ប្រទេសជប៉ុនផ្ដល់ជំនួយ និងកម្ចីប្រមាណ ៣១០លានដុល្លារអាមេរិក សម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធ និងការបោសសម្អាតមីននៅកម្ពុជា។ ក្នុងចំនួនទឹកប្រាក់ ៣១០លានដុល្លារអាមេរិកនេះ ជំនួយឥតសំណងមានជិត ៤៣លានដុល្លារអាមេរិក ហើយប្រមាណ ២៦៧ លានដុល្លារទៀត គឺជាកម្ចីឥណទាន។
លោកនាយករដ្ឋមន្ត្រី ហ៊ុន សែន អះអាងលើទំព័រហ្វេសប៊ុកនៅថ្ងៃទី២៤ មីនាថា ជំនួយឥតសំណងចំនួនជិត ៤៣លានដុល្លារអាមេរិកនោះ គឺសម្រាប់អនុវត្តន៍គម្រោងពង្រីកប្រព័ន្ធផ្គត់ផ្គង់ទឹកស្អាតនៅក្រុងតាខ្មៅនៃខេត្តកណ្ដាល គម្រោងបោសសម្អាតមីន និងសង្គ្រោះជនពិការដោយសារមីន ព្រមទាំងគម្រោងកម្មវិធីអភិវឌ្ឍន៍សេដ្ឋកិច្ច និងសង្គម។ ដោយឡែក កម្ចីឥណទានចំនួន២៦៧ លានដុល្លារនោះវិញ គឺសម្រាប់អនុវត្តគម្រោងស្ថាបនាផ្លូវជាតិលេខ៥ ឱ្យល្អប្រសើរឡើងវិញ។
លោក ហ៊ុន សែន ដែលបានធ្វើជាអធិបតីក្នុងពិធីចុះហត្ថលេខាលើលិខិតប្ដូរសាររវាងរដ្ឋមន្ត្រីក្រសួងការបរទេស លោក ប្រាក់ សុខុន និងឯកអគ្គរាជទូតជប៉ុនប្រចាំកម្ពុជា លោក មិកាមិ ម៉ាសាហ៊ីរ៉ូ (MIKAMI Masahiro) នោះ មានប្រសាសន៍ថា ជំនួយ និងកម្ចីរបស់រដ្ឋាភិបាលជប៉ុននេះ នឹងជួយលើកកម្ពស់ការអភិវឌ្ឍសេដ្ឋកិច្ច និងសង្គមរបស់កម្ពុជា ព្រមទាំងធ្វើឱ្យទំនាក់ទំនងទ្វេភាគីរវាងប្រទេសទាំងពីរកាន់តែល្អឡើងថែមទៀត។
គិតពីដើមឆ្នាំ២០១៩ រហូតមកដល់ពេលនេះ ជប៉ុនបានផ្ដល់ជំនួយឥតសំណងដល់កម្ពុជា គិតជាទឹកប្រាក់ជិត ៩០លានដុល្លារអាមេរិកហើយ។ ជំនួយទាំងនោះ គឺសម្រាប់គម្រោងបង្ការគ្រោះមហន្តរាយ គម្រោងធ្វើទំនើបកម្មកំពង់ផែ គម្រោងប្រព័ន្ធលូបង្ហូរទឹកកខ្វក់ គម្រោងបោសសម្អាតមីន គម្រោងពង្រីកប្រព័ន្ធផ្គត់ផ្គង់ទឹកស្អាត ព្រមទាំងគម្រោងអភិវឌ្ឍន៍សេដ្ឋកិច្ច និងសង្គម ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។