បទ​វិភាគ៖ ហេតុអ្វី​បាន​ជា​លោក ហ៊ុន សែន ដូរ​មេដឹកនាំ​យោធា​ដាក់​ជំនួស​ដោយ​កូន​របស់​លោក?

ទីន ហ្សាការីយ៉ា
2018-07-15
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន (ឆ្វេង) និង​កូន​ប្រុស លោក ហ៊ុន ម៉ាណែត។ លោក ហ៊ុន ម៉ាណែត កាល​ពី​ថ្ងៃ​ទី​៣ ខែ​មករា ឆ្នាំ​២០១១ ត្រូវ​បាន​តែងតាំង​ជា​មេបញ្ជាការ​រង​នៃ​បញ្ជា​ការដ្ឋាន​កងទ័ព​ជើង​គោក​នៃ​កង​យោធពល​ខេមរភូមិន្ទ។
លោក​នាយករដ្ឋមន្ត្រី ហ៊ុន សែន (ឆ្វេង) និង​កូន​ប្រុស លោក ហ៊ុន ម៉ាណែត។ លោក ហ៊ុន ម៉ាណែត កាល​ពី​ថ្ងៃ​ទី​៣ ខែ​មករា ឆ្នាំ​២០១១ ត្រូវ​បាន​តែងតាំង​ជា​មេបញ្ជាការ​រង​នៃ​បញ្ជា​ការដ្ឋាន​កងទ័ព​ជើង​គោក​នៃ​កង​យោធពល​ខេមរភូមិន្ទ។
Photo courtesy of camnews.com

របប​លោក ហ៊ុន សែន បាន​ផ្លាស់ប្ដូរ​តួនាទី​មន្ត្រី​ជាន់ខ្ពស់​យោធា​ដែល​បាន​ប្រព្រឹត្តិ​អំពើ​រំលោភ​សិទ្ធិមនុស្ស​ជាច្រើន​ទសវត្សរ៍​មក​ហើយ​នៅ​ក្នុង​របប​របស់​លោក ដ៏​គួរ​ភ្ញាក់ផ្អើល និង​នឹកស្មាន​មិន​ដល់។

ការ​ផ្លាស់ប្ដូរ​មន្ត្រី​ជាន់ខ្ពស់​នៃ​កងយោធពល​ខេមរភូមិន្ទ​ឲ្យ​ទៅ​ស្ថាប័ន​នយោបាយ​វិញ​នេះ តាម​មើល​ទៅ​មិនមែន​ជា​ការ​ព្យួរ​តំណែង​មួយ​រយៈ ដោយសារតែ​ច្បាប់បោះឆ្នោត​រារាំង​តែ​មួយ​មុខ​នោះ​ទេ ផ្ទុយទៅវិញ​ហាក់បីដូចជា លោក ហ៊ុន សែន មាន​យុទ្ធសាស្ត្រ​រុះរើ មន្ត្រី​នៅ​កៀកកើយ​លោក​ឲ្យ​ទៅ​កាន់​ខាង​កិច្ចការ​ស៊ីវិល​វិញ ក្នុង​គោលបំណង​ដើម្បី​មាន​ឱកាស​ដំឡើង​កូនចៅ សាច់ញាតិ​លោហិត​ផ្ទាល់​របស់​លោក ឲ្យ​ទៅកាន់​តួនាទី​យោធា​ជាន់ខ្ពស់​ជំនួស​មន្ត្រី​ទាំងអស់​នោះ​វិញ ដើម្បី​ធ្វើ​ឲ្យ​មាន​ស្ថិរភាព​អំណាច​ក្រុម​គ្រួសារ​របស់​លោក​តទៅ​មុខ​ទៀត​បាន។

រដ្ឋាភិបាល​ថ្មី​មួយ​នឹង​បង្កើត​ឡើង​នៅ​ក្រោយ​ថ្ងៃ​ទី​២៩ កក្កដា ឆ្នាំ​២០១៨ បន្ទាប់ពី​ការរៀបចំ​បោះឆ្នោត​ដ៏​ចម្រូងចម្រាស ដែល​របប​របស់​លោក​បាន​រំលាយ​បក្ស​ប្រឆាំង​មិន​អនុញ្ញាត​ឲ្យ​ចូលរួម​ការបោះឆ្នោត​អាណត្តិ​ទី​៦​នេះ។

លោក ហ៊ុន សែន ទំនងជា​នឹង​ធ្វើ​ឲ្យ​ពលរដ្ឋ​មើល​ឃើញ​ពី​ការផ្លាស់ប្ដូរ​របៀប​ដឹកនាំ រដ្ឋាភិបាល​ជា​ទ្រង់ទ្រាយ​ថ្មី ដែល​លោក​ធ្លាប់​បាន​ប្រកាស​ជាច្រើន​ដង​រួច​ទៅ​ហើយ​ថា លោក នឹង​នៅ​តែ​ធ្វើ​ជា​នាយករដ្ឋមន្ត្រី​បន្ត​ទៀត ហើយ​លោក​នឹង​ធ្វើ​ឲ្យ​ពលរដ្ឋ​មើល​ឃើញ​ពី​ការ​រុះរើ​ក្បាលម៉ាស៊ីន​ដឹកនាំ​ដោយ​ផ្លាស់ប្ដូរ​ពី​មនុស្ស​ដែល​មាន​វ័យ​ចំណាស់ ជំនួស​មកវិញ ពី​ក្រុម​យុវជន​ក្មេង​ជំនាន់​ក្រោយ ដែល​ជា​បក្សពួក និង​សាច់សាលោហិត​របស់​លោក​ជា​មិនខាន។

នៅ​ពេល​នោះ មន្ត្រី​ជាន់ខ្ពស់​យោធា ដែល​អ្នកខ្លះ​ខិតខំ​ធ្វើការ​បម្រើ​របប​លោក​ជាច្រើន​ទសវត្សរ៍​មក​ហើយ ពេល​ខ្លះ ទោះ​ជា​ប្រើ​សារ​នយោបាយ ឲ្យ​ពលរដ្ឋ​ស្អប់ខ្ពើម​ខ្លួន ក៏​ពួកគេ​ហ៊ាន​ប្រើ​ដែរ ដើម្បី​បំពេញ​បំណង​លោក ហ៊ុន សែន និង​មហិច្ឆតា​របស់​ខ្លួន ឧទាហរណ៍​ដូចជា លោក ទៀ បាញ់ រដ្ឋមន្ត្រី​ការពារ​ជាតិ​ធ្លាប់​ប្រកាស​គំរាម​ពលរដ្ឋ​វាយ​បាក់ធ្មេញ​ចំពោះ​អ្នកណា​ហើយ ដែល​ហ៊ាន​ងើប​តវ៉ា​បាតុកម្ម​ប្រឆាំង​របប​បច្ចុប្បន្ន។ មេទាហាន​ផ្សេងទៀត ក៏​ប្រកាស​ប្ដូរ​ផ្ដាច់ ការពារ​របប​លោក ហ៊ុន សែន ដូចគ្នា​នេះ​ដែរ។

ជា​សំណង​ចំពោះ​ភក្ដីភាព​របស់​មេទាហាន​ទាំងនេះ​វិញ លោក ហ៊ុន សែន នាទី​ចុងក្រោយ បាន​ព្យួរ​ឬ​ផ្ទេរ​មុខ​ដំណែង មន្ត្រី​កំពូល​ក្នុង​ជួរ​កងយោធពល​ខេមរភូមិន្ទ ៣​រូប ទៅ​ឲ្យ​កូនប្រុស​លោក គឺ​លោក ហ៊ុន ម៉ាណែត និង​មន្ត្រី​ជំនិត​របស់​លោក​មួយទៀត គឺ​លោក សៅ សុខា។ ឧត្ដមសេនីយ៍​ទាំង​បី​រូប​នោះ​មាន​លោក ប៉ុល សារឿន អគ្គមេបញ្ជាការ​កង​យោធពល​ខេមរភូមិន្ទ លោក គន់ គីម អគ្គមេបញ្ជាការ​រង​នៃ​កងយោធពល​ខេមរភូមិន្ទ​ផង និង ជា​នាយសេនាធិការ​ចម្រុះ នៃ​កង​យោធពល​ខេមរភូមិន្ទ​ផង និង​លោក មាស សុភា ជា​អគ្គ​មេបញ្ជាការ​រង និង​ជា​មេបញ្ជាការ​កងទ័ពជើងគោក។

ការ​ព្យួរ​មុខតំណែង​នេះ ត្រូវ​បាន​អ្នកនាំពាក្យ​ក្រសួងការពារជាតិ​លោក ឈុំ សុជាតិ អះអាង​ក្នុង​ទំព័រ​ហ្វេសប៊ុក (Facebook) របស់​លោក​កន្លង​មក ថា ដោយសារ​អ្នក​ទាំងនោះ ត្រូវ​ឈរ​ឈ្មោះ​ជា​បេក្ខជន​តំណាងរាស្ត្រ របស់​គណបក្ស​ប្រជាជន​កម្ពុជា នៅ​តាម​មណ្ឌល​ផ្សេងៗ សម្រាប់​ការប្រកួតប្រជែង​ការ​បោះឆ្នោត​ជាតិ នៅ​ថ្ងៃ​ទី​២៩ ខែ​កក្កដា ឆ្នាំ​២០១៨ ។ ការ​ព្យួរ​តំណែង​នេះ តាមមើលទៅ​ពួកគេ​មិន​អាច​វិល​ត្រលប់​ទៅកាន់​ស្ថាប័ន​ដើម និង​កាន់​តួនាទី​ជា​មេដឹកនាំ​ជាន់ខ្ពស់​យោធា​វិញ​ឡើយ។

នរណា​ក៏​ដឹង​ដែរ​ថា ឧត្ដមសេនីយ៍​ទាំងនេះ​ខិតខំ​ធ្វើ​កិច្ចការ​សព្វបែបយ៉ាង ដើម្បី​ការពារ​ក្រុម​គ្រួសារ និង​របប​លោក ហ៊ុន សែន ក្នុង​រយៈពេល​ជាង​២០​ឆ្នាំ​មកនេះ។ លើស​ពី​នេះ​ឧត្ដមសេនីយ៍​ទាំងនោះ ជាប់​នៅ​ក្នុង​បញ្ជី​ឈ្មោះ​អាក្រក់​លើ​ពិភពលោក​ទៀត ដោយសារតែ​សកម្មភាព​រំលោភ​សិទ្ធិ​មនុស្ស ក្នុង​នោះ​មានការ​បង្ក្រាប និង​ការ​បាញ់​សម្លាប់​មនុស្ស ជាក់ស្ដែង​ឧត្ដមសេនីយ៍​ទាំង ៣​នាក់ ក្នុង​ចំណោម​ឧត្ដមសេនីយ៍ ១២​រូប ដែល​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) បាន​ចេញ​របាយការណ៍​ស្ដីពី «បុគ្គល​នាយ​ឧត្ដមសេនីយ៍​មាន​បាតដៃ​កខ្វក់​១២​រូប​របស់​កម្ពុជា៖ ប្រវត្តិ​រំលោភ​សិទ្ធិ​មនុស្ស​ដ៏​យូរអង្វែង​នៃ​នាយ​ឧត្ដមសេនីយ៍​របស់​លោក ហ៊ុន សែន»។ របាយការណ៍​នេះ លាតត្រដាង​ឲ្យ​ឃើញ​ថា កម្ពុជា​កាន់តែ​ប្រែក្លាយ​ទៅ​រក​របប​ផ្ដាច់ការ និង​ការដឹកនាំ​បែប​ឯក​បក្ស ដោយសារតែ​នាយ​ឧត្ដមសេនីយ៍​មាន​បាតដៃ​កខ្វក់​ទាំង​១២​រូប ក្នុង​ជួរ​កងកម្លាំង​សន្តិសុខ​របស់​លោក​នាយករដ្ឋមន្ត្រី ហ៊ុន សែន បាន​ធ្វើជា​ខ្នងបង្អែក​នៃ​របប​នយោបាយ​មួយ​ពោរពេញ​ទៅ​ដោយ​អំពើ​រំលោភបំពាន​សិទ្ធិមនុស្ស​ធ្ងន់ធ្ងរ​ជា​ប្រព័ន្ធ និង​មាន​ចរិត​ផ្ដាច់ការ​និយម។ ក្នុង​ចំណោម​ឧត្ដមសេនីយ៍​ទាំង ១២​នាក់​នោះ ក៏​មាន លោក គន់ គីម លោក ប៉ុល សារឿន និង​លោក មាស សភា ដែល​ទើប​ព្យួរ​តំណែង ហើយ​ទៅ​ឈរ​ជា​បេក្ខជន​តំណាងរាស្ត្រ​របស់​គណបក្ស​ប្រជាជន​កម្ពុជា។

នៅ​ក្រោយ​ពេល​របាយការណ៍ ត្រូវ​បាន​ផ្សព្វផ្សាយ​កាលពី​ចុង​ខែ​មិថុនា លោក ហ៊ុន សែន ហាក់​បង្ហាញ​កាយវិការ ការពារ​ឧត្ដមសេនីយ៍​ទាំងនោះ ដោយ​បញ្ចេញ​ប្រតិកម្ម​ខ្លាំង​ៗ​ឆ្លើយតប​ទៅ​របាយការណ៍​របស់​អង្គការ​ឃ្លាំមើល​សិទ្ធិមនុស្ស​អន្តរជាតិ​វិញ ហើយ​អះអាង​ថា ឧត្ដមសេនីយ៍​ទាំងនោះ​ជាមួយ​មន្ត្រី​ស្អាតស្អំ៖ «ត្រឹមតែ​១២​នាក់​វា​មិន​គ្រប់​ទេ គិត​ទាំង​ទាហាន និង​ប៉ូលិស​មាន​១៦​ម៉ឺន​នាក់ អ្នកឯង​ដាក់​ទាំងអស់​ទៅ ព្រោះ​ថ្ងៃមុន​ខ្ញុំ​និយាយ​តែ​ទាហាន​ទេ ដាក់ ប៉ុល សារឿន ដាក់ សៅ សុខា ដាក់​ហ៊ីង ប៊ុនហៀ​ង ដាក់​ផេះ​អី​ប៉ុណ្ណឹង​? ដាក់​ទាំងអស់​ហ្មង​ទៅ»

លោក ហ៊ុន សែន ថែម​ទាំង​ទាញ​ភ្ជាប់​កងកម្លាំង​យោធា និង​នគរបាល​ទាំងអស់​ទៅ​នឹង​រឿង​មន្ត្រី​បាតដៃ​កខ្វក់​នេះ ទំនងជា ហាក់​ចង់​បញ្ឆេះ​កំហឹង​កងកម្លាំង​ទ័ព និង​នគរបាល​ទាំងអស់ របស់​ជាតិ​ឲ្យ​ខឹង​អង្គការ​អន្តរជាតិ​មួយ​នេះ ហើយក៏​អាច​ដើម្បី​លួង​ចិត្ត​ឧត្ដមសេនីយ៍​ទាំង​១២​រូប ដែល​ជាប់​ឈ្មោះ​អាក្រក់​ដោយសារតែ​ការពារ​អំណាច​លោក​នោះ​ផង។ ក៏ប៉ុន្តែ​យុទ្ធសាស្ត្រ​បែបនេះ នឹង​មិន​ជោគជ័យ​ឡើយ លោក ហ៊ុន សែន ហាក់​ភ្លេចខ្លួន​ថា ឧត្ដមសេនីយ៍​ទាំងអស់ និង​យោធា នគរបាល​ជាច្រើន​ទៀត​របស់​ជាតិ ពួកគាត់​ក៏​មាន​ទឹកចិត្ត​ស្នេហា​ជាតិ និង​ជា​មនុស្ស​ស្មោះត្រង់​នឹង​ជាតិ​ដែរ។ រីឯ​កងទ័ព នគរបាល​មួយ​ចំនួន​ធំ​ទៀត ខិតខំ​ធ្វើការ​បម្រើ​ជាតិ អ្នកខ្លះ​ទៀត​ហ៊ាន​ពលី​ជីវិត នៅ​សមរភូមិ មិនបាន​ឡើង​បុណ្យ​ស័ក​ឡើយ ផ្ទុយ​ទៅវិញ ប្រាក់​បៀវត្សរ៍​ក៏​តិច ពេលខ្លះ​បើក​មិន​ទៀងទាត់ ពេល​ខ្លះ​ថ្នាក់​លើ​កាត់​ប្រាក់ខែ​ទៀត នេះ​បើ​យោង​តាម​ការ​ត្អូញត្អែរ​ពី​មេទាហាន នគរបាល​កន្លងមក។

ផ្ទុយទៅវិញ បើសិនជា​មិនមែន​យុទ្ធសាស្ត្រ​ដើម្បី​ពង្រឹង​អំណាច​ក្រុម​គ្រួសារ​លោក​ទេ​នោះ តាម​មើល​ទៅ លោក​មិនមែន​យក​តួនាទី​របស់​ឧត្ដមសេនីយ៍​ទាំងនោះ ទៅ​ប្រគល់​ជូន​កូន​របស់​លោក និង មនុស្ស​ជំនិត​របស់​លោក​ដូច្នេះ​ទេ។ ការ​ពង្រឹង​អំណាច​របស់​ខ្លួន និង​ក្រុម​គ្រួសារ​នេះ លោក ហ៊ុន សែន បាន​រៀប​សេណារីយូ ដក​សិទ្ធិ​អំណាច​មន្ត្រី​គ្រាក់ៗ នៅ​ក្បែរ​លោក​បន្តិច​ម្ដងៗ ជាក់ស្ដែង​ដូចជា​លោក​ឧត្ដមសេនីយ៍ គន់ គីម ដែល​ធ្លាប់​ជា​មន្ត្រី​មានអំណាច​ផ្អៀង​ផែនដី​នោះ ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ លោក​ហាក់បីដូចជា​គ្មាន​ឥទ្ធិពល​ខ្លាំង​ដូច​កាលពីមុន​ឡើយ តាំងពី​មុន​ពេល​ព្យួរ​តួនាទី​លោក​មក​ម្ល៉េះ។

លោក​បណ្ឌិត កែម ឡី ធ្លាប់​លើកឡើង​ក្នុង​បទ​វិភាគ​របស់​លោក​កន្លង​មក ដោយ​ប្រៀបធៀប​លោក​នាយករដ្ឋមន្ត្រី​ថា ជា​ខ្លា ហើយ​ថា​អ្នក​ដែល​នៅ​ក្បែរៗ​នឹង​ខ្លា​នោះ មិន​ប្រាកដ​ថា​ជា​អ្នក​ពេញចិត្ត​ខ្លា​នោះ​ឡើយ៖ «នៅ​ពេល​យើង​មើល​ឃើញ ឧទាហរណ៍​ទ្រង់​ខ្លា​មួយ​នៅ​ពេល​យើង​មើល​ឃើញ​ខ្លា​ស៊ី​ស្វា ស៊ី​សត្វ​ច្រើន​នៅ​ក្នុង​ហ្នឹង សូម្បី​យើង​មើល​ឃើញ​ពី​ចម្ងាយ​ក៏​យើង​ខ្លាច​ដែរ ចុះ​ល្មម​ដល់​សត្វ​នៅ​ក្បែរៗ​ហ្នឹង គឺ​សត្វ​ដែល​នៅ​ក្បែរៗ​ខ្លា គឺ​រងគ្រោះ​ជាង​ហើយ​នៅ​ឆ្ងាយ​ទៅទៀត»

ក្រៅ​ពី​នេះ​ទៀត លោក ហ៊ុន សែន​ក៏​បង្កើត​ច្បាប់​ស្ដីពី​ការរៀបចំ និង​ការ​ប្រព្រឹត្តទៅ​នៃ​ទីស្ដីការ​គណៈរដ្ឋមន្ត្រី ដែល​ច្បាប់​នេះ មាន​សិទ្ធិ​អំណាច ក្នុង​ការ​តែងតាំង និង​ដក​តួនាទី រដ្ឋលេខាធិការ និង អនុរដ្ឋលេខាធិការ ទោះបីជា​ច្បាប់​នេះ​រង​ការរិះគន់ និង​រំលោភ​រដ្ឋធម្មនុញ្ញ​យ៉ាងណាក្ដី។

នៅ​ត្រង់​ចំណុច​នេះ នរណា​ក៏​ដឹង​ដែរ​ថា លោក ហ៊ុន សែន មិនមែន​ត្រឹមតែ​លោក រិះរក​វិធី​គ្រប់​បែប​យ៉ាង ដើម្បី​បន្សាប​ឥទ្ធិពល ឬ​រំលាយ​ក្រុម​បក្ស​ប្រឆាំង​ប៉ុណ្ណោះ​ទេ សូម្បីតែ​សែស្រឡាយ អតីត​មេ​បក្ស​របស់​លោក គឺ លោក ជា ស៊ីម ក៏​លោក​បន្សាប​ឥទ្ធិពល​ដែរ។ លោក ហ៊ុន សែន បាន​ដក​តួនាទី លោក កែ គឹមយ៉ាន ពី​អគ្គបញ្ជាការ​កង​យោធពល​ខេមរភូមិន្ទ ទៅជា​ប្រធាន​អាជ្ញាធរ​ជាតិ​គ្រឿងញៀន កាលពី​ថ្ងៃ​ទី​២២ មករា ឆ្នាំ​២០០៩។ លោក បាន​ថ្លែង​ក្រោយពី​ដក​តួនាទី​លោក កែ គឹមយ៉ាន ភ្លាមៗ​ថា ជា​ការ​ធ្វើ​កំណែ​ទម្រង់​ស៊ីជម្រៅ​ប្រកបដោយ​ឆន្ទៈ​នយោបាយ​មោះមុត។ បន្ទាប់​មក​ទៀត នៅ​ថ្ងៃ​ទី​១៣ ខែ​សីហា ឆ្នាំ​២០១១ តុលាការ​របស់​លោក ក៏​ចាប់ខ្លួន លោក​ឧត្តមសេនីយ៍​ផ្កាយ​បី ឈឿន ចាន់ថន ប្រធាន​កង​អង្គរក្ស​លោក ជា ស៊ីម និង​ជា​នាយរង​សេនាធិការ​ចម្រុះ​នៃ​កងយោធពល​ខេមរភូមិន្ទ ដោយ​ចោទប្រកាន់​ជាច្រើន​ករណី ដូចជា​កាន់កាប់​អាវុធ​ខុសច្បាប់ ចែកចាយ​អាវុធ រំលោភ​សេចក្ដី​ទុកចិត្ត និង​ករណី​ផ្សេងៗ​ទៀត។ ដែល​សំណុំរឿង​ខ្លះ តុលាការ​ផ្ដន្ទាទោស ៧​ឆ្នាំ ១០​ឆ្នាំ និង​សំណុំរឿង​ខ្លះ​ទៀត ជាង​២០​ឆ្នាំ​ជាដើម។

ទន្ទឹម​នឹង​នេះ លោក ហ៊ុន សែន បាន​បន្សាប​ឥទ្ធិពល​លោក ស ខេង ដែល​លោក​ជា​ប្អូនថ្លៃ​លោក ជា ស៊ីម បន្តិច​ម្ដងៗ​ដែរ តាមរយៈ​ចាប់​យក​អភិបាលខែត្រ​ទាំងអស់ ដែល​នៅ​ក្រោម​ចំណុះ​របស់​ក្រសួង​មហាផ្ទៃ​នោះ មក​តែងតាំង​ជាទី​ប្រឹក្សា​ផ្ទាល់​របស់​លោក ដើម្បី​បន្សាប​ឥទ្ធិពល​របស់​លោក ស ខេង ផង និង​ដើម្បី​ឲ្យ​លោក​ងាយ​គ្រប់គ្រង និង​ក្ដោប​ក្ដាប់​អភិបាលខែត្រ​ទាំងនោះ​ដោយ​ផ្ទាល់ ក្នុង​នោះ លោក​ក៏​មាន​សិទ្ធិ​ក្នុង​ការ​លើក​បន្តុប​អ្នកណាម្នាក់​ទៅជា​អភិបាលខែត្រ ឬ​ដក​ចេញពី​តួនាទី​ពី​អភិបាល​ខែត្រ​វិញ​ដែរ។

ជាង​នេះ​ទៅ​ទៀត តាមមើលទៅ តួនាទី​របស់​លោក ស ខេង ជា​រដ្ឋមន្ត្រី​ក្រសួងមហាផ្ទៃ​នេះ ក៏​មិន​អាច​នៅ​គង់វង្ស​បាន​យូរ​អង្វែង​ដែរ លោក ហ៊ុន សែន ប្រហែលជា​នឹង​អាច​ដំឡើង​លោក ស ខេង ឲ្យ​កាន់តែ​ខ្ពស់ នៅ​ក្រោយ​ពី​បង្កើត​រដ្ឋាភិបាល​ថ្មី​អាណត្តិ​ទី​៦​នេះ ក្រោម​រូបភាព​ធ្វើ​កំណែ​ទម្រង់ និង​លើកទឹកចិត្ត។ លោក ស ខេង អាច​នឹង​ទៅកាន់​តំណែង​ជា​ប្រធាន​រដ្ឋសភា​វិញ​ក៏​ថា​បាន នៅ​គ្រា​ដែល​អនុប្រធាន​គណបក្ស​ប្រជាជន​កម្ពុជា​មួយ​រូប​ទៀត លោក សាយ ឈុំ ជា​ប្រធាន​ព្រឹទ្ធសភា​រួចទៅ​ហើយ​នោះ។ រីឯ​លោក ហេង សំរិន អាច​នឹង​ត្រូវ​ដំឡើង​ទៅជា​ឧបនាយករដ្ឋមន្ត្រី​ប្រចាំការ នៅ​ទីស្ដីការគណៈរដ្ឋមន្ត្រី​ជាដើម។ ហើយ​តួនាទី​ជា​រដ្ឋមន្ត្រី​ក្រសួងមហាផ្ទៃ លោក ហ៊ុន សែន នឹង​តែងតាំង ក្មួយ​ប្រសា​របស់​លោក​គឺ​លោក នេត សាវឿន ជំនួស​លោក ស ខេង រី​ឯ​កូន​ប្រសារ​របស់​លោក ឌី វិជ្ជា ដែល​ជា​កូនប្រុស​របស់​លោក ហ៊ុក ឡង់ឌី នោះ នឹង​ត្រូវ​តែងតាំង​ជា​អគ្គស្នងការ​នគរបាល​ជាតិ​វិញ​ក៏​ថា​បាន។

ចំពោះ​តួនាទី​លោក ទៀ បាញ់ ជា​រដ្ឋមន្ត្រី​ក្រសួងការពារជាតិ​វិញ ក៏​នឹង​អាច​ផ្លាស់ប្ដូរ​ដែរ តំណែង​ជា​រដ្ឋមន្ត្រី​ក្រសួងការពារជាតិ​នេះ តាមមើលទៅ​គ្មាន​អ្នកណា​ក្រៅពី​កូន​សំណព្វ​ចិត្ត​របស់​លោក គឺ លោក ហ៊ុន ម៉ាណែត នោះ​ឡើយ ដើម្បី​ឲ្យ​សាធារណជន​មើល​ឃើញ​ពី​ការផ្លាស់ប្ដូរ​ក្បាលម៉ាស៊ីន​ដឹកនាំ​ស្ថាប័នរដ្ឋ ដែល​ធ្លាប់តែ​ដឹកនាំ​ដោយ​ក្រុម​មនុស្ស​មាន​វ័យ​ចំណាស់ ជំនួស​មកវិញ​ដោយ​ក្រុម​មនុស្ស​វ័យក្មេង​ឈាម​ថ្មី ដែល​ចេញពី​វង្ស​ត្រកូល​លោកនាយក​រដ្ឋមន្ត្រី។

នៅ​ពេល​នោះ អំណាច​ទាំងមូល​នឹង​នៅ​ក្នុង​កណ្ដាប់ដៃ លោក ហ៊ុន សែន ហើយ​លោក​ក៏​នឹង​កាត់​បន្ថយ​ការ​ភ័យខ្លាច អំពី​ការបះបោរ​ណាមួយ​ពី​ក្រុម​ផ្ទៃក្នុង​បក្ស​របស់​លោក ឬ​ហៅថា ដង្កូវ​ផុស​ចេញ​ពី​ក្នុង​សាច់​ក៏​ថា​បាន ព្រោះថា​កន្លងមក លោក ហ៊ុន សែន តែងតែ​គំរាម​ថា បើ​អត់​ពី​លោក​នឹង​មាន​សង្គ្រាម​នោះ ទំនងជា​លោក​ព្រួយបារម្ភ​មាន​ចលនា​ងើប​បះបោរ​ពី​ក្រុម​នៅ​ជួរ​បក្ស​របស់​លោក​ក៏​ថា​បាន ព្រោះ​ក្រុម​បក្ស​ប្រឆាំង ពលរដ្ឋ​រងគ្រោះ​ដីធ្លី និង​សហគមន៍​រងគ្រោះ​ផ្សេងទៀត គ្មាន​អាវុធ​នៅ​ដៃ ដូច​ពី​ជំនាន់​គណបក្ស​ហ៊្វុនស៊ិនប៉ិច​ឡើយ។

អ្វី​ដែល​ជា​គោលបំណង​ធំ ដែល​លោក ហ៊ុន សែន រៀបចំ​សេណារីយូ នយោបាយ​បែបនេះ គឺ​លោក​ចង់​ទាញ​ប្រទេស​កម្ពុជា​ទៅជា​របប​យោធា និង​ក្រុម​គ្រួសារនិយម មិន​ខុស​ពី​របប​កុម្មុយនិស្ត​កូរ៉េខាងជើង ដែល​តំណែង​ឪពុក​នឹង​ត្រូវ​រក្សាទុក​បន្ត​ឲ្យ​កូន​នោះ​ឡើយ។ ហើយ បញ្ហា​សំខាន់​លោក​ចង់​ឲ្យ​លោក ហ៊ុន ម៉ាណែត ដឹកនាំ​កម្ពុជា​បន្ត​ពី​លោក តែ​លោក​ត្រូវ​រៀបចំ​យុទ្ធសាស្ត្រ​ការពារ​អំណាច​នេះ​ឲ្យ​បាន​រឹងមាំ​ជា​មុន​សិន ដោយ​លោក​ក្ដោប​ក្ដាប់​ប៉ូលិស ទាហាន បាន​ទាំងស្រុង ហើយ​រយៈពេល​ពីរ​អាណត្តិ​ទៀត តួនាទី​ជា​នាយក​រដ្ឋមន្ត្រី​នេះ នឹង​ប្រគល់​ជូន​លោក ហ៊ុន ម៉ាណែត ដូច​ដែល​លោក​ធ្លាប់​អះអាង​ជាច្រើនលើក​ថា លោក​ត្រូវ​ការ​ដឹកនាំ​ប្រទេស តែ​ពីរ​អាណត្តិ​ទៀត​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

tmil Hun Sen running VS time

Tmil Hun Sen is trying to turns left with 180 degrees to hit the brake before getting kill to others"evil Hun Sen's last suicide mission/time to live free or time to die".

Jul 19, 2018 07:13 PM

Khmer

ពី Canada. Ontario

Every body know , the world know inside and out side the way Sdach ort trokol Hun Sen do . What can Cambodian do ? They can't do nothing just wait and see what the world can do.

Jul 15, 2018 09:27 PM

គេហទំព័រ​ទាំងមូល