សង្គម​ស៊ីវិល​ជំរុញ​ឱ្យ​ស៊ើបអង្កេត​ក្រុមហ៊ុន​ចិន​នៅ​ខេត្ត​ព្រះសីហនុ​ដែល​អាមេរិក​ថា​គេច​ពន្ធ

ដោយ មាន ឫទ្ធិ
2019-06-22
អ៊ីម៉ែល
មតិ
Share
បោះពុម្ព
លោក សន ជ័យ ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា ថ្លែង​ប្រាប់​អ្នក​កាសែត​ក្នុង​កម្មវិធី​ពិគ្រោះ​យោបល់ និង​ផ្សព្វផ្សាយ​លទ្ធផល​សិក្សា​រៀបចំ​យុទ្ធសាស្ត្រ​គ្រប់គ្រង​ការ​បូម​ខ្សាច់​នៅ​ខេត្ត​កោះកុង ដែល​រៀបចំ​ដោយ​ក្រសួង​រ៉ែ និង​ថាមពល នៅ​សណ្ឋាន​គារ អ៊ីនធឺ ខនធីណិនថល ភ្នំពេញ (Inter Continental Phnom Pehn) នៅ​ថ្ងៃ​ទី​២១ ខែ​កក្កដា ឆ្នាំ​២០១៧។
លោក សន ជ័យ ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា ថ្លែង​ប្រាប់​អ្នក​កាសែត​ក្នុង​កម្មវិធី​ពិគ្រោះ​យោបល់ និង​ផ្សព្វផ្សាយ​លទ្ធផល​សិក្សា​រៀបចំ​យុទ្ធសាស្ត្រ​គ្រប់គ្រង​ការ​បូម​ខ្សាច់​នៅ​ខេត្ត​កោះកុង ដែល​រៀបចំ​ដោយ​ក្រសួង​រ៉ែ និង​ថាមពល នៅ​សណ្ឋាន​គារ អ៊ីនធឺ ខនធីណិនថល ភ្នំពេញ (Inter Continental Phnom Pehn) នៅ​ថ្ងៃ​ទី​២១ ខែ​កក្កដា ឆ្នាំ​២០១៧។
RFA

មន្ត្រី​សង្គម​ស៊ីវិល ជំរុញ​ឱ្យ​អាជ្ញាធរ​នៃ​របប​លោក ហ៊ុន សែន បើក​ការស៊ើបអង្កេត​គួរ​ឱ្យ​ជឿ​ទុកចិត្ត​បាន ទៅលើ​ក្រុមហ៊ុន​ចិន​នៅ​តំបន់​សេដ្ឋកិច្ច​ពិសេស​ខេត្ត​ព្រះសីហនុ ដែល​សហរដ្ឋអាមេរិក​រក​ឃើញ​ថា បាន​ប្រើ​ឈ្មោះ​កម្ពុជា​នាំ​ទំនិញ​ចេញទៅ​ដាក់​លក់​នៅ​លើ​ទីផ្សារ​សហរដ្ឋអាមេរិក ដើម្បី​គេចវេះ​ពី​ការ​បង់ពន្ធ​។ ក្រុមហ៊ុន​ចិន​ដែល​គ្រប់គ្រង​តំបន់​សេដ្ឋកិច្ច​ពិសេស​ខេត្ត​ព្រះសីហនុ បាន​ចេញមុខ​បដិសេធ​ព័ត៌មាន​នេះ ស្រប​ពេល​ដែល​រដ្ឋាភិបាល​ខ្មែរ នៅ​មិនទាន់​បង្ហាញ​ចំណាត់​ការ​ជាក់លាក់​ណាមួយ​ចំពោះ​បញ្ហា​នេះ​នៅឡើយ។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ ថ្លែងប្រាប់​អាស៊ីសេរី​តាម​ទូរស័ព្ទ​កាលពី​ថ្ងៃទី២១ មិថុនា ថា ប្រសិនបើ​ពិត​ជា​មាន​ករណី​បែប​នេះ​ដូច​តាម​ការ​រក​ឃើញ​របស់​សហរដ្ឋអាមេរិក​មែន​នោះ នោះ​រឿងរ៉ាវ​នេះ​ជា​ការ​ប៉ះពាល់​យ៉ាង​ធ្ងន់ធ្ងរ​ដល់​កេរ្តិ៍​ឈ្មោះ និង​អធិបតេយ្យ​របស់​កម្ពុជា ព្រមទាំង​ប៉ះពាល់​ដល់​អត្ថប្រយោជន៍​របស់​ប្រជាពលរដ្ឋ​ខ្មែរ​ម្ចាស់​ស្រុក​ផង​។ ដូច្នេះ លោក​ថា រដ្ឋាភិបាល មិន​គួរ​នៅ​សម្ងំ​ស្ងៀមស្ងាត់ ហើយ​មិន​ព្រម​ចាត់​វិធានការណ៍​បើក​ការស៊ើបអង្កេត​ណាមួយ​នោះ​ទ៖ «អ៊ីចឹង​រឿង​ដែរ​ល្អ​បំផុត​នោះ គឺ​នៅ​ពេល​ដែល​មាន​ប្រភព​ច្បាស់លាស់​ពី​បណ្ដា​ប្រទេស​មួយ​ចំនួន​ដូចជា​អាមេរិក​គេ​មានការ​ស្រាវជ្រាវ​បែបនេះ នោះ​ការ​ស៊ើបអង្កេត​គួរតែ​កើតមាន ហើយ​ប្រតិកម្ម​ទាំងឡាយ​ណា​ដែល​មាន​លក្ខណៈ​មួយ​ឆាប់រហ័ស​ពេក លឿន​ពេក ខ្ញុំ​គិត​ថា ដូចជា​ពុំ​សូវ​មាន​ប្រយោជន៍​ឬ​ពុំ​សូវ​មានការ​ផ្ដល់​នូវ​គុណសម្បត្តិ​នៃ​ការ​ជឿ​ជាក់​អី​ទៅលើ​សមត្ថកិច្ច​របស់​អ្នកស៊ើប​អង្កេត​ហ្នឹង​ប៉ុន្មាន​ទេ»

លោក សន ជ័យ ហៅ​ករណី​ដែល​ក្រុមហ៊ុន​ចិន​អាច​យកឈ្មោះ​កម្ពុជា​ធ្វើជា​ប្រភព​នាំ​ចេញ​ទំនិញ​របស់​ខ្លួន​ដើម្បី​ចំណេញ​កប់​ក្ដោង​ពី​ការ​មិន​បង់ពន្ធ​នៅ​អាមេរិក ឬ​ប្រទេស​លោក​សេរី​ដទៃ​ទៀត​នោះ គឺជា​ការ​លូកដៃ​ចូល ឬ​ជា​ទម្រង់​នៃ​ការ​យាយី ឬ​យក​កម្ពុជា​ធ្វើជា​ឈ្នាន់ ដើម្បី​បម្រើ​អត្ថប្រយោជន៍​សេដ្ឋកិច្ច​របស់​ចិន ដែល​អាច​ជា​ការ​ធ្វើ​អាណានិគម​សេដ្ឋកិច្ច​បែប​ថ្មី​របស់​ចិន​មក​លើ​កម្ពុជា៖ «ភាព​ចំណេញ​បែបនេះ គេ​ហៅថា ជា​ប្រភេទ ជា​ទម្រង់​មួយ ជា​ឥទ្ធិពល​នៃ​ការប្រើប្រាស់​ទឹកដី ឬ​ឈ្មោះ​កម្ពុជា ដែល​គេ​អាច​ថា ជា​ទម្រង់​នៃ​អាណានិគម​សេដ្ឋកិច្ច​បែប​ថ្មី​ក៏បាន​ដែរ​។ ពីព្រោះ​អី​គេ​មាន​ឥទ្ធិពល​លើ​យើង គេ​ខ្ចី​ខោ​ខ្ចី​អាវ​យើង​ស្លៀក ដើម្បី​ចំណេញ​ផ្ទាល់ខ្លួន​របស់​គេ»

ការ​លើកឡើង​របស់​មន្ត្រី​សង្គម​ស៊ីវិល​រូប​នេះ កើតមានឡើង​ក្រោយ​ពេល​ដែល​ក្រុមហ៊ុន​សេដ្ឋកិច្ច​ពិសេស​ខេត្ត​ព្រះសីហនុ បាន​ចេញមុខ​បដិសេធ​លើ​ព័ត៌មាន​ដែល​ថា ទីភ្នាក់ងារ​គយ និង​ការពារ​ព្រំដែន នៃ​ក្រសួង​សន្តិសុខ​ជាតិ​អាមេរិក​បាន​រក​ឃើញ និង​បាន​ផាក​ពិន័យ​ក្រុមហ៊ុន​ចិន​មួយ​ចំនួន ដែល​បាន​ប្រើប្រាស់​ប្រភព​ពី​តំបន់​សេដ្ឋកិច្ច​ពិសេស​នៃ​ប្រទេស​កម្ពុជា ដើម្បី​គេច​ពន្ធ​ពេល​នាំ​ទំនិញ​ទៅ​លក់​នៅ​អាមេរិក​។ កាលពី​ថ្ងៃទី២០ មិថុនា ក្រុមហ៊ុន​តំបន់​សេដ្ឋកិច្ច​ពិសេស​ខេត្ត​ព្រះសីហនុ គ្រប់គ្រង​ដោយ​ចិន បាន​ប្រកាស​នៅ​លើ​គេហទំព័រ​ផ្លូវការ​របស់​ខ្លួន ដោយ​ហៅ​ព័ត៌មាន​នេះ​ថា ជា​សកម្មភាព​នៃ​ការ​បង្ខូច​កេរ​ឈ្មោះ​របស់​ខ្លួន និង​ជា​ព័ត៌មាន​មិន​ពិត។ ក្រុមហ៊ុន​សេដ្ឋកិច្ច​ពិសេស​ខេត្ត​ព្រះសីហនុ សរសេរ​ថា ខ្លួន​បាន​យកចិត្តទុកដាក់​ខ្ពស់ ទៅលើ​សេចក្តី​រាយការណ៍​អំពី​បញ្ហា​នេះ ហើយ​បាន​បើក​ការស៊ើបអង្កេត​ជាបន្ទាន់​លើ​ករណី​មួយ​នេះ​។ ជា​លទ្ធផល ក្រុមហ៊ុន​ថា ក្រុមហ៊ុន​ទាំង ២៩ របស់​ខ្លួន​ដែល​មាន​វត្តមាន​នៅ​ក្នុង​តំបន់​សេដ្ឋកិច្ច​ពិសេស​ខេត្ត​ព្រះសីហនុ​នេះ ហើយ​មាន​ផលិតផល​នាំចេញ​ទៅ​សហរដ្ឋអាមេរិក មិន​មាន​ក្រុមហ៊ុន​ណាមួយ​របស់​ខ្លួន​ត្រូវ​បាន​ធ្វើ​ការស៊ើបអង្កេត ឬ​ផាក​ពិន័យ​ដោយ​ភ្នាក់ងារ​គយ​របស់​សហរដ្ឋ​អាមេរិក​នោះ​ទេ​។ សេចក្ដី​ថ្លែងការណ៍​ដដែល​អះអាង​ថា ក្នុងនាម​ខ្លួន​ជា​គម្រោង​ចម្បង​មួយ​នៃ​កិច្ច​សហប្រតិបត្តិការ​រវាង​ចិន និង​កម្ពុជា ក្រោម​គំនិត​ផ្ដួចផ្ដើម ខ្សែ​ក្រវាត់ និង​ផ្លូវ ក្រុមហ៊ុន​តំបន់​សេដ្ឋកិច្ច​ពិសេស​ខេត្ត​ព្រះសីហនុ តែងតែ​ទទូច​ឱ្យ​មាន​ឡើង​នូវ​ការ​បង្កើត និង​ការគ្រប់គ្រង​លើ​តំបន់​នេះ ស្របតាម​ច្បាប់ និង​បទប្បញ្ញត្តិ​នានា ហើយ​ថា​ខ្លួន​ប្រឆាំង​ដាច់ខាត ចំពោះ​សកម្មភាព​ខុសច្បាប់​ណាមួយ​នោះ។

ការ​ចេញ​មុខ​មក​បដិសេធ​របស់​ក្រុមហ៊ុន​តំបន់​សេដ្ឋកិច្ច​ពិសេស​ខេត្ត​ព្រះសីហនុ​នេះ គឺ​ផ្ទុយគ្នា​ស្រលះ​ទៅ​នឹង​អ្វី​ដែល​អ្នកនាំពាក្យ​ស្ថានទូត​សហរដ្ឋអាមេរិក​បាន​ផ្តល់​ព័ត៌មាន​ឱ្យ​អាស៊ីសេរី កាលពី​ថ្ងៃទី១៩ មិថុនា កន្លងទៅ​។ កាលណោះ អ្នកនាំពាក្យ​ស្ថានទូត​អាមេរិក​ប្រចាំ​ក្រុងភ្នំពេញ លោក អេរិន ឆ្វាតជេស (Arend Zwartjes) ប្រាប់​អាស៊ីសេរី​ថា ក្រសួង​សន្តិសុខ​ជាតិ​របស់​សហរដ្ឋអាមេរិក​បាន​ផាក​ពិន័យ​ក្រុមហ៊ុន​ចិន​មួយ​ចំនួន ដែល​បាន​ប្រើប្រាស់​ប្រភព​នាំ​ចេញពី​កម្ពុជា ដើម្បី​គេចវេះ​ការ​បង់ពន្ធ​ទំនិញ​ទៅ​សហរដ្ឋអាមេរិក។ លោក​ថា ក្រុមហ៊ុន​ចិន​ទាំងនោះ​មាន​ទីស្នាក់ការ​ក្នុង​តំបន់​សេដ្ឋកិច្ច​ពិសេស​ខេត្ត​ព្រះសីហនុ​តែ​លោក​មិនបាន​បញ្ចេញ​ឱ្យ​ដឹង​លម្អិត​អំពី​ឈ្មោះ​របស់​ក្រុមហ៊ុន​ចិន​ទាំងនោះ​នោះ​ទេ។

គិត​ត្រឹម​យប់​ថ្ងៃទី២១ មិថុនា អាស៊ីសេរី នៅ​មិនទាន់​អាច​ទាក់ទង​អ្នកនាំពាក្យ​រដ្ឋាភិបាល លោក ផៃ ស៊ីផាន ដើម្បី​សុំ​ការ​ពន្យល់​អំពី​ជំហរ​របស់​រដ្ឋាភិបាល​ជុំវិញ​បញ្ហា​នេះ និង​ថា​តើ​រដ្ឋាភិបាល​អាច​នឹង​ចាត់​វិធានការណ៍​បើក​ការស៊ើបអង្កេត​ណាមួយ​ដែរ​ឬ​យ៉ាងណា​នោះ ទៅលើ​ក្រុមហ៊ុន​ចិន​នៅ​ក្នុង​តំបន់​សេដ្ឋកិច្ច​ពិសេស​ខេត្ត​ព្រះសីហនុ​នេះ។ ក៏ប៉ុន្តែ កាល​ពី​ពេល​កន្លងទៅ លោក​ថា កម្ពុជា​ស្វាគមន៍​ចំពោះ​ការស៊ើបអង្កេត​របស់​អាមេរិក និង​បាន​ហៅ​ទង្វើ​ប្រើប្រាស់​ឈ្មោះ​កម្ពុជា ថា​ជា​បទឧក្រិដ្ឋ និង​ថា​កម្ពុជា​មិនបាន​ចូលរួម​ពាក់ព័ន្ធ​នោះ​ទេ។

ស្ថិតនៅ​ចម្ងាយ ១២​គីឡូម៉ែត្រ​ពី​កំពង់ផែ​ទឹក​ជ្រៅ​ក្រុងព្រះសីហនុ និង ៣​គីឡូម៉ែត្រ​ពី​ព្រលាន​យន្តហោះ​អន្តរជាតិ​ខេត្ត​ព្រះសីហនុ តំបន់​សេដ្ឋកិច្ច​ពិសេស​ខេត្ត​ព្រះសីហនុ​នេះ ត្រូវ​បាន​បង្កើត​ឡើង​កាល​ពី​ដើម​ឆ្នាំ២​០០៨ នៅ​លើ​ផ្ទៃដី​ទំហំ​ជាង ១ ពាន់​ហិកតារ (.១១៣ ហិកតារ​) ស្ថិត​ក្នុង​ឃុំ​បិតត្រាំង ស្រុក​ព្រៃនប់ ខេត្ត​ព្រះសីហនុ។ តំបន់​សេដ្ឋកិច្ច​ពិសេស​ខេត្ត​ព្រះសីហនុ​នេះ បង្កើត​ឡើង​ដោយ​សហគ្រាស​ចិន និង​កម្ពុជា​ជា​ការ​បណ្ដាក់ទុន​រួមគ្នា ក្នុង​នោះ​ភាគី​ចិន កាន់កាប់​ភាគហ៊ុន ៤៩ ភាគរយ ឯ​ភាគី​កម្ពុជា​កាន់កាប់​ភាគហ៊ុន ៥១​ភាគរយ។ លោក​ឧបនាយករដ្ឋមន្ត្រី ហោ ណាំហុង ធ្លាប់​សរសើរ​ថា តំបន់​សេដ្ឋកិច្ច​ពិសេស​នេះ ជា​តំបន់​គំរូ​មួយ និង​ហៅ​តំបន់​នេះ​ថា​ជា កូនបង្កើត​របស់​រដ្ឋាភិបាល​កម្ពុជា និង​ចិន​ក្រោម​ក្របខ័ណ្ឌ​គម្រោង​គំនិត​ផ្ដួចផ្ដើម​ខ្សែ​ក្រវាត់ និង​ផ្លូវ​របស់​មហា​យក្ស​ចិន។ បច្ចុប្បន្ន ក្រុមហ៊ុន​តំបន់​សេដ្ឋកិច្ច​ពិសេស​ខេត្ត​ព្រះសីហនុ​នេះ កំពុង​ត្រៀម​រៀបចំ​បោះផ្សាយ​ដាក់​លក់​មូលបត្រ​កម្មសិទ្ធិ​ជា​សាធារណៈ​របស់​ខ្លួន ឬ​ហៅថា IPO និង​ចុះបញ្ជី​នៅ​លើ​ផ្សារ​មូលបត្រ​កម្ពុជា​ផង។ ទិន្នន័យ​របស់​ក្រុមប្រឹក្សា​អភិវឌ្ឍន៍​កម្ពុជា ឱ្យ​ដឹង​ថា ក្នុង​ឆ្នាំ​២០១៨ នេះ ក្រុមហ៊ុន​តំបន់​សេដ្ឋកិច្ច​ពិសេស​ខេត្ត​ព្រះសីហនុ បាន​នាំចេញ​ផលិតផល​សរុប​តម្លៃ ៣៧២ លាន​ដុល្លារ​អាមេរិក ភាគច្រើន​ជា​ផលិតផល​វាយនភណ្ឌ ស្បែកជើង ផលិតផល​ទេសចរណ៍ ផលិតផល​អេឡិចត្រូនិក កង់ឡាន គ្រឿងបន្លាស់​យានយន្ត គ្រឿង​សង្ហា​រឹម គ្រឿង​បរិក្ខារ​ការិយាល័យ និង​ឧបករណ៍​កីឡា​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល