កម្ពុជា​និង​អូស្ត្រាលី​ជំរុញ​ការដោះដូរ​ពាណិជ្ជកម្ម​នៃ​ប្រទេស​ទាំងពីរ

ដោយ ម៉ៅ សុធានី
2020-07-03
អ៊ីម៉ែល
មតិ
Share
បោះពុម្ព
ឯកអគ្គរាជទូត​អូស្ត្រាលី​ថ្មី ប្រចាំ​នៅ​កម្ពុជា លោក ប៉ាប្លូ ជីហូ កង (Pablo Chiho Kang) (ឆ្វេង) និង​ប្រធាន​សភា​ពាណិជ្ជកម្ម​កម្ពុជា លោក គិត ម៉េង ក្នុង​ជំនួបកាល​ពី​ថ្ងៃ​ទី១ ខែ​កក្កដា ឆ្នាំ​២០២០។
ឯកអគ្គរាជទូត​អូស្ត្រាលី​ថ្មី ប្រចាំ​នៅ​កម្ពុជា លោក ប៉ាប្លូ ជីហូ កង (Pablo Chiho Kang) (ឆ្វេង) និង​ប្រធាន​សភា​ពាណិជ្ជកម្ម​កម្ពុជា លោក គិត ម៉េង ក្នុង​ជំនួបកាល​ពី​ថ្ងៃ​ទី១ ខែ​កក្កដា ឆ្នាំ​២០២០។
រូប​សភាពាណិជ្ជកម្មកម្ពុជា

កម្ពុជា និង​អូស្ត្រាលី​ប្ដេជ្ញា​ជំរុញ​ការដោះដូរ​ពាណិជ្ជកម្ម​និង​បង្កើន​ការ​វិនិយោគទុន នៃ​ប្រទេស​ទាំងពីរ។

ឯកអគ្គរាជទូត​អូស្ត្រាលី​ថ្មី ប្រចាំ​នៅ​កម្ពុជា លោក ប៉ាប្លូ ជីហូ កង (Pablo Chiho Kang) និង​ប្រធាន​សភា​ពាណិជ្ជកម្ម​កម្ពុជា លោក គិត ម៉េង បាន​ចុះហត្ថលេខា​លើ​កិច្ចព្រមព្រៀង​បង្កើន​ការដោះដូរ​ពាណិជ្ជកម្ម​រវាង​ប្រទេស​ទាំងពីរ កាល​ពី​ថ្ងៃ​ទី១ ខែ​កក្កដា។

លោក Pablo Chiho Kang ត្រូវ​បាន​កាសែត​ភ្នំពេញ​ប៉ុស្តិ៍ ដកស្រង់​សម្ដី កាល​ពី​ថ្ងៃ​២ ខែ​កក្កដា ឱ្យ​ដឹង​ថា លោក​យល់ស្រប​ក្នុង​ការ​លើកកម្ពស់​ទំនាក់​ទំនង​សេដ្ឋកិច្ច​ជាមួយ​នឹង​កម្ពុជា តាមរយៈ​ការចូលរួម​ជាមួយ​សភា​ពាណិជ្ជកម្ម​កម្ពុជា​។ លោក​ក៏​គ្រោង​ដឹកនាំ​ក្រុម​ពាណិជ្ជករ និង​ក្រុម​វិនិយោគិន​អូស្ត្រាលី ដើម្បី​មក​ស្វែងរក​ឱកាស​ធ្វើ​ពាណិជ្ជកម្ម និង​វិនិយោគ​នៅ​កម្ពុជា​ផង​ដែរ ជាពិសេស​លើ​វិស័យ​ថាមពល​កកើត​ឡើងវិញ។

ទំហំ​ពាណិជ្ជកម្ម​រវាង​ប្រទេស​ទាំង ២ កាលពី​ឆ្នាំ​២០១៩ មាន​ចំនួន​ជិត ២​រយ​លាន​ដុល្លារ​អាមេរិក (១៩៧​លាន​) គឺ​កើន​ឡើង ជាង ៣២% បើ​ប្រៀបធៀប​កាលពី​ឆ្នាំ​២០១៨។

ស្ថានទូត​អូស្ត្រាលី​បង្ហាញ​ទិន្នន័យ​ថា កម្ពុជា បាន​នាំចេញ​ផលិតផល​សំលៀកបំពាក់​និង​ស្បែកជើង ទៅ​លក់​នៅ​ប្រទេស​អូស្ត្រាលី មានតម្លៃ​សរុប ចំនួន​ទឹកប្រាក់ ១៥៥ លាន​ដុល្លារ កើន​ឡើង ជិត​៣៥% ខណៈ​ការ​នាំចូល​ទំនិញ​ពី​អូស្ត្រាលី ដែល​ភាគច្រើន​ជា​ស្រូវ​សាឡី គឺ​មាន​តម្លៃ​សរុប​ជាង ៤២ លាន​ដុល្លារ (៤២,១៩ លាន​) កើន​ឡើង​ជិត​២៥%

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល