ប្រជាកសិករជាច្រើនគ្រួសារនៅខេត្តបាត់ដំបងត្អូញត្អែរអំពីតម្លៃស្រូវចុះថោកខ្លាំងធ្វើឱ្យពួកគាត់លក់មិនបានប្រាក់កម្រៃ ដើម្បីដោះស្រាយជីវភាពអំឡុងពេលមានវិបត្តិជំងឺកូវីដ១៩។ កសិករទាំងនោះអំពាវនាវដល់រដ្ឋាភិបាលឱ្យជួយដោះស្រាយតម្លៃកសិផលរបស់ពួកគាត់ជាបន្ទាន់។
ប្រជាកសិករនៅស្រុកសង្កែ ខេត្តបាត់ដំបងឱ្យដឹងថា តម្លៃស្រូវឆ្នាំនេះចុះថោកខ្លាំងតាំងពីដើមដៃ ក្នុងពេលដែលកសិករកំពុងចាប់ផ្ដើមប្រមូលផលស្រូវ។
កសិករនៅឃុំតាប៉ុន ស្រុកសង្កែ លោក ហម អ៊ាប ប្រាប់អាស៊ីសេរីនៅថ្ងៃទី២៦ កក្កដាថា តម្លៃស្រូវបានចុះថោកប្រមាណ ១សប្ដាហ៍មកហើយដោយពុំដឹងពីមូលហេតុអ្វី។ កសិកររូបនេះបន្តថា ស្រូវប្រភេទណាំប៉ុង និងអូអឹម ជាប្រភេទស្រូវប្រាំង ដែលឈ្មួញកំពុងប្រមូលទិញនោះឱ្យតម្លៃ ៦៨០រៀលក្នុង ១គីឡូក្រាមប៉ុណ្ណោះ។ លោកបញ្ជាក់ថា តម្លៃនេះ មិនបានប្រាក់កម្រៃ ដើម្បីដោះស្រាយជីវភាពគ្រួសារនោះទេ ពីព្រោះលោកចំណាយអស់ដើមទុនច្រើនក្នុងការដាំដុះ៖ «វាថោកពេក យើងគិតទៅ ថ្លៃឈ្នួលដឹក និងថ្លៃជីផង វាអត់បានចំណេញបណ្ដោយ។ បើនិយាយរឿងជី ឡើងមួយការុង ១២ម៉ឺន៨ពាន់រៀល ហើយយើងលក់ស្រូវ ២០០គីឡូបានថ្លៃជីមួយការុង។ មិនដឹងធ្វើយ៉ាងម៉េច បើយើងមិនលក់ដល់ពេលច្រូតហើយ អីចឹងមានតែលក់តម្លៃប៉ុណ្ណឹងទៅ » ។
ដូចគ្នានេះដែរ កសិករនៅភូមិបឹងទឹម ឃុំតាប៉ុនម្នាក់ទៀត លោក អាន តង់ ថ្លែងថា គ្រួសារលោកធ្វើស្រែប្រាំងចំនួន ៩ហិកតារ ដោយចំណាយអស់ដើមទុនជិត ៥ពាន់ដុល្លារ។ កសិករវ័យ ៣៣ឆ្នាំរូបនេះ បញ្ជាក់ថា ថវិកាមួយចំនួនលោកខ្ចីពីធនាគារ និងមួយចំនួនទៀត ជាប្រាក់ដែលលោកខំសន្សំក្នុងពេលធ្វើសំណង់នៅប្រទេសថៃ ដើម្បីយកមកដាំដុះ ដោយរំពឹងថា នឹងធ្វើឱ្យជីវភាពប្រសើរឡើងនៅពេលប្រមូលផលស្រូវ។ ប៉ុន្តែអ្វីៗ មិនបានដូចក្ដីស្រមៃនោះឡើយ ពីព្រោះលោកថា ដល់ពេលវេលាប្រមូលស្រូវហើយ ស្រាប់តែតម្លៃកសិផលស្រូវបែរជាចុះថោកខ្លាំងទៅវិញ៖ «ស្រូវវាទុំស្អាតបណ្ដោយតែវាអត់មានតម្លៃបណ្ដោយ បើសិនជាបានត្រឹម ១លានរៀលក្នុងមួយតោនយើងអាចលក់បានកម្រៃខ្លះ យើងអាចឈរជើងនៅស្រុកខ្មែរបាន ព្រោះសព្វថ្ងៃកូវីដ១៩ រកអី អត់បានទេ។ យើងសង្ឃឹមលើស្រូវដល់ស្រូវថោក គឺអត់មានអីសង្ឃឹមបណ្ដោយ។ បើគេមានដីស្រែខ្លួនឯង គេទូទាត់បានគេនៅសល់ខ្លះ ប៉ុន្តែខ្ញុំជួលទាំងស្រែគេ ទិញជីហើយឈ្នួលភ្ជួរផងគឺឡុងចុងបណ្ដោយ » ។
កសិករទាំងនេះបន្តថា នៅតំបន់ពួកគាត់មានដំណាំស្រូវប្រាំងរបស់កសិករប្រហែល ៣ពាន់ហិកតារ គឺចាប់ផ្ដើមប្រមូលផលស្រូវបណ្ដើរៗ ហើយ ដោយមិនទាន់មានអាជ្ញាធរណាជួយដោះស្រាយពីបញ្ហាតម្លៃនេះជួបពួកគាត់នៅឡើយទេ។
ទាក់ទងនឹងបញ្ហានេះ អនុប្រធានមន្ទីរកសិកម្ម និងរុក្ខាប្រមាញ់ខេត្តបាត់ដំបង លោក អ៊ិន សុវណ្ណមុន្នី ប្រាប់អាស៊ីសេរីថា លោកមិនទាន់ទទួលដំណឹងពីតម្លៃស្រូវចុះថោកនេះនៅឡើយទេ។ លោកបន្ថែមថា នៅខេត្តបាត់ដំបងកសិករបានដាំដុះស្រូវប្រាំងជាង ២ម៉ឺន (២០.០០០) ហិកតារ ត្រៀមប្រមូលផលក្នុងរយៈពេលប្រមាណកន្លះខែខាងមុខ។ លោកបន្តថា មូលហេតុដែលតម្លៃស្រូវចុះថោកនេះ អាចដោយសារអំឡុងពេលនេះមិនសូវមានឈ្មួញចូលទៅទិញ ស្រូវរបស់កសិករ បណ្ដាលមកពីការរាតត្បាតជំងឺកូវីដ១៩៖ «អ៊ីចឹងវានាំឱ្យកត្តាអីចឹងវាអាចកើតឡើងដែរ ហើយទី២ វាទាក់ទងនឹងលំហូរទំនិញចេញចូល វាមិនសមប្រកបដូចមុន។ បើសិនជាអាចឱ្យគាត់សំងួតទុកខ្លួនឯងខ្ញុំគិតថាវាល្អកុំឱ្យវាខូច តែទម្លាប់របស់គាត់ដល់ពេលប្រមូលផលលក់ទាំងសើមឱ្យគេអាហ្នឹងវាអត់ល្អដែរ។ សំខាន់ការហាលសំងួតរបស់គាត់ធ្វើម៉េចឱ្យល្អ ទុកបានយូរហើយយើងអាចទាមទារតម្លៃបានទៀត » ។
កន្លងទៅលោកនាយករដ្ឋមន្ត្រី ហ៊ុន សែន បានប្រកាសម្ដងហើយម្ដងទៀតថា វិបត្តិជំងឺកូវីដ១៩ នេះ ជាឱកាសមាសរបស់កសិករខ្មែរ ហើយលោកថែមទាំងបានជំរុញឱ្យប្រជាកសិករបង្កើនការដាំដុះឱ្យបានច្រើនបន្ថែមទៀត ដើម្បីទាញយកប្រយោជន៍ពីវិបត្តិជំងឺដ៏កាចសាហាវនេះ៖ «គេអាចផ្អាកធ្វើដំណើរដើរលែងអាចផ្អាកទិញសំលៀកបំពាក់គេអាចផ្អាកទិញឡានគេអាចផ្អាកទិញម៉ូតូ ក៏ប៉ុន្តែគេមិនអាចផ្អាកទិញរបស់សម្រាប់ច្រកក្រពះបានទេ។ ដូច្នេះប្រទេសដែលមានការផលិតស្បៀង គឺជាប្រទេសដែលត្រូវប៉ាន់គឺឱកាសវាបានមកដល់។ យើងត្រូវប្រែក្លាយវិបត្តិនេះឱ្យទៅជាឱកាសរបស់កម្ពុជា ដើម្បីពង្រីកទីផ្សារនាំចេញនូវប្រភេទស្បៀងទាំងឡាយមិនមែនគ្រាន់តែអង្ករទេ យើងនាំចេញទាំងម្សៅមីទាំងដំឡូងមី នាំចេញទាំងស្វាយនាំចេញទាំងចេកនាំចេញទាំងអ្វីៗ ដែលជាប្រភេទស្បៀង » ។
ទោះជាយ៉ាងណា នៅពេលដែលប្រជាពលរដ្ឋនាំគ្នាដាំដុះដំណាំតាមការណែនាំរបស់លោកនាយករដ្ឋមន្ត្រីហើយ ដល់ពេលប្រមូលផល ប៉ុន្តែបែរជារកគ្មានទីផ្សារលក់កសិផលក្នុងតម្លៃសមរម្យទៅវិញ។
ជុំវិញរឿងនេះប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ស្រូវចុះថោកនេះ ដោយសារកម្ពុជាពឹងផ្អែកខ្លាំងពេកទៅលើទីផ្សារប្រទេសជិតខាង ស្របពេលដែលប្រទេសទាំងនោះកំពុងតែផ្ទុះការរាតត្បាតខ្លាំងនៃជំងឺកូវីដ១៩ដែរ។ មន្ត្រីសង្គមស៊ីវិលរូបនេះ កត់សំគាល់ទៀតថា កន្លងទៅរដ្ឋាភិបាលច្រើនបានតែទ្រឹស្ដី ឬដាក់ចេញវិធានការនៅលើតែក្រដាស ដោយខ្វះការអនុវត្តជាក់ស្ដែង ដើម្បីជួយដោះស្រាយទុក្ខលំបាករបស់កសិករ៖ «សុំអំពាវនាវដល់រដ្ឋាភិបាលពាក់ព័ន្ធត្រូវតែគិតគួរបន្ថែមទៀតទៅលើវិស័យកសិកម្ម ពីព្រោះថា វិស័យនេះជាមុខរបរមួយជួយឱ្យប្រជាពលរដ្ឋ ដែលបាត់បង់មុខរបរក្នុងវិស័យផ្សេងៗ គាត់អាចមកជ្រក ឬក៏មកប្រកបមុខរបរនេះចិញ្ចឹមជីវិត។ ប៉ុន្តែបើសិនជាមិនបានដោះស្រាយវិស័យនេះវារុញឱ្យពួកគាត់ហ្នឹង កាន់តែក្រីក្រ » ។
លោក ថេង សាវឿន យល់ថា ដើម្បីដោះស្រាយបញ្ហានេះ រដ្ឋាភិបាលគួរតែបញ្ចេញថវិកាជាតិទិញស្រូវពីកសិករស្តុកទុក ដើម្បីកុំឱ្យឈ្មួញកណ្ដាលចេះតែបញ្ចុះតម្លៃស្រូវតាមអំពើចិត្តដូចសព្វថ្ងៃទៀត។ លោកបន្តថា ប្រសិនបើរដ្ឋាភិបាលមិនឆាប់ដោះស្រាយបញ្ហានេះទេនោះ នឹងធ្វើឱ្យប៉ះពាល់ធ្ងន់ធ្ងរដល់ជីវភាពរស់នៅរបស់កសិករទូទាំងប្រទេស ហើយធ្វើឱ្យពួកគាត់ជំពាក់ប្រាក់ធនាគារវ័ណ្ឌកកាន់តែច្រើនថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។