កសិករនៅខេត្តកណ្ដាលជាច្រើនឈប់ចិញ្ចឹមជ្រូកដោយសារ តម្លៃធ្លាក់ចុះធ្វើឲ្យពួកគេមិនអាចទប់ទល់នឹងថ្លៃចំណាយប្រចាំខែ ខណៈចំណីថ្នាំជ្រូកវិញកំពុងឡើងថ្លៃខ្ពស់។ អ្នកជំនាញយល់ឃើញថា បញ្ហានេះបានកើតមានឡើងទូទាំងប្រទេស ដោយសារមានការនាំចូលជ្រូក និងសាច់ជ្រូកបង្កកពីប្រទេសជិតខាង។
កសិករដែលមានកសិដ្ឋានចិញ្ចឹមជ្រូកជាច្រើននាក់នៅខេត្តកណ្ដាល ត្អូញត្អែរស្រដៀងគ្នាថា ពួកគេកំពុងប្រឈមមុខបិទទ្វារឈប់ចិញ្ចឹមជ្រូក ដោយសារមិនអាចរកប្រាក់ដើម្បីទប់ទល់និងថ្លៃចំណាយប្រចាំខែបាន។ រីឯអ្នកខ្លះទៀតពុំអាចរកប្រាក់បាន ដើម្បីសងធនាគារ និងបង្ខំចិត្តលក់ ដី ស្រែចម្ការ យកលុយទៅដោះបំណុលគេ។
កសិករនៅក្រុងសំពៅពូន ខេត្តកណ្ដាល លោក សៅ ចក់ អះអាងប្រាប់វិទ្យុអាស៊ីសេរី នៅថ្ងៃទី៣០ ខែសីហា ថា រូបលោកប្រកបមុខរបរចិញ្ចឹមជ្រូកនេះជាច្រើនឆ្នាំមកហើយ ប៉ុន្តែមួយរយៈចុងក្រោយនេះលោកសង្កេតឃើញថា តម្លៃជ្រូកធ្លាក់ចុះខុសពីសព្វមួយដង ដោយពីមុនលក់បានតម្លៃ១ម៉ឺនរៀលក្នុង ១គីឡូ មកដល់បច្ចុប្បន្ននេះ ក្នុង១គីឡូក្រាមឈ្មួញទិញតែជាង៧ពាន់រៀលប៉ុណ្ណោះ។ រីឯចំណីសម្រាប់ចិញ្ចឹមវិញ កំពុងឡើងខុសពីធម្មតា ពោលគឺតម្លៃ២ម៉ឺន ទៅ៣ម៉ឺនរៀលក្នុង ១បាវ(៣០គីឡូក្រាម) ចំណែកឯតម្លៃពីមុន ១បាវ(៣០គីឡូក្រាម) ១ម៉ឺនរៀល។
លោក សៅ ចក់៖ «សូមរដ្ឋាភិបាលជួយដោះស្រាយឱ្យបានជ្រូកឡើងថ្លៃ តុល្យភាពជាមួយនឹងការចិញ្ចឹមមានចំណេញមានអីខ្លះអ៊ីចឹងណា៎ ប្រជាពលរដ្ឋយើងមានកម្លាំងចិញ្ចឹម ដល់ខាតអ៊ីចឹងបិទទ្រង់ បានឡើងថ្លៃក្រែងបានចំណេញអីខ្លះខ្ចីគេចិញ្ចឹមដែរហ្នឹង។
ស្រដៀងគ្នានេះដែរ កសិករម្នាក់រស់នៅ ស្រុកកោះធំ គឺលោកស្រី ជី ភី រៀបរាប់ថា លោកស្រីកំពុងពិបាកចិត្ត មិនដឹងទៅរកលុយមកពីទីណា ដើម្បីយកទៅសងម្ចាស់បំណុលវិញនោះទេ ដោយសារ ជ្រូកប្រមាណ ៣០ក្បាលដែលត្រូវលក់ចេញ ឈ្មួញឲ្យតម្លៃទាបពេកមិនអាចគ្រប់គ្រាន់នឹងថ្លៃចំណាយ។ លោកស្រីថា កំពុងដាក់លក់ដីចម្ការជិត ១ហិកតារ ដើម្បីយកប្រាក់ទៅសងម្ចាស់បំណុល។
លោកស្រី ជី ភី៖ «កូនមួយ ១៦ម៉ឺនដែលហើយហើយដល់ពេលចំណីថ្លៃ ចំណីជាង ១០ម៉ឺន មួយស្បោង ៣០គីឡូ ជូនងាប់មួយអីខាត ស្គមឈឺងាប់ឈឺងាប់ ឈឺអីផងចិញ្ចឹមលក់ទៅអត់បានថ្លៃទៀត តស៊ូហា៎ ប៉ុន្តែចិញ្ចឹមខាតរហូត ឥឡូវជិតអស់ដីហើយលោកគ្រូ រកលក់មួយដុំទៀតហើយមើលទៅសងគេខាតរហូត»។
ចំណែកឯលោកស្រី ស្តើង ណារី ដែលកំពុងចិញ្ចឹមជ្រូកជាង ១០០ក្បាល រៀបរាប់ដែរថា លោកស្រីសម្រេចចិត្តកាត់បន្ថយប្រើប្រាស់ចំណីថ្នាំ ដោយសារតម្លៃថ្លៃមិនអាចរកប្រាក់ទិញចំណីដើម្បីផ្គត់ផ្គង់បាននោះទេ។ លោកស្រីបន្ថែមថា ការធ្វើបែបនេះវា ប៉ះពាល់ដល់ការលូតលាស់របស់ជ្រូកនឹងមិនមានសាច់ល្អ ហើយមិនអាចលក់បានថ្លៃឡើយ។
លោកស្រី ស្តើង ណារី៖ «ចិញ្ចឹមតែវាអត់ធំម៉េចលោកគ្រូ ដឹងយើងឱ្យវាស៊ីចំណីអត់ដល់ម៉េចលាយកន្ទក់ពាក់កណ្ដាល ចំណីពាក់កណ្ដាលចំណីវាថ្លៃពេក លោកគ្រូវាឡើងរហូតអ៊ីចឹងយើងលាយកន្ទក់លាយអ៊ីចឹងខ្លះវាអត់សូវធំដូចថាលឿន»។
កសិករនៅខេត្តកណ្ដាលភាគច្រើនប្រកបរបរធ្វើស្រែចម្ការ ដាំដំណាំ និងចិញ្ចឹមសត្វ ជាពិសេសជ្រូកដើម្បីផ្គត់ផ្គង់ជីវភាពគ្រួសារ។ ប៉ុន្តែបច្ចុប្បន្ន កសិករបានលះបង់មុខរបរពួកគាត់ជាបន្តបន្ទាប់ដោយសារតែកសិផលមិនមានទីផ្សារ និងតម្លៃសមរម្យ កសិករទាំងនោះប្រឈមមុខនឹងធ្វើចំណាកស្រុក ដើម្បីស្វែងរកការងារធ្វើនៅក្រៅប្រទេស ដោយអ្នកខ្លះបង្ខំចិត្តបញ្ជូនកូនទៅធ្វើការនៅប្រទេសថៃ។
ជុំវិញរឿងនេះ វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងកសិកម្ម រុក្ខាប្រមាញ់ និង នេសាទ អ្នកនាង អ៊ឹម រចនា បានទេ នៅថ្ងៃទី៣០ ខែសីហា។
ទាក់ទងនឹងបញ្ហានេះប្រធានក្រុមប្រឹក្សាភិបាលអ្នកចិញ្ចឹមសត្វកម្ពុជា លោក លី ឡាវីល យល់ឃើញថា ការចិញ្ចឹមជ្រូកមិនអាចរកប្រាក់ចំណេញ ដោយសារតម្លៃធ្លាក់ចុះនេះមិនមែនកើតឡើងនៅខេត្តកណ្ដាលប៉ុណ្ណោះទេ បញ្ហានេះបានកើតឡើងទូទាំងប្រទេស។លោកថា បញ្ហានេះ ដោយសារតែមានការនាំជ្រូក ចូល និងសាច់ជ្រូកបង្កក ពីប្រទេសជិតខាង។
លោក លី ឡាវីល៖ «ស្នើសូមទៅក្រសួងពាក់ព័ន្ធពិសេសក្រសួងកសិកម្មហ្នឹងប៉ុន្តែក្រសួងកសិកម្មគាត់ក៏អត់មានដំណោះស្រាយអ្វីដែរ បានន័យថា មានតែអង្គុយមើលទាំងអស់គ្នាអ៊ីចឹង វាអត់ធ្វើអ្វីកើត ចង់និយាយអ៊ីចឹង ព្រោះនេះវាបើមកស្របច្បាប់ ខ្ញុំជឿថា រដ្ឋាភិបាលវាមានមកស្របច្បាប់ គេឱ្យកូតា ១ពាន់តោន ហ្នឹងគឺមកស្របច្បាប់ហើយ ក៏ប៉ុន្តែមិនស្របច្បាប់នោះទេ មិនដឹងយ៉ាងណា ឱ្យ១ពាន់ មក១ម៉ឺនក៏យើងមិនដឹង»។
របាយការណ៍របស់សមាគមអ្នកចិញ្ចឹមសត្វកម្ពុជាបានឲ្យដឹងថា បច្ចុប្បន្នប្រទេសកម្ពុជាត្រូវការជ្រូកប្រមាណ ១ម៉ឺនក្បាល ក្នុងថ្ងៃដើម្បីផ្គត់ផ្គង់។ របាយការណ៍នេះបញ្ជាក់ថា កម្ពុជាបាននាំចូលជ្រូកពីក្រៅប្រទេសទើបធ្វើឱ្យតម្លៃជ្រូកក្នុងស្រុកធ្លាក់ ពោលគឺចាប់តាំងពីខែកញ្ញា ឆ្នាំ២០២២ ភាគច្រើនការនាំចូលពីប្រទេសវៀតណាម ថៃ និងបណ្ដាប្រទេសផ្សេងៗទៀតតាមរយៈកំពង់ផែខេត្តព្រះសីហនុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។