អ្នកវិភាគ និង​សង្គម​ស៊ីវិល​រិះគន់​របប​ភ្នំពេញ​រឿង​ប្រមូល​ចំណូល​ពី​ដី​សម្បទាន​សេដ្ឋកិច្ច​បាន​តិច

ដោយ សុ ជីវី
2018-11-08
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​កសិកម្ម លោក វេង សាខុន ថ្លែង​ក្នុង​ពិធី​ចែក​ពូជ​ស្រូវ​ផ្កា​រំដួល​ជូន​កសិករ​នៅ​ខេត្ត​កំពង់ឆ្នាំង កាល​ពី​ថ្ងៃ​ទី​១៤ ខែ​កក្កដា ឆ្នាំ​២០១៦។ Photo courtesy of MAFF.gov.kh
រដ្ឋមន្ត្រី​ក្រសួង​កសិកម្ម លោក វេង សាខុន ថ្លែង​ក្នុង​ពិធី​ចែក​ពូជ​ស្រូវ​ផ្កា​រំដួល​ជូន​កសិករ​នៅ​ខេត្ត​កំពង់ឆ្នាំង កាល​ពី​ថ្ងៃ​ទី​១៤ ខែ​កក្កដា ឆ្នាំ​២០១៦។ Photo courtesy of MAFF.gov.kh
Photo courtesy of MAFF.gov.kh

អ្នកវិភាគ​និង​សង្គម​ស៊ីវិល រិះគន់​របប​លោក ហ៊ុន សែន ថា ប្រមូល​ចំណូល​បាន​តិច​តូច​ពី​ការ​ផ្ដល់​ដី​សម្បទាន​សេដ្ឋកិច្ច ដោយសារតែ​កង្វះ​សមត្ថភាព និង​មាន​អំពើពុករលួយ​។ ការរិះគន់​នេះ បន្ទាប់ពី​ក្រសួងកសិកម្ម បង្ហាញ​របាយការណ៍​ថា ក្រសួង​ប្រមូល​ចំណូល​បាន​ជាង​៦​លាន​ដុល្លារ ពី​ការជួល​ដី​សម្បទាន​សេដ្ឋកិច្ច​ជាង​១​លាន​ហិកតារ​។

ដី​សម្បទាន​សេដ្ឋកិច្ច ដែល​ជា​មូលហេតុ​ដ៏​សំខាន់​មួយ​បណ្ដាល​ឲ្យ​មាន​ជម្លោះដីធ្លី ការ​កាប់​បំផ្លាញ ព្រៃឈើ ធនធានធម្មជាតិ និង​ការរំលោភ​សិទ្ធិមនុស្ស​នៅ​ក្នុង​ប្រទេស​កម្ពុជា អស់​រយៈកាល​ជាង ២ ទសវត្សរ៍​មកនេះ បាន​ផ្ដល់​ចំណូល​សម្រាប់​ជាតិ​ជាង​៦ លាន​ដុល្លារ​អាមេរិក​ក្នុង​ឆ្នាំ​២០១៨។

អ្នកស្រាវជ្រាវ និង​អ្នកវិភាគ​បញ្ហា​សង្គម និង​នយោបាយ លោក គឹម សុខ យល់​ថា ការ​ប្រមូល​ចំណូល​បាន​ជាង ៦​លាន ដុល្លារ​ពី​ការ​ការជួល​ដី​ឬ​ផ្ដល់​ដី​សម្បទាន​សេដ្ឋកិច្ច​ជាង ១​លាន ហិកតារ​នេះ គឺ​មានន័យថា របប​លោក ហ៊ុន សែន បាន​ជួល​ដី​ឱ្យ​បរទេស​ថោកៗ​ក្នុង​១​ហិកតារ តម្លៃ​ត្រឹម ៦ដុល្លារ​ក្នុង មួយ​ឆ្នាំ។ លោក​រិះគន់ថា វា​គឺជា​របៀប​ធ្វើ​សេដ្ឋកិច្ច​បែប​ល្ងង់ខ្លៅ ឬ​អសមត្ថភាព​បំផុត និង​ជា​របៀប​ធ្វើ សេដ្ឋកិច្ច​ដែល​ចេះ​ប្រើ​តែ​កាំភ្លើង ហើយ​សម្លុត​យក​តែ​ប្រយោជន៍​ស្រាប់ៗ ដែល មិនបាន​គិត​អំពី​ប្រយោជន៍​ប្រជាពលរដ្ឋ​ខ្លួនឯង​នោះ​ទេ។ «»

លោក គឹម សុខ បន្ថែម​ថា ចំណូល​ពី​ការ​ផ្តល់​ដី​សម្បទាន​នេះ គឺ​មិនបាន​ស្មើ ឬ​មិន​អាច​តបស្នង ការ​ខូចខាត​សង្គម​កម្ពុជា​នោះ​ទេ ដូចជា​បាត់បង់​ព្រៃឈើ បាត់បង់​ធនធានធម្មជាតិ បាត់បង់​ដីស្រែ ចម្ការ និង​ផ្ទះសម្បែង​ពលរដ្ឋ​ជាដើម។ លោក​យល់ថា ប្រសិនបើ​របប​លោក ហ៊ុន សែន ជួល​ដី​ឲ្យ​ប្រជា​ពលរដ្ឋ ឬ​ផ្ដល់​ដី​ឲ្យ​ពលរដ្ឋ​ធ្វើ​កសិកម្ម​ផ្ទាល់ ហើយ​រដ្ឋ​ជួយ​គាំទ្រ និង​រក​ទីផ្សារ​ឲ្យ​បាន​ទូលាយ ខណៈ​ស​សហគមន៍​អឺរ៉ុប ផ្ដល់​ប្រព័ន្ធ​អនុគ្រោះ​ព័ន្ធ​ដល់​កម្ពុជា​នោះ ក៏បាន​ផល​ចំណេញ​ច្រើនជាង ការ​ផ្តល់ ដី​សម្បទាន​សេដ្ឋកិច្ច​ដែរ។

លោក គឹម សុខ បន្ត​ថា របាយការណ៍​របស់​ក្រសួងកសិកម្ម​នេះ គឺជា​ការ​ភូត​កុហក​រាស្ត្រ​ទាំងស្រុង ដោយសារ​មានការ​ឃុបឃិត​គ្នា​ប្រព្រឹត្ត​អំពើពុករលួយ​ជា​ប្រព័ន្ធ ដែល​មិន​គិត​អំពី​ការ​រីកចម្រើន​របស់ ជាតិ​នោះ​ទេ។ «»

ការលើកឡើង​នេះ បន្ទាប់ពី​រដ្ឋមន្ត្រី​ក្រសួង​កសិកម្ម លោក វេង សាខុន បាន​បង្ហាញ​របាយការណ៍ ប្រាប់​អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុជា អ្នកស្រី រ៉ូណា ស្មីត (Rhona Smith) កាលពី​ថ្ងៃ​ទី​៥ ខែ​វិច្ឆិកា ថា កម្ពុជា​ប្រមូល​ចំណូល​ពី​ដី​សម្បទាន​សេដ្ឋកិច្ច​បាន ជាង ៦​លាន​( ,៦៣៦, ៧២០ )​ដុល្លារ​សហរដ្ឋអាមេរិក។ ក្នុង​របាយការណ៍ បង្ហាញ​ដែរ​ថា បច្ចុប្បន្ន​មាន​ក្រុមហ៊ុន​ចំនួន ២២៩ ត្រូវ​បាន​របប​លោក ហ៊ុន សែន សម្រេច​ឲ្យ​បន្ត​សុពលភាព​លើ​ផ្ទៃដី​ជាង​១​លាន​(,១៧៨ ,៦៤៦) ហិកតារ ដែល​ស្ថិត​ក្នុង​១៩​ខេត្ត​។ ក្រុមហ៊ុន​ទាំងនោះ បាន​ឈូស​ឆាយ​លើ​ដី​ចំនួន​ជាង ៥​សែន​( ៥១៥, ៧០១ )​ហិកតារ បង្កើន​ការ​ដាំដុះ​បាន​ជាង​៤​សែន​( ៤៣៨, ២៥០ )​ហិកតារ និង​បាន​កសាង​ប្រព័ន្ធ​ផ្លូវ​ចំនួន ១​ម៉ឺន​( ១៧, ៦២៤) គីឡូម៉ែត្រ។

អាស៊ីសេរី មិន​អាច​សុំ​ការ​ឆ្លើយ​តប​បន្ថែម​ពី​អ្នកនាំពាក្យ​ក្រសួង​កសិកម្ម លោក ឡោ រស្មី បាន​ទេ ដោយ​ទូរស័ព្ទ​ចូល​ពុំ​មាន​អ្នកទទួល​។ ចំណែក​អ្នកនាំពាក្យ​ក្រសួងបរិស្ថាន លោកស្រ៊ុន ដារិទ្ធ បដិសេធ​ឆ្លើយ​សំណួរ​អាស៊ីសេរី ក្រោម​ហេតុផល​ថា របប​លោក​ហ៊ុន សែន ផ្អាក​ដំណើរការ​វិទ្យុ​អាស៊ីសេរី នៅ​ក្នុង​ប្រទេស​កម្ពុជា។

រីឯ​ប្រធាន​គ្រប់គ្រង​ផ្នែក​អង្កេត​អង្គការ​លីកាដូ (Licadho) លោក អំ សំអាត ទទួលស្គាល់​ថា ចំណូល​រដ្ឋ​ពី​ឈ្នួល​ដី​សម្បទាន​សេដ្ឋកិច្ច មិន​មាន​សមមូល​នឹង​ផ្ទៃដី​ដែល​របប​លោក ហ៊ុន សែន បាន​ផ្ដល់​ឲ្យ​ក្រុមហ៊ុន​នោះ​ទេ​។ លោក​បន្ថែម​ថា ការ​ទទួល​បាន​ចំណូល​ពី​ដី​សម្បទាន​សេដ្ឋកិច្ច គួរ​មាន​លក្ខណៈ​ច្បាស់លាស់ ហើយ​សមស្រប​ជាមួយ​នឹង​ទំហំ​ដី និង​ទំហំ​ទទួល​ផល​ប្រយោជន៍​របស់​ក្រុមហ៊ុន​នីមួយៗ ដែល​រក​បាន​ពី​ធនធាន​ដី។ «»

លោក អំ សំអាត បន្ត​ថា របប​លោក​ហ៊ុន សែន គួរតែ​ពិនិត្យ​ឡើងវិញ​អំពី​តម្លៃ​ឈ្នួល​ដី​នេះ តើ​ថា ស្រប​ជាមួយ​ទីផ្សារ​បច្ចុប្បន្ន​ឬ​អត់​ហើយ​គួរតែ​គ្រប់​គ្រង់​ចំណូល​ពី​ការ​ប្រមូល​ព័ន្ធ​អាករ​ផ្សេងៗ​ពី​ក្រុមហ៊ុន​ទាំងអស់​ឲ្យ​បាន​ច្បាស់លាស់​មាន​តម្លាភាព​ក្នុង​ការ​ផ្ដល់​ព័ត៌មាន និង​បើកចំហ​ជា​សាធារណៈ ដើម្បី​ធានា ថវិកា​ទាំងអស់​ត្រូវ​ចូល​ទៅ​ថវិកាជាតិ។ «»

របប​លោក ហ៊ុន សែន តែងតែ​អះអាង​ថា ការ​ផ្ដល់​ដី​សម្បទាន​សេដ្ឋកិច្ច គឺ​ដើម្បី​ជួយ​សម្រាល​ជីវភាព ផ្ដល់​ការងារ​ឲ្យ​ប្រជាជន​កម្ពុជា និង​ជំរុញ​ការ​អភិវឌ្ឍ​ប្រទេស ប៉ុន្តែ​ផ្ទុយទៅវិញ ក្រុម​អង្គការ​សង្គម ស៊ីវិល មើលឃើញ​ថា ការ​ផ្ដល់​ដី​សម្បទាន​សេដ្ឋកិច្ច គឺជា​មូលហេតុ​បង្ក​ទៅជា​ទុក្ខទោស​ដល់​ប្រជា ពលរដ្ឋ​ដែល​ពាក់ព័ន្ធ​ទៅវិញ។ នៅ​ក្នុង​របាយការណ៍​ដែល​ចេញផ្សាយ​ដោយ​វេទិកា​នៃ​អង្គការ​មិនមែន​រដ្ឋាភិបាល​ស្ដីពី​កម្ពុជា បាន​បង្ហាញ​ថា ដី​សម្បទាន​សេដ្ឋកិច្ច​ភាគច្រើន បាន​បង្ក​អោយ​មាន​វិវាទ​ដីធ្លី​រាំ​រ៉ៃ ដែល​បាន​ធ្វើ​ឲ្យ​ប៉ះពាល់ ទៅដល់​ប្រជាជន​ជាច្រើន​ម៉ឺន​គ្រួសារ ហើយ​មានការ​ដោះស្រាយ តិច​តូច​ប៉ុណ្ណោះ​មកដល់​បច្ចុប្បន្ន​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល