មន្ត្រី​សង្គម​ស៊ីវិល​ថា ពុំ​មែន​ការ​ផ្ទុះ​ឡើង​កូវីដ-១៩ តែ​ម្យ៉ាង​ទេ ដែល​នាំ​ឱ្យ​សណ្ឋាគារ ៨ បិទ​ទ្វារ​នៅ​ខេត្ត​សៀមរាប

ដោយ សេក បណ្ឌិត
2020-03-05
អ៊ីម៉ែល
មតិ
Share
បោះពុម្ព
សណ្ឋាគារ​មួយ​ក្នុង​ក្រុង​សៀមរាប ត្រូវ​បាន​បិទ​ទ្វារ នៅ​ថ្ងៃ​ទី៥ ខែ​មីនា ឆ្នាំ២០២០។
សណ្ឋាគារ​មួយ​ក្នុង​ក្រុង​សៀមរាប ត្រូវ​បាន​បិទ​ទ្វារ នៅ​ថ្ងៃ​ទី៥ ខែ​មីនា ឆ្នាំ២០២០។
រូប៖ RFA

ពលរដ្ឋ​រស់​នៅ​ខេត្ត​សៀមរាប សមាគម​មគ្គុទ្ទេសក៍​អង្គរ និង​មន្ត្រី​សង្គម​ស៊ីវិល​អះអាង​ថា ការ​ធ្លាក់​ចុះ​ភ្ញៀវ​ទេសចរ​យ៉ាង​គំហុក នាំ​ឱ្យ​សណ្ឋាគារ​លំដាប់​ផ្កាយ និង​កន្លែង​ផ្ដល់​សេវាកម្ម​ជូន​ភ្ញៀវ​ទេសចរ​មួយ​ចំនួន បង្ខំ​ចិត្ត​បិទ​ទ្វារ ពុំ​មែន​បណ្ដាល​មក​ពី​ជំងឺ​រលាក​ផ្លូវ​ដង្ហើម កូវីដ-១៩ តែ​ម្យ៉ាង​នោះ​ទេ។ ពួកគេ​សង្កេត​ឃើញ​ថា ​វិបត្តិ​នយោបាយ និង​ការ​ធ្លាក់​ចុះ​ប្រជាធិបតេយ្យ គឺ​ជា​មូលហេតុ​ចម្បង ដែល​នាំ​ឱ្យ​ភ្ញៀវ​ទេសចរ​ថយ​ចុះ។

ការ​លើក​ឡើង​នេះ ក្រោយពី ប្រធាន​សហព័ន្ធ​សហជីព​វិស័យ​ទេសចរណ៍ និង​សេវាកម្ម​កម្ពុជា លោក ម៉ម រិទ្ធី និង​អ្នក​នាំ​ពាក្យ​ក្រសួង​ទេសចរ លោក ជុក ជំនោរ ត្រូវ​បាន​កាសែត​ក្នុង​ស្រុក​ស្រង់​សំដី​ថា មូល​ហេតុ​ចម្បង​នាំ​ឲ្យ​សណ្ឋាគារ​ចំនួន ៨ នៅ​ខេត្ត​សៀមរាប ​បិទ​ទ្វារ​បណ្ដោះអាសន្ន ប៉ះពាល់​ការងារ​បុគ្គលិក​រាប់​ពាន់​នាក់ គឺ​ដោយ​សារ​ការ​ធ្លាក់​ចុះ​ភ្ញៀវ​ទេសចរ​ទៅ​កាន់​ខេត្ត​សៀមរាប បង្ក​ឡើង​ដោយ​ការ​ផ្ទុះ​ឡើង​នៃ​ជំងឺ​កូវីដ-១៩។

មន្ត្រី​សង្គម​ស៊ីវិល​សង្កេត​ឃើញ​ថា  អាជ្ញាធរ​បាន​ទម្លាក់​កំហុស​លើ​មេរោគ​វីរុស​កូរ៉ូណា ថា ជា​មូលហេតុ​នាំ​ឱ្យ​ធ្លាក់​ចុះ​ភ្ញៀវ​ទេសចរ ក៏​ប៉ុន្តែ​ធាតុ​ពិត​ពុំ​ដូច្នេះ​ទាំង​ស្រុង​នោះ​ទេ។ ពួក​គេ​រក​ឃើញ​ថា ចាប់​តាំង​ពី​កម្ពុជា​មាន​វិបត្តិ​នយោបាយ ជា​ពិសេស ការ​រំលាយ​គណបក្ស​សង្គ្រោះ​ជាតិ កាលពី​អំឡុង​ឆ្នាំ២០១៧ ធ្វើ​ឱ្យ​ប្រជាធិបតេយ្យ និង​ការ​គោរព​រំលោភ​សិទ្ធិ​មនុស្ស​ធ្លាក់​ចុះ​យ៉ាង​គំហុក ដែល​ជា​ប្រភព​ចម្បង ប៉ះពាល់​វិស័យ​ភ្ញៀវ​ទេសចរ មក​ពី​ប្រទេស​លោក​ខាង​លិច និង​អឺរ៉ុប។

ប្រធាន​សមាគម​ប្រជាធិបតេយ្យ​ឯករាជ្យ នៃ​សេដ្ឋកិច្ច​ក្រៅ​ប្រព័ន្ធ លោក វន់ ពៅ យល់​ថា ការ​ទម្លាក់​កំហុស​លើ​វីរុស​កូរ៉ូណា ធ្វើ​ឱ្យ​ប៉ះ​ពាល់​វិស័យ​ទេសចរ​នៅ​ខេត្ត​សៀមរាប ពុំ​ទាន់​ត្រឹម​ត្រូវ​ទាំង​ស្រុង​នោះ​ទេ។ លោក​ទទួល​ស្គាល់​ថា វីរុស​នេះ ក៏​ជា​ធាតុ​ផ្សំ​មួយ​ផ្នែក ប៉ះ​ពាល់​វិស័យ​ទេសចរ ក៏ប៉ុន្តែ ជម្លោះ​នយោបាយ ទើប​ជា​ហេតុផល​សំខាន់ បណ្ដាល​ឱ្យ​ភ្ញៀវ​ទេសចរ​ធ្លាក់​ចុះ​ច្រើន មុន​ពេល​មិន​ទាន់​ផ្ទុះ​វីរុស​កូរ៉ូណា «ភ្ញៀវ​អឺរ៉ុប​បាន​ធ្លាក់​ចុះ​ក្រោយ​ពី​មាន វិបត្តិនយោបាយ ទី២បន្ទាប់ពីមានវត្តមានភ្ញៀវចិន ភ្ញៀវ​អឺរ៉ុប​បាន​បន្ថយ​វត្តមាន ក្នុង​តំបន់​ទេសចរ​សំខាន់ៗ ក្នុង​កម្ពុជា។ ក្រោយ​មក​យើង​ឃើញ​ថា ភ្ញៀវ​អឺរ៉ុប​កាន់​តែ​ស្ងាត់ៗ ក្រោយ​ពេល​មាន​បញ្ហា​សេដ្ឋកិច្ច​ប៉ះ​ពាល់​សំខាន់​ផង​ដែរ បញ្ហា​ពិភព​លោក និង​ចុង​ក្រោយ​មួយទៀត រហូត​ដល់​មាន​បញ្ហា​ជំងឺ​វីរុស (កូវីដ-១៩) ធ្វើ​ឱ្យ​ភ្ញៀវ​ទេសចរ​រឹត​តែ​ស្ងាត់​មួយ​ជាន់​ទៀត អា​ហ្នឹង​គឺ​ជា​ធាតុផ្សំ»

ក្រសួង​ទេសចរណ៍​ឱ្យ​ដឹង​ថា សណ្ឋាគារ​លំដាប់​ផ្កាយ​ចំនួន ៨ នៅ​ខេត្ត​សៀមរាប ផ្អាក​ដំណើរ​ការ ប៉ះពាល់​បុគ្គលិក​ជាង ១ពាន់​នាក់​បាត់​បង់​ការងារ និង​មាន​កន្លែង​ផ្ដល់​សេវាកម្ម​ទេសចរ​មួយ​ចំនួន​ទៀត បាន​បញ្ឈប់​បុគ្គលិក​របស់​ខ្លួន​បណ្ដើរៗ ដោយ​សារ​ខ្សត់​ភ្ញៀវ។

បុគ្គលិក​រដ្ឋបាល​សណ្ឋាគារ​មួយ ក្នុង​ក្រុង​សៀមរាប លោក អាង ឆាល ទទួល​ស្គាល់​ថា ការ​ផ្ទុះ​វីរុស​កូរ៉ូណា ធ្វើ​ឱ្យ​ភ្ញៀវ​ទេសចរ​ជន​ជាតិ​ចិន​ថយ​ចុះ​យ៉ាង​គំហុក​នៅ​រយៈ​ពេល​ជាង ២ខែ​កន្លង​មក​នេះ ខណៈ​ដែល​ភ្ញៀវ​ទេសចរ​កំពុង​ធ្លាក់​ចុះ​ស្រាប់ បង្ក​ប៉ះពាល់​កន្លែង​ផ្ដល់​សេវាកម្ម​ទេសចរ​ជា​ច្រើន​ ប្រឈម​ក្ស័យធន ធ្វើ​ឱ្យ​ពលរដ្ឋ​បាត់បង់​ការងារ និង​ប្រាក់​ចំណូល៖ «ជន​ជាតិ​ចិន​ឥឡូវ​ដេក​ស្អាត​ហើយ មានន័យថា Guides (មគ្គុទ្ទេសក៍) ដេក​ស្អាត​ហើយ អត់​មាន​ភ្ញៀវ​ដើរ​ទេ។ ក្រុមហ៊ុន Tours ចិន (ក្រុមហ៊ុន​ទេសចរណ៍​របស់​ចិន) គឺ​ចប់​ឈឹង គឺ​ចប់​ទាំង​ស្រុង មាន​ន័យ​ថា ៩០ភាគ​រយ គឺ​ចប់​អស់​ហើយ។ គ្មាន​ដំណើរ​ការ​អ្វី​កើត​ទេ បុគ្គលិក​រំសាយ​មួយ​រយៈ​ពេល​នេះ​ទៅ។ មួយ​រយៈ​នេះ ក្រុម Guides (មគ្គុទ្ទេសក៍) ជន​ជាតិ​ចិន មាន​ការ​ដើរ​ហែ​ក្បូន​ដង្ហែ ដង្ហោយ​ហៅ ភ្ញៀវ​ទេសចរ​ចិន ឱ្យ​មក​ដើរ​លេង​វិញ​ច្រើន។ អា​ហ្នឹង​ខាង Guides (មគ្គុទ្ទេសក៍) ចិន និង​សមាគម​ចិន​គាត់​ផ្សព្វផ្សាយ​ខ្លួន​គាត់»

ប្រធាន​ក្រុម​មគ្គុទ្ទេសក៍​អង្គរ លោក ខៀវ ធី សង្កេត​ឃើញ​ថា ប៉ុន្មាន​ឆ្នាំ​ចុង​ក្រោយ ភ្ញៀវ​ទេសចរ​អឺរ៉ុប​ធ្លាក់​ចុះ​ខ្លាំង កើន​ឡើង​ភ្ញៀវ​ជន​ជាតិ​ចិន ក៏​ប៉ុន្តែ​នៅ​គ្រា​ដែល​ផ្ទុះ​វីរុស​កូរ៉ូណា ភ្ញៀវ​ទេសចរ​ជន​ជាតិ​ចិន​ចាប់​ផ្ដើម​ស្ងប់​ស្ងាត់​នៅ​រយៈ​ពេល​ជាង ២ខែ​ចុង​ក្រោយនេះដែរ។ លោក​ថា កត្តា​នយោបាយ អាកាសធាតុ និង​ភាព​រញ៉េរញ៉ៃ​តាម​ច្រក​ព្រំដែន ក៏​ជា​បញ្ហា​ធ្វើ​ឱ្យ​ប៉ះ​ពាល់​ភ្ញៀវ​ទេសចរ​ដែរ៖ «កត្តា​នយោបាយ​តិចតួច អាកាសធាតុ បរិស្ថាន​ខ្លះ​ទៅ ភាព​រញ៉េរញ៉ៃ​តាម​ច្រក​ព្រំដែន​ខ្លះ​ទៅ វា​ជា​កត្តា​ដែល​មាន​ការ​ធ្លាក់​ចុះ ភាគច្រើន​ធ្លាក់​តិច ដល់​ឥឡូវ​ដល់​កត្តា​មេរោគ​ហ្នឹង​វា​ធ្លាក់​គំហុក​មែនទែន។ ទាំង​ចិន​ក៏​ឈប់​មក អឺរ៉ុប​ក៏​គេ​បារម្ភ»

របាយការណ៍​គ្រឹះស្ថាន​អង្គរ​ឱ្យ​ដឹង​ថា នៅ​ខែ​មករា ដើម​ឆ្នាំ២០២០ នេះ ចំនួន​ភ្ញៀវ​ទេសចរ​អន្តរជាតិ ទិញ​សំបុត្រ​ចូល​តំបន់​អង្គរ ចំនួន​ជាង ២៣ម៉ឺន​នាក់ (២៣៤.៩៣៧នាក់) គឺ​ថយ​ចុះ​ជាង ២៦% បើ​ធៀប​កាល​ពី​ខែ​មករា​ឆ្នាំ២០១៩ នោះ។ មន្ត្រី​ជាន់​ខ្ពស់​ក្រសួង​ទេសចរ​ប៉ាន់​ប្រមាណ​ថា ចំនួន​ទេសចរ​មក​កម្ពុជា​អាច​នឹង​ថយ​ចុះ​ប្រមាណ ១០រយ​ភាគ នៅ​ក្នុង​ឆ្នាំ២០២០ នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល