អ្នកឃ្លាំមើលស្ថានការណ៍សង្គម លើកឡើងថា រដ្ឋាភិបាលគួរតែរកឱកាសពង្រីកពាណិជ្ជកម្មជាមួយថៃឱ្យបានច្រើនបន្ថែមទៀត ខណៈដែលទំហំពាណិជ្ជកម្មថៃមានប្រៀបលើកម្ពុជាច្រើន។ ការលើកឡើងនេះ ស្របពេលដែលនាយករដ្ឋមន្ត្រីថៃថ្មី គ្រោងធ្វើទស្សនកិច្ចទៅកម្ពុជាលើកដំបូងនៅថ្ងៃទី២៨ កញ្ញា។
អ្នកឃ្លាំមើលស្ថានការណ៍សង្គមលើកឡើងថា នាយករដ្ឋមន្ត្រីថៃធ្វើទស្សនកិច្ចមកកម្ពុជាជារឿងល្អដែលប្រមុខរដ្ឋាភិបាលខ្មែរគួរតែឆក់ឱកាសនេះពង្រីកពាណិជ្ជកម្មឱ្យបានទូលំទូលាយជាមួយប្រទេសជិតខាងមួយនេះ។
អ្នកជំនាញផ្នែកវិទ្យាសាស្ត្រនយោបាយ លោក ឯម សុវណ្ណារ៉ា ប្រាប់វិទ្យុអាស៊ីសេរីនៅថ្ងៃទី២៧ កញ្ញាថា ដំណើរទស្សនកិច្ចរបស់នាយករដ្ឋមន្ត្រីថៃ លោក សេដ្ឋា ធ្វីថាវីស៊ីន (Srettha Thvisin) មកកម្ពុជា រដ្ឋាភិបាលប្រទេសទាំងពីរគួរតែសហការគ្នាដើម្បីផ្ដល់អត្ថប្រយោជន៍ឱ្យគ្នាទៅវិញទៅមកឱ្យបានច្រើនជាងបច្ចុប្បន្ន ក្នុងនោះរួមមានបញ្ហាសន្តិសុខ រឿងទេសចរ។ លោកបញ្ជាក់ថា កន្លងមកថៃតែងតែមានប្រៀបជាងកម្ពុជាលើការដោះដូរពាណិជ្ជកម្ម។
លោក ឯម សុវណ្ណារ៉ា៖ «វាមានរឿងខ្លះដែលកម្ពុជាគួរតែបង្ហាញ ឬក៏មានទស្សនៈឱ្យភាគីថៃជួយទប់ស្កាត់ ឧទាហរណ៍រឿងចិនដែលថតឡើងថ្មីៗនេះ ដែលពាក់ព័ន្ធទៅនឹងការដាក់បន្ទុកទៅដល់កម្ពុជា និងភូមាថា ជាប្រទេសដែលចាប់ជម្រិត។ ហើយអ្វីដែលកម្ពុជាសង្ឃឹមមែនទែននោះ គឺភ្ញៀវនៅខាងថៃច្រើន អ៊ីចឹងគួរតែមានយន្តការមួយអាចបង្កើនចរន្តកញ្ចប់ទេសចរឱ្យរីកសាយភាយមកដល់កម្ពុជា កុំមានតែត្រឹមថៃ។ អ៊ីចឹងបើមានការជជែកការពង្រីកទំនាក់ទំនងទេសចរណ៍ដែលមកថៃគួរតែអាចពង្រីក ឬបង្កលក្ខណៈឱ្យមកដល់កម្ពុជាដើម្បីជួយជំរុញកំណើនសេដ្ឋកិច្ចកម្ពុជាផងដែរ»។
ការលើកឡើងនេះ ស្របពេលដែលនាយករដ្ឋមន្ត្រីថៃ លោក សេដ្ឋា ធ្វីថាវីស៊ីន គ្រោងបំពេញទស្សនកិច្ចទៅកម្ពុជានៅថ្ងៃទី២៨ កញ្ញា។ សេចក្ដីប្រកាសព័ត៌មានរបស់ក្រសួងការបរទេស ចុះថ្ងៃទី២៦ កញ្ញា ឱ្យដឹងថា ដំណើរទស្សនកិច្ចរបស់លោក សេដ្ឋា នេះដើម្បីពង្រឹងបន្ថែមនូវចំណងមិត្តភាពជាប្រពៃណី និងលើកកម្ពស់កិច្ចសហប្រតិបត្តិការពហុវិស័យ រវាងប្រទេសទាំងពីរស្របតាមស្មារតីការពង្រឹងភាពជាដៃគូ ដើម្បីសន្តិភាព និងវិបុលភាព នៃប្រទេសទាំងពីរ។ ចំណែកនាយករដ្ឋមន្ត្រីថៃថ្មី ក៏គ្រោងនឹងលើកយកវិធានការបង្ក្រាប និងជួយសង្គ្រោះជនរងគ្រោះពីអំពើបោកប្រាស់ ជួញដូរមនុស្សតាមប្រព័ន្ធអនឡាញនៅតាមតំបន់ព្រំដែននៃប្រទេសទាំងពីរដែលជនរងគ្រោះជាច្រើនជាជនជាតិថៃផងដែរ មកពិភាក្សា។
ទាក់ទងនឹងការដោះដូរទំនិញគ្នាវិញ ជញ្ជីងពាណិជ្ជរបស់កម្ពុជានៅចាញ់ប្រៀបថៃច្រើន។
របាយការណ៍របស់ស្ថានទូតកម្ពុជាប្រចាំនៅប្រទេសថៃ បង្ហាញថា ការដោះដូរពាណិជ្ជកម្មទ្វេភាគីរវាងកម្ពុជា និងប្រទេសថៃ រយៈពេល១១ខែ ក្នុងឆ្នាំ២០២២ មានទំហំទឹកប្រាក់សរុបជាង ៩ពាន់លានដុល្លារ គឺកើនឡើង ជាង២៦% ប្រៀបធៀបនឹងរយៈពេលដូចគ្នា ឆ្នាំ២០២១ ។ ក្នុងនោះការនាំទំនិញចេញរបស់កម្ពុជាទៅថៃ មានជាង ១ពាន់លានដុល្លា គឺកើនឡើងជាង ២៧% បើធៀបនឹងឆ្នាំ២០២១ ដែលមានជាង ៨០០លានដុល្លារ (៨១៤លានដុល្លា) ។ ចំណែកការនាំចូលទំនិញពីប្រទេសថៃ វិញមានជាង ៨ពាន់លានដុល្លារអាមេរិក គឺកើនឡើង ជិត២៦ភាគរយ(២៥.៩%) បើធៀបនឹងឆ្នាំ២០២១ ដែលមានជិត ៦ពាន់ ៥០០លានដុល្លារ(៦,៤៨០)។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេសលោក អាន សុខខឿន និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី២៧ កញ្ញា។
ទោះជាយ៉ាងណាអ្នកសិក្សាផ្នែកច្បាប់ និងជាអ្នកតាមដានស្ថានការណ៍សង្គម លោក លី ចាន់ដារ៉ាវុត យល់ឃើញថា ក្រៅពីត្រូវការពង្រីកពាណិជ្ជកម្មបន្ថែមហើយ រដ្ឋាភិបាលកម្ពុជា ក៏គួរតែជំរុញទៅនាយករដ្ឋមន្ត្រីថៃឱ្យសម្រួលដល់ការរស់នៅរបស់ពលករខ្មែរនៅប្រទេសថៃផងដែរ។ លោកបញ្ជាក់ថា ពលករខ្មែរភាគច្រើនពិបាកធ្វើឯកសារស្របច្បាប់ ដែលធ្វើឱ្យពលករខ្លះបង្ខំចិត្តធ្វើការងារដោយខុសច្បាប់ ហើយតែងត្រូវថៅកែថៃរំលោភបំពានកម្លាំងពលកម្ម។
លោក លី ចាន់ដារ៉ាវុត៖ «ហើយបើអាចយើងជជែកគ្នាទៅលើធ្វើយ៉ាងម៉េចដើម្បីឱ្យជីវភាពរបស់ពលករខ្មែរនៅប្រទេសថៃកាន់តែល្អប្រសើរ។ ព្រោះថា នៅពេលដែលប្រជាជនខ្មែរនៅប្រទេសថៃគាត់ធ្វើការបានប្រាក់ខែមក គឺវាហូរចូលទៅក្នុងប្រទេសកម្ពុជាជួយទៅលើគ្រួសារអភិវឌ្ឍជីវភាពប្រជាជននៅក្នុងស្រុកខ្មែរ។ ដូច្នេះវាសំខាន់មែនទែនដែលមេដឹកនាំគួរតែផ្ដោតលើចំណុចហ្នឹងបាទ»។
របាយការណ៍អង្គការសង់ត្រាល់ (Central) ឱ្យដឹងថា បច្ចុប្បន្ននៅប្រទេសថៃមានពលករខ្មែរធ្វើការស្របច្បាប់ និងមិនស្របច្បាប់ជាង ២លាននាក់។ កាលពីខែមេសាកន្លងទៅ មានពលករមួយចំនួនត្រូវបានសមត្ថកិច្ចថៃចាប់ដាក់គុកដោយចងដៃនឹងច្រវាក់ជាប់គ្នា ក្នុងពេលដែលពួកគេឆ្លងដែនមកប្រទេសថៃខុសច្បាប់ ហើយរដ្ឋាភិបាលកម្ពុជាមិនបានអើពើជួយដល់ពួកគេឡើយ។
អ្នកតាមដានស្ថានការណ៍សង្គមរំពឹងថា ដំណើរទស្សនកិច្ចរបស់នាយករដ្ឋមន្ត្រីថៃនេះ នឹងធ្វើឱ្យស្ថានការណ៍ទាំងនេះបានប្រសើរឡើង ហើយនឹងជំរុញឱ្យសេដ្ឋកិច្ចនៃប្រទេសទាំងពីរប្រសើរជាងមុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។