ក្រុមហ៊ុនចិនអាចនឹងបោះបង់គម្រោងសាងសង់ព្រលានយន្តហោះនៅខេត្តមណ្ឌលគិរីដោយសារតែគ្មានសង្ឃឹមអាចប្រមូលចំណូលមកវិញ

ដោយ សុ ជីវី
2024.03.04
ក្រុមហ៊ុនចិនអាចនឹងបោះបង់គម្រោងសាងសង់ព្រលានយន្តហោះនៅខេត្តមណ្ឌលគិរីដោយសារតែគ្មានសង្ឃឹមអាចប្រមូលចំណូលមកវិញ អ្នកទេសចរទៅកម្សាន្តនៅក្រុងសែនមនោរម្យ ខេត្តមណ្ឌលគិរី អំឡុងពិធីបុណ្យចូលឆ្នាំចិន កាលពីថ្ងៃទី១០ ខែកុម្ភៈ ឆ្នាំ២០២៤។
រូបភាព៖ ហ្វេសប៊ុកមន្ទីរទេសចរណ៍ខេត្តមណ្ឌលគិរី

ក្រុមហ៊ុន​ចិន ​ដែល​ទទួល​គម្រោង​សាងសង់​ព្រលាន​យន្តហោះ​នៅ​ក្នុង​ខេត្ត​មណ្ឌលគីរី បាន​ដក​ខ្លួន​ចេញ​ពី​កិច្ច​ព្រមព្រៀង​អភិវឌ្ឍន៍​ព្រលាន​យន្តហោះ​នេះ​ជាមួយ​និង​ទឹក​ប្រាក់​ចំនួន ៨០ លាន​ដុល្លារ​អាមេរិក។ បច្ចុប្បន្ន​ផ្ទៃ​ដី​ទំហំ​៣​រយ (៣០០) ហិកតារ​ដែល​គ្រោង​នឹង​សាងសង់​ព្រលាន​យន្ត​ហោះ​នោះ ​មាន​តែ​បង្គោល​របង​បេតុង ​ដែល​គេ​បោះ​កាត់​ដី​ស្រែ​ចម្ការ​របស់​សហគមន៍​​​ជនជាតិ​ដើម​ភាគ​តិច​ ដែល​គេ​ឈូស​ឆាយ​សម្រាប់​ធ្វើ​ជា​ផ្លូវ​រត់​របស់​យន្ត​ហោះ​តែ​ប៉ុណ្ណោះ​។

គម្រោង​សាងសង់​ព្រលាន​យន្តហោះ ​នៅ​ខេត្ត​មណ្ឌលគីរី ​ដែល​ពឹង​ផ្អែក​លើ​ការ​វិនិយោគ​ពី​ចិន​ មិន​អាច​ធ្វើ​ទៅ​រួច​ទេ ​ក្នុង​ពេល​ដែល​ប្រទេស​ចិន​កំពុង​តែ​ជួប​វិបត្តិ​សេដ្ឋ​កិច្ច​ ហើយ​ភ្ញៀវ​ទេសចរ​ក៏​កំពុង​ធ្លាក់​យ៉ាង​គំហុក​ដែរ​នោះ​។

រដ្ឋាភិបាល​កម្ពុជា​បាន​​សម្រេច​​ជ្រើស​យក​ក្រុមហ៊ុន ផៅវើ ឆាយណា អ៊ីនធឺណេសិនណល គ្រុប (Power​ china ​International Group) ធ្វើ​ជា​ដៃ​គូ​ឯកជន​ ក្នុង​ការ​សិក្សា​និង​អភិវឌ្ឍន៍​គម្រោង​សាងសង់​អាកាសយានដ្ឋាន​ថ្មី​ខ្នាត​តំបន់​ នៅ​ខេត្ត​មណ្ឌលគិរី​កាល​ពី​អំឡុង ខែ​ធ្នូ ឆ្នាំ​២០២០​។ ​ក៏​ប៉ុន្តែ​កាល​ពី​ឆ្នាំ ២០២២ ក្រុមហ៊ុន​ចិន​បាន​ដក​ខ្លួន​ចេញ​ពី​កិច្ច​ព្រមព្រៀង​អភិវឌ្ឍន៍​ព្រលាន​យន្តហោះ​នេះ​ជា​មួយ​និង​ទឹក​ប្រាក់​ចំនួន​៨០​លាន​ដុល្លារ​អាមេរិក​ផង។​

គម្រោង​សង់​ព្រលាន​យន្តហោះ​នៅ​ខេត្ត​មណ្ឌលគីរី​ ជា​គម្រោង​មួយ​ក្នុង​ចំណោម​គម្រោង​សាងសង់​ព្រលាន​យន្តហោះ​ខ្លះ​ទៀត​នៅ​កម្ពុជា​ ដែល​ពាក់ព័ន្ធ​និង​គម្រោង​ហេដ្ឋារចនាសម្ព័ន្ធ​ផ្លូវ​និង​ខ្សែ​ក្រវាត់ (BRI) របស់​ចិន​ ដូច​ជា​ព្រលាន​យន្តហោះ​អន្តរ​ជាតិ​នៅ​ខេត្ត​សៀមរាប ​គម្រោង​ព្រលាន​យន្តហោះ​ថ្មី​នៅ​ខេត្ត​កណ្ដាល​ គម្រោង​ព្រលាន​យន្តហោះ​តារា​សាគរ ​នៅ​ខេត្ត​កោះកុង​និង​គម្រោង​ព្រលាន​យន្តហោះ​តម្លៃ​៣​រយ​លាន​ដុល្លារ ​នៅ​លើ​កោះ​រុង​នៃ​ខេត្ត​ព្រះ​សីហនុ​ជា​ដើម​។

ជុំវិញ​រឿង​នេះ អ្នក​វិភាគ​បញ្ហា​សង្គម​និង​នយោបាយ ​លោក ​គឹម សុខ​ យល់​ឃើញ​ថា នៅ​ក្នុង​ស្ថានភាព​បច្ចុប្បន្ន​ដែល​សេដ្ឋកិច្ច​ របស់​ប្រទេស​ចិន​កំពុង​ធ្លាក់​ចុះ ហើយ​កម្ពុជា​ក៏​កំពុង​ធ្លាក់​ចុះ​ចំនួន​ភ្ញៀវ​ទេសចរ​ ឯ​វិស័យ​ដឹកជញ្ជូន​ផ្សេងៗ​ទៀត​ក៏​មិន​ដំណើរ​ការ​ល្អ​ដែរ​នោះ ​គឺ​គម្រោង​សាងសង់​ព្រលាន​យន្តហោះ​នៅ​ខេត្ត​ភាគ​ឦសាន​របស់​ប្រទេស​កម្ពុជា​មួយ​នេះ ​នឹង​មិន​អាច​ទៅ​រួច​ទេ​។

លោក ​គឹម ​សុខ៖ «​មិន​អាច​ទៅ​រួច​ទាំង​ស្ថានភាព​ជាក់ស្ដែង​ជា​ទូទៅ​ កម្ពុជា​ការ​ធ្លាក់​ចុះ​នៃ​វិស័យ​សេដ្ឋកិច្ច​​។​ មិន​អាច​ទៅ​រួច​ដោយសារ​តែ​គម្រោង​នោះ​​អត់​មាន​វិសាល​ភាព​នៅ​ក្នុង​ដំណើរ​ការ​បាន​ឡើយ ដោយសារ​តែ​ឆ្ងាយ​ វិស័យ​ទេសចរ​ធ្លាក់​ចុះ ហើយ​ការ​ដឹកជញ្ជូន​ក៏​មាន​ការ​ធ្លាក់​ចុះ​ខ្លាំង​ដែរ​។​ ជា​តំបន់​ដែល​គ្មាន​ការ​វិនិយោគ​ផង​ដែរ ​តើ​នឹង​មាន​​មនុស្ស​ច្រើន​ឯណា​ដែល​ជិះ​យន្តហោះ​​ទៅ​មើល​តំបន់​នោះ?​។​ចំណុចទី១​ចិន​មាន​បញ្ហា​ធ្លាក់​ចុះ​នៃ​វិស័យ​សេដ្ឋកិច្ច​របស់​ខ្លួន ​ម៉្លោះ​ហើយ​ចិន​ត្រូវ​ការ​បម្រុង​លុយ ​ដើម្បី​ទប់ទល់​សេដ្ឋកិច្ច​ក្នុង​ស្រុក​របស់​ខ្លួន​ដែរ​»

ក្នុង​ពេល​ដែល​ចំនួន​ភ្ញៀវ​ទេសចរ​កំពុង​ធ្លាក់​ចុះ​នៅ​កម្ពុជា ​គឺ​នៅ​ព្រលាន​យន្តហោះ ដែល​វិនិយោគ​ដោយ​ក្រុមហ៊ុន​ចិន ​ដូច​ជា​នៅ​ខេត្ត​សៀមរាប​ជា​ដើម​ កំពុង​ប្រឈម​នឹង​ការ​ខ្វះ​ចំណូល​សម្រាប់​ប្រាក់​ខែ​បុគ្គលិក​ និង​ការ​ចំណាយ​ដើម្បី​ទ្រទ្រង់​ដំណើរការ​ប្រចាំ​ថ្ងៃ​ជា​ដើម​។

ស្រដៀង​គ្នា​នេះ អ្នក​ប្រឹក្សា​យោបល់​ផ្នែក​អភិវឌ្ឍន៍​ផ្នត់​គំនិត​និង​ការ​សិក្សា​ស្រាវ​ជ្រាវ លោក ​សេក សុជាតិ ​យល់​ឃើញ​ថា​បច្ចុប្បន្ន​នេះ បើ​ពិនិត្យ​ទៅ​លើ​តំបន់​ភូមិភាគ​ឦសាន​នៃ​ប្រទេស​កម្ពុជា​ឃើញ​ថា ​មិន​ទាន់​មាន​ភ្ញៀវ​ទេសចរ​ទៅ​កម្សាន្ត​​ចំនួន​ច្រើន​ទេ ​ហើយ​វិស័យ​សេដ្ឋកិច្ច​ផ្សេង​ៗ​ទៀត​ក៏​មិន​មាន​សក្ដានុពល​ធំធេង​ដែរ​។

លោក សេក សុជាតិ យល់ឃើញ​ថា ស្ថានភាព​បែប​នេះ​ រដ្ឋាភិបាល​ក៏​ដូច​ជា​អ្នក​វិនិយោគ​អាច​នឹង​មិន​ហ៊ាន​ដាក់​ទុន ​ដើម្បី​បន្ត​គម្រោង​សាងសង់​ព្រលាន​យន្តហោះ​ នៅ​ភាគ​ឦសាន​នោះ​ឡើយ​។

លោក ​សេក សុជាតិ​៖ «គម្រោង​នេះ​វា​មាន​ចំណាយ​ខ្ពស់ ​រីឯ​ចំណូល​ដែល​ទទួល​មក​វិញ​មាន​ចំនួន​តិច​តួច​មែន​ទែន​។​ ​បញ្ហា​នេះ​ខ្ញុំ​យល់​ថា​រដ្ឋាភិបាល​កម្ពុជា​​អាច​នឹង​ពន្យារ​​ពេល​ឬ​ក៏​អាច​យក​ថវិកា​​ ឬ​ក៏​គម្រោង​ដែល​ត្រូវ​ដាក់​ទុន​វិនិយោគ​ទៅ​លើ​​ហេដ្ឋារចនាសម្ពន្ធ​ព្រលាន​យន្តហោះ​នៅ​ក្នុង​តំបន់​ភូមិ​ភាគ​ឦសាន​ទៅ​ធ្វើ​កិច្ចការ​ផ្សេង​ដែល​​មាន​ប្រយោជន៍​ឬ​ក៏​អាច​ទទួល​បាន​ប្រយោជន៍​ច្រើន​ជាង​នេះ​វិញ​»

វិទ្យុ​អាស៊ី​សេរី ​មិន​អាច​ទាក់​ទង ​អភិបាល​ខេត្ត​មណ្ឌលគីរី ​លោក ​ថង សាវុន​ ដើម្បី​អធិប្បាយ​ជុំវិញ​គម្រោង​សាងសង់​ព្រលាន​យន្តហោះ​នេះ​ បាន​នៅ​ឡើយ​កាល​ពី​ថ្ងៃ​ទី​២​ខែ​មីនា​។

ចំណែក​រដ្ឋមន្ត្រី​ទទួល​បន្ទុក​រដ្ឋលេខាធិការដ្ឋាន​អាកាសចរណ៍​ស៊ីវិល​ លោក ​ម៉ៅ ហា​វណ្ណាល់ ​មិន​បាន​អធិប្បាយ​ក្បោះក្បាយ​ជុំវិញ​រឿង​នេះ​ទេ​ ដោយ​លោក​គ្រាន់​តែ​ប្រាប់​ថា ​លោក ​សយ សុខាន់ ​គឺ​ជា​អ្នក​គ្រប់គ្រង​គម្រោង​ព្រលាន​យន្តហោះ​ នៅ​ខេត្ត​មណ្ឌលគីរី​នោះ​។

លោក ​ម៉ៅ ​ហា​វណ្ណាល់​៖«​សូម​ទាក់​ទង​ទៅ​ខាង​អ្នក​រៀបចំ​គម្រោង​ឯកឧត្តម ​សយ​សុខាន់​។ ​គាត់​ជា​អ្នក​ដឹក​នាំ​គម្រោង​ការងារ​ហ្នឹង។ ​គាត់​ជា​អ្នក​ដឹកនាំ​ផ្ទាល់​ទើប​គាត់​ដឹង»​

ខេត្ត​មណ្ឌលគីរី​បច្ចុប្បន្ន ​មាន​ប្រជាពលរដ្ឋ​រស់​នៅ​ប្រមាណ​ជាង​១៣​ម៉ឺន​នាក់​ ដែល​ភាគ​ច្រើន​ជា​ជនជាតិ​ដើម​ភាគ​តិច​ ហើយ​មាន​តំបន់​ទេសចរណ៍​​ធម្មជាតិ​តិច​តួច​ ដូច​ជា​តំបន់​វាល​ស្មៅ ​ទឹកជ្រោះ​និង​ទេសភាព​ព្រៃឈើ​ជា​ដើម​។

មន្ទីរ​ទេសចរណ៍​ខេត្ត​មណ្ឌលគិរី​ឱ្យ​ដឹង​ថា​ កាល​ពី​ឆ្នាំ​២០២៣​ខេត្ត​នេះ​បាន​ទទួល​ភ្ញៀវ​ទេសចរ​ជាតិ​និង​អន្តរជាតិ ​ចំនួន​ជាង​២៦​ម៉ឺន​នាក់​។ ​ចំនួន​នេះ​កើន​ឡើង​ជាង​៣០% បើ​ធៀប​និង​ឆ្នាំ​២០២២​កន្លង​ទៅ​៕​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។