ពលរដ្ឋរស់នៅក្នុងឃុំចំនួន០៣ ក្នុងស្រុកស្វាយជ្រំខេត្តស្វាយរៀងរអ៊ូរទាំ ផ្លូវថ្នល់គ្មានគុណភាព នៅតែជាបញ្ហាដដែលៗគ្មានដំណោះស្រាយនៅឡើយទេ។ អ្នកភូមិបារម្ភថា បញ្ហានេះអ្នកដែលរងគ្រោះញឹកញាប់ដោយសារគ្រោះថ្នាក់ចរាចរណ៍ គឺសិស្សានុសិស្ស។
ផ្លូវលំមួយខ្សែក្រាលកៅស៊ូមានប្រវែងជាង ២០ គីឡូម៉ែត្រចាប់ពីខ្លោងទ្វារវត្តក្រោលគោ ជាប់ផ្លូវជាតិលេខ០១ ក្នុងឃុំក្រោលគោ ឆ្ពោះទៅកាន់ឃុំឈើទាល និងឃុំគ្រួស ស្រុកស្វាយជ្រំ កៀកព្រំដែនកម្ពុជា-វៀតណាមកំពុងប្រឈមការខូចជាបណ្តើរៗ ខណៈអាជ្ញាធរទើបនឹងសាងសង់រួចរាល់មិនទាន់បានប៉ុន្មានខែផង។
ពលរដ្ឋរស់នៅអមសាងខាងផ្លូវ ក្នុងឃុំឈើទាល លោក ជា គា ប្រាប់វិទ្យុអាស៊ីសេរីនៅថ្ងៃទី ១៣ សីហាថា ផ្លូវគ្មានគុណភាពបែបនេះ ងាយនឹងបង្កគ្រោះថ្នាក់ចរាចរណ៍ញឹកញាប់ដល់អ្នកដំណើរ ព្រោះមានជង្ហុកច្រើន ដាច់ជាកង់ៗ។ លោកសង្កេតឃើញថា អាជ្ញាធរកសាងផ្លូវ ប្រើប្រាស់បានតែ ក្នុងរយៈពេលខ្លីប៉ុណ្ណោះ ឬយ៉ាងហោចណាស់ក្នុងមួយឆ្នាំត្រូវធ្វើឡើងវិញម្តងទៀត។
លោក ជា គា៖ «ពិបាកដែរផ្លូវរហូតតាំងពីក្រោលគោមកគឺមានជង្ហុកទាំងអស់ គេធ្វើរាល់ឆ្នាំហើយធ្វើមិនដែលទំនេរទេផ្លូវហ្នឹងរាល់ឆ្នាំអត់ខាត ងាកៗខូចអ្នកខូចអ៊ីចឹង»។
ពលរដ្ឋម្នាក់ទៀតរស់នៅឃុំគ្រួស ថ្លែងសុំមិនបញ្ចេញឈ្មោះព្រោះបារម្ភពីសុវត្ថិភាព ប្រាប់វិទ្យុអាស៊ីសេរីថា ពលរដ្ឋជាច្រើនពាន់គ្រួសារ រស់នៅតាមបណ្តោយដងផ្លូវនេះ ក្នុងឃុំចំនួន៣ នៃស្រុកស្វាយជ្រំ បានចាត់ទុកផ្លូវមួយខ្សែនេះ ជាសរសៃឈាមសេដ្ឋកិច្ចយ៉ាងសំខាន់ ក៏ប៉ុន្តែគុណភាពផ្លូវមិនបានឆ្លើយតបនឹងតម្រូវការចាំរបស់របស់ពលរដ្ឋនៅឡើយទេ។ លោកអំពាវនាវឱ្យរដ្ឋាភិបាល កសាងផ្លូវនេះមានគុណភាព គ្មានអំពើពុករលួយ និងទទួលយកមតិយោបល់ ពីពលរដ្ឋចូលរួមកែលម្អលើគម្រោងអភិវឌ្ឍន៍នេះ។
ពលរដ្ឋថ្លែងសុំមិនបញ្ចេញឈ្មោះ៖ «ផ្លូវហ្នឹងបើនិយាយទៅវាចេញច្រកព្រំដែន វាផ្លូវចេញចូលរហូតហ្នឹងផ្លូវហ្នឹង ប៉ុន្តែគេធ្វើមិនទាន់បានមួយឆ្នាំស្រួលបួលផងចាប់ផ្ដើមក្រហែងក្រហូង ឥឡូវវារលាយអស់ហើយ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺជុំវិញរឿងនេះពីអភិបាលខេត្តស្វាយរៀង លោក ប៉េង ពោធិ៍សា បាននៅឡើយទេ នៅថ្ងៃទី១៣ និង១៤ សីហា។
ជុំវិញរឿងនេះ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង ថ្លែងថា រដ្ឋាភិបាលគួរតែពិនិត្យករណីនេះឡើងវិញ ដោយកោះហៅមន្ត្រីពាក់ព័ន្ធមកទទួលខុសត្រូវ។ លោកបារម្ភថា ប្រសិនបើរដ្ឋាភិបាលគ្មានវិធានការដោះស្រាយករណីនេះ បញ្ហានេះនឹងបន្តកើតមានដដែលៗ។
លោក យង់ គិមអេង៖ «ស្នើឱ្យប្រជាពលរដ្ឋចូលរួមឱ្យបានច្រើននៅក្នុងដំណើរការធ្វើផ្លូវហ្នឹងគឺ ធ្វើជាភ្នែកជាច្រមុះនិងតាមដានមើលថាការធ្វើនោះគោរពស្តង់ដារឬមិនគោរព ក្នុងនោះអាចរៀបចំជាប្រព័ន្ធឱ្យបានប្រសើរតាំងពីលើរហូតដល់ក្រោមដោយតម្លាភាព ខ្ញុំជឿថា ប្រហែលជាគុណភាពហ្នឹងត្រូវបានកែលម្អជារឿងមួយសំខាន់»។
ច្បាប់ស្តីពីផ្លូវថ្នល់ ឆ្នាំ២០១៤ មាត្រា ៥២ ចែងថា ត្រូវដាក់ទោសទណ្ឌឬពិន័យចំពោះបុគ្គលឬក្រុមហ៊ុនសាងសង់ផ្លូវគ្មានបច្ចេកទេសព្រមទាំងបុគ្គលធ្វើឱ្យប៉ះពាល់ឬខូចខាតផ្លូវថ្នល់។ ប៉ុន្តែមន្ត្រីសង្គមស៊ីវិលមើលឃើញថា ច្បាប់នេះ មិនទាន់ឃើញរដ្ឋាភិបាលយកមកអនុវត្តនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។