ព្រះមហាក្សត្រ​ប្រកាស​ឱ្យ​ប្រើ​ច្បាប់​ថវិកា​ជាតិ​ឆ្នាំ​២០១៩ ដែល​ចំណាយ​ច្រើន​ជាង​ចំណូល

ដោយ សុ ជីវី
2018-12-16
អ៊ីម៉ែល
មតិ
Share
បោះពុម្ព
ព្រះមហាក្សត្រ ​ព្រះករុណា​ព្រះបាទ​សម្ដេច ព្រះ​បរមនាថ នរោត្តម សីហមុនី។
ព្រះមហាក្សត្រ ​ព្រះករុណា​ព្រះបាទ​សម្ដេច ព្រះ​បរមនាថ នរោត្តម សីហមុនី។
Photo: RFA

ព្រះមហាក្សត្រ​ព្រះបាទ បរមនាថ នរោត្តម សីហមុនី ប្រកាស​ដាក់​ឱ្យ​ប្រើប្រាស់​ច្បាប់​ថវិកា​ជាតិ​ឆ្នាំ ២០១៩ តាម​រយៈ​ព្រះរាជក្រម ចុះ​ថ្ងៃទី១២ ខែ​ធ្នូ។

សេចក្ដី​ព្រាងច្បាប់​ស្ដីពី​ហិរញ្ញវត្ថុ​សម្រាប់​ការ​គ្រប់គ្រង​ឆ្នាំ​២០១៩ ឬ​ច្បាប់​ថវិកា​ជាតិ​ឆ្នាំ ២០១៩ នេះ ត្រូវ​បាន​សភា​ឯកបក្ស​អនុម័ត​ទាំងស្រុង​ដោយ​គ្មាន​ការ​កែប្រែ កាល​ពី​ពាក់​កណ្ដាល​ខែ​វិច្ឆិកា កន្លង​ទៅ។

របប​ក្រុង​ភ្នំពេញ​បាន​បង្កើន​ថវិកាជាតិ​ប្រមាណ ៧​រយ​លាន​ដុល្លារ​បន្ថែម​ទៀត សម្រាប់​ការ​ចំណាយ​នៅ​ឆ្នាំ២០១៩។ ថវិកា​ដែល​របប​នេះ​គ្រោង​ចំណាយ​មាន​ប្រមាណ ៦.៧ ពាន់​លាន​ដុល្លារ​អាមេរិក កើន​ឡើង​ជាង ១១​ភាគរយ បើ​ប្រៀប​ធៀប​នឹង​ច្បាប់​ថវិកាជាតិ​ឆ្នាំ​២០១៨ កន្លង​ទៅ ដែល​មាន​ប្រមាណ ៦​ពាន់​លាន​ដុល្លារ។ គម្រោង​ចំណាយ​សម្រាប់​ឆ្នាំ២០១៩ នេះ ​កើន​ឡើង​លើស​ពី​គម្រោង​ចំណូល​របស់​រដ្ឋ ដែល​មាន​ត្រឹមតែ​ជាង​ ៥​ពាន់​លាន​ដុល្លារ។

អ្នក​ឃ្លាំ​មើល​សង្គម​ថ្លែង​ថា នៅ​ពេល​ដែល​ចំណាយ និង​ចំណូល​មិន​មាន​តុល្យភាព​នឹង​គ្នា​ របប​ក្រុង​ភ្នំពេញ​ចៀស​មិន​ផុត​ពី​ត្រូវ​ខ្ចី​បំណុល​គេ ដើម្បី​យក​មក​បង្គ្រប់​ការ​ចំណាយ​របស់​ខ្លួន​ឡើយ​ ហើយ​និន្នាការ​បែបនេះ​ គឺ​ជា​ហានិភ័យ​សម្រាប់​សង្គម​ជាតិ​ទៅ​ថ្ងៃ​មុខ។

គិត​ត្រឹម​បំណាច់​ខែ​កញ្ញា ឆ្នាំ២០១៨ កម្ពុជា​ជំពាក់​បំណុល​បរទេស​ក្នុង​ក្របខ័ណ្ឌ​ទ្វេភាគី​ជាង ៦​ពាន់ ៨ រយ​លាន​​ដុល្លារ និង​ពហុភាគី​ជាង ៣​ពាន់​លាន​ដុល្លារ​អាមេរិក​​។ ប្រទេស​ដែល​កម្ពុជា​ខ្ចី​ច្រើន​ជាង​គេ​បំផុត​ គឺ​ប្រទេស​ចិន​ ដែល​មាន​ទឹក​ប្រាក់​កម្ចី​ជាង ៤​ពាន់​លាន​ដុល្លារ​អាមេរិក។ របប​ក្រុង​ភ្នំពេញ​អះអាង​ថា នេះ​មិន​មែន​ជា​ចំនួន​ច្រើន​ដែល​គួរ​ឱ្យ​ព្រួយ​បារម្ភ​នោះ​ទេ ព្រោះ​សេដ្ឋកិច្ច​កម្ពុជា​មាន​កំណើន​ខ្ពស់ ហើយ​កម្ពុជា​នៅ​មាន​​លទ្ធភាព​សង​បំណុល​នេះ​នៅ​ឡើយ​ ហើយ​កាល​ពី​ប៉ុន្មាន​ថ្ងៃមុន​នេះ​ ប្រទេស​ចិន​ក៏បាន​​ផ្ដល់​ជំនួយ និង​កម្ចី​ជាង ២​រយ​លាន​ដុល្លារ​បន្ថែម​ទៀត ដល់​របប​ក្រុង​ភ្នំពេញ​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល