អ្នកជំនាញកសិកម្មស្នើឱ្យរដ្ឋាភិបាលគិតគូរពីផលប្រយោជន៍កសិករឱ្យបានច្រើនពាក់ព័ន្ធនឹងការនាំចេញផ្លែស្វាយស្រស់ទៅកាន់ប្រទេសចិន។ ការស្នើឡើងនេះ បានកើតមានឡើងក្រោយពីកម្ពុជា និងប្រទេសចិនបានបើកសម្ពោធជាផ្លូវការនាំចេញផ្លែស្វាយស្រស់ជាលើកដំបូងទៅកាន់ប្រទេសចិន។
ស្ថាបនិកគណបក្សប្រជាធិបតេយ្យមូលដ្ឋាន និងជាអ្នកជំនាញកសិកម្ម លោកបណ្ឌិត យ៉ង សាំងកុមារ មានប្រសាសន៍ថា ការនាំចេញផ្លែស្វាយស្រស់នេះគឺជារឿងល្អ ដើម្បីជួយដល់វិស័យកសិកម្មកម្ពុជា។
លោកបញ្ជាក់ថា ប្រសិនបើរដ្ឋាភិបាលធ្វើយ៉ាងណាឱ្យកសិករខ្មែរ អ្នកដាំស្វាយទទួលបានផលប្រយោជន៍ពីការនាំចេញនោះរឹតតែល្អប្រសើរ ជាជាងចំណេញតែក្រុមហ៊ុនចិន៖ «ចង់និយាយថា ជំហានដំបូងអីចឹងមានក្រុមហ៊ុនចិនមកវិនិយោគយ៉ាងណាក៏ដោយ សំខាន់យើងបានផលិតផលយើងបានទៅដល់ទៅផ្សារ ហើយទៅថ្ងៃមុខទៅប្រសិនបើគេស្គាល់ គេតម្រូវការច្រើនវាល្អ។ ប៉ុន្តែវាសំខាន់គឺធ្វើម៉េច ឱ្យកសិករខ្មែរទៅថ្ងៃមុខអាចបានទទួលផលប្រយោជន៍ ពីការនាំចេញទៅកាន់ទីផ្សារចិនដែរ»។
ស្ថានទូតចិនប្រចាំប្រទេសកម្ពុជា កាលពីថ្ងៃទី ៧ ឧសភា បានបង្ហោះនៅលើបណ្ដាញសង្គមហ្វេសប៊ុករបស់ខ្លួនអំពីពិធីសម្ពោធជាផ្លូវការក្នុងការនាំចេញផ្លែស្វាយស្រស់ជាលើកដំបូង ទៅកាន់ប្រទេសចិន តាមរយៈប្រព័ន្ធវីដេអូថា ផ្លែស្វាយស្រស់ប្រមាណ ១០០ តោន បាននាំចេញជាលើកដំបូងទៅកាន់ទីផ្សារប្រទេសចិន។
ចិនកាលពីខែមេសា ឆ្នាំ២០២១ បានចុះបញ្ជីឈ្មោះចម្ការស្វាយចំនួន ៣៧ កន្លែង និងរោងចក្រចំនួន ៥ ដែលមានទីតាំងនៅក្នុងខេត្តកំពង់ស្ពឺ និងខេត្តកោះកុង សម្រាប់នាំផ្លែស្វាយស្រស់ទៅកាន់ប្រទេសចិន
ពាក់ព័ន្ធនឹងការនាំចេញនេះដែរ បណ្ឌិត យ៉ង សាំងកុមារ ថ្លែងថា ក្រសួងកសិកម្មត្រូវជួយបណ្តុះបណ្តាលដល់កសិករ ឱ្យពួកគាត់ផលិតដំណាំកសិកម្មស្របតាមស្តង់ដារទីផ្សារដែលប្រទេសចិនត្រូវការ ដើម្បីជួយបង្កើនជីវភាពដល់កសិករ។
អ្នកនាំពាក្យក្រសួងកសិកម្ម លោក ស្រី វុទ្ធី ប្រាប់អាស៊ីសេរីថា ក្រុមហ៊ុនចិនដែលនាំចេញផ្លែស្វាយស្រស់ទាំងនោះ ពឹងផ្អែកច្រើនពីការប្រមូលទិញផ្លែស្វាយដែលត្រូវស្តង់ដារពីកសិករ និងសហគមន៍កសិកម្ម ហើយក្រសួងរំពឹងថា បញ្ហាទីផ្សារផ្លែស្វាយរបស់កសិករនឹងល្អប្រសើរជាងមុន។របាយការណ៍ក្រសួងកសិកម្ម ស្ដីពីការនាំចេញកសិផលក្នុងរយៈពេល៤ ខែ ឆ្នាំ២០២១ មានចំនួនជាង ៣,៨ លានតោន(៣,៨២៦ ៤៣២,៨៥ តោន) ទៅកាន់ប្រទេសចំនួន៥៤ គឺបានកើនឡើងជាង ៨៧%(៨៧,៣៥%) បើធៀបនឹងរយៈពេលដូចគ្នាកាលពីឆ្នាំ ២០២០។ ក្នុងនោះផ្លែស្វាយស្រស់មានចំនួនជាង ១,៤លានតោន គឺបានកើនឡើងជិត ២៤០%( ២៣៩,១៣%)។
ផ្លែស្វាយដែលក្រសួងកសិកម្ម បាននាំចេញនោះ គឺទៅកាន់ទីក្រុងហុង កុង(Hong Kong) កូរ៉េខាងត្បូង ( South Korea) គុយវ៉ែត (Kuwait ) សិង្ហបុរី ( Singapore) ថៃ (Thailand) និងវៀតណាម (Vietnam)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។