ទឹកប្រាក់ ២លានដុល្លារអូស្ត្រាលីនេះ គឺត្រូវបែងចែកទៅឲ្យភាគីអន្តរជាតិ ១លានដុល្លារ និងភាគីជាតិចំនួន ១លានដុល្លារ។
លោក ឌឹម សុវណ្ណារុំ មន្ត្រីទទួលបន្ទុកផ្នែកកិច្ចការសាធារណៈសាលាក្ដីខ្មែរក្រហម មានប្រសាសន៍ដោយបានចាត់ទុកជំនួយរបស់រដ្ឋាភិបាលអូស្ត្រាលីថា ជាការឆ្លើយតបបានទាន់ពេលវេលាចំពោះកង្វះខាតថវិកា ដែលសាលាក្ដីបានជួបប្រទះ។
លោកថា ខាងផ្នែកជាតិនៅខ្វះថវិកា ១លានដុល្លារថែមទៀត និងភាគីអន្តរជាតិនៅខ្វះថវិកា ៩,២លានដុល្លារ តម្រូវការថវិកាសម្រាប់ឆ្នាំ២០១១។ ដូច្នេះការឆ្លើយតបនេះ គឺបានទាន់ពេលវេលាណាស់ ដោយសារតែនៅក្នុងខែមិថុនានេះ គឺជាឱកាសដ៏សំខាន់បំផុតដែលសំណុំរឿង ០០២ នឹងចាប់ផ្ដើមឡើង។
សាលាក្ដីខ្មែរក្រហមបានឲ្យដឹងថា ប្រទេសអូស្ត្រាលី បានស្ថិតក្នុងចំណោមប្រទេសម្ចាស់ជំនួយធំៗ ដែលបានផ្ដល់ការគាំទ្រចំពោះសាលាក្តីខ្មែរក្រហមតាំងពីសាលាក្ដីនេះ បានចាប់ផ្ដើមដំណើរការដំបូងកាលពីឆ្នាំ២០០៧មក។ បូករួមទាំងជំនួយចុងក្រោយផង ប្រទេសអូស្ត្រាលី បានផ្ដល់ជំនួយជាថវិកាសរុបចំនួនជិត ១៧លានដុល្លារអូស្ត្រាលី ដល់សាលាក្ដីខ្មែរក្រហម៕