កសិករ​នៅ​ខេត្ត​ត្បូង​ឃ្មុំ​ត្អូញ​រឿង​តម្លៃ​ម្រេច​ចុះ​ថោក​ខ្លាំង ខណៈ​ដល់​រដូវ​ប្រមូល​ផល

ដោយ សេក បណ្ឌិត
2019-03-08
អ៊ីម៉ែល
មតិ
Share
បោះពុម្ព
កសិផល​ម្រេច​របស់​កសិករ នៅ​ខេត្ត​ត្បូង​ឃ្មុំ ថ្ងៃ​ទី៥ ខែ​មីនា ឆ្នាំ២០១៩។
កសិផល​ម្រេច​របស់​កសិករ នៅ​ខេត្ត​ត្បូង​ឃ្មុំ ថ្ងៃ​ទី៥ ខែ​មីនា ឆ្នាំ២០១៩។
រូបថត៖ ហ្វេសប៊ុក​ម្រេច​ប្រជាកសិករ​ត្បូង​ឃ្មុំ

កសិករ​ដាំ​ម្រេច​នៅ​ខេត្ត​ត្បូង​ឃ្មុំ ត្អូញត្អែរ​ពី​តម្លៃ​ម្រេច​ចុះ​ថោក​ខ្លាំង​នៅ​ឆ្នាំ​នេះ ធ្វើ​ឲ្យ​ពួក​គាត់​មិន​អាច​ទទួល​បាន​ប្រាក់​ចំណេញ។ អ្នក​ជំនាញ​ខាង​កសិកម្ម ​យល់​ថា របប​ក្រុង​ភ្នំពេញ ​ត្រូវ​លូក​ដៃ​ធ្វើ​អន្តរាគមន៍​រឿង​នេះ​ មិន​អាច​បណ្ដែត​បណ្ដោយ ឬ​ឈរ​មើល​កសិករ​ត្រូវ​រង​ការ​ខាត​បង់​ពី​ការ​ដាំដុះ​ដំណាំ​ឧស្សាហកម្ម​ម្រេច​នេះ​ឡើយ។

នៅ​ឆ្នាំ​នេះ ក្រុមកសិករ​ដាំ​ម្រេច​នៅ​ខេត្ត​ត្បូងឃ្មុំ កំពុង​ជួប​ប្រទះ​បញ្ហា​ធំ​ពីរ គឺ​ការ​ធ្លាក់​ចុះ​ទិន្នផល​បង្ក​ឡើង​ដោយ​ការ​ប្រែ​ប្រួល​អាកាសធាតុ និង​បញ្ហា​តម្លៃ​ម្រេច​ចុះថោក​ខ្លាំង ​ពិបាក​រក​ទីផ្សារ​លក់​ចេញ។

កសិករ​ដាំ​ម្រេច​នៅ​ឃុំ​ទឹក​ជ្រៅ ស្រុក​តំបែរ ខេត្តត្បូងឃ្មុំ លោក ម៉ៅ ជាម៉េន រៀបរាប់​ថាកាល​ពី​ឆ្នាំ​មុនៗ ម្រេច​ធ្លាប់​តែ​លក់​បាន​យ៉ាង​តិច​បំផុត​ក៏​ជាង២​ម៉ឺន​រៀល​ក្នុង​មួយ​គីឡូក្រាម​នោះ ប៉ុន្តែឆ្នាំនេះត្រូវ​ធ្លាក់​មក​នៅ​ត្រឹម​ជាង ៧ពាន់​រៀល​ទៅ ៨ពាន់​រៀល​ក្នុង​មួយ​គីឡូក្រាម ហើយ​ស្ទើរ​តែ​គ្មាន​ឈ្មួញ ឬ​ក្រុមហ៊ុន​បញ្ជាទិញ​ទៅ​ទៀត។ លោក បន្តថា តម្លៃ​ម្រេច​ចុះ​ថោក​យ៉ាង​គំហុក​នេះ គឺ​ធ្វើ​ឲ្យ​កសិករ​មិន​ទទួល​បាន​ប្រាក់​ចំណេញ​ឡើយ ហើយគ្រាន់​តែ​បាន​លុយ​តិច​តូច​សម្រាប់​ចំណាយ​លើ​ការ​ជួល​កម្មករ​បេះ​ម្រេច​ប៉ុណ្ណោះ៖ «»

ពេលនេះគឺជា​រដូវ​កសិករ​សម្រុក​ប្រមូលផល​ម្រេច​បណ្ដើរៗ។ កសិករ ម៉ៅ ជាម៉េន ​បញ្ជាក់​ថា នៅ​ពេល​តម្លៃ​ម្រេច​ចុះ​ថោក​ខ្លាំង​បែប​នេះ គឺ​កសិករ​ភាគ​ច្រើន មាន​បំណង​បោះបង់​មុខ​របរ​ដាំ​ម្រេច​នេះ​ចោល។ លោក​បន្ត​ទៀត បញ្ហា​ម្រេច​ចុះ​ថោក​នេះ មិនមែន​​កើត​មាន​តែ​នៅតំបន់​របស់​លោក​នោះ​ទេ ពោល​គឺ​កសិករ​អ្នក​​ដាំ​ម្រេច​នៅ​តំបន់​ដទៃ​ទៀត​ក្នុង​ប្រទេស​កម្ពុជា​សុទ្ធ​​តែ​ជួប​ប្រទះ​បញ្ហា​ទាំង​នេះ​ដូច​គ្នា ប៉ុន្តែ​រដ្ឋាភិបាល ហាក់​មិន​ចាប់​អារម្មណ៍​ស្វែងរក​ដំណោះ​ស្រាយ​ជូន​កសិករ​ឡើយ៖ «»

កសិករ​មួយ​រូប​ទៀត​នៅ​ឃុំ​ជាំ​ក្រវៀន ស្រុក​មេមត់ លោក កាន ឈាង រៀបរាប់​ថា ឆ្នាំ​នេះ លោក​ក៏​បាន​ដាំ​ម្រេច​ច្រើន​គួរ​សម​ដែរ ប៉ុន្តែ​លោក​បាន សម្រេច​ទុក​ឲ្យ​ដើម​ម្រេច​ទាំង​នោះ​ងាប់​ខ្ទេច​តែ​ម្ដង ដោយ​មិន​ស្រោច​ទឹក និង​ដាក់​ជី ថែទាំ​នោះ​ទេ ព្រោះ​ដោយសារ​ម្រេច​ចុះ​ថោក​ខ្លាំង៖ «»

អ្នក​ជំនាញ ឲ្យ​ដឹង​ថា ការ​ដាំ​ម្រេច គឺ​ត្រូវ​ចំណាយ​ដើម​ទុន​ច្រើន ចាប់​តាំង​ពី​ដំណាក់កាល​ដំបូង​រហូត​ដល់​ពេល​ប្រមូល​ផល ព្រោះ​ម្រេច​ត្រូវ​ការ​ទឹក និង​ថ្នាំ​សម្រាប់​ស្រោចស្រព​ថែទាំ។

កសិករ​នៅ​ឃុំ​ជាំ​ក្រវៀន​ម្នាក់​ទៀត អ្នកស្រី ស៊ីណាត ឲ្យ​ដឹង​ថា ឆ្នាំ​នេះ​អ្នក ស្រី ដាំ​ម្រេច​លើ​ផ្ទៃដី​មួយ​ហិកតារ និង​កំពុង​ចុះ​ប្រមូល​ផល​បណ្ដើរៗ។ អ្នកស្រី​បន្ត​ថា កសិករ​ដែល​ដាំ​ដុះ​ម្រេច​ទាំងអស់​សុទ្ធ​សឹង​តែ​កំពុង​បារម្ភ​ដូចៗ គ្នា អំពី​លទ្ធភាព​សង​ប្រាក់​ត្រឡប់​ទៅ​ធនាគារ បន្ទាប់​ពី​តម្លៃ​ម្រេច​ឆ្នាំ​នេះ ចុះ ថោកខ្លាំងមិនធ្លាប់មាន រហូត​នៅ​ត្រឹម​តែ​ជាង ៧ពាន់​រៀល​ទៅ ៨ពាន់​រៀល ក្នុង​មួយ​គីឡូក្រាម។ អ្នក​ស្រី​ស្នើសុំ​ឲ្យ​រដ្ឋាភិបាល​ជួយ​រក​ទីផ្សារ​លក់​ម្រេច​ឲ្យ បាន​តម្លៃ​យ៉ាង​ហោច​ណាស់​ត្រឹម ២ម៉ឺន​រៀល​ក្នុង​មួយ​គីឡូ

មិនខុសគ្នាប៉ុន្មានឡើយ មេឃុំទឹកជ្រៅ លោក ហ៊ឹង ម៉េងហ៊ាង ដែល​បាន​ដាំ​ដុះ​ម្រេច​ជាង ៥ពាន់​ជន្លង់​លើ​ផ្ទៃ​ជាង ៣ហិកតារ​ដែរ​នោះ រៀបរាប់​ថា តម្លៃ​ម្រេច​ចុះ​ថោក​ខ្លាំង​នេះ បាន​កើត​ឡើង​ពីរ​ឆ្នាំ​ចុង​ក្រោយ​នេះ​ដោយ​មិន​ដឹង​មូលហេតុ។ ប៉ុន្តែ​ទោះ​បី​ជា​ឆ្នាំ​មុន​ម្រេច​ចុះ​ថោក​ក៏​ដោយ ក៏​អាច​លក់​បាន​ក្នុង​មួយ​គីឡូក្រាម​តម្លៃ​​ជាង ១ម៉ឺន​រៀល​ដែរ តែ​ឆ្នាំ​នេះ​លក់​បាន​តែ​ជាង ៨ពាន់​រៀល​ប៉ុណ្ណោះ។ លោក​បន្ត​ថា តម្លៃ​ម្រេច​ជាង ៨ពាន់​រៀល​នេះ បើ​ក្នុង​ករណី​កសិករ​ធ្វើ​ដោយ​ខ្លួន​ឯង គឺ​កសិករ​អាច​ស្មើ​ដើម ឬ​អាច​ទប់ទល់​បាន​តែ​បើ​ប្រើ​កម្លាំង​ពលកម្ម​ជួល​គេ​វិញ គឺ​​ពួក​គាត់​នឹង​មិន​ចំណេញ​អ្វី​ឡើយ៖ «»

លោក​មេ​ឃុំ​បន្ត​ថា ម្រេច​នៅ​ខេត្ត​ត្បូង​ឃ្មុំ​សព្វ​ថ្ងៃ គឺ​មាន​ឈ្មួញ​កណ្ដាល​ទិញ ទៅ​លក់​នៅ​ប្រទេស​វៀតណាម និង​ប្រទេស​ថៃ។ លោក​ក៏​ចង់​ឲ្យ​រដ្ឋាភិបាល ជួយ​អន្តរាគមន៍​រឿង​តម្លៃ​ម្រេច​នេះ​ជូន​កសិករ​ដែរ៖ «»

អាស៊ីសេរី បាន​ព្យាយាម​ទាក់ទង​អ្នក​នាំ​ពាក្យ​ក្រសួង​កសិកម្ម លោក ស្រី វុឌ្ឍី ជា​ច្រើន​លើក​នៅ​ថ្ងៃ​ទី៦ ខែ​មីនា ប៉ុន្តែ​ទូរស័ព្ទ​ចូល​ពុំ​មាន​អ្នក​ទទួល។ ចំណែក​អ្នក​នាំ​ពាក្យ​រដ្ឋាភិបាល លោក ផៃ ស៊ីផាន ក៏​មិន​ទទួល​ទូរស័ព្ទ​ដែរ

អ្នក​ជំនាញ​ខាង​កសិកម្ម​ និង​ជា​មន្ត្រី​ជាន់​ខ្ពស់​គណបក្ស ប្រជាធិបតេយ្យ​មូលដ្ឋាន បណ្ឌិត យ៉ង សាំង​កុមារ មើល​ឃើញ​ថា តម្លៃ​ម្រេច​ចុះ​ថោក​នេះ គឺ​កើត​ឡើង​ទូទាំង​ពិភព​លោក ប៉ុន្តែ​កសិករ​ប្រទេស​ដទៃ មិន​ជួប​បញ្ហា​លំបាក​ខ្លាំង​ដូច​កសិករ​ខ្មែរ​នោះ​ទេ។ លោក​កត់​សម្គាល់​ថា ទីផ្សារ​ធំ​បំផុត​របស់​ម្រេច​កម្ពុជា​ គឺ​​វៀតណាម ហើយ​នៅ​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ វៀតណាម​ផលិត​ម្រេច​លើស​ពី​តម្រូវ​ការ​ ដូច្នេះ​វៀតណាម​បាន​កាត់​បន្ថយ​ការ​ទិញ​ម្រេច​ពី​កសិករ​កម្ពុជា ហេតុ​ដូច​នេះ​ហើយ​ទើប​ម្រេច​កម្ពុជា​ជួប​ប្រទះ​បញ្ហា​ទីផ្សារ និង​ធ្លាក់​ថ្លៃ​យ៉ាង​គំហុក​ដូច្នេះ៖ «»

លោក​បន្ត​ថា រដ្ឋាភិបាល​មិន​ត្រូវ​ទុក​កសិករ​ចោល​នោះ​ទេ គឺត្រូវ​លូក​ដៃ​ធ្វើ​អន្តរាគមន៍​រឿង​នេះ​ទោះ​ក្នុង​កម្រិត​ណា​ក៏​ដោយ ដើម្បី​កុំ​ឱ្យ​ប្រជា​កសិករ បាក់​ទឹក​ចិត្ត​បោះបង់​ចោល​ការ​ដាំ​ដំណាំ​ឧស្សាហកម្ម​មួយ​នេះ។ លោក​យល់​ថា វិធានការ​នោះ គឺ​រដ្ឋាភិបាល​គួរ​តែ​ផ្ដល់​ទុន​ខ្លះ ដើម្បី​បង្កើត​កន្លែង​ស្តុក​ម្រេច​របស់​កសិករ និង​ជួយ​ផ្ដល់​ថវិកា​ខ្លះ​ដល់​កសិករ ដើម្បី​ដោះ​ស្រាយ តម្រូវ​ការ​របស់​ពួក​គេ ក្នុង​អំឡុង​ពេល​រង់ចាំ​តម្លៃ​ម្រេច​ហក់​ឡើង​វិញ៖ «»

របាយការណ៍​ក្រសួង​កសិកម្ម បង្ហាញ​ថា ក្នុង​ឆ្នាំ២០១៨ ដំណាំ​ម្រេច​ត្រូវ បាន​ដាំ​ដុះ​នៅ​ក្នុង​ខេត្ត​ចំនួន ១៩ លើ​ផ្ទៃ​ដី​ជាង ៦ពាន់ (.៦៧៨) ហិកតា និង​ផ្ដល់​ទិន្នផល​ប្រហែល​ជាង ២ម៉ឺន​តោន ក្នុង​មួយ​ឆ្នាំ។ ប្រភព​ឲ្យ​ដឹង​ដែរ​ថា ខេត្ត​ត្បូងឃ្មុំ​មាន​ទិន្នផល​ម្រេច​ប្រមាណ ៦០% នៃ​ទិន្នផល​សរុប​ទូទាំង​ប្រទេស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល