បី​ទិញ​ពេល​វេលា​បន្ថែម និង​ផ្ដាច់​ក្ដី​សង្ឃឹម​របស់​មន្ត្រី​មូលដ្ឋាន​របស់​គណបក្ស​ សង្គ្រោះ​ជាតិ ​ដែល​កំពុង​រង់ចាំ​ប្រសិទ្ធភាព​នៃ​ទណ្ឌកម្ម​អន្តរជាតិ​តែ​ប៉ុណ្ណោះ។ មន្ត្រី​មូលដ្ឋាន​របស់​គណបក្ស​ សង្គ្រោះ​ជាតិ ​ដែល​មិន​ព្រម​សុំ​សិទ្ធិ​ធ្វើ​នយោបាយ​វិញ​ អាច​មក​ពី​ពួក​គាត់​នៅ​តែ​សង្ឃឹម​ថា នឹង​មាន​ដំណោះ​ស្រាយ​នយោបាយ​មួយ​ជា​កញ្ចប់ ដែល​ពេល​នោះ សិទ្ធិ​ធ្វើ​នយោបាយ​នឹង​មាន​ដោយ​ស្វ័យប្រវត្តិ។

ការ​បន្ត​មាន​ក្ដី​សង្ឃឹម​ថា នឹង​មាន​ដំណោះស្រាយ​គួបផ្សំ​នឹង​សកម្មភាព​ផុលផុស​របស់​គណបក្ស​ សង្គ្រោះ​ជាតិ ​នៅ​ក្រៅ​ប្រទេស​ផង​ អាច​ជា​ផ្នែក​មួយ​ជួយ​ធ្វើ​ឱ្យ​មន្ត្រី​បក្ស​ប្រឆាំង​ជា​ច្រើន​ នៅ​តែ​សុខ​ចិត្ត​ទ្រាំ​មិន​សុំ​សិទ្ធិ​ធ្វើ​នយោបាយ។ ម្យ៉ាង​ទៀត​ ការ​ដាក់​ពាក្យ​សុំ​សិទ្ធិ​ធ្វើ​នយោបាយ​មុន​លោក​ កឹម​ សុខា​ ដែល​ជា​ប្រធាន​បក្ស​មាន​សេរីភាព​បែប​នេះ​ ជា​ការ​មិន​គប្បី​មួយ​ផង​ និង​រង​ការ​រិះគន់​ថា ​មិន​ស្មោះ​ត្រង់​នឹង​បក្ស ​និង​ជា​ជន​ឱកាស​និយម​ផង។ ប្រការ​នេះ​ ធ្វើ​ឱ្យ​លោក​ ហ៊ុន​ សែន​ ពិបាក​នឹង​អន្ទង​ឱ្យ​មន្ត្រី​បក្ស​ប្រឆាំង​សុំ​សិទ្ធិ​នយោបាយ​បាន​ច្រើន​ដូច​ការ​ចង់​បាន​របស់​លោក​ណាស់​ ទើប​លោក​បន្ត​យុទ្ធសាស្ត្រ​បំភិតបំភ័យ​មន្ត្រី​បក្ស​នេះ​ត​ទៅ​ទៀត។

ទោះ​ជា​ខំប្រឹង​យ៉ាងណា​លោក​ ហ៊ុន​ សែន​ នៅ​តែ​មិន​អាច​បំបែក​ក្បាល​ម៉ាស៊ីន​កំពូល​របស់​គណបក្ស​សង្គ្រោះ​ជាតិ​បាន ​គឺ​មិន​អាច​បំបែក​លោក កឹម សុខា ចេញ​ពី​លោក​ សម​ រង្ស៊ី​ បាន​លើក​លែង​តែ​មន្ត្រី​ថ្នាក់​ក្រោម​មួយ​ចំនួន​តូច​ប៉ុណ្ណោះ។ ទោះ​ជា​យ៉ាង​នេះ​ក្ដី​ លោក​ ហ៊ុន ​សែន​ មិន​បោះ​បង់​ចោល​ការ​ព្យាយាម​បំបែក​នេះ​ទេ។ គោលបំណង​របស់​លោក ​គឺ​គ្មាន​អ្វី​ក្រៅ​ពី​ចង់​ធ្វើ​ឱ្យ​បក្ស​ សង្គ្រោះ​ជាតិ ​បែក​ជា​បំណែក​តូចៗ ដើម្បី​ចុះ​ខ្សោយ​ងាយ​លោក​ទប់ទល់​ជាង​បក្ស​នេះ​នៅ​មូល​គ្នា។

ការ​គំរាម​បណ្ដើរ បំភ័យ​បណ្ដើរ និង​លួងលោម​បណ្ដើរ​នេះ គឺ​ជា​យុទ្ធសាស្ត្រ​លោក ហ៊ុន សែន ក្នុង​ការ​អន្ទង​ក្រុម​មន្ត្រី​បក្ស​ប្រឆាំង ដែល​និយម​លោក កឹម​ សុខា ចេញ​មក​សុំ​លោក ដើម្បី​បាន​សិទ្ធិ​ធ្វើ​នយោបាយ​វិញ​បាន​ច្រើន​តាម​ដែល​អាច​ធ្វើ​ទៅ​បាន។ ក្នុង​ពេល​ជាមួយគ្នា​នេះ​ដែរ ​លោក ហ៊ុន សែន​ ប្ដេជ្ញា​មិន​បន្ធូរបន្ថយ ឬ​អនុគ្រោះ​ ចំពោះ​មន្ត្រី​បក្ស​ប្រឆាំង​ណា​ ដែល​និយម​លោក សម រង្ស៊ី ទេ លើក​លែង​តែ​អ្នក​ទាំង​នោះ​សន្យា​ទៅ​បើក​បក្ស​នយោបាយ​ថ្មី ឬ​ជ្រក​ក្រោម​គណបក្ស​ថ្មី​ក្រៅ​ពី​គណបក្ស​ សង្គ្រោះ​ជាតិ​ ទើប​លោក​ព្រម​ផ្ដល់​សិទ្ធិ​នេះ​វិញ៖ «ហើយ​គោលដៅ​របស់​យើង​សម្រាប់​ការ​លើក​លែង​ គឺ​មិន​អាច​លើក​លែង​អ្នក​ណា​ក៏​ដោយ ​ដែល​មាន​ការ​ប៉ុនប៉ង​សម្រាប់​ធ្វើ​ជា​ឈ្នាន់​សម្រាប់​ការ​ចូល​មក​របស់​ សម​ រង្ស៊ី​ ដើម្បី​ចូល​ស្រុក​ គឺ​យើង​មិន​អាច​លើក​លែង​ទេ។ ប៉ុន្តែ​ បើ​មាន​ការ​លើក​លែង​សម្រាប់​បម្រាម​នយោបាយ​ណា​មួយ​ គឺ​សំដៅ​ទៅ​ឆ្ពោះ​ទៅ​រក​តែ​អ្នក​ណា​ ដែល​ចង់​បង្កើត​បក្ស​នយោបាយ​តែ​ប៉ុណ្ណោះ»

មិន​តែ​ប៉ុណ្ណោះ​លោក​ឆ្លៀត​បញ្ចេញ​សារ​គំរាម​កំហែង​បំបាក់​ស្មារតី​មន្ត្រី​គណបក្ស ​សង្គ្រោះ​ជាតិ​ ថា លោក​នឹង​ផ្ដាច់​ឫស​កែវ​នៃ​រចនាសម្ព័ន្ធ​គណបក្ស សង្គ្រោះ​ជាតិ ទាំង​ស្រុង​ឲ្យ​ខាង​តែ​បាន​ថែម​ទៀត​ផង៖ «កម្ចាត់​ចោល​កម្លាំង​ប្រឆាំង​ទាំងអស់​ដែល​ជា​បណ្ដាញ​របស់​អតីត​ សង្គ្រោះ​ជាតិ​ ដោយ​មិន​ឲ្យ​ពួក​នេះ​រើ​ក្បាល​រួច​ ព្រោះ​យើង​មិន​អាច​ឲ្យ​ពួក​អា​ក្រុម​នេះ​រស់​ទេ»

យុទ្ធសាស្ត្រ​ត្រជាក់​ក្ដៅ​នេះ​លោក​ ហ៊ុន​ សែន​ ប្រើ​ផ្គួប​គ្នា​ពោល ​គឺ​ខោក​ផង​ អង្អែល​ផង។ លោក ហ៊ុន សែន គ្មាន​ទម្លាប់​តម្លៃ​មនុស្ស​បក្ស​ប្រឆាំង​នោះ​ទេ ​លើក​លែង​តែ​លោក​យល់​ថា​អ្នក​ទាំង​នោះ​ហុច​ផល​ប្រយោជន៍​ដល់​លោក។ ពេល​កាលៈទេសៈ​ហុច​ឲ្យ លោក​អនុវត្ត​ល្បិច​រុញ​ទូក​បណ្ដោយ​ទឹក​ភ្លាម។

ក្រោយ​មាន​មន្ត្រី​បក្ស​ប្រឆាំង​ប្រាំ​រូប​បន្ថែម​ទៀត​ សុំ​សិទ្ធិ​នយោបាយ​លោក​សម្ដែង​ឫក​ធ្វើ​ជា​មនុស្ស​យល់​ចិត្ត​ និង​ឲ្យ​តម្លៃ​មន្ត្រី​បក្ស​ប្រឆាំង​ទាំង​នោះ និង​ទូន្មាន​អ្នក​ដទៃ​កុំ​ឲ្យ​មើល​ងាយ​ពួក​គាត់៖ «កុំ​មើល​ស្រាល​អ្នក​ដែល​គេ​មិន​នៅ​ជា​មួយ​អ្នក​ឯង​ ហើយ​គេ​សុំ​សិទ្ធិ​នយោបាយ​ ដើម្បី​សេរីភាព​របស់​គេ​។មនុស្ស​ទាំង​អស់​នោះ​មិនមែន​ជា​សត្វ​ធាតុ​ ឬ​ជា​វត្ថុ​សម្រាប់​លក់​ទេ។ យើង​ខ្ញុំ​ផ្ដល់​ការ​គោរព​ចំពោះ​សេរីភាព​របស់​មនុស្ស​ទាំង​អស់​ ទោះ​បី​មនុស្ស​នោះ​នៅ​ក្នុង​បក្ស​នយោបាយ​ណា​ក៏​ដោយ។ យើងខ្​ញុំ​ផ្ដល់​ការ​គោរព។ អ្នក​ដែល​ចេញ​មក​សុំ​សិទ្ធិ​នយោបាយ​ យើង​ខ្ញុំ​ក៏​គោរព​អ្នក​ដែល​មិន​សុំ​សិទ្ធិ​ក៏​យើង​ខ្ញុំ​គោរព»

សារ​នេះ​វា​ផ្ទុយ​ស្រឡះ​ទៅ​នឹង​សម្ដី​របស់​លោក​ដែល​តែង​តែង​ហៅ​មន្ត្រី​បក្ស​ប្រឆាំង​ថា​ ជា​ពួក​អាសិរពិស​ ពួក​ចង្រៃ​ឧត្បាត ពួក​ក្បត់​ជាតិ​ ពួក​ឧទ្ទាម​ភេរវករ​ ដែល​ត្រូវ​កម្ចាត់​ចោល​ឲ្យ​ផុត​ពី​ផែន​ដី​នេះ​ជា​ដើម។

ប៉ុន្តែ​ក្នុង​កាលៈទេសៈ​នេះ​ លោក​មិន​ខ្លាច​អ្វី​នឹង​ធ្វើ​ជា​តួ​ស្លូត​ស្អំ​ចិត្ត​មន្ត្រី​បក្ស​ប្រឆាំង ​ដែល​លោក​ចង់​ឲ្យ​ចេញ​មក​សុំ​សិទ្ធិ​នយោបាយ​ឲ្យ​បាន​ច្រើន ​ដើម្បី​បង្អួត​ប្រាប់​សហភាព​អឺរ៉ុប​ថា ​អ្នក​ទាំង​នោះ​លែង​រង​ការ​ហាម​ឃាត់​សិទ្ធិ​នយោបាយ​អ្វី​ទៀត​ហើយ គឺ​ស្រុក​ខ្មែរ​មាន​លំហ​ប្រជាធិបតេយ្យ​ពេញលេញ​ជា​ដើម។

ការ​អន្ទង​មន្ត្រី​ដែល​និយម​លោក កឹម​ សុខា​ ចេញ​មក​សុំ​សិទ្ធិ​នយោបាយ​លោក​ ហ៊ុន​ សែន​ ចំណេញ​ពីរ​ផ្លូវ។ ទី​មួយ ចំណេញ​បាន​បំបែក​សំឡេង​ប្រឆាំង។ ទីពីរ លោក​អាច​សង្ឃឹម​ថា នឹង​ស្រប​តាម​ផ្នែក​ខ្លះ​នៃ​ការ​ទាមទារ​របស់​សហភាព​អឺរ៉ុប។ ក្នុង​ចំណោម​សំណើ​មួយ​របស់​សហភាព​អឺរ៉ុប​ គឺ​ការ​ទាមទារ​ឲ្យ​របប​លោក ហ៊ុន​ សែន​ បើក​ចំហ​លំហ​ប្រជាធិបតេយ្យ​ឡើង​វិញ ដែល​រួម​មាន ​សិទ្ធិ​ធ្វើ​នយោបាយ​នេះ​ផង។ ហេតុ​ដូច្នេះ​ហើយ​ ទើប​លោក​ ហ៊ុន​សែន​ នៅ​តែ​ខំ​ប្រឹង​បញ្ចុះបញ្ចូល​ឲ្យ​មន្ត្រី​បក្ស​ប្រឆាំង​ព្រម​សុំ​ធ្វើ​នយោបាយ​វិញ​នេះ។ ស្រប​ពេល​ដែល​អ្នក​ដាក់​ពាក្យ​សុំ​មាន​ចំនួន​តិចតួច​ លោក​ ហ៊ុន ​សែន​ បារម្ភ​ រហូត​ឆេះ​ដុំ​ខ្លាំង ​និង​គំរាម​បិទ​ច្រក​នេះ​ផង៖ «ខ្ញុំ​គ្រាន់តែ​ឲ្យ​សារ​ចុង​ក្រោយ​សម្រាប់​អ្នក​ហើយ​បើ​អ្នក​ព្រងើយ​កន្តើយ​ទ្វារ​នឹង​អាច​បិទ​នៅ​មុន​ចូល​ឆ្នាំ​ខ្មែរ​ ឬ​ក្រោយ​ចូល​ឆ្នាំ​ខ្មែរ ​ទោះ​បី​អ្នក​ដាក់​លិខិត​សុំ​ ក៏​ខ្ញុំ​មិន​អើពើ។ រឿង​វា​តែ​ប៉ុណ្ណឹង! ដើម្បី​ខ្ញុំ​គ្រាន់​តែ​បញ្ជាក់​ឲ្យ​អ្នក ហើយ​បញ្ជាក់​នៅ​មុខ​ទូត​ជប៉ុន​ទៀត​ផង​ ដើម្បី​ឲ្យ​អ្នក​ឯង​បាន​ដឹង»

ស្រប​ពេល​ដែល​លោក​ហ៊ុន​ សែន​ កំពុង​ដំឡើង​សំឡេង​ថា មិន​ខ្ចី​ខ្វល់​នឹង EBA នេះ របប​លោក​បាន​ប្រឹង​ចរចា​ជាមួយ​មន្ត្រី​សហភាព​អឺរ៉ុប​ជា​ច្រើន​លើក​ច្រើន​សា ទាំង​ក្រោម​តុ និង​លើ​តុ​ផង ដើម្បី​សុំ​កុំ​ឲ្យ​សហភាព​អឺរ៉ុប​ព្យួរ​ការ​អនុគ្រោះ​ពន្ធ EBA នេះ។ មន្ត្រី​គណបក្សប្រជាជន​កម្ពុជា​លោក ឈាង វុន ថ្លែង​ប្រាប់​អ្នក​សារព័ត៌មាន​តាំង​ពី​ខែ​តុលា ឆ្នាំ២០១៨ ថា ការ​ចរចា​ក្រោម​តុ​មាន​ជា​ហូរហែ​ហើយ៖ «យើង​ធ្វើ​ការ​ក្រោម​តុ​ច្រើន​យើង​និយាយ​ នៅ​ក្នុង​វេទិកា​អ្នក​ការ​ទូត​សភា ​គឺ​ការងារ​ភាគ​ច្រើន ​គឺ​ការងារ​ក្រោម​តុ​ហ្នឹងហើយ។ អាច​មាន​ការ​ជជែក​គ្នា​ក្រៅ​ផ្លូវការ»

ការ​ចរចា​ផ្លូវការ​ក៏​ចាប់​ផ្ដើម​មាន​ជា​បន្ត​បន្ទាប់​ដែរ។ លោក​ ហ៊ុន​ សែន​ បាន​បញ្ជូន​គណៈ​ប្រតិភូ​ខ្មែរ​មួយ​ក្រុម​ពី​ក្រសួង​ការ​បរទេស​ ដឹក​នាំ​លោក សុខ​ ស៊ីផាន់ណា ដែល​ជា​មេធាវី​ និង​ទីប្រឹក្សា​របស់​រដ្ឋាភិបាល​ទៅ​បំពេញ​បេសកកម្ម​ពីរ​សប្ដាហ៍​នៅ​សហគមន៍​អឺរ៉ុប ​ដើម្បី​ជួប​ចរចា​ជាមួយ​មន្ត្រី​សហភាព​អឺរ៉ុប ​កាល​ពី​ចុង​ខែ​មិថុនា​ ឆ្នាំ២០១៨។ ជាង​បី​ខែ​ក្រោយ​មក​ទៀត​ លោក​ ហ៊ុន​ សែន ​ផ្ទាល់​បាន​ស្កាត់​ជួប​តំណាង​ជាន់​ខ្ពស់​របស់​សហភាព​អឺរ៉ុប គឺ​អ្នកស្រី ហ្វេដេរីកា មូហ្គែរីនី (Federica Mogherini) នៅ​ទីក្រុង​ប្រ៊ុចស្សែល ប្រទេស​ប៊ែលហ្ស៊ិក កាល​ពី​ខែ​តុលា ឆ្នាំ២០១៨។

ប៉ុន្តែ​កិច្ច​ខិតខំ​ប្រឹងប្រែង​របស់​របប​លោក​ ហ៊ុន​ សែន​ ក្នុង​ការ​ចរចា​នេះ​ទំនង​ជា​ធ្វើ​គ្រាន់​តែ​បង្គ្រប់​កិច្ច​តែ​ប៉ុណ្ណោះ ​ព្រោះ​មិន​បាន​លទ្ធផល​ជា​វិជ្ជមាន​អ្វី​ទាំង​អស់។ ស្ថានភាព​អាក្រក់​ផ្នែក​សិទ្ធិមនុស្ស​ និង​ ប្រជាធិបតេយ្យ​ នៅ​តែ​មិន​ប្រសើរ​ ព្រោះ​ចំណុច​សំ​ខាន់ៗ ដែល​សហភាព​អឺរ៉ុប​ចង់​បាន ​នៅ​តែ​មិន​ឃើញ​កែ។ មិន​តែ​ប៉ុណ្ណោះ​ សហភាព​អឺរ៉ុប​បាន​កំណត់​ឱសានវាទ​ក្នុង​ការ​ព្យួរ​ការ​អនុគ្រោះ​ពន្ធ​នោះ​ថែម​ទៀត​ផង។

លោក​ហ៊ុន​ សែន​ នៅ​បន្ត​អូស​ក្រឡាត​ទៅទៀត​ដោយ​កាលពី​ថ្ងៃ​ទី២០ ខែ​មីនា​ថ្លែង​ប្រាប់​កម្មករ​រោងចក្រ​ថា កុំ​ភ័យ​រឿង​អត់​ប្រាក់​ខែ​បើក​ ព្រោះ​របប​លោក​គ្រោង​នឹង​ដាក់​ចេញ​នូវ​កំណែ​ទម្រង់​សេដ្ឋកិច្ច​ថ្មី​ ដើម្បី​ទប់ទល់​បញ្ហា​អត់ EBA នេះ​ហើយ៖ «ឱ្យ​បើ​គេ​ដក​ភាព​អនុគ្រោះ​ពី​យើង​ ក៏​មិន​ធ្វើ​ឲ្យ​យើង​ស្លាប់​ដែរ។ យល់​ទេ អា​កន្លែង​ហ្នឹង​? បញ្ហា​ធំ​ស្ថិត​ត្រង់​យើង​កែ​ទម្រង់​នេះ។ ថ្ងៃ​ទី២៩​ ខែ​មីនា​ ខាង​មុខ​ នឹង​ប្រកាស​ជា​កញ្ចប់​នៃ​កំណែ​ទម្រង់​នេះ​តែ​ម្ដង»

មិន​ដឹង​ថា ​កម្មករ​អាច​ទទួល​យក​បាន​ប៉ុណ្ណា​នោះ​ឡើយ ចំពោះ​ការ​ពន្យល់​របស់​លោក ហ៊ុន សែន ព្រោះ​សូម្បី​តែ​សហជីព​ដែល​តំណាង​ឲ្យ​ថៅកែ​រោងចក្រ និង​សភា​ពាណិជ្ជកម្ម​កម្ពុជា និង​ស្ថាប័ន​ជំនួញ​ធំៗ ដែល​ស្និទ្ធ​នឹង​របប​លោក​ក៏​សុទ្ធតែ​បាន​ថ្លែង​ពី​ក្ដី​បារម្ភ​ខ្លាំង​របស់​ខ្លួន ចំពោះ​ផល​ប៉ះពាល់​នេះ​ដែរ។គ្រាន់តែ​ផ្នែក​កម្មករ​រោងចក្រ​កាត់ដេរ​មួយ កម្មករ​រាប់​សែន​នាក់​ពឹងផ្អែក​ទាំង​ស្រុង​លើ​ការ​នាំ​ចេញ​ទៅ​សហភាព​អឺរ៉ុប តាម​រយៈ​ប្រព័ន្ធ​អនុគ្រោះ​ពន្ធ EBA ដែល​កម្ពុជា​ចំណេញ​ការ​បង់ពន្ធ​ជិត ៧០០លាន​ដុល្លារ​ក្នុង​មួយ​ឆ្នាំៗ។ មិនទាន់​ឃើញ​ស្ថាប័ន​ណា​មួយ​ចេញ​សេចក្ដី​ថ្លែងការណ៍​ថា កំណែ​ទម្រង់​ថ្មី ដែល​លោក ហ៊ុន សែន គ្រោង​ប្រកាស​នេះ អាច​ជួយ​អ្វី​បាន​ដល់​ស្ថានភាព​សេដ្ឋកិច្ច​ខ្មែរ ដែល​ពឹង​ខ្លាំង​លើ​ទីផ្សារ​សហភាព​អឺរ៉ុប​នោះ​ទេ។

ចំណែក​អ្នកវិភាគ​គោលនយោបាយ​វិញ​គ្មាន​ជំនឿ​ថា​ កំណែ​ទម្រង់​សេដ្ឋកិច្ច​នោះ​អាច​ធ្វើ​ទៅ​រួច​ដោយ​មាន​ប្រសិទ្ធភាព​នោះ​ទេ ព្រោះ​សេដ្ឋកិច្ច​កម្ពុជា​ នៅ​តែ​មាន​ភាព​ទន់ខ្សោយ​ និង​ពឹង​ពាក់​ខ្លាំង​លើ​ការ​អនុគ្រោះ​ផ្នែក​ពាណិជ្ជកម្ម ​និង​កម្ចី​ពី​បរទេស​នៅ​ឡើយ។ សាស្ត្រាចារ្យ​ផ្នែក​កិច្ចការ​ការ​ទូត និង​ពិភពលោក​ នៃ​សាកល​វិទ្យាល័យ​អុកស៊ីដិនថល (Occidental College) នៅ​ទីក្រុង​ឡូស​ អែនជីឡេស (Los Angeles) រដ្ឋ​កាលីហ្វ័រញ៉ា (California) សហរដ្ឋ​អាមេរិក បណ្ឌិត អៀ សុផល លើក​ឡើង​បន្ថែម​ថា ​បញ្ហា​អំពើ​ពុក​រលួយ​ដ៏​រ៉ាំរ៉ៃ​ពី​លើ​ដល់​ក្រោម​ រឹត​តែ​ធ្វើ​ឲ្យ​កំណែ​ទម្រង់​នេះ​មិន​ជោគជ័យ។

ប្រទេស​កម្ពុជា​ជាប់​ចំណាត់​ថ្នាក់​ក្នុង​ចំណោម​ប្រទេស​ពុក​រលួយ​ជាង​គេ​បំផុត​នៅ​លើ​ពិភព​លោក។នៅ​ក្នុង​សន្ទស្សន៍​អំពើពុករលួយ​ឆ្នាំ២០១៨​ របស់​អង្គការ​តម្លាភាព​អន្តរជាតិ​រក​ឃើញ​ថា​ ប្រទេស​កម្ពុជា​ជាប់លេខ​រៀង​ទី ១៦១ ពោល​គឺ​ធ្លាក់​ដល់​ជិត​បាត​តារាង ក្នុង​ចំណោម​ប្រទេស ១៨០ ឬ​ជាប់​ពិន្ទុ ២០ លើ ១០០ ដែល​ពិន្ទុ ១០០ គឺ​ស្អាតស្អំ​បំផុត និង​ពិន្ទុ ០ ពុក​រលួយ​បំផុត។

ឥឡូវ​នេះ​នាឡិកា​ម៉ោង​កំណត់​នីតិវិធី​ព្យួរ​ការ​អនុគ្រោះ​ពន្ធ​នោះ​រំកិល​ទៅ​មុខ​ មិន​ថយ​ក្រោយ​វិញ​ទេ។សំណួរ​ គឺ​ស្ថិត​នៅ​ត្រង់​ថា តើ​លោក ហ៊ុន សែន អាច​បន្ត​អូស​ក្រឡា​បាន​យូរ​ប៉ុណ្ណា​ទៀត ទម្រាំ​ដល់​ពេល​គាត់​ស៊ូ​ទ្រាំ​នឹង​សម្ពាធ​នេះ​លែង​បាន?

តាំងពី​មុន​ការ​រម្លាយ​គណបក្ស​ សង្គ្រោះ​ជាតិ​ មក​ម្ល៉េះ ​លោក​ ហ៊ុន​ សែន​ មិនមែន​មិន​ដឹង​អំពី​ផល​វិបាក​នៃ​ការ​ព្យួរ​ការ​អនុគ្រោះ​ពន្ធ​នោះ​ទេ។ ប៉ុន្តែ លោក ហ៊ុន សែន ច្បាស់​ជា​គិត​ថា នៅ​ទីបំផុត​យ៉ាង​ច្រើន​ធ្វើ​តាម​សំណូមពរ​អន្តរជាតិ គាត់​អាច​រួច​ខ្លួន និង​ចំណេញ​បាន​រម្លាយ​ដៃគូ​ប្រកួត និង​ធ្វើ​ឲ្យ​បក្ស​ប្រឆាំង​ចុះ​ខ្សោយ។ ចំពោះ​លោក ហ៊ុន សែន ការ​ងាក​ទៅ​ធ្វើ​តាម​សហភាព​អឺរ៉ុប គឺ​គ្មាន​ខាត​បង់​អ្វី​ទាំង​អស់ សម្រាប់​លោក និង​បក្ស​កាន់​អំណាច។ ចំណុច​នេះ គឺ​វា​ស្រប​ទៅ​នឹង​យុទ្ធសាស្ត្រ​រុញ​ទូក​បណ្ដោយ​ទឹក ដែល​លោក​បាន​ប្រកាស​តាម​ហ្វេសប៊ុក​លោក កាល​ពី​ខែ​វិច្ឆិកា ឆ្នាំ២០១៨។

ជាពិសេស​ជាង​នេះ​ទៅ​ទៀត​ ក្រោយ​រម្លាយ​គណបក្ស​ប្រឆាំង​ លោក​ ហ៊ុន​ សែន​ អាច​បន្ត​ក្រាញ​អំណាច​យ៉ាង​ហោច​ណាស់​ ក៏​បាន​មួយ​អាណត្តិ​នេះ​ទៀត ​និង​បាន​ឆ្លៀត​ឱកាស​ដំឡើង​ឋានៈ​កូន​ប្រុស​ច្បង​របស់​លោក ​គឺ​លោក​ ហ៊ុន​ ម៉ា​ណែត ឲ្យ​ឡើង​ដល់​ឧត្ដមសេនីយ៍​ផ្កាយ​បី និង​លើក​បន្តុប​តំណែង​កំពូលៗ ក្នុង​ជួរ​កងទ័ព​ឲ្យ​កូន​ប្រុស​នេះ ដើម្បី​ត្រៀម​ជើង​ព្រួល​ឲ្យ​ហើយ ងាយ​ស្រួល​បន្ត​តំណែង​ត​ពូជ​ពង្ស​វង្ស​ត្រ​កូល ហ៊ុន ពេល​អត់​ពី​លោក​ទៅ។

កូន​ប្រុស​លោក​ម្នាក់ទៀត​ គឺ​លោក​ ហ៊ុន​ ម៉ា​នី​ ដែល​រង​ការ​ចោទ​ប្រកាន់​ពី​រឿង​អាស្រូវ​ផ្លូវ​ភេទ​ជា​ច្រើន ក៏​បាន​កាន់​តំណែង​ខ្ពស់​ជា​ប្រធាន​គណៈកម្មការ​រដ្ឋសភា​មួយ​ដែរ។ មិន​តែ​ប៉ុណ្ណោះ គណបក្ស​កាន់​អំណាច​ក៏​បាន​ឆ្លៀត​ប្រញាប់ប្រញាល់​ដំឡើង​ឋានៈ​របស់​កូនៗ របស់​រដ្ឋមន្ត្រី​ជា​ច្រើន​រូប​ ឲ្យ​កាន់​ការ​ជា​អភិបាល​ខេត្ត​ និង​តំណែង​សំខាន់ៗ ជា​ច្រើន​ផ្សេង​ទៀត​ទាន់​ឱកាស​នៅ​មាន។

ជោគជ័យ​ដ៏​សម្បើម​របស់​លោក​ ហ៊ុន​ សែន​ និង​គណបក្ស ប្រជាជន​កម្ពុជា ​មួយ​ទៀត ​គឺ​ការ​បំបាត់​ដៃគូ​ប្រកួត​ក្នុង​ឆាក​នយោបាយ​ក្រោយ​រម្លាយ​ក្បាល​ម៉ាស៊ីន​ដឹក​នាំ​របស់​បក្ស​ប្រឆាំង​នៅ​ក្នុង​ប្រទេស​ដោយ​ហាម​ឃាត់​សិទ្ធិ​នយោបាយ​មន្ត្រី​បក្ស​នេះ​ចំនួន ១១៨រូប និង​រម្លាយ​តំណែង​ក្រុមប្រឹក្សា​ឃុំ​សង្កាត់​ជាប់​ឆ្នោត​របស់​បក្ស​នេះ​ទាំង ៥.០០៧រូប។

ស្រប​ពេល​ជាមួយគ្នា​ដែរ​របប​លោក​ ហ៊ុន​ សែន ​ក៏​ជោគជ័យ​ក្នុង​ការ​បណ្ដេញ​អង្គការ​សង្គម​ស៊ីវិល​ ដូចជា ​វិទ្យាស្ថាន​ជាតិ​ប្រជាធិបតេយ្យ​របស់​សហរដ្ឋ​អាមេរិក (NDI) បិទ​បន្ទប់​ស្ថានការណ៍​បោះ​ឆ្នោត​ដែល​ជា​បណ្ដុំ​អង្គការ​សង្គម​ស៊ីវិល​ជាង ៤០ បិទ​ប្រព័ន្ធ​ផ្សព្វផ្សាយ​ឯករាជ្យ​ចាប់​អ្នក​សារព័ត៌មាន​ដាក់​គុក​ធ្វើ​ទុក្ខ​បុក​ម្នេញ​ដល់​អ្នកវិភាគ​មន្ត្រី​សហជីពកម្មករ​ឯករាជ្យ និង​សកម្មជន​សិទ្ធិមនុស្ស​ដីធ្លី​ បរិស្ថាន​ជា​ដើម។

ប៉ុន្តែ​ក្នុង​ពេល​ជាមួយគ្នា​នេះ​ លោក ហ៊ុន សែន ប្រឹង​លេង​ល្បែង​យក​ចិត្ត​កម្មករ​រោងចក្រ​កាត់ដេរ​យ៉ាង​ចម្លែក​ និង​មិន​ដែល​ធ្លាប់​មាន​ក្នុង​ប្រវត្តិ​ជា​មេ​ដឹក​នាំ​ក្រាញ​អំណាច​ជាង ៣០ឆ្នាំ​មក​នេះ។ ការ​លួង​ចិត្ត​កម្ម​ករ​ដោយ​ចែក​លុយ​ម្នាក់ ៥ដុល្លារ​រាល់​ពេល​ចុះ​ជួប​ម្តងៗ និង​ការ​ដំឡើង​ប្រាក់​ខែ​ខ្លះ​ធ្វើ​ឲ្យ​លោក​ ហ៊ុន​ សែន​ មាន​អំនួត​ថា​ លោក​អាច​ទិញ​ចិត្តកម្ម​ករ​បាន​ហើយ៖ «ខ្ញុំ​កំពុង​ច្បាម​នៅ​មុខ​សញ្ញា​កម្មករ​ ដែល​ខ្ញុំ​គិត​ថា​ វា​នឹង​អាច​ឱ្យ​ក្នុង​ជួរ​កម្មករ​ប្រែ​ពណ៌​ ដែល​មុន​នេះ​ បងប្អូន​យើង​គិត​ថា​ កម្មករ​ គឺ​ជា​កម្លាំង​គាំទ្រ​បក្ស​ប្រឆាំង។ ក៏​ប៉ុន្តែ​ផ្ទុយ​ទៅ​វិញ​ទេ ​ឥឡូវ​នេះ​ស្ថានភាព​នៅ​ក្នុង​ជួរ​កម្មករ​មាន​ការ​ប្រែ​ពណ៌​ហើយ»

ក្រោយ​បោះឆ្នោត​ភ្លាម​លោក​ ហ៊ុន​ សែន​ សម្រេចជោគជ័យ​មួយ​ថ្មីទៀត​ក្នុង​ល្បែង​ឆ្ពិន​ភ្នែក​របស់​លោក​នោះ​គឺ​ការ​បង្កើត​ឧត្ដម​ក្រុម​ប្រឹក្សា​ពិគ្រោះ​ និង​ផ្ដល់​យោបល់​ ដែល​ជា​បណ្ដុំ​គណបក្ស​នយោបាយ​មិន​ជាប់​ឆ្នោត។ លោក​ ហ៊ុន​ សែន បាន​ប្រគល់​តំណែង​ស្មើ​រដ្ឋមន្ត្រី និង​ប្រាក់ខែ​ ទៅ​ឲ្យ​ប្រធាន​គណបក្ស​ទាំង​នោះ និង​បង្កើត​ឲ្យ​មាន​រូបភាព​មួយ​ទំនង​ជា​ចង់​ឲ្យ​គេ​ជឿ​ថា ក្រុម​ប្រឹក្សា​នេះ​អាច​ជំនួស​គណបក្ស​ប្រឆាំង​បាន និង​ថា កម្ពុជា​មាន​ភាព​ពហុ​និយម​ផ្នែក​គណបក្ស​នយោបាយ ព្រោះ​មាន​បក្ស​ច្រើន​ចូលរួម​ផ្ដល់​យោបល់​ដល់​របប​នេះ។

ពាក្យចាស់​លោក​ថា​ "អូស​ទូក​កុំ​ឲ្យ​ល្អាន ចាប់​ត្រី​បាន​កុំ​ឲ្យ​ល្អក់​ទឹក"។ ប៉ុន្តែ​លោក​ ហ៊ុន​ សែន​ ជ្រើស​យក​យុទ្ធសាស្ត្រ​ ចាប់​ត្រី​បាន​មិន​ខ្វល់​រឿង​ល្អក់​ទឹក។ ចាប់​ត្រី​បាន​មានន័យ​ថា​ លោក​រម្លាយ​គណបក្ស​ សង្គ្រោះ​ជាតិ ​បាន​សម្រេច​ និង​ធ្វើ​ឲ្យ​រចនាសម្ព័ន្ធ​ ដែល​នៅ​សេ​សល់​របស់​បក្ស​នេះ​ពិបាក​ប្រមូល​ផ្ដុំ​កម្លាំង​ដោយសារ​ការ​ធ្វើទុក្ខ​បុក​ម្នេញ​ឥត​ស្រាក​ស្រាន្ត​ពី​របប​លោក​។ចំណែក​ទឹកល្អក់​វិញ​ គឺ​មានន័យថា​ស្ថានភាព​គោរព​សិទ្ធិមនុស្ស​ប្រជាធិបតេយ្យ​ និង​ នីតិរដ្ឋ​នៅ​កម្ពុជា​រង​ភាព​អាម៉ាស់​យ៉ាង​ដំណំ​ក្នុងចំណោម​អ្នក​និយម​ប្រជាធិបតេយ្យ​ខ្មែរ​ និង​នៅ​លើ​ឆាក​អន្តរជាតិ។

ក៏​ប៉ុន្តែ​លោក ​ហ៊ុន​ សែន ​ប្រហែល​ជា​មិន​ខ្វល់​ទៅ​នឹង​មុខ​មាត់​របស់​កម្ពុជា​នេះ​ទេ។ លោក​ខ្វល់​តែ​ការ​បន្ត​ការ​ក្រាញ​អំណាច​យូរ​ត​ទៅ​ទៀត​តែ​ប៉ុណ្ណោះ ព្រោះ​ចុង​ក្រោយ​លោក​អាច​ក្រឡះ​ចិត្ត​ងាក​មក​ធ្វើ​តាម​ការ​ចង់​បាន​របស់​សហភាព​អឺរ៉ុប។ ការ​ផ្លាស់​ប្ដូរ​ចិត្ត​របស់​លោក​ ហ៊ុន​ សែន​ ពី​ដាច់​ខាត​មក​បន្ទាន់​ឥរិយាបថ​តាម​សម្ពាធ​អន្តរជាតិ​ នេះ​មិន​មែន​ជា​រឿង​អ្វី​ចម្លែក​នោះ​ទេ។ លោក​ ហ៊ុន​ សែន​ ធ្លាប់​បំពាន​ពាក្យ​សន្យា ​និង​ការ​ប្ដេជ្ញា​ចិត្ត​របស់​លោក​ឡើង​ស៊ាំ​ជា​ទម្លាប់​ទៅ​ហើយ។ លោក​ធ្លាប់​ប្ដេជ្ញា​ កាល​ពី​ដើម​ឆ្នាំ២០០២ ថា បើ​ទប់​ស្កាត់​ការ​កាប់​បំផ្លាញ​ព្រៃ​ឈើ​មិន​បាន​ទេ ​លោក​សុខ​ចិត្ត​កាត់​ក្បាល​លោក​ចោល​ទៀត​ផង៖ «សុំ​សាកល​មើល​ទៅ​ បើ​មិន​គោរព​ ក៏​សុំ​សាក​បើ​មិន​ដក​យក​ព្រៃ​បិទ​រោងចក្រ​ទេ ​ខ្ញុំ​ហ៊ាន​កាត់​ក​ខ្ញុំ​ក្រវាត់​ចោល»។ ១៥ឆ្នាំ ក្រោយ​មក​ ការ​កាប់​បំផ្លាញ​ព្រៃ​ឈើ​នៅ​តែ​កើត​ឡើង​ពេញ​បន្ទុក។ អង្គការ​អន្តរជាតិ​នៅ​ទី​ក្រុង​ឡុងដ៍ (London) ប្រទេស​អង់គ្លេស​ឈ្មោះ​ ទីភ្នាក់ងារ​ស៊ើប​អង្កេត​បរិស្ថាន​ឬ អ៊ី​.អាយ​.អេ​(EIA​)បាន​ចេញ​របាយការណ៍​មួយ​កាលពី​ខែឧសភា​ ឆ្នាំ​ ២០១៧​ រក​ឃើញ​ថា​អាជ្ញាធរ​ពុករលួយ​នៃ​ប្រទេស​កម្ពុជា ​និង​ប្រទេស​វៀតណាម​ បាន​ទទួល​យក​ប្រាក់​សំណូក​រាប់​លាន​ដុល្លារ​សហរដ្ឋ​អាមេរិក​ពី​ឈ្មួញ​ឈើ ជា​ថ្នូរ​ឲ្យ​កាប់​ព្រៃ​ឈើ​នៅ​ក្នុង​តំបន់​ព្រៃ​អភិរក្ស​ក្នុង​ប្រទេស​កម្ពុជា ដូច​ជា នៅ​តំបន់​ឧទ្យាន​ជាតិ​វីរ​ជ័យ និង​អនុញ្ញាត​ឲ្យ​នាំ​ឈើ​ខុស​ច្បាប់​ចេញ​ទៅ​ប្រទេស​វៀតណាម រួម​ទាំង​ជួយ​ប្រែ​ក្លាយ​ធ្វើ​ឈើ​ឲ្យ​ខុសច្បាប់​ទាំង​នោះ​ឲ្យ​ទៅ​ជា​ឈើ​ស្រប​ច្បាប់​វិញ។

ថ្មីៗ នេះ​ទៀតសោត លោក​ប្ដេជ្ញា​ថា មិន​ជ្រលក់​មាត់​រក​លោក​ សម​ រង្ស៊ី ដើម្បី​កុំ​ឲ្យ​លោក សម រង្ស៊ី បាន​ចិត្ត។ ប៉ុន្តែ​តាំង​ពី​សន្យា​នោះ​មក​ លោក​ឆ្លើយឆ្លង​ដាក់​លោក សម រង្ស៊ី ស្ទើរ​គ្រប់​វេទិកា​សាធារណៈ។

ទោះបីជា​នៅទីបំផុត​លោក​ ហ៊ុន​ សែន​ អាច​នឹង​ប្ដូរ​ចិត្ត​មក​ធ្វើ​តាម​សហភាព​អឺរ៉ុប​ ដើម្បី​ទទួល​បាន​ការ​អនុគ្រោះ​ពន្ធ​បន្ត​ទៀត​យ៉ាង​ណា​ក្ដី​ ក៏​មន្ត្រី​សិទ្ធិមនុស្ស​អន្តរជាតិ​ថា ​សហភាព​អឺរ៉ុប​ និង​សហគមន៍​អន្តរជាតិ​ នឹង​ឃ្លាំមើល​ស្ថានការណ៍​កម្ពុជា​ក្នុង​ស្ថានភាព​ប្រយ័ត្នប្រយែង​ជាង​មុន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

evil dictator Hun sen pissing off the EU's EBA/GSP sanctions with claim that those EU's member are very low qualified officials and why want them to see him...and he won't cares what's hell they want see who...am not care ever...everything is on my deicision is not someone else...

Everything in Cambodia is under control by master criminal mind Hun Sen and its cronies in the last 4 decades.It doesn't what matter or who's the hell or what u are...the only thing that this horrible man worries the most is CNRP's members who still alive in millions heart of Cambodian pple by without anyone else parties with including tmil Hun Sen's CCP.Because Hun Sen himself not too worry to other small politic parties at all,and those parties didn't have a single seat in national assembly without pple support them,or just created to support evil Hun Sen's election to keep him more in power,or to avoid EBA/GSP/ economic sanctions coming"no human resources/opportunism".In Fact comrade Hun Sen try to makes lie,liar,cheater to get that free EBA/GSP's benefit to extension of his power.That's why he keeps threatening the CNRP's members every daily lives such as buying them with hundreds of ten thousands us$,offering a good job,or forcing them to joins his CCP crooks if some of them won't join it and try to do politic activity along in communes or districts will beat or kill...if they see one they've to kill one..see two kill two...see more kill more at any cost"+100% evil man responsible".Moreover,his top military in chief Ta Tea Banh commented in recent year national election that who were CNRP opposition's members should be punish by pull off the teeth like they did in killing fields era at"Toul Sleng interrogation killing camp in P Penh 1975-1979",with other one whom Heng Samrin's son in-law said those CNRP opposition members should use a bamboo trunk to knock them down on the back head like we did during the killing fields regime"there a lot former Khmer rouge vietminh notorious still alive at large in fascist dictator Hun Sen's rogue govm't and those have ever never bring to justice,and still committing atrocities on Khmer pple.

Mar 23, 2019 12:13 PM

គេហទំព័រ​ទាំងមូល