ឯកអគ្គរដ្ឋទូត​អឺរ៉ុប​ទើប​ចប់​អាណត្តិ ថា ពន្ធ​លើ​អង្ករ​កម្ពុជា​នឹង​មាន​ការ​សម្រេច​ជា​ថ្មី​បន្ទាប់​ពី ៣​ឆ្នាំ

ដោយ មាន ឫទ្ធិ
2019-03-12
អ៊ីម៉ែល
មតិ
Share
បោះពុម្ព
ឯក​អគ្គរដ្ឋទូត​សហភាព​អឺរ៉ុប​ប្រចាំ​កម្ពុជា លោក ច្សច អេដហ្គា (George Edgar) [ឆ្វេង] ថ្លែង​នៅ​ក្នុង​កម្មវិធី​អបអរ​ខួប​ទី​២០ នៃ​កិច្ច​ព្រមព្រៀង​សហប្រតិបត្តិការ​រវាង​កម្ពុជា-​សហភាព​អឺរ៉ុប នៅ​ថ្ងៃ​ទី​៥ ខែ​ឧសភា ឆ្នាំ​២០១៧ នា​រាជធានី​ភ្នំពេញ។
ឯក​អគ្គរដ្ឋទូត​សហភាព​អឺរ៉ុប​ប្រចាំ​កម្ពុជា លោក ច្សច អេដហ្គា (George Edgar) [ឆ្វេង] ថ្លែង​នៅ​ក្នុង​កម្មវិធី​អបអរ​ខួប​ទី​២០ នៃ​កិច្ច​ព្រមព្រៀង​សហប្រតិបត្តិការ​រវាង​កម្ពុជា-​សហភាព​អឺរ៉ុប នៅ​ថ្ងៃ​ទី​៥ ខែ​ឧសភា ឆ្នាំ​២០១៧ នា​រាជធានី​ភ្នំពេញ។
RFA

ឯកអគ្គរដ្ឋទូត​ចប់​អាណត្តិ​របស់​សហភាព​អឺរ៉ុប​ប្រចាំ​កម្ពុជា លោក ចច អេដហ្ការ (George Edgar) ប្រាប់​អាស៊ីសេរី តាម​សារ​អេឡិចត្រូនិក​នៅ​ថ្ងៃអង្គារ ទី ១២ មីនា ថា គណៈកម្មការ​អឺរ៉ុប នឹង​ត្រូវ​ធ្វើ​សេចក្ដី​សម្រេច​ចិត្ត​ជាថ្មី​បន្ថែម​ទៀត ក្នុង​រឿង​យកពន្ធ​លើ​អង្ករ​កម្ពុជា បន្ទាប់ពី​ហួស​រយៈពេល​គិត​ពន្ធ ៣ ឆ្នាំ​ដំបូង ដែល​សហភាព​អឺរ៉ុប​ទើបបាន​ដាក់​ចេញ។ លោក ចច អេដហ្ការ បដិសេធ​ឆ្លើយតប​នឹង​សំណួរ​អាស៊ីសេរី​ថា តើ​លោក​ពិតជា​បាន​សម្ដែង​ការ​សោកស្តាយ​ចំពោះ​រឿង​សហភាព​អឺរ៉ុប​សម្រេច​យកពន្ធ​លើ​អង្ករ​កម្ពុជា​នេះ ដូច​តាម​ការផ្សាយ​របស់​សារព័ត៌មាន​ក្នុងស្រុក​មែនដែរ​ឬទេ ក្នុង​ជំនួប​ជម្រាបលា​រវាង​លោក ជាមួយ​រដ្ឋមន្ត្រី​កសិកម្ម លោក វេង សាខុន កាលពី​ថ្ងៃ​ទី១១ មីនា។

យ៉ាងណាក៏ដោយ លោក ចច អេដហ្ការ គូស​បញ្ជាក់​ថា ក្នុង​ជំនួប​នោះ ភាគី​ទាំងពីរ ពិតជា​បាន​កត់សម្គាល់ ពី​ករណី​ដាក់​ចេញ​វិធានការ​ការពារ​របស់​សហភាព​អឺរ៉ុប តាមរយៈ​ការ​គិត​ពន្ធ​លើ​ការ​នាំចូល​អង្ករ​កម្ពុជា និង​មីយ៉ាន់ម៉ា ឬ​ភូមា ជា​ផ្លូវការ ចាប់ពី​ថ្ងៃទី១៨ មករា ឆ្នាំ ២០១៩ តទៅ។ លោក​ថា វិធានការ​ការពារ​រយៈ​ពេល​បី​ឆ្នាំ​ដំបូង​នេះ ធ្វើឡើង​ស្របតាម​បទប្បញ្ញត្តិ​របស់​សហភាព​អឺរ៉ុប​ស្ដីពី ប្រព័ន្ធ​អនុគ្រោះ​ពន្ធ​ទូទៅ GSP បន្ទាប់ពី​មាន​បណ្ដឹង​ពី​រដ្ឋ​សមាជិក​របស់​អឺរ៉ុប ដោយសារតែ​មានការ​គំរាមកំហែង​ធ្ងន់ធ្ងរ​ដល់​សមត្ថភាព​ប្រកួតប្រជែង​នៅ​ទីផ្សារ​អឺរ៉ុប។ លោក ចច អេដហ្ការ បន្ថែម​ថា ក្នុង​ជំនួប​នោះ​ភាគី​ទាំងពីរ​ក៏បាន​ពិភាក្សា​គ្នា​ជុំវិញ​សមិទ្ធផល​នានា​ដែល​ក្រសួង​សម្រេច​បាន​ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ ក្រោម​កម្មវិធី​កិច្ច​សហប្រតិបត្តិការ​យូរអង្វែង​រវាង​សហភាព​អឺរ៉ុប និង​ក្រសួង​កសិកម្ម។

កម្ពុជា ត្រូវ​ខាតបង់​យ៉ាងហោចណាស់​ជាង ៥០​លាន​ដុល្លារ​ក្នុង​មួយឆ្នាំៗ ពី​ការ​តម្រូវ​ឱ្យ​បង់ពន្ធ​លើ​ការ​នាំចូល​អង្ករ​ទៅកាន់​សហភាព​អឺរ៉ុប៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល