រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង អះអាងថា ពលរដ្ឋខ្មែរ ដែលធ្វើការនៅបរទេសចំនួន ១.២៣៤.១១១នាក់ ក្នុងនោះមានស្រី ៤៩៩.០៧០នាក់ បានផ្ញើថវិកាមកឱ្យក្រុមគ្រួសាររបស់ពួកគេបានជាង ២ពាន់ ៣រយលានដុល្លារអាមេរិក ក្នុងឆ្នាំ២០១៨ កន្លងទៅ។
តួលេខរបស់ក្រសួងការងារ ឱ្យដឹងថា ពលករខ្មែរ ដែលកំពុងធ្វើការនៅបរទេសមានជាង ១លាន ២សែននាក់ (១.២៣៤.១១១) ក្នុងនោះស្រីមានជិត ៥០ម៉ឺននាក់ (៤៩៩.០៧០)។
ប្រទេសដែលមានពលករខ្មែរច្រើនជាងគេ គឺប្រទេសថៃ មានពលករខ្មែរចំនួន ១.១៤៦.៦៨៥នាក់ បន្ទាប់មក គឺប្រទេសកូរ៉េខាងត្បូង មានពលករខ្មែរចំនួន ៤៩.០៩៩នាក់។ ចំណែកនៅប្រទេសម៉ាឡេស៊ីវិញ ពលករខ្មែរមានចំនួន ៣០.១១៣នាក់ ខណៈប្រទេសជប៉ុន ៩.១០០នាក់ សិង្ហបុរីជាង ៨៣១រយនាក់ ហុងកុងជាង ៥៤នាក់ និងអារ៉ាប់ប៊ីសាអូឌីតចំនួន ១៦នាក់។
ប្រទេសដែលផ្ដល់ប្រាក់ឈ្នួលខ្ពស់ជាងគេសម្រាប់ពលករខ្មែរ គឺប្រទេសជប៉ុន ដែលប្រាក់ឈ្នួលជាមធ្យមប្រមាណ ១.៥០០ដុល្លារអាមេរិក ខណៈកូរ៉េខាងត្បូងបាន ១.៣០០ដុល្លារអាមេរិក ក្នុងមួយខែ។ ដោយឡែកប្រទេសដែលពលករខ្មែរទទួលបានចំណូលទាបជាងគេ គឺប្រទេសថៃ និងម៉ាឡេស៊ី ដែលមានប្រមាណ ៣០០ដុល្លារអាមេរិកក្នុងមួយខែ៕
សូមរង់ចាំស្ដាប់ព័ត៌មានពិស្ដារនៅក្នុងការផ្សាយរបស់យើងក្នុងរាត្រីនេះ...
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។