កសិករ​នៅ​ស្រុក​សំឡូត​ត្អូញត្អែរ​ខាត​ទុន​ដោយសារ​ខ្យល់​កន្ត្រាក់​រលំ​​ដើម​ទុរេន​​ និង​ជ្រុះ​ផ្លែ​​ជា​ច្រើន​តោន

ដោយ ទីន ហ្សាការីយ៉ា
2019-03-26
អ៊ីម៉ែល
មតិ
Share
បោះពុម្ព
ដើម​ទុរេន​រលំ និង​ផ្លែ​ជិត​បាន​ប្រមូល​ផល​ជ្រុះ ដោយសារ​ខ្យល់​កន្ត្រាក់​បក់​បោក កាល​ពី​រសៀល​ថ្ងៃ​ទី២៣ មីនា។
ដើម​ទុរេន​រលំ និង​ផ្លែ​ជិត​បាន​ប្រមូល​ផល​ជ្រុះ ដោយសារ​ខ្យល់​កន្ត្រាក់​បក់​បោក កាល​ពី​រសៀល​ថ្ងៃ​ទី២៣ មីនា។
រូប៖ ហ្វេសប៊ុក Prom Nop

ប្រជាកសិករ​នៅ​ស្រុក​សំឡូត​ ខេត្ត​បាត់ដំបង​ ត្អូញត្អែរ​ពី​ផល​ប៉ះពាល់​ដោយសារ​ខ្យល់​កន្ត្រាក់ បោកបក់​បណ្ដាល​ឲ្យ​​ធូរេន​របស់​ពួកគាត់​រលំ​ដួល​រាប់​រយ​ដើម និង​ជ្រុះ​ផ្លែ​ខូចខាត​អស់​ជា​ច្រើន​តោន កាល​ពី​រសៀល​ថ្ងៃ​ទី​២៣​មីនា។ ពួកគាត់​ព្រួយបារម្ភ​ខ្លាច​ខាត​ដើម​ទុន​គ្មាន​ប្រាក់​ដោះស្រាយ​ជីវភាព​គ្រួសារ ​ព្រោះ​ជួប​គ្រោះ​ធម្មជាតិ​ ២ដង ផ្ទួន​គ្នា​ក្នុង​ឆ្នាំ២០១៩នេះ។​

ខ្យល់​កន្ត្រាក់​ប៉ះពាល់​ដំណាំ​ទុរេន​របស់​កសិករ នៅ​ចំនួន​ពីរ​ឃុំ គឺ​ឃុំ​ស៊ុង និង​ឃុំ​សំឡូត ខែត្រ បាត់ដំបង កាល​ពី​ថ្ងៃ​ទី២៣ មីនា។

កសិករ​នៅ​ភូមិ​បឹង​រ៉ុន ឃុំ​សំឡូត​ ស្រុក​សំឡូត​ លោក​ អ៊ួន ជួន​ ឲ្យ​ដឹង​កាល​ពី​ថ្ងៃ​ទី២៤ មីនា​ថា ឆ្នាំនេះ​​ពួកគាត់​ជួប​គ្រោះ​ធម្មជាតិ ២ ផ្ទួនៗ ដោយ​នៅ​​ដើម​រដូវ​ដាំដុះ​ដើម​ធូរេន​រលួយ​ងាប់​ជាង ៦០ដើម ឬ​ប្រមាណ ៣០ភាគ​រយ​នៃ​ចំនួន​ទុរេន ដែល​បាន​ដាំដុះ​នៅ​លើ​ផ្ទៃ​ដី​ជាង​ ២ហិកតារ ដែល​ចំណាយ​ដើម​ទុន​អស់​ប្រមាណ ៥ពាន់​ដុល្លារ ត្រូវ​ខ្យល់​កន្ត្រាក់​បោកបក់​រលំ​បាក់​ដើម​ធូរេន ៦ដើម ហើយ​ជ្រុះ​ផ្លែ​ខូចខាត​អស់​ជិត​ ២តោន។ លោក​បន្ត​ថា ផ្លែ​ធូរេន​ដែល​ជ្រុះ​មាន​ទម្ងន់​ពី​ ២ ទៅ​ ៣ គីឡូក្រាម ដែល​ត្រៀម​ប្រមូល​ផល​នៅ​ចុង​ខែ​មេសា ក៏​ប៉ុន្តែ​ត្រូវ​គ្រោះ​ធម្មជាតិ​បោកបក់​ខូច​អស់៖ «ខ្ញុំ​ស្ដាយ​ដែរ​ខំ​ដាំ​យូរ​មក​ហើយ​ ដល់​ពេល​ខូច​អស់​ដូច្នេះ​ខ្ញុំ​ស្ដាយ​ណាស់​ ព្រោះ​ខំ​តស៊ូ​ដាំ​មក​យូរ​ឆ្នាំ​មក​ទល់​ពេល​នេះ​ពិបាក​ណាស់។ ខ្ញុំ​មិន​ដឹង​ធ្វើ​យ៉ាង​មិច​ទេ​ខ្ញុំ​មាន​តែ​កន្លែង​ដែល​ដើម​ធូរេន​ងាប់​ យើង​មាន​តែ​ដាំ​បន្ថែម​ទៀត​ជួស​វា​ឡើង​វិញ​។ខ្ញុំ​យ៉ាប់​ហើយ​ ព្រោះ​ធ្វើ​អស់​លុយ​អស់​កាក់​ហើយ​អត់​បាន​ផល​ ផល​បាន​តិចតួច​មក​មិន​ស្មើ​នឹង​កម្លាំង​ដែល​ខំ​ថែទាំ​វា​ទេ»

លោក​បន្ត​ថា​បើ​ទោះ​បី​ជា​តម្លៃ​​ធូរេន​ឆ្នាំ​នេះ​ខ្ពស់​ជាង​ឆ្នាំ​កន្លង​ទៅ​ក៏​ដោយ​ ក៏​កសិករ​មិន​បាន​ផល​កម្រៃ​ដូច​ឆ្នាំ​មុនៗ ដែរ ព្រោះ​ចំណាយ​អស់​ដើម​ទុន​ច្រើន​ ដូច្នេះ​នៅ​ពេល​ប្រមូល​ផល​លក់​មិន​បាន​ប្រាក់​កម្រៃ​សម្រាប់​ដោះស្រាយ​ជីវភាព​នោះ​ទេ។

កសិករ​ដាំ​ធូរេន​នៅ​ឃុំ​សំឡូត​ម្នាក់​ទៀត លោក ខ្លឹម ចាន់ថុល អះអាង​ថា លោក​ដាំ​ដំណាំ​ទុរេន​ជាង​១០០ដើម​នៅ​លើ​ផ្ទៃ​ដី​ប្រហែល​ ១ហិកតារ​ ហើយ​ត្រូវ​ខ្យល់​កន្ត្រាក់​បោកបក់​ជ្រុះ​ផ្លែ​អស់​ប្រហែល​២តោន​ ស្រប​ពេល​ដែល​ទុរេន​ជិត​ដល់​រដូវ​ប្រមូល​ផល​នោះ។ កសិករ​រូប​នេះ​បន្ត​ថា កសិករ​នៅ​ក្នុង​មូលដ្ឋាន​បាន​ត្រឹម​តែ​នាំ​គ្នា​សោកស្ដាយ​ ដោយ​មិន​ដឹង​ធ្វើ​យ៉ាង​ណា​ដោះ​ស្រាយ​ផល​ដំណាំ​របស់​ខ្លួន​ដែល​បាន​ខូច​ខាត​នោះ​ទេ ព្រោះ​ផ្លែ​ទុរេន​ដែល​ជ្រុះ​​ខូច​អស់​មិន​អាច​យក​ទៅ​លក់​ដូរ​បាន​ទេ៖ «បាទ​ខាង​ភូមិ​ផ្សេង​ជាប់​គ្នា​នឹង​​ដើម​ធូរេន​គេ​រលំ​ដួល​ច្រើន​អ្នក​ខ្លះ​រលំ ១០ដើម ២០ដើម។ ខ្ញុំ​ដាំ​រយៈ​ពេល ៧ឆ្នាំ​បាន​ទទួល​ផល​វិញ ដល់​ពេល​វា​ដួល​ខូច​អីចឹង​ ហើយ​យើង​ដាំ​វា​ថ្មី​ឡើង​វិញ វា​ពិបាក​ណាស់​ ហើយ​មាន​អ្នក​ខ្លះ​រហូត​យំ​ ព្រោះ​ស្ដាយ​ទុរេន​ជិត​បាន​ផល​ហើយ​ខូច​អស់»

ទាក់ទង​នឹង​បញ្ហា​នេះ​ មេឃុំ​ សំឡូត​ លោក​ ធឹម ព្រឿង​ មាន​ប្រសាសន៍​ប្រាប់​អាស៊ី​សេរី​ថា ខ្យល់​កន្ត្រាក់​បក់​បោក ​រលំ​ដើម​ទុរេន​របស់​កសិករ​ក្នុង​ឃុំ​របស់​លោក​​ប្រហែល ២០០​ដើម និង​ប៉ើង​ដំបូល​ផ្ទះ​របស់​ពលរដ្ឋ​ ៦ខ្នង​ផ្ទះ ប៉ុន្តែ​មិន​បណ្ដាល​ឲ្យ​​មនុស្ស​រង​របួស​នោះ​ទេ។ លោក​បន្ត​ថា ​គិត​ត្រឹម​ម៉ោង​១២ថ្ងៃ​ដដែល​ ដោយ​​អាជ្ញាធរ​នៅ​តែ​បន្ត​ចុះ​ប្រមូល​ទិន្នន័យ​ពី​ការ​ខូចខាត​មិន​ទាន់​ចាប់​នៅ​ឡើយ​ទេ៖ «បាទ​ចាំ​បន្តិច​ទៀត​ខាង​ខ្ញុំ​កំពុង​តែ​បូក​សរុប​ ហើយ​ខ្ញុំ​កំពុង​តែ​ធ្វើ​ដំណើរ​តាម​ផ្លូវ​អត់​ទាន់​មាន​ពេល​និយាយ​បកស្រាយ​បាន​ទេ»

ទោះ​ជា​យ៉ាង​ពលរដ្ឋ​ទាំង​ ២នាក់​អះអាង​ថា​ អាជ្ញាធរ​បាន​ត្រឹម​ចុះ​ពិនិត្យ​មើល​ផល​ដំណាំ​របស់​ពួក​គាត់ ដោយ​មិន​បាន​សួរ​សុខ​ទុក្ខ​ និង​រក​វិធី​​ជួយ​ដោះ​ស្រាយ​ពី​ការ​ខូច​ខាត​នេះ​ជូន​ដល់​ពួកគាត់​នៅ​ឡើយ​ទេ។ របាយការណ៍​អភិបាល​ស្រុក​សំឡូត កាល​ពី​ឆ្នាំ២០១៨ ឲ្យ​ដឹង​ថា កសិករ​ក្នុង​ស្រុក​មួយ​នេះ​បាន​ដាំ​ដុះ​ដំណាំ​ទុរេន​ប្រមាណ ៤.០០០ហិកតារ នៅ​ឃុំ​ស៊ុង និង​ឃុំ​សំឡូត​ ក្នុង​នោះ​ប្រហែល ២.០០០ហិកតារ​កំពុង​ហុច​ផល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល