លោក ហ៊ុន សែន ប្រកាសផ្អាកពិធីបុណ្យអុំទូក
2020.10.26
ទិដ្ឋភាពអ្នកទស្សនាការប្រណាំងទូកថ្ងៃដំបូង នៅមុខវាំង រាជធានីភ្នំពេញ នាថ្ងៃទី២១ ខែវិច្ឆិកា ឆ្នាំ២០១៨។
រូបថត៖ រដ្ឋបាលសាលារាជធានីភ្នំពេញ
លោកនាយករដ្ឋមន្ត្រី ហ៊ុន សែន ប្រកាសផ្អាកព្រះរាជពិធីបុណ្យអុំទូក អកអំបុក និងសំពះព្រះខែក្នុងទីក្រុងភ្នំពេញ នៅចុងខែតុលានេះ ក្រោមហេតុផលជំងឺកូវីដ ប៉ុន្តែលោកអនុញ្ញាតឲ្យធ្វើពិធីអកអំបុក និងសំពះព្រះខែនៅតាមផ្ទះ ហើយមន្ត្រីរាជការ និងកម្មករ-កម្មការិនី នៅតែអាចបន្តឈប់សម្រាកពីការងារដដែល។
ការប្រកាសផ្អាកព្រះរាជពិធីបុណ្យអុំទូកនេះ ស្របពេលស្ថានភាពនយោបាយកំពុងបន្តឡើងកម្ដៅ ជាពិសេស ក្រោយពេលប្រធានស្ដីទីគណបក្សសង្គ្រោះជាតិ លោក សម រង្ស៊ី ប្រកាសផែនការវិលចូលស្រុកជាថ្មី ដើម្បីដឹកនាំកម្លាំងមហាជនធ្វើបាតុកម្មប្រឆាំងរបបលោក ហ៊ុន សែន។
អ្នកស្រាវជ្រាវការអភិវឌ្ឍន៍សង្គម បណ្ឌិត សេង សារី គាំទ្រចំពោះការផ្អាកព្រះរាជពិធីបុណ្យអុំទូកនៅឆ្នាំនេះ ដោយសារជំងឺកូវីដនៅតែបន្តគំរាមកំហែង ហើយរងគ្រោះដោយទឹកជំនន់ធ្ងន់ធ្ងរថែមទៀត។ ទោះយ៉ាងណា លោកមើលឃើញថា ការផ្អាកពិធីប្រពៃណីជាតិដ៏ធំនេះ ក៏អាចជាយុទ្ធសាស្ត្រមួយរបស់រដ្ឋាភិបាល ដើម្បីទប់ស្កាត់ចលនាបាតុកម្មផ្សេងៗ ចូលក្នុងទីក្រុងភ្នំពេញ ខណៈដែលស្ថានភាពនយោបាយនៅកម្ពុជា មិនទាន់ប្រាកដប្រជានៅឡើយ ជាពិសេស ការផ្ទុះបាតុកម្មជាបន្តបន្ទាប់ពីសំណាក់ក្រុមយុវជន និងក្រុមសកម្មជនគណបក្សប្រឆាំងនៅក្នុងស្រុក។
កម្ពុជាធ្លាប់ខកខានប្រារព្ធព្រះរាជពិធីបុណ្យមួយនេះរយៈពេល ៣ឆ្នាំជាប់ៗ គ្នា កាលពីឆ្នាំ២០១១ ឆ្នាំ២០១២ និងឆ្នាំ២០១៣ ក្រោយពីមានហេតុការណ៍រត់ជាន់គ្នានៅកោះពេជ្រ ដែលបណ្ដាលឲ្យមនុស្សជាង ៣៥០នាក់ស្លាប់ និងដោយសារហេតុផលគ្រោះទឹកជំនន់ និងក្រោយការសោយទិវង្គតរបស់ព្រះបរមរតនកោដ្ឋព្រះបាទ នរោត្តម សីហនុ។ ក្នុងឆ្នាំ២០១៤ ពិធីបុណ្យបុណ្យអុំទូកត្រូវបានរៀបចំធ្វើឡើងវិញ តែក៏បានខកខានម្ដងទៀតនៅឆ្នាំ២០១៥ ស្របពេលដែលស្ថានភាពនយោបាយនៅកម្ពុជាបានឡើងកម្ដៅ។ ប៉ុន្តែ លោកនាយករដ្ឋមន្ត្រី ហ៊ុន សែន អះអាងនៅពេលនោះថា គឺផ្អាកដោយសារកម្ពស់ទឹកទន្លេរាក់ពេកមិនអាចអុំទូកបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជីវករនៅភ្នំពេញខ្លះត្អូញត្អែរលក់ដូរមិនសូវដាច់ក្នុងថ្ងៃបុណ្យអុំទូក
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- សង្គមស៊ីវិលបារម្ភពីករណីបង្ខាំងមនុស្ស និងចាប់ជំរិតផ្ទុះឡើងវិញនៅកម្ពុជា