អូស្ត្រាលី​ឱ្យ​ប្រព័ន្ធ​ធារាសាស្ត្រ​​៤​ខ្សែ​​តម្លៃ​៧​លាន​ដុល្លារ​ដល់​ខេត្ត​ព្រៃវែង​ដែល​ជួប​គ្រោះ​រាំងស្ងួត

ដោយ ហេង រស្មី
2019-02-28
អ៊ីម៉ែល
មតិ
Share
បោះពុម្ព
កសិករ​ប្រើ​ម៉ាស៊ីន​បូម​ទឹក​បញ្ចូល​ស្រែ​ប្រាំង​​ពី​ប្រឡាយ​ដែល​ស្ងួត​ទឹក​អស់ ស្ថិត​នៅ​ខាង​កើត​ខេត្ត​ព្រៃវែង កាលពី​ឆ្នាំ​កន្លង​ទៅ។
កសិករ​ប្រើ​ម៉ាស៊ីន​បូម​ទឹក​បញ្ចូល​ស្រែ​ប្រាំង​​ពី​ប្រឡាយ​ដែល​ស្ងួត​ទឹក​អស់ ស្ថិត​នៅ​ខាង​កើត​ខេត្ត​ព្រៃវែង កាលពី​ឆ្នាំ​កន្លង​ទៅ។
Photo: RFA

ស្ថានទូត​អូស្ត្រាលី​ប្រកាស​ជា​ផ្លូវការ​ផ្ដល់​ជូន​ប្រព័ន្ធ​ធារាសាស្ត្រ​ចំនួន ៤​ខ្សែ ដែល​មាន​តម្លៃ ៧ លាន​ដុល្លារ ដល់​សហគមន៍​នានា​ក្នុង​ខេត្ត​ព្រៃវែង ក្នុង​ខណៈ​ដែល​ខេត្ត​នេះ​កំពុង​ជួប​ប្រទះ​នូវ​​គ្រោះ​រាំង​ស្ងួត​ក្នុង​ឆ្នាំ​នេះ។

នៅ​ក្នុង​សេចក្ដី​ប្រកាស​ព័ត៌មាន​របស់​ស្ថានទូត​អូស្ត្រាលី​ដែល​អាស៊ីសេរី​ទទួល​បាន ឱ្យ​ដឹង​ថា ប្រព័ន្ធ​ធារាសាស្ត្រ​ទាំង​បួន​ខ្សែ នឹង​ផ្ទល់​ទឹក​ស្រោចស្រព​ពេញ​មួយ​ឆ្នាំ ដល់​កសិករ​ជាង ១.៥០០​គ្រួសារ នៅ​ស្រុក​ព្រះស្តេច ពាមជរ ពាមរក៍ និង​ស្រុក​កំពង់ត្របែក ដែល​អាច​ជួយ​កសិករ​ឱ្យ​ធ្វើស្រែ​បាន​បី​ដង​ក្នុង​មួយ​ឆ្នាំ។

ឯកអគ្គរាជទូត​អូស្ត្រាលី​ប្រចាំ​កម្ពុជា អ្នកស្រី អេនជីឡា ខ័រកូរ៉េន ( Angela Corcoran) បញ្ជាក់​នៅ​ក្នុង​សេចក្ដី​ថ្លែងការណ៍​នោះ​ថា «នេះ​គឺជា​ឧទាហរណ៍​មួយទៀត ដែល​បង្ហាញ​ថា កម្មវិធី​សហប្រតិបត្តិ​ការ​អភិវឌ្ឍ​របស់​រដ្ឋាភិបាល​អូស្ត្រាលី​នៅ​កម្ពុជា ផ្ដល់​នូវ​លទ្ធផល​ប្រកបដោយ​គុណភាព​ខ្ពស់ និង​និរន្តរភាព​សម្រាប់​កសិករ​កម្ពុជា»

អ្នកស្រី​បញ្ជាក់​ថា «អ្នកស្រី​មាន​មោទនភាព​ចំពោះ​ការងារ​របស់​រដ្ឋាភិបាល​អូស្ត្រាលី ក្នុង​ការ​ជួយ​ដល់​គ្រួសារ និង​សហគមន៍​នៅ​តាម​តំបន់​ជនបទ​ក្នុង​ប្រទេស​កម្ពុជា ដើម្បី​បង្កើន​ប្រាក់ចំណូល និង​ត្រៀមខ្លួន​សម្រាប់​បញ្ហា​ប្រឈម​រយៈពេល​វែង ដូចជា​កង្វះ​កម្លាំង​ពលកម្ម និង​ការប្រែប្រួល​អាកាសធាតុ​ជាដើម»

ជំនួយ​របស់​រដ្ឋាភិបាល​អូស្ត្រាលី​ដល់​កសិករ​ខេត្ត​ព្រៃវែង​នេះ​បាន​កើត​ឡើង​តាមរយៈ​កម្មវិធី​ខ្សែ​សង្វាក់​តម្លៃ​កសិកម្ម​កម្ពុជា​ដែល​ហៅ​កាត់​ថា កាវ៉ាក់ (CAVAC)

កាវ៉ាក់​មាន​គោលបំណង​បង្កើន​ផលិតភាព និង​ប្រាក់ចំណូល​ដល់​កសិករ​ខ្នាត​តូច​ព្រមទាំង​ពាណិជ្ជកម្ម វិស័យ​ស្រូវ​អង្ករ និង​ដំណាំ​ផ្សេងៗ តាមរយៈ​ពង្រឹង​ប្រព័ន្ធ​ទីផ្សារ និង​ការ​វិនិយោគ​លើ​ហេដ្ឋារចនាសម្ព័ន្ធ​ធារាសាស្ត្រ។

ចាប់​តាំង​ពី​ឆ្នាំ​២០១០ កាវ៉ាក់ បាន​សាងសង់ និង​កែ​លម្អ​ឡើងវិញ​នូវ​ប្រព័ន្ធ​ធារាសាស្ត្រ ៣០​កន្លែង នៅ​ក្នុង​ខេត្ត​កំពង់ធំ កំពត តាកែវ ព្រៃវែង និង​ខេត្ត​កណ្ដាល។

អាស៊ីសេរី​នៅ​ថ្ងៃ​នេះ មិនទាន់​អាច​ទាក់ទង អ្នកនាំពាក្យ​ក្រសួង​ធនធាន​ទឹក និង​ឧតុនិយម លោក ចាន់ យុត្ថា បានទេ​។ ក៍​ប៉ុន្តែ​កន្លងមក​លោក​ធ្លាប់​ប្រាប់​អាស៊ីសេរី​ថា គ្រោះ​រាំងស្ងួត​ដែល​បណ្ដាល​ឱ្យ​ខ្វះ​ទឹក​ប្រើប្រាស់ បាន​ធ្វើ​ឱ្យ​ប៉ះពាល់​ដល់​ផលដំណាំ​កសិកម្ម និង​ពលរដ្ឋ​ជាង ៥​ម៉ឺន​គ្រួសារ​នៅ​ទូទាំង​ប្រទេស។ លោក​បញ្ជាក់​ថា ខេត្ត​ដែល​ប៉ះពាល់​ខ្លាំង​ជាង​គេ គឺ​ខេត្ត​កំពង់ធំ និង​ខេត្ត​ឧត្តរមានជ័យ ដែល​មាន​រហូត​ជាង ២​ម៉ឺន​គ្រួសារ​។ លោក​បញ្ជាក់​ទៀត​ថា ប្រព័ន្ធ​ធារាសាស្ត្រ​នៅ​កម្ពុជា មិនទាន់​អាច​គ្របដណ្ដប់ និង​មានលទ្ធភាព​ស្រោចស្រព​លើ​ផ្ទៃដី​កសិកម្ម​បាន ១០០% នៅឡើយ​ទេ ជាក់ស្ដែង​បាន​ត្រឹម​ជាង ៥០% ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល