អ្នកវិភាគ​៖ ការ​បង្វែង​​រឿង​ទណ្ឌកម្ម EBA នឹង​នាំ​គ្រោះថ្នាក់​កាន់តែ​ខ្លាំង​ដល់​ពលរដ្ឋ​ទូទៅ

ដោយ មួង ណារ៉េត
2019-02-15
អ៊ីម៉ែល
មតិ
Share
បោះពុម្ព
លោក​នាយករដ្ឋមន្ត្រី ហ៊ុន សែន ​ចុះ​ជួប​សំណេះសំណាល​ជាមួយ​កម្មករ កម្មការិនី​រោងចក្រ ក្នុង​ខណ្ឌ​ឫស្សីកែវ រាជធានី​ភ្នំពេញ កាល​ពី​ព្រឹក​ថ្ងៃ​ទី​៣ ខែ​មករា ឆ្នាំ​២០១៨។
លោក​នាយករដ្ឋមន្ត្រី ហ៊ុន សែន ​ចុះ​ជួប​សំណេះសំណាល​ជាមួយ​កម្មករ កម្មការិនី​រោងចក្រ ក្នុង​ខណ្ឌ​ឫស្សីកែវ រាជធានី​ភ្នំពេញ កាល​ពី​ព្រឹក​ថ្ងៃ​ទី​៣ ខែ​មករា ឆ្នាំ​២០១៨។
Photo courtesy of SPM's Facebook page

អ្នកវិភាគ​ថា ការ​ខំប្រឹង​បង្វែង​ស្ថានការណ៍​រឿង​ទណ្ឌកម្ម​ការ​អនុគ្រោះ​ពន្ធ​អឺរ៉ុប EBA ដែល​លោក ហ៊ុន សែន កំពុង​ធ្វើ​នៅ​ពេល​នេះ គឺ​កំពុងតែ​នាំ​គ្រោះថ្នាក់​កាន់តែ​ខ្លាំង ដល់​ពលរដ្ឋ​ទូទៅ ព្រោះ​កម្ពុជា​ពិតជា​មិន​អាច​ទាន់​ត្រៀមខ្លួន រួចរាល់​ផ្នែក​សេដ្ឋកិច្ច​នៅឡើយ​ទេ។

អ្នកវិភាគ​នយោបាយ និង​សង្គម លោក គឹម សុខ ចាត់​ទុក​ការ​អះអាង​របស់​នាយក​រដ្ឋមន្ត្រី នៃ​របប​ឯក​បក្ស​គឺ​លោក ហ៊ុន សែន ដែល​ប្រាប់​ប្រជាពលរដ្ឋ​ខ្មែរ ថា​កម្ពុជា​មិន​ស្លាប់ ទោះ​គ្មាន​ផ្នែក​ពាណិជ្ជកម្ម ដែល​មាន​ទំហំ​ទឹកប្រាក់​ជិត ៧០ដុល្លារ ក្នុង​មួយ​ឆ្នាំ នៅ​ពេល​សហភាព​អឺរ៉ុប លែង​ផ្ដល់​ឱ្យ​កម្ពុជា​នេះ​។ ប្រការ​នេះ ធ្វើ​ឱ្យ​លោក ហ៊ុន សែន ពិបាក​ដោះស្រាយ​នៅ​ចំពោះ​មុខ ទើប​ប្រើ​ចិត្តសាស្ត្រ បង្វែងដាន​បែបនេះ។

ក្នុង​ស្ថានភាព​គ្រោះថ្នាក់ ដែល​អាច​កើតមាន​ជាយថាហេតុ ប៉ុន្តែ​បែរជា​លោក ហ៊ុន សែន ប្រឹង​ថា មិន​អី​ទេ និង​មិន​ប្រឹង​ស្ដារ​សិទ្ធិមនុស្ស និង​ប្រជាធិបតេយ្យ​ឡើងវិញ​បែបនេះ លោក គឹម សុខ ថា​ជា​គ្រោះថ្នាក់​ខ្លាំង​ដល់​ពលរដ្ឋ​ខ្មែរ​ទូទៅ ដែល​ទទួល​បាន​ព័ត៌មាន មិន​ត្រឹមត្រូវ​ពី​ថ្នាក់ដឹកនាំ​ប្រទេស៖ «ដូច្នេះ​វា​មិនមែន​ជា​បញ្ជាក់​ថា ការ​ដក EBA ហ្នឹង​វា​ធ្វើ​ឱ្យ​ជា​ការ​បើកឱកាស​ថ្មី សម្រាប់​ក្រុម​លោក ហ៊ុន សែន សម្រាប់​គាត់​ធូរស្រាល​នោះ​ទេ»

ប្រតិកម្ម​របស់​អ្នកវិភាគ​រូប​នេះ ធ្វើឡើង​ក្រោយ​លោក ហ៊ុន សែន ថ្លែង​ក្នុង​ពិធី​បិទ​សន្និបាត​បូកសរុប​ការងារ​ឆ្នាំ​២០១៨ និង​ទិសដៅ​ការងារ​ឆ្នាំ​២០១៩ របស់​ក្រសួងមហាផ្ទៃ កាលពី​ថ្ងៃទី១៤ ខែ​កុម្ភៈ ដោយ​អះអាង​ថា ទោះ​អត់ EBA ក៏​មិន​ធ្វើ​ឱ្យ​កម្ពុជា​ស្លាប់ ហើយ​បើ​នៅ​មាន EBA ក៏​កម្ពុជា​មិន​ក្លាយ​ជា​អ្នកមាន​នោះ​ដែរ​។ លោក​អះអាង​បន្ថែម​ទៀត ថាបើ​កម្ពុជា​ត្រូវ​បង់ពន្ធ ក្នុង​ការ​នាំ​ទំនិញ​ចេញទៅ​ទីផ្សារ​អឺរ៉ុប គឺ​ធ្វើ​ឱ្យ​កម្ពុជា​ថ្លៃថ្នូរ​ជាង​បច្ចុប្បន្ន​ទៅវិញ​។ លោក​ចោទ អ្នក​និយាយ​អំពី​ផល​ប៉ះពាល់​នៃ EBA នេះ ថា​ជា​អ្នក​ចង់​ឃើញ​កម្ពុជា​ស្លាប់ និង​អំពាវនាវ​ឱ្យ​កម្មករ និង​មន្ត្រីរាជការ​ទូទៅ កុំ​ខ្វល់​ពី​អ្នកណា​ថា​អ្វី ឱ្យ​គេ​ថា​ទៅ៖ «ជនរួមជាតិ ជាពិសេស​កម្មករ​កម្ម​ការ​នី បើ​នៅ​តែ​មាន​មុខរបរ មានការ​ងារ​ធ្វើ មាន​ប្រាក់ចំណូល សូម​កុំ​ខ្វល់​ពី​អ្នកណា​និយាយ​ពី​អ្វី​។ មន្ត្រីរាជការ កងកម្លាំងប្រដាប់អាវុធ និង​និវត្តជន បើ​នៅតែ​ទទួល​បាន​ប្រាក់បៀវត្សរ៍​ពីរ​សប្ដាហ៍​ម្តង សូម​កុំ​ខ្វល់​ពី​អ្នកណា​និយាយ​ពី​អ្វី​។ ត្រូវ​បន្ត​តាម​ពាក្យ “​ឆ្កែ​ចេះតែ​ព្រុស មនុស្ស​ចេះតែ​ដើរ»

លោក ហ៊ុន សែន អះអាង​បន្ថែម​ទៀត​ថា គ្រាន់តែ​ចំណូល​ពន្ធគយ អាច​យក​មក​បើក​ប្រាក់ខែ​មន្ត្រីរាជការ បាន​ពេញ​មួយ​ឆ្នាំ បើ​បាត់​ចំណូល​ពី​ការ​អនុគ្រោះ​ពន្ធ EBA នេះ។

ទោះជា​យ៉ាង​នេះ​ក្តី លោក​មិនបាន​បញ្ជាក់​ថា ថា​តើ​បាន​ចំណូល​ពី​ណា មក​ទប់​ទល់ និង​បន្ត​បើក​ប្រាក់ខែ​កម្មករ​រោងចក្រ​កាត់ដេរ រាប់​សែន​នាក់ ដែល​អាច​បាត់​បង់​ការងារ​ធ្វើ ដោយសារតែ​ការ​បិទ​រោងចក្រ នោះ​ឡើយ។ លោក ហ៊ុន សែន ក៏​មិនបាន​បញ្ជាក់​ថា តើ​ក្រោយពី​ការ​ប្រមូល​ពន្ធគយ សម្រាប់​បើកប្រាក់​ខែ​រាជការ​ទូទៅ បាន​មួយ​ឆ្នាំនេះ ថា​តើ​ឆ្នាំក្រោយៗ​បន្ត​ទៅ​ទៀត តើ​បាន​ប្រាក់​ពី​ណា​មក​បើក​បន្ត នោះ​ឡើយ។

ម្យ៉ាងទៀត លោក ហ៊ុន សែន ក៏​មិនបាន​បញ្ជាក់ ថា​តើ​ការ​ប្រមូល​ពន្ធគយ​នេះ អាច​បន្ត​ប្រមូល​បាន​ដូច​អ្វី​ដែល​លោក​អះអាង​ដដែល​នេះ ដែរ​ឬ​យ៉ាងណា នៅ​ពេល​ដែល​ទំហំ​ពាណិជ្ជកម្ម ជាពិសេស​ការនាំចេញ​ផលិតផល​ទៅ​ទីផ្សារ​អឺរ៉ុប ចាប់ផ្ដើម​ធ្លាក់​ចុះ ដែល​ជា​ការបាត់បង់​ចំណូល​ពន្ធ​រដ្ឋ​មួយ​យ៉ាង​ធំ​នោះ។

មិនតែប៉ុណ្ណោះ សូម្បីតែ​ការ​ប្រមូល​ពន្ធ ដូច​អ្វី​ដែល​លោក​បាន​អះអាង​ក្នុង​ពេល​បច្ចុប្បន្ន ក៏​ប្រទេស​កម្ពុជា​ត្រូវការ​ខ្ចី​លុយ​បរទេស ជិត​ពីរ​ពាន់​លាន​ដុល្លារ​មួយឆ្នាំៗ សម្រាប់​យក​មក​ផ្គត់ផ្គង់​នៅ​ក្នុង​ថវិកា​ជាតិ​រៀងរាល់​ឆ្នាំ។

នេះ​នៅ​មិនទាន់ គិតដល់​ការ​ដក​ប្រពន្ធ​អនុគ្រោះ​ពន្ធ​ទូទៅ ពី​សហរដ្ឋអាមេរិក ប្រសិនបើ​រដ្ឋាភិបាល​ប្រទេស​នេះ ធ្វើតាម​សហភាព​អឺរ៉ុប​ដែរ ព្រោះ​តំណាងរាស្ត្រ​សហរដ្ឋអាមេរិក បាន​ស្នើ​ច្បាប់​ឱ្យ​ដក​ការ​អនុគ្រោះ​ពន្ធ​នេះ​ដែរ​ហើយ​។ ស្រប​ពេល​ជាមួយគ្នា​ដែរ ទោះបីជា​លោក ហ៊ុន សែន អះអាង​ថា លោក​នឹង​ធ្វើ​កំណែទម្រង់សេដ្ឋកិច្ច​ស៊ីជម្រៅ ដើម្បី​ទប់ទល់​នឹង​ស្ថានការណ៍​អាក្រក់​នេះ តើ​កម្ពុជា​ត្រៀមខ្លួន រួច​ឬ​នៅ ជាពិសេស​នៅ​ចុងខែ មីនា នេះ ប្រទេស​អង់គ្លេស​នឹង​ដក​ខ្លួន​ចេញពី​សហគមន៍​អឺរ៉ុប ដែល​ធ្វើ​ឱ្យ​កម្ពុជា នឹង​បាត់បង់​ការ​នាំ​ចេញទៅ​ប្រទេស​នេះ ប្រហែល ៧.៧​ភាគរយ​ដែរ។អ្នកវិភាគ​ថា វិធី​ដែល​ល្អ​ប្រសើរ​បំផុត គឺ​លោក ហ៊ុន សែន ត្រូវ​ស្គារ​សិទ្ធិមនុស្ស និង ប្រជាធិបតេយ្យ​ឡើងវិញ ដើម្បី​បញ្ចៀស​ការ​ដាក់​ទណ្ឌកម្ម និង​ស្ដារ​ទំនាក់ទំនង​ល្អ​របស់​កម្ពុជា ជាមួយ​ប្រទេស​ប្រជាធិបតេយ្យ​នៅ​ជុំវិញ​ពិភពលោក ជាជាង​ប្រឹង​ថ្លែង​សារ​លួង​ចិត្ត ប្រជាពលរដ្ឋ កុំ​ឱ្យ​ក្រោក​តវ៉ា ដោយសារ​ផល​ប៉ះពាល់​សេដ្ឋកិច្ច ដល់​ជីវភាព​ប្រចាំថ្ងៃ​របស់​ពួកគាត់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល