សង្គម​ស៊ីវិល​ខេត្ត​កំពត ​ជំរុញ​​អាជ្ញាធរ​​​​ឱ្យ​ស៊ើប​​អង្កេត និង​ចាត់​​ការ​​មន្ត្រី​ ដែល​ចេញ​ប្លង់​ឲ្យ​ឈ្មួញ​​​ខ័ណ្ឌ​​​សមុទ្រ​លក់ នៅ​​សង្កាត់​ត្រើយ​កោះ​

ដោយ សុ ជីវី
2019-05-21
អ៊ីម៉ែល
មតិ
Share
បោះពុម្ព

សង្គម​ស៊ីវិល​នៅ​ខេត្ត​កំពត ជំរុញ​ឲ្យ​អាជ្ញាធរ​ខេត្ត ​ហ៊ាន​បើក​ការ​ស៊ើប​អង្កេត និង​ចាត់​វិធានការ ​លើ​មន្ត្រី​ដែល​ចេញ​ប្លង់ និង​បើក​ដៃ​ឲ្យ​ឈ្មួញ​ បោះ​បង្គោល​ព្រំ លើ​មាត់​ឆ្នេរ និង​ដែន​សមុទ្រ​លក់។ ការ​ជំរុញ​នេះ ធ្វើ​ឡើង​ក្រោយ​ពេល អាជ្ញាធរ​ខេត្ត​រក​ឃើញ ទីតាំង​ជាក់​ស្ដែង ដែល​មាន​ការ​បោះ​បង្គោល​លក់​ដី​លើ​​ផ្ទៃ​​សមុទ្រ ពិត​មែន គឺ​នៅ​ត្រង់​តំបន់​ភ្នំ​ដូង ក្នុង​សង្កាត់​ត្រើយ​កោះ ក្រុង​កំពត។

អ្នក​អង្កេត​សមាគម​ការពារ​សិទ្ធិ​មនុស្ស​អាដហុក ប្រចាំ​ខេត្ត​កំពត លោក ប៊ី វន្នី យល់​ថា បើ​ទោះ​ការ​បោះ​​បង្គោល​​​ព្រំ​​នៅ​​មាត់​ឆ្នេរ និង​​ក្នុង​ដែន​សមុទ្រ​នោះ នៅ​មិន​ទាន់​មាន​ការ​ចាក់​ដី​បំពេញ ប៉ុន្តែ​នេះ​ជា​ទង្វើ​រំលោភ​យក​ដែន​សមុទ្រ និង​ដី​រដ្ឋ។ លោក​ជឿ​ជាក់​ថា ដី​នោះ មិន​មែន​ពលរដ្ឋ​សាមញ្ញ មាន​លទ្ធភាព​ទេ គឺ​អ្នក​ដែល​មាន​លុយ និង​មាន​អំណាច​ទើប​ អាច​មាន​លទ្ធភាព​ឃុបឃិត ជា​មួយ​អាជ្ញាធរ​ចេញ​ប្លង់​កម្មសិទ្ធិ​ឲ្យ​បាន។

លោក ប៊ី វន្នី បន្ត​ថា ការ​ចុះ​ទៅ​ស៊ើប​អង្កេត​ដល់​ទីតាំង​លក់​ដី​ក្នុង​សមុទ្រ ដោយសារ​​រង​ការ​រិះគន់ ពី​ពលរដ្ឋ​អ្នក​ប្រើ​ប្រាស់​បណ្ដាញ​សង្គម ហ្វេសប៊ុក (facebook) ហើយ​ក្រោយ​ពេល​ចុះ​ទៅ​​ពិនិត្យ​ដល់​ទីតាំង​នោះ​ហើយ អាជ្ញាធរ​គួរ​ពន្យល់​ ពលរដ្ឋ​ឲ្យ​ច្បាស់ ជៀស​វាង​ពលរដ្ឋ​មាន​មន្ទិល​សង្ស័យ​ថា​ អាជ្ញាធរ​បន្ត​នៅ​​ឃុបឃិត​នឹង​ឈ្មួញ​ ទើប​មិន​ព្រម​ចាត់​វិធានការ​ច្បាប់ លើ​បុគ្គល​រំលោភ​ដែន​សមុទ្រ​លក់«ចង់​ឲ្យ​អាជ្ញាធរ​មេត្តា​ពិនិត្យ​មើល​ឡើងវិញ ករណី​បែប​ហ្នឹង​តើ​អ្នក​ណា មន្ត្រី​មួយ​ណា ដែល​ជា​អ្នក​ធ្វើ​ប្លង់​ឲ្យ ហើយ​បើ​សិន​ជា​ធ្វើ​តើ​គាត់​សំអាង​អ្វី ហើយ​បង្ហាញ​មក»

អភិបាល​ខេត្ត​កំពត លោក ជាវ តាយ ប្រាប់​ប្រព័ន្ធ​ឃោសនា​ស្និទ្ធ​របប​ក្រុង​ភ្នំពេញ (freshnews) ថា មន្ត្រី​ជំនាញ​មួយ​ក្រុម បាន​រក​ឃើញ​ទីតាំង​បោះ​បង្គោល​ក្នុង​ដែន​សមុទ្រ​លក់​ហើយ គឺ​ នៅ​ចំណុច​​ភ្នំដូង​ ភូមិ​បឹងតាព្រាម ​សង្កាត់​ត្រើយ​កោះ ក្រុង​កំពត។

អាស៊ី​សេរី​ បាន​ទូរស័ព្ទ​ច្រើន​ដង​ទៅ​អភិបាល​ខេត្ត​កំពត លោក ជាវ តាយ និង​ប្រធាន​មន្ទីរ​ដែនដី ខេត្ត​កំពត លោក យិន វុឌ្ឍ តែ​មិន​ទទួល​ទូរស័ព្ទ នៅ​ថ្ងៃ​ទី​២១ ឧសភា។ តែ​យ៉ាង​ណា អភិបាល​រង​ខេត្ត​កំពត លោក នៃ គង់ ប្រាប់​កាសែត​ក្នុង​ស្រុក​ថា អាជ្ញាធរ​​ត្រូវ​ការ​ពេល​វេលា​​មួយ ឬ​ពីរ​ថ្ងៃ​បន្ថែម​ទៀត ដើម្បី​ប្រមូល​ឯកសារ ខណៈ​អាជ្ញាធរ​រក​ឃើញ​ថា ដី​តំបន់​ក្បែរ​បោះ​បង្គោល​ព្រំ មាន​ប្លង់​កម្មសិទ្ធិ​ត្រឹម​ត្រូវ។

ចំណែក​កាសែត (Phnom Penh Post) វិញ​ បាន​ស្រង់​សំដី​របស់​ប្រធាន​ក្រុមហ៊ុន BLUE STAR REAL ESTATE លោក កែវ សុជាតិ បដិសេធ​ថា ក្រុមហ៊ុន​នេះ មិន​ពាក់ព័ន្ធ​នឹង​ការ​រំលោភ​យក​ដី​នោះ​ទេ គ្រាន់​តែ​ក្រុមហ៊ុន ជួយ​ដាក់​លក់ ប៉ុន្តែ​ក្រោយ​មាន​ការ​​រិះគន់​លោក​បាន​ផ្អាក​ហើយ។

មាត្រា ៥៨ នៃ​រដ្ឋ​ធម្មនុញ្ញ ចែង​ថា ដីធ្លី ធនធាន​ក្រោម​ដី ភ្នំ សមុទ្ទ បាត​សមុទ្ទ ក្រោម​បាត​សមុទ្ទ ឆ្នេរ​សមុទ្ទ អាកាស កោះ ទន្លេ ព្រែក ស្ទឹង បឹង ព្រៃឈើ ធនធានធម្មជាតិ ជាដើម ជា​ទ្រព្យ​សម្បត្តិ​រដ្ឋ។

នេះ​មិន​មែន​ជា​ករណី​ថ្មី​ទេ សម្រាប់​ការ​រំលោភ​យក​ឆ្នេរ និង​ដែន​សមុទ្រ​នៅ​ខេត្ត​កំពត។ ​កន្លង​ មក​​​កើត​មាន​ករណី​បែប​នេះ​ច្រើន​ដង​ ​ដូច​ករណី​​ ចាក់​ដី​រំលោភ​យក​ឆ្នេរ និង​ដែន​​សមុទ្រ​ ទំហំ​ប្រមាណ​២០០​ហិកតារ នៅ​​​ក្នុង​ដែន​សមុទ្រ​ភូមិ​កែប​ថ្មី និង​ភូមិ​ទទឹងថៃ្ង នៃ​ឃុំ​បឹងទូក ស្រុក​ទឹកឈូ តាំង​ពី​​កំឡុង​ឆ្នាំ​២០១០​ មក នៅ​តែ​បន្ត​មាន​ភាព​ចម្រូង​ចម្រាស​ដល់​សព្វ​ថ្ងៃ។

អ្នក​នេសាទ​នៅ​ដែន​សមុទ្រ​ អះអាង​ថា ការ​រំលោភ​យក​ដី​សមុទ្រ​ ហាក់​ជា​ការ​សម្លាប់​អ្នក​នេសាទ ព្រោះ​ដែន​ទឹក​កាន់​តែ​បាត់​បង់ ហើយ​អ្នក​នេសាទ​ត្រូវ​ជិះ​ទូក​វាង​ ដើម្បី​ទៅ​នេសាទ​ក្នុង​សមុទ្រ។

សង្គម​ស៊ីវិល ខេត្ត​កំពត លោក ប៊ី វន្នី យល់​ថា ប្រសិន​បើ​ ​អាជ្ញាធរ​ខេត្ត​កំពត មិន​ចង់​ឲ្យ​រង​ការ​រិះគន់​​ថា បើក​ដៃ ឬ​​ឃុបឃិត​ ជាមួយ​ឈ្មួញ លក់​ដី​សមុទ្រ និង​មាត់​ឆ្នេរ​ត​ទៅ​ទៀត ត្រូវ​ផ្ដន្ទាទោស​តឹងរ៉ឹង​លើ​ករណី​រំលោភ​ដី​សមុទ្រ នៅ​សង្កាត់​ត្រើយ​កោះ ដើម្បី​បង្ហាញ​ជា​គំរូ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល