សាស្ត្រាចារ្យវិចិត្រសិល្បៈមួយចំនួន បានឱ្យដឹងថា ជាច្រើនឆ្នាំមកហើយនៅពេលបុណ្យចូលឆ្នាំខ្មែរម្ដងៗ យុវវ័យជំនាន់ក្រោយបានបំភ្លេចចោលនូវល្បែង និងរបាំប្រជាប្រិយ ដែលជាឫសគល់នៃវប្បធម៌ជាតិស្ទើរតែទាំងស្រុង។ ក៏ប៉ុន្តែ នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំនេះ ពួកគាត់ជាមនុស្សចាស់ មានការសប្បាយចិត្តជាខ្លាំង ដោយមានក្រុមយុវជនជាច្រើនចង់លេងល្បែងប្រជាប្រិយខ្មែរ ដើម្បីអបអរសាទរថ្ងៃមហាសង្ក្រាន្តនៅឯខេត្តសៀមរាប ដែលជាតំបន់ទាក់ទាញអ្នកទេសចរបរទេសដ៏សំខាន់បំផុតនោះ។
ក្រុមយុវជនវ័យក្មេងជានិស្សិតនៃសកលវិទ្យាល័យ និងជាសិស្សវិទ្យាល័យ ចំនួនជាង ៥០០នាក់ មកពីខេត្តតាកែវ ទីក្រុងភ្នំពេញ និងខេត្តសៀមរាប កំពុងនាំគ្នាហ្វឹកហាត់លេងល្បែងប្រជាប្រិយខ្មែរជាច្រើនប្រភេទ និងហាត់រាំកម្សាន្តតាមចង្វាក់ខ្មែរផង ដើម្បីត្រៀមខ្លួនចូលរួមប្រារព្ធពិធីអង្គរសង្ក្រាន្តដ៏ធំមួយ ជាលើកដំបូង នៅទឹកដីខេត្តសៀមរាប។
«សំឡេងប្របកៃ»
ល្បែងកម្សាន្តប្រជាប្រិយខ្មែរជាច្រើនប្រភេទ និងការរាំលេងកម្សាន្តតាមចង្វាក់ខ្មែរនេះ នឹងបង្ហាញវត្តមានរយៈពេល ៣ថ្ងៃ ដើម្បីឱ្យមហាជន ភ្ញៀវទេសចរជាតិ និងអន្តរជាតិ បានចូលរួមសប្បាយ និងកម្សាន្តជាមួយគ្នា។
ក្រុមយុវវ័យខ្លះ បានឱ្យដឹងថា ពួកគេមានអារម្មណ៍សប្បាយរីករាយ នៅពេលពួកគេបានលេងល្បែងប្រជាប្រិយខ្មែរ ដែលល្បែងខ្លះគេពុំធ្លាប់ស្គាល់ពីមុនមកផងនោះ។
កញ្ញា យ៉ាំ បញ្ញា ជានិស្សិតមកពីសកលវិទ្យាល័យភ្នំពេញ ដែលកំពុងហាត់លេងល្បែងចោលឈូងជាមួយមិត្តភក្ដិជាច្រើនទៀត នាងបានមានប្រសាសន៍ថា នៅពេលចូលឆ្នាំខ្មែរម្ដងៗ នាងធ្លាប់លេងល្បែងប្រជាប្រិយខ្មែរខ្លះនៅតាមវត្តអារាម ក៏ប៉ុន្តែ នេះគឺជាលើកដំបូងដែលនាងទើបតែបានចូលរួមនៅក្នុងពិធីដ៏ធំ៖ «រយៈពេលប៉ុន្មានថ្ងៃហ្នឹង គឺមានអារម្មណ៍សប្បាយរីករាយមែនទែន ព្រោះបំណងខ្ញុំធំ ទីមួយ គឺផ្សារភ្ជាប់ទំនាក់ទំនងជាមួយយុវជនដទៃទៀត។ មួយទៀត គឺមកលេងនេះ ក្នុងគោលបំណងស្វែងយល់ ព្រោះថាខ្ញុំក៏អត់ស្គាល់ពីល្បែងប្រពៃណីទាំងអស់នេះច្បាស់ដែរ ស្គាល់មួយចំនួន។ អីចឹង ពេលដែលខ្ញុំមក គឺទឹកចិត្តស្រឡាញ់ ព្រោះវប្បធម៌ខ្មែរយើងមានការរីកចម្រើនតាំងពីសម័យអង្គរ រហូតមកដល់បច្ចុប្បន្ន។ ដោយសារថ្នាក់ដឹកនាំលោកអត់ចង់ឱ្យវប្បធម៌ អរិយធម៌ខ្មែរយើងបាត់បង់ អីចឹងគឺលោកចង់បន្តថែរក្សា និងបណ្ដុះគំនិតយុវជនជាអ្នកបន្តវេនពីចាស់ព្រឹទ្ធាចារ្យ ដែលលោកចាស់ទៅ គឺពួកខ្ញុំនេះហើយជាអ្នកបន្តវេន»។
រយៈពេល ៤-៥ថ្ងៃកន្លងមកហើយ យុវជនជាច្រើនក្រុមបានប្រមូលផ្តុំគ្នានៅក្រោមម្លប់ឈើខាងក្រៅបរិវេណប្រាសាទអង្គរវត្ត ហើយនាំគ្នាហ្វឹកហាត់លេងល្បែងប្រជាប្រិយខ្មែរ ជាមួយសំណើចក្អាកក្អាយ ដោយមានសាស្ត្រាចារ្យនៃសកលវិទ្យាល័យវិចិត្រសិល្បៈ ព្រមទាំងមន្ត្រីក្រសួងវប្បធម៌ និងវិចិត្រសិល្បៈ ខ្លះទៀត ជួយបង្ហាត់បង្ហាញផង។
«សំឡេងវាយក្អម»
ការប្រារព្ធអង្គរសង្ក្រាន្តដ៏ធំមួយនៅក្នុងខេត្តសៀមរាប រយៈពេល ៣ថ្ងៃ ដែលពុំធ្លាប់មានពីមុនមកនោះ គឺក្រុមសហភាពសហព័ន្ធយុវជនកម្ពុជា ដែលមានកូនប្រុសរបស់លោកនាយករដ្ឋមន្ត្រី ហ៊ុន សែន ជាអ្នកដឹកនាំគ្រោងរៀបចំឡើង ចាប់ពីថ្ងៃទី១៤ រហូតដល់ថ្ងៃទី១៦ ខែមេសា។
អ្នកនាំពាក្យរបស់សហភាពសហព័ន្ធយុវជន និងជាអ្នកទទួលបន្ទុកការលេងល្បែងប្រជាប្រិយ គឺលោក សុខ សប្បាយណា បានមានប្រសាសន៍ថា មានសិស្សវិទ្យាល័យ និងនិស្សិតប្រមាណជាង ៥០០នាក់ មកពីខេត្តតាកែវ ទីក្រុងភ្នំពេញ និងខេត្តសៀមរាប បានត្រៀមខ្លួនចូលរួមលេងល្បែងប្រជាប្រិយខ្មែរក្នុងឱកាសប្រារព្ធអង្គរសង្ក្រាន្តនៅពេលឆាប់ៗនេះ។ លោក សុខ សប្បាយណា បានបញ្ជាក់ថា គោលបំណងនៃការរៀបចំប្រារព្ធអង្គរសង្ក្រាន្តឡើង គឺដើម្បីប្រមូលផ្ដុំប្រជាពលរដ្ឋឱ្យបានអបអរសាទរឆ្នាំថ្មីទាំងអស់គ្នា។ ទីពីរ គឺចង់ឱ្យយុវជនទាំងអស់ ដែលមកពីកន្លែងផ្សេងគ្នា ចេះធ្វើសហការ និងធ្វើការជាក្រុមជាមួយគ្នា ហើយជាពិសេស ក៏ជាការចាប់ផ្ដើមផ្សព្វផ្សាយវប្បធម៌ខ្មែរតាមរយៈល្បែងប្រជាប្រិយ ដើម្បីទាក់ទាញភ្ញៀវទេសចរបរទេស ឱ្យចូលមកទស្សនាកម្ពុជា កាន់តែច្រើនឡើងថែមទៀតដែរ។ ល្បែងប្រជាប្រិយខ្មែរដែលគេគ្រោងលេងនៅក្នុងពិធីប្រារព្ធសង្ក្រាន្តនោះ គឺមានទាំងអស់ចំនួន ១៧ប្រភេទ។
លោក សុខ សប្បាយណា៖ «ដូចមានជាអង្គញ់ ឈូង ចាប់កូនខ្លែង លាក់កន្សែង ស្ដេចចង់ ឬអៀវ ខាំប៉ិកួៈ វាយក្អម ប្រណាំងកង់យឺត សំខាន់ជាទីបំផុតទាត់សី។ យើងបានសហការជាមួយក្រសួងវប្បធម៌ សិក្សាស្រាវជ្រាវច្បាស់លាស់ឈ្មោះល្បែងរបៀបលេងល្បែងនិមួយៗ បង្ហាញដល់យុវជនយើង ដើម្បីឱ្យគាត់ចេះស្វែងយល់ យល់ដឹង ស្រឡាញ់ ការពារ ហើយផ្សព្វផ្សាយវប្បធម៌យើងតាមរយៈល្បែងប្រជាប្រិយជូនដល់ភ្ញៀវជាតិ និងអន្តរជាតិ»។
សាស្ត្រាចារ្យមួយចំនួនផ្នែកវប្បធម៌ និងសិល្បៈខ្មែរ បានសម្ដែងអារម្មណ៍សប្បាយចិត្ត នៅពេលដែលយុវវ័យជំនាន់ក្រោយ បានងាកមករកកិច្ចការពារ និងថែរក្សាវប្បធម៌ដែលស្ទើរតែបាត់បង់ទៅហើយ ឱ្យគង់វង្សឡើងវិញនោះ។
អតីតសាស្ត្រាចារ្យផ្នែកនាថសាស្ត្រ គឺលោក យ៉ាន់ បូរិន្ទ បានមានប្រសាសន៍ថា លោកបានមកចូលរួមបង្ហាត់ក្រុមយុវវ័យមួយចំនួន ឱ្យចេះលេងឈូង និងច្រៀងចម្រៀងមួយចំនួន ដែលស្ទើរតែបាត់បង់ទៅហើយ។ លោកសាស្ត្រាចារ្យបានមានប្រសាសន៍ថា ពេលដែលរូបលោកមានវ័យកាន់តែចាស់ ហើយឃើញក្រុមយុវវ័យជំនាន់ក្រោយមានការចាប់អារម្មណ៍លើល្បែងប្រជាប្រិយ និងទំនុកច្រៀងខ្មែរដូចនេះ គឺលោកសប្បាយចិត្តយ៉ាងខ្លាំង។ លោកនឹងខិតខំបង្ហាត់បង្រៀនដល់ពួកគេ ឱ្យអស់នូវអ្វីដែលលោកមាន។
លោក យ៉ាន់ បូរិន្ទ ឱ្យដឹងថា រយៈពេល ៤-៥ថ្ងៃមកនេះ គឺលោកបានបង្ហាត់ពួកគេឱ្យលេងឈូង ឱ្យចេះច្រៀងបទចំរៀងខ្លះ ដូចជាបទសាវតារខ្មែរ ហើយនិងមានកំណាព្យមួយទៀត ដែលចង់រំលឹកអំពីល្បែងរបាំប្រជាប្រិយខ្មែរ ដែលចង់ធ្វើឱ្យកេរដំណែលនេះរស់ឡើងវិញ៖ «ខ្ញុំចង់អំពាវនាវបងប្អូនជនជាតិខ្មែរទាំងអស់ នៅទូទាំងសកលលោកតែម្ដង ឱ្យតែខ្មែរ កុំឱ្យបំភ្លេចនូវអត្តសញ្ញាណជាតិ នូវអរិយធម៌វប្បធម៌ទាំងរូបិយ អរូបិយរបស់ជាតិ ពីព្រោះទាំងនេះនៅប្រទេសណាក៏ដោយ ក៏គេគិតណាស់ ជាតម្លៃអមតៈរបស់ជាតិ។ អីចឹង ទោះបីបរទេសប៉ុណ្ណា យើងយកចុះ ប៉ុន្តែគំនិតដើមរបស់យើង គឺនៅក្នុងការគោរពការស្រឡាញ់វប្បធម៌ខ្មែរ»។
អ្នកទេសចរបរទេសខ្លះ ដែលមកទស្សនាប្រាសាទអង្គរ មានការចាប់អារម្មណ៍ចំពោះការលេងល្បែងប្រជាប្រិយខ្មែរនេះ។
បុរសបរទេសម្នាក់ដែលយកម៉ាស៊ីនមកថតរូបភាពនៃការលេងល្បែងប្រជាប្រិយនោះ បានមានប្រសាសន៍ថា វាពិតជាវិសេសបំផុតសម្រាប់រូបគាត់ ដែលបានមកកម្ពុជា លើកដំបូង ហើយបានជួបព្រឹត្តិការណ៍ដូចនេះ៖ «ល្អខ្លាំងណាស់។ នេះជាលើកដំបូងដែលខ្ញុំបានមកទីនេះ»។
អាជ្ញាធររដ្ឋាភិបាល រំពឹងថា ការសម្ដែងរបាំ និងល្បែងប្រជាប្រិយខ្មែរនៅក្នុងពិធីអង្គរសង្ក្រាន្ត គឺគេអាចនឹងទទួលប្រជាពលរដ្ឋខ្មែរ និងអ្នកទេសចរបរទេសប្រមាណ ១០ម៉ឺននាក់ ឱ្យចូលរួមសប្បាយជាមួយគ្នាបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។