ប្រជាពលរដ្ឋនៅក្បែរអាជីវកម្មរ៉ែស្នើដល់រដ្ឋាភិបាលទទួលខុសត្រូវចំពោះការផ្ដល់សិទ្ធិដល់ក្រុមហ៊ុនរុករកអាជីវកម្មរ៉ែណា ដែលបំផ្លិចបំផ្លាញដីស្រែចម្ការ និងទាមទារឱ្យរដ្ឋាភិបាលបង្ហាញចំណូលពីវិស័យរ៉ែទាំងនោះជាសាធារណៈ។ មន្ត្រីសង្គមស៊ីវិលថា ចំណូលដែលបានមកវិស័យរ៉ែកន្លងមកហាក់មិនមានភាពប្រក្រតីប្រៀបធៀប និងធនធានរ៉ែដែលបាត់បង់។
ពលរដ្ឋ និងសង្គមស៊ីវិលស្នើដល់រដ្ឋាភិបាលបង្ហាញចំណូលដែលបានមកវិស័យរ៉ែជាសាធារណៈ និងបែងចែកចំណូលដែលបានពីវិស័យនេះ អភិវឌ្ឍន៍ទៅលើសហគមន៍មូលដ្ឋានដែលអ្នកការពារធនធានទាំងនោះ។
ពលរដ្ឋនៅជិតក្រុមហ៊ុនជីកយករ៉ែមាសឌែលខម (Del com Cambodia) ខេត្តព្រះវិហារ លោកស្រី យឹម សុផាន លើកឡើងថា អស់រយៈពេលជាង២០ឆ្នាំមកហើយដែលក្រុមហ៊ុនចិននេះបានឈូសឆាយទៅលើដីសហគមន៍ជនជាតិកួយជាង ៥០គ្រួសារ ហើយអាជ្ញាធរមិនបានស្វែងរកដំណោះស្រាយដល់ពលរដ្ឋរហូតដល់បច្ចុប្បន្ន។
ជនជាតិដើមកួយ លោកស្រី យឹម សុផាន បន្តថា សហគមន៍ដែលបាត់បង់ដីធ្លីកំពុងរស់នៅទាំងវេទនាដោយសារតែពួកគាត់មិនមានស្រែចម្ការធ្វើដូចមុន និងសូម្បីតែអនុផលព្រៃឈើដែលពួកគាត់រកបានដូចជាដំឡូង ក្ដួច និងបន្លែព្រៃ ក៏ក្រុមហ៊ុនបានបំផ្លាញទាំងស្រុងនោះដែរ។ «»
ចំណែកប្រជាពលរដ្ឋរស់នៅក្បែរ ក្រុមហ៊ុនក្រុមហ៊ុន ឡេត ចេង ម៉ាញនីង ឌីវេឡុបមិន (LATE CHENG MINING DEVELOPMENT CO.,LTD) ខេត្តកំពង់ធំ ដែលកំពុងធ្វើអាជីវកម្មរ៉ែមាស ដោយសុំមិនបញ្ចេញឈ្មោះថាក្រុមហ៊ុនចិននេះបំផ្លាញផលដំណាំរបស់ប្រជាពលរដ្ឋដែលរស់នៅជុំវិញ និងបង្ហូរទឹកកង្វក់ទៅកាន់អូរដែលប្រជាពលរដ្ឋប្រើប្រាស់។
លោកថា ក្រុមហ៊ុន និងមន្ត្រីពាក់ព័ន្ធគួរតែសិក្សាពីផលប៉ះពាល់ជាមុន និងគួរតែផ្ដល់ថវិកាខ្លះសម្រាប់អភិវឌ្ឍមូលដ្ឋានដែលកំពុងខ្វះខាតសាលារៀន មន្ទីរពេទ្យ ជាដើម។ «»
វិទ្យុអាស៊ីសេរីមិនទាន់អាចសុំការឆ្លើយតបរឿងនេះពីអ្នកនាំពាក្យក្រសួងរ៉ែ និងថាមពល លោក ជៀប សួរ និងរដ្ឋមន្ត្រីក្រសួងរ៉ែ និងថាមពល លោក កែវ រតនៈ បានទេ នៅថ្ងៃទី៨ ខែកញ្ញា។
សេចក្ដីព្រាងហិរញ្ញវត្ថុឆ្នាំ២០២៣ ថា ចំណូលដែលបានមកពីសម្បទានរ៉ែក្នុងឆ្នាំ២០២២ ទទួលបានចំនួនជាង១៣៦ ពាន់លានរៀល (១៣៦.២០៤,៥លានរៀល) ឬជាង៣២លានដុល្លាអាមេរិក។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថាការបាត់បង់ធនធានធម្មជាតិ និងធនធានរ៉ែ មិនសមាមាត្រទៅនឹងប្រាក់ចំណូលដែលរដ្ឋាភិបាលទទួលបាននោះទេ។ លោក សន ជ័យ ថា រដ្ឋាភិបាលត្រូវតែបង្ហាញចំណូលពីវិស័យនេះជាសាធារណៈ និងចាត់វិធានការផ្លូវច្បាប់លើក្រុមហ៊ុនមិនចុះបញ្ជី ឬរំលោភបំពានលើសិទ្ធិពលរដ្ឋ។ «»
លោក សន ជ័យ បន្តថា រដ្ឋាភិបាលគួរតែមានកញ្ចប់ផែនការជាក់លាក់សម្រាប់ការអភិវឌ្ឍដល់សហគមន៍មូលដ្ឋាន និងជនជាតិដើម ដែលជាអ្នកការពារធនធានទាំងអស់នេះ ខណៈកន្លងមកលោកសង្កេតឃើញថាពលរដ្ឋតាមមូលដ្ឋានមិនទទួលបានការយកចិត្តទុកដាក់ពីរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។