ចំនួនភ្ញៀវទេសចរខេត្តសៀមរាបធ្លាក់ចុះ «ដោយសារកម្សោយការផ្សព្វផ្សាយរបស់រដ្ឋាភិបាល»
2024.07.03
ភ្ញៀវទេសចរចូលទស្សនាប្រាសាទអង្គរវត្ត នាខេត្តសៀមរាប។
រូប៖ ពលរដ្ឋផ្ដល់ឱ្យ
បញ្ហាដែលនាំឱ្យភ្ញៀវទេសចរធ្លាក់ចុះ បានធ្វើឱ្យមានភាពចម្រូងចម្រាសគ្នា រវាងមន្ត្រីរដ្ឋាភិបាល និងពលរដ្ឋ ដោយមន្ត្រីរដ្ឋាភិបាលអះអាងថា ការធ្លាក់ចុះភ្ញៀវទេសចរនៅពេលនេះ គឺទៅតាមរដូវកាល និងវិបត្តិសេដ្ឋកិច្ចជាសកល ក៏ប៉ុន្តែ មគ្គទេសក៍នាំភ្ញៀវនៅតំបន់ទេសចរណ៍ ក្នុងខេត្តសៀមរាប លើកឡើងថា បញ្ហានេះ គឺបណ្ដាលមករដ្ឋាភិបាលខ្វះការផ្សព្វផ្សាយលើកកម្ពស់វិស័យទេសចរណ៍ សេវាកម្មនៅព្រលានយន្តហោះមិនសូវល្អ និងរឿងអាស្រូវ ពាក់ព័ន្ធនឹងឧក្រិដ្ឋកម្មឆបោកតាមអ៊ីនធឺណិត នៅលើទឹកដីកម្ពុជា។
វិស័យទេសចរណ៍ ដែលជាឧស្សាហកម្មគ្មានផ្សែង គឺជាប្រភពដ៏សំខាន់មួយ សម្រាប់កំណើនសេដ្ឋកិច្ចកម្ពុជា។ ក៏ប៉ុន្តែ ក្រោយការថមថយនៃការរីករាលដាលជំងឺកូវីដ១៩ វិស័យទេសចរណ៍របស់កម្ពុជា ហាក់នៅតែដើរយឺតជាងប្រទេសក្នុងតំបន់មួយចំនួន ទោះបីកម្ពុជាបានសាងសង់ព្រលានយន្តហោះអន្តរជាតិថ្មីមួយបន្ថែមទៀត នៅខេត្តសៀមរាប ក្ដី។ ប្រឈមនឹងបញ្ហានេះ រដ្ឋាភិបាលនៅតែបន្តដាក់បន្ទុកលើវិបត្តិសេដ្ឋកិច្ច ខណៈអ្នកធ្វើការក្នុងវិស័យទេសចរណ៍លើកឡើងថា គឺមកពីរដ្ឋាភិបាលទៅវិញទេ ដែលខ្វះយុទ្ធសាស្ត្រធ្វើទីផ្សារ ដើម្បីទាក់ទាញភ្ញៀវអន្តរជាតិ។
មគ្គទេសក៍ភាសាអង់គ្លេស លោក តុង ហាន ប្រាប់វិទ្យុអាស៊ីសេរី ថា មូលហេតុដែលវិស័យទេសចរណ៍របស់កម្ពុជា ចាញ់ប្រៀបប្រទេសជិតខាង ដោយសារ រដ្ឋាភិបាលនៅមិនទាន់ហ៊ានចំណាយលើការផ្សព្វផ្សាយពាណិជ្ជកម្មអំពីទេសចរណ៍កម្ពុជា ទៅកាន់គោលដៅសំខាន់ៗ ដូចជានៅទីប្រជុំជន Time Square ក្នុងសហរដ្ឋអាមេរិក ការផ្សព្វផ្សាយនៅតាមនិវេសនដ្ឋាន ស្ថានទូតកម្ពុជានៅក្រៅប្រទេស ឬចុះលើទស្សនាវដ្ដីល្បីៗ ដូចជា Bloomberg ខណៈប្រទេសជិតខាងកម្ពុជា កំពុងបង្កើនការផ្សព្វផ្សាយតាមវិធីនេះ។
លោក តុង ហាន៖ «ឧបមាថា ខ្ញុំចង់ធ្វើពិព័រណ៍មួយអំពីទេសចរណ៍ ខ្ញុំមិនមែនមកធ្វើនៅជិតព្រះអង្គចេក ព្រះអង្គចម ក្រុងសៀមរាបនេះទេ។ យើងគួរធ្វើនៅឯណា ឧបមាថា ធ្វើនៅ ញូវយ៉ក (New York) ធ្វើនៅឯណាឯណី យើងមានស្ថានទូតយើងនៅគ្រប់កន្លែង យើងអាចធ្វើបានតើ។ ផ្សព្វផ្សាយពីសក្ដានុពលរបស់យើង។ យើងមានផលិតផលអីខ្លះ ជាពិសេសម្ហូបអាហារ និងរូបភាពផ្សេងៗ អាចហ្វ្រី (Free) បាន ក៏ហ្វ្រី (Free) ឱ្យជនបរទេស ឱ្យគេភ្លក់ ឱ្យគេហូប មិនបាច់គិតរឿងលុយទេ ព្រោះយើងមិនមែននៅក្រឯណា។ កាលណាទេសចរដិតដាម មកដល់ស្រុកយើងគេ គេដឹងច្រើនអីច្រើន យើងអាចមានឱកាស»។
កម្ពុជាមានប្រាសាទដែលមានរូបរាងជិត ៦រយប្រាសាទ(៥៨២ ប្រាសាទ) ក្នុងនោះខេត្តសៀមរាប មានប្រាសាទបុរាណដែលនៅសល់រូបរាងច្រើនជាងគេ គឺមានចំនួន ២២០ប្រាសាទ។ បន្ថែមពីលើនេះ ខេត្តសៀមរាប ដែលជាអតីតរាជធានីនៃអាណាចក្រខ្មែរ មានទាំងតំបន់ទេសចរធម្មជាតិ និងវប្បធម៌ជាច្រើនទៀត ដែលធ្វើឱ្យខេត្តសៀមរាប ក្លាយជាតំបន់ប៉ូលទេសចរ ដ៏សំខាន់ជាងគេ របស់កម្ពុជា។ ទោះបីជាមានសក្ដានុពលយ៉ាងណាក្ដី ក៏មកដល់ពេលនេះ វិស័យទេសចរណ៍របស់ខេត្តសៀមរាប ហាក់បន្តស្ថិតក្នុងសភាពទ្រុឌទ្រោម ខណៈប្រទេសជិតខាង កាន់តែទទួលបានកំណើនភ្ញៀវទេសចរណ៍ ជាបន្តបន្ទាប់។
មគ្គទេសក៍ភាសាអង់គ្លេស នៅតំបន់អង្គរ លោក ង៉ែន ប៊ុនលឹម ប្រាប់ថា ការធ្លាក់ចុះចំនួនភ្ញៀវទេសចរ មកលេងនៅខេត្តសៀមរាប បណ្ដាលមកពីការធ្វើទីផ្សារទាក់ទាញភ្ញៀវរបស់កម្ពុជា មិនសូវល្អ និងរឿងអាស្រូវពាក់ព័ន្ធនឹងឧក្រិដ្ឋកម្មឆបោកតាមអ៊ីនធឺណិត និងការជួញដូរមនុស្ស នៅលើទឹកដីកម្ពុជា។ លោកពន្យល់ថា ចំនួនភ្ញៀវទេសចរ គឺមិនអាស្រ័យទៅលើរដូវកាល ដែលគេហៅថា Low season នោះទេ។ ជាក់ស្ដែងនៅអំឡុងខែកក្កដា នេះ មានតែភ្ញៀវអឺរ៉ុប និយាយភាសាអង់គ្លេស មួយប៉ុណ្ណោះ ដែលថយចុះ ក៏ប៉ុន្តែ ចំពោះភ្ញៀវជនជាតិអេស្ប៉ាញ (Spain) និងអាស៊ី ជាច្រើនទៀត មានដូចជា ចិន(China) កូរ៉េ(South Korea) និងជប៉ុន(Japan) ជាដើម គឺពួកគេនៅតែធ្វើដំណើរកម្សាន្តជាធម្មតា។
លោក ង៉ែន ប៊ុនលឹម៖ «ច្រកចេញចូលព្រំដែន ធ្វើវីសាយ៉ាប់ ធ្វើឱ្យភ្ញៀវពិបាក។ ព្រលានយន្តហោះយើងក៏ថ្លៃជាងគេ សំបុត្រយន្តហោះយើង ក៏ថ្ងៃជាងគេ ការផ្សព្វផ្សាយយើង ដូចជាមិនសូវធំទូលាយ។ ខ្ញុំតែងសុំកម្មវិធីភ្ញៀវមើល ភ្ញៀវគេទៅលេងវៀតណាម ដល់ទៅពីរសប្ដាហ៍ ហើយមកលេងខ្មែរយើងតែបីថ្ងៃ។ ហើយដល់ពេលមកលេងនៅខ្មែរបីថ្ងៃ ភ្ញៀវគេឆ្ងល់ គេសួរថា ខ្មែរសម្បូរកន្លែងដើរ តែហេតុអី ធួរ(ក្រុមហ៊ុនទេសចរណ៍ Tourist) រៀបចំកម្មវិធី គេរៀបចំឱ្យដើរលេងនៅវៀតណាមយូរម្ល៉េះ ហេតុអីមិនឱ្យមកខ្មែរ»។
យ៉ាងណាក៏ដោយចុះ កាលពីពេលថ្មីៗនេះ អ្នកលេងបណ្ដាញសង្គមហ្វេសប៊ុកមួយចំនួន បានផ្សព្វផ្សាយថា ព្រលានយន្តហោះថ្មី នៅខេត្តសៀមរាប ដែលមានតម្លៃជាង ១ពាន់លានដុល្លារ ចុងជាក្រោយបែរជាស្ងាត់ឈឹង ហើយថែមទាំងចំណាយលើការធ្វើដំណើររហូតដល់ទៅ ៣០ដុល្លារ និងប្រើពេលយូររហូតដល់ ១ម៉ោង ពីព្រលានយន្តហោះទៅក្រុងសៀមរាប ដែលធ្វើឱ្យភ្ញៀវមានអារម្មណ៍ថាខ្ជះខ្ជាយ។
ពាក់ព័ន្ធនឹងការរិះគន់នេះ អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល លោក ស៊ិន ចាន់សេរីវុត្ថា កាលពីថ្ងៃទី២៩ ខែមិថុនា បានចេញមកច្រានចោល លើការរិះគន់របស់អ្នកលេងបណ្ដាញសង្គម ដោយអះអាងថា ភាពស្ងប់ស្ងាត់នៃភ្ញៀវទេសចរ នៅខេត្តសៀមរាប មិនពាក់ព័ន្ធនឹងព្រលានយន្តហោះទេ ក៏ប៉ុន្តែ គឺដោយសារតែរដូវកាលនេះ គឺជារដូវកាលធ្លាក់ចុះនៃភ្ញៀវទេសចរ (Low Season) បូករួមនឹងស្ថានភាពសេដ្ឋកិច្ចសកល ដែលមិនប្រាកដប្រជាថែមទៀតនោះ បានជះឥទ្ធិពលដល់ការថមថយ នៃភ្ញៀវទេសចរមកកាន់ខេត្តសៀមរាប។
ទោះជាបែបនេះក្ដី មហាជនលើកឡើងថា ការបកស្រាយរបស់មន្ត្រីអាកាសចរស៊ីវិលរូបនេះ មិនសមហេតុផលនោះឡើយ ព្រោះបើប្រៀបធៀបជាមួយប្រទេសជិតខាងដូចជា ថៃ (Thai) និងវៀតណាម(Vietnam) ដែលមិនសូវសម្បូរតំបន់ទេសចរប្រវត្តិសាស្ត្រ ដូចកម្ពុជា ផងនោះ បែរជាមានភ្ញៀវទេសចរមកដើរកម្សាន្តច្រើនទៅវិញ។ ទន្ទឹមគ្នានេះ ពលរដ្ឋថែមទាំងបង្ហាញពីរូបភាពដែលថតដោយផ្កាយរណប បង្ហាញបច្ចុប្បន្នភាពជើងហោះហើររបស់ប្រទេសជិតខាង ដែលមានយន្តហោះ ធ្វើចរាចរនៅពីលើអាកាស ច្រើនជាងកម្ពុជា។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងទេសចរណ៍ លោក តុប សុភ័ក ដើម្បីសុំការបកស្រាយជុំវិញរឿងនេះបានទេ នៅថ្ងៃទី២ ខែកក្កដា។
ទាក់ទិនរឿងនេះ ប្រធានសមាគមមគ្គុទ្ទេសក៍អង្គរ លោក ខៀវ ធី មានប្រសាសន៍ថា រដ្ឋាភិបាលគួររៀបចំវិស័យទេសចរណ៍ឱ្យមានភាពទាក់ទាញ ដោយចាប់ផ្ដើមចេញពីការកែសម្រួលវិស័យដឹកជញ្ជូនផ្លូវអាកាស និងពង្រីកទំនាក់ទំនងទីផ្សារជាមួយក្រុមហ៊ុនទេសចរណ៍អន្តរជាតិ ដើម្បីស្នើដាក់បញ្ចូលកម្ពុជា ទៅក្នុងកម្មវិធីដំណើរកម្សាន្ត។ លោកបន្តថា កត្តាសំខាន់មួយទៀត ដើម្បីទាក់ទាញភ្ញៀវទេសចរណ៍នោះគឺ ការសម្រួលតម្លៃវីសា សម្រាប់កញ្ចប់ទេសចរណ៍ ដែលមានរយៈពេលវែង ឬអ្នកដែលមកកម្សាន្តជាលក្ខណៈគ្រួសារ ឬជាក្រុម។
លោក ខៀវ ធី៖ «អ្វីដែលទាក់ទងនឹងព្រលានយន្តហោះ រដ្ឋាភិបាលគួរតែបញ្ចុះតម្លៃការយកពន្ធដែលយន្តហោះចត។ កាលណា(យន្តហោះ)ចុះចត យើងគួរបញ្ចុះតម្លៃឱ្យថោកបន្តិចទៅ។ កាលណាតម្លៃយកពន្ធនៅប្រលានថោកបន្តិចទៅ ក្រុមហ៊ុនអាកាសចរណ៍លក់សំបុត្រថោកដែរ។ អ៊ីចឹងមានភ្ញៀវមួយចំនួនធំគាត់បាននិយាយថា យន្តហោះមកលេងស្រុកខ្មែរវាថ្លៃ។ វាថ្លៃដោយសារយើងពិបាកយកយន្តហោះ ហោះត្រង់(Direct Flight) អ៊ីចឹងបានស្រុកយើងតជើង(យន្តហោះ)ច្រើនកន្លែង»។
របាយការណ៍ក្រសួងទេសចរណ៍ ចេញផ្សាយកាលពីខែមេសា បង្ហាញថា កម្ពុជាទទួលភ្ញៀវទេសចរអន្តរជាតិចំនួនជាង ១លាន ៥សែននាក់(១,៥៨ លាននាក់) នៅក្នុងត្រីមាសទី១ ឆ្នាំ២០២៤ កើនឡើង ២២,៥ ភាគរយ ពីចំនួនជិត ១លាន ៣សែននាក់ (១,២៩ លាននាក់) ក្នុងអំឡុងពេលដូចគ្នាក្នុងឆ្នាំ២០២៣។ របាយការណ៍បញ្ជាក់ថា ប្រទេសថៃ គឺជាទីផ្សារទេសចរណ៍ដ៏ធំបំផុតរបស់កម្ពុជា ក្នុងអំឡុងពេលនេះ ដែលមានភ្ញៀវទេសចរ ចំនួនជិតកន្លះលាននាក់ (៤៤៩,៧៨១នាក់)។
ទន្ទឹមគ្នានេះ លោកនាយករដ្ឋមន្ត្រី ហ៊ុន ម៉ាណែត កាលពីពេលថ្មីៗនេះ បានប្រកាសអបអរសាទរ ចំពោះប្រាសាទអង្គរវត្ត ដែលបានជាប់ចំណាត់ថ្នាក់ទី១២ ជាគោលដៅទាក់ទាញទេសចរណ៍ល្អបំផុតលើពិភពលោក ពីកម្មវិធីពានរង្វាន់ Traveler Choice Awards របស់គេហទំព័រ ទ្រីបអេដវ៉ាយស័រ (TripAdvisor)។
ផ្ទុយពីរបាយការណ៍ និងមោទនភាពរបស់មេដឹកនាំ ពលរដ្ឋប្រកបរបរ ក្នុងវិស័យទេសចរណ៍នៅខេត្តសៀមរាប លើកឡើងថា របាយការណ៍វាយតម្លៃពីចំនួនភ្ញៀវទេសចរណ៍ របស់រដ្ឋាភិបាល គឺមិនដែលអន់ម្ដងណាឡើយ ប៉ុន្តែបើក្រឡេកមើលពីទិដ្ឋភាពជាក់ស្ដែងវិញ ពួកគាត់សឹងតែដាច់បាយទៅហើយ បន្ទាប់ពីពិធីបុណ្យចូលឆ្នាំខ្មែរបានកន្លងផុតទៅ ភ្ញៀវទេសចរមកពីបរទេស ដែលមកលេងខេត្តសៀមរាប ហាក់ធ្លាក់ចុះជាបន្តបន្ទាប់ រហូតដល់អាហារដ្ឋាន ភោជនីយដ្ឋាន សណ្ឋាគារ ផ្ទះសំណាក់ និងផ្សារទំនើបមួយចំនួន បានក្ស័យធន និងបិទទ្វារបន្តគ្នាទៅហើយ។
ជាក់ស្ដែង កាលពីថ្ងៃទី១ ខែកក្កដា ហាងលក់សាច់អាំងតារានី នៅខេត្តសៀមរាប បានប្រកាសបិទទ្វារ ដោយសាររដ្ឋតម្រូវឱ្យបង់ពន្ធលើតម្លៃបន្ថែម(VAT)ចំនួន ១០ភាគរយ ដែលធ្វើឱ្យអតិថិជនមិនពេញចិត្ត និងឈប់ចូលបរិភោគជាបន្តបន្ទាប់ ខណៈខេត្តសៀមរាប កាន់តែស្ងាត់ភ្ញៀវទេសចរជាងមុន។
មគ្គទេសក៍ទេសចរណ៍នៅខេត្តសៀមរាប ជំរុញឱ្យរដ្ឋាភិបាល អភិវឌ្ឍវិស័យទេសចរណ៍បន្ថែមទៀត ដើម្បីស្រូបទាញភ្ញៀវទេសចរ ឱ្យមកទស្សនាកម្ពុជា ឡើងវិញ។ ជាមួយគ្នានេះ ពួកគាត់លើកឡើងថា ដើម្បីពង្រីកវិស័យទេសចរណ៍នេះបាន រដ្ឋាភិបាលត្រូវចេះទទួលស្គាល់ភាពកម្សោយរបស់ខ្លួន និងរកវិធីដោះស្រាយ ជាជាងការចេញផ្សាយតែតួលេខខ្ពស់ ដែលខុសពីការពិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់