សហជីព​មិន​ជឿ​របាយការណ៍​ក្រសួង​ដែល​ថា ភ្ញៀវ​ទេសចរ​កើន​ឡើង

ដោយ ទីន ហ្សាការីយ៉ា
2020-06-26
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​ទេសចរណ៍ លោក ថោង ខុន (ឆ្វេង) និង​អ្នក​តំណាង​រាស្ត្រ​មក​ពី​គណបក្ស​សង្គ្រោះ​ជាតិ លោក យ៉ែម បុញ្ញឫទ្ធិ (ស្តាំ) ផ្ដល់​បទសម្ភាសន៍​ដល់​អ្នក​កាសែត កាល​ពី​ថ្ងៃ​ទី​១៩ ខែ​វិច្ឆិកា ឆ្នាំ​២០១៤។
រដ្ឋមន្ត្រី​ក្រសួង​ទេសចរណ៍ លោក ថោង ខុន (ឆ្វេង) និង​អ្នក​តំណាង​រាស្ត្រ​មក​ពី​គណបក្ស​សង្គ្រោះ​ជាតិ លោក យ៉ែម បុញ្ញឫទ្ធិ (ស្តាំ) ផ្ដល់​បទសម្ភាសន៍​ដល់​អ្នក​កាសែត កាល​ពី​ថ្ងៃ​ទី​១៩ ខែ​វិច្ឆិកា ឆ្នាំ​២០១៤។
RFA

សហជីព និង​អ្នកធ្វើការ​ផ្នែក​ទេសចរណ៍​ច្រាន​ចោល​ការ​លើក​ឡើង​របស់​ក្រសួង​ទេសចរណ៍ ដែល​ថា ចំនួន​ភ្ញៀវ​ទេសចរ​នៅ​ខែ​មិថុនា​នេះ កើន​ឡើង​ជាង​ខែ​ឧសភា។ ពួកគេ​ថា របាយការណ៍​បែបនេះ ធ្វើ​ឱ្យ​ពលរដ្ឋ​បាត់​ជំនឿ​លើ​ក្រសួងទេសចរណ៍។

ប្រធាន​សហព័ន្ធ​សហជីព​វិស័យ​ទេសចរណ៍ និង​សេវាកម្ម​កម្ពុជា លោក ម៉ម រិទ្ធី ថ្លែង​ថា លោក​មិន​ដឹង​ខាង​ក្រសួង​ទេសចរណ៍ បាន​ទិន្នន័យ​កំណើន​ភ្ញៀវ​ទេសចរណ៍​មក​ពី​ណា​នោះ​ទេ ព្រោះ​ប្រជាពលរដ្ឋ​ខ្មែរ​ភាគច្រើន​កំពុង​ព្រួយបារម្ភ​រឿង​គ្មាន​ប្រាក់​សម្រាប់​ផ្គត់ផ្គង់​គ្រួសារ ស្រប​ពេល​អ្នកខ្លះ​ទៀត​បាន​បាត់បង់​ការងារ​ធ្វើជា​បន្តបន្ទាប់ ហើយ​ស្ថានភាព​ជំងឺ កូវីដ​១៩ ក៏​មិនទាន់​ធូរស្បើយ​ស្រួលបួល​នៅ​ឡើយ​ដែរ។

លោក ម៉ម រិទ្ធី សង្កេត​ឃើញ​ថា សណ្ឋាគារ​ធំៗ និង​សេវាកម្ម​ទាំងឡាយ​ដែល​បម្រើ​ឱ្យ​វិស័យ​ទេសចរណ៍​នៅ​មិនទាន់​បើក​ដំណើរការ​នៅឡើយ​ទេ ពោល​គឺ​មានតែ​ផ្ទះសំណាក់​ប៉ុណ្ណោះ ដែល​បើក​ទទួល​ភ្ញៀវ ហើយ​មាន​ភ្ញៀវ​ខ្មែរ ចេញ ចូល តិចតួច​ប៉ុណ្ណោះ​។ រីឯ​មគ្គុទ្ទេសក៍​មួយ​ចំនួន​ធំ​វិញ លោក​ថា ពួកគេ​បាន​ទៅ​ប្រកបមុខរបរ​ផ្សេងៗ អស់ហើយ​ដើម្បី​ចិញ្ចឹមជីវិត​។ លោក​ថា របាយការណ៍​របស់​ក្រសួង​ទេសចរណ៍​ពេល​នេះ មិន​អាច​យក​ជា​ការ​បាន​ទេ៖ «របាយការណ៍ គួរតែ​តម្លាភាព ចេះតែ​យក​របាយការណ៍​យក​មក​ដាក់​និយាយ​បំប៉ោង ឬមួយ​ក៏​និយាយ​ដើម្បី​ឱ្យ​ល្អ ខ្ញុំ​គិត​ថា មិន​គួរ​ជា​របាយការណ៍​យក​មក​ផ្សព្វផ្សាយ​ទេ ហើយ​ធម្មតា​ឥឡូវ ថ្មើរ​នេះ​គឺ​មនុស្ស​គេ​មាន​ប្រព័ន្ធ​ស្មាតហ្វូន គេ​ទំនើបៗ​ណាស់ គេ​អាច​មើល​ឃើញ គេ​ដើរ​ទៅ​ណា​ក៏​អាច​មើល​ឃើញ​ដែរ អ៊ីចឹង​ណា ខ្ញុំ​គិត​ថា​របាយការណ៍ ហ្នឹង​ខ្ញុំ​មិនទាន់​យល់​ស្រប​មួយ​រយ​ភាគរយ​ថា វា​ជា​រឿង​ត្រឹមត្រូវ​ទេ ថា​អាច​មាន​អីចឹង តាម​ការ​មើល​ឃើញ​របស់​ខ្ញុំ»

ប្រតិកម្ម​នេះ​កើតមាន បន្ទាប់ពី​រដ្ឋមន្ត្រី​ក្រសួង​ទេសចរណ៍ លោក ថោង ខុន អះអាង​នៅ​ពេល​ថ្មីៗ​នេះ ក្នុង​រយៈពេល​បី​សប្ដាហ៍​នៃ​ខែ​មិថុនា មាន​ភ្ញៀវ​ទេសចរ​ជាង ៤៥ ម៉ឺន​នាក់ បាន​ចេញ​ដើរ​កម្សាន្ត គឺ​កើន​ឡើង​ជាង​៧% (.២៤%) បើ​ធៀប​នឹង​រយៈពេល ៣​សប្ដាហ៍ នៃ​ខែ​ឧសភា កន្លង​ទៅ។

លោក ថោង ខុន អះអាង​ទៀត​ថា តំបន់​ឆ្នេរ ពិសេស​ខេត្ត​កំពត និង​ក្រុងកែប នៅតែ​ជា​គោលដៅ​ទេសចរណ៍​សំខាន់ ដែល​បាន​ទាក់ទាញ​ភ្ញៀវ​ទេសចរ​ច្រើន ចំណែក​ឯ​ខេត្ត​សៀមរាប មានការ​ងើប​ឡើងជា​បណ្តើរៗ ហើយ​អាជីវកម្ម​ទេសចរណ៍​មួយ​ចំនួន ពិសេស​សណ្ឋាគារ ផ្ទះសំណាក់ និង​ភោជនីយដ្ឋាន បាន​បើក​ដំណើរការ​អាជីវកម្ម​ឡើងវិញ​ជា​ធម្មតា។

ផ្ទុយ​ពី​ការ​លើកឡើង​នេះ ប្រធាន​សមាគម​មគ្គុទ្ទេសក៍​អង្គរ លោក ខៀវ ធី អះអាង​ថា អ្នក​ប្រកប​របរ​នៅ​ជុំវិញ​តំបន់​អង្គរ ដូចជា អ្នកលក់​វត្ថុ​អនុស្សាវរីយ៍ អ្នក​រត់​ម៉ូតូ​កង់​បី តាក់ស៊ី និង​ឡាន​ទេសចរណ៍ ជាដើម បាន​បាត់បង់​ការងារ​រយៈ​បី​ខែ​មក ហើយ​ពួកគាត់​បាន​រក​ការងារ​ធ្វើ​បណ្ដោះអាសន្ន សម្រាប់​ចិញ្ចឹម​ឆ្នាំង​រៀងខ្លួន ដោយ​មិនទាន់​មាន​អ្នកណា​វិល​មក​រក​មុខរបរ​ដើម​វិញ​នៅ​ឡើយ​ទេ៖ «អត់​ដោយឡែក​មគ្គុទ្ទេសក៍ ទេសចរ អត់​មាន​ចំណូល​ទាំងស្រុង ចំណូល​គិត​ទេ​ហ្សេរូ () ។ លុយ​ដែល​សល់​ពីមុន​បន្តិចបន្តួច ចេះតែ​ចាយ​បន្តិចបន្តួច​ទៅ​ណា ហើយ​ចេះតែ​រក​ខ្លះ​ទៅ អត់​មាន​ការងារ​ធ្វើ ខ្លះ​ទៅ​បង់​ត្រី ខ្លះ​ទៅ​ធ្វើការ​សំណង់ ខ្លះ​ក៏​ចាប់ផ្ដើម​មុខរបរ​ចិញ្ចឹម​មាន់ ចិញ្ចឹម​ទា​។ ខ្ញុំ​នៅផ្ទះ ហើយ​ចាប់ផ្ដើម​ចិញ្ចឹម​មាន់​ខ្លះៗ ដែរ ទិញ​មាន់​មក​ចិញ្ចឹម​បង្កាត់​ពូជ​វា បាទ»

សហជីព​ផ្នែក​វិស័យ​ទេសចរណ៍​យល់ថា ដើម្បី​ស្ដារ​វិស័យ​ទេសចរណ៍ ឱ្យ​ងើបឡើង​ដូចដើម​វិញ​បាន កម្ពុជា​ត្រូវ​ប្រើ​រយៈពេល​ប្រហែលជា​២​ឆ្នាំ ព្រោះ​កម្ពុជា​ជា​ប្រទេស​ក្រីក្រ ខ្វះ​ធនធាន​នៅឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល