សហគមន៍​ព្រៃ​ឡង់​៤​ខេត្ត​ចាប់​ផ្ដើម​ចូល​ព្រៃ​ឡង់​ខេត្ត​ស្ទឹងត្រែង​ប្រារព្ធ​ពិធី​រំឭក​គុណ​ព្រៃ​ឈើ

ដោយ ម៉ែន សុធីរ
2017-02-09
អ៊ីម៉ែល
មតិ
Share
បោះពុម្ព
ក្រុម​យុវជន បណ្ដាញ​ព្រះសង្ឃ​ឯករាជ្យ​ដើម្បី​យុត្តិធម៌​សង្គម និង​សកម្មជន​ព្រៃ​ឡង់ ធ្វើ​ដំណើរ​ចូល​ព្រៃ​ឡង់​ខែត្រ​ស្ទឹងត្រែង ដើម្បី​ប្រារព្ធ​ពិធី​រំឭក​គុណ​ព្រៃ នៅ​ព្រឹក​ថ្ងៃ​ទី​៩ ខែ​កុម្ភៈ ឆ្នាំ​២០១៧។ RFA/Men Sothyr
ក្រុម​យុវជន បណ្ដាញ​ព្រះសង្ឃ​ឯករាជ្យ​ដើម្បី​យុត្តិធម៌​សង្គម និង​សកម្មជន​ព្រៃ​ឡង់ ធ្វើ​ដំណើរ​ចូល​ព្រៃ​ឡង់​ខែត្រ​ស្ទឹងត្រែង ដើម្បី​ប្រារព្ធ​ពិធី​រំឭក​គុណ​ព្រៃ នៅ​ព្រឹក​ថ្ងៃ​ទី​៩ ខែ​កុម្ភៈ ឆ្នាំ​២០១៧។ RFA/Men Sothyr
RFA/Men Sothyr

សហគមន៍​ព្រៃ​ឡង់​នៅ​ក្នុង​ខែត្រ​ចំនួន​៤ សរុប​ប្រមាណ​ជាង ៤០០​នាក់ បាន​ចេញ​ដំណើរ​នៅ​ព្រឹក​ថ្ងៃ​ទី​៩ កុម្ភៈ ឆ្ពោះ​ទៅ​កណ្ដាល​ព្រៃ​ឡង់​ចំណុច​វាល​ម្រេង​ទន្សាយ ក្នុង​ទឹក​ដី​ខែត្រ​ស្ទឹងត្រែង ដើម្បី​ប្រារព្ធ​បុណ្យ​រំឭក​គុណ​ព្រៃ​ឡង់ ហើយ​ពួក​គេ​នឹង​វិល​ត្រឡប់​មក​វិញ​នៅ​ថ្ងៃ​ទី​១៤ កុម្ភៈ។ ចំណែក​សហគមន៍​ការពារ​ព្រៃ​ឡង់​ខែត្រ​ស្ទឹងត្រែង មាន​មនុស្ស​ចូលរួម​ប្រមាណ​ជិត ១០០​នាក់។

សហគមន៍​ការពារ​ព្រៃ​ឡង់​ខែត្រ​ស្ទឹងត្រែង បណ្ដាញ​ព្រះសង្ឃ​ឯករាជ្យ និង​ក្រុម​យុវជន​មក​ពី​រាជធានី​ភ្នំពេញ និង​ខែត្រ​កោះកុង បាន​ជួបជុំ​គ្នា​នៅ​ឃុំ​កាំងចាម ស្រុក​ថាឡាបរិវ៉ាត់ ខែត្រ​ស្ទឹងត្រែង ដើម្បី​ធ្វើ​ដំណើរ​ទៅ​ចូលរួម​ពិធី​បុណ្យ​រំឭក​គុណ​ព្រៃ​ឡង់​នៅ​ព្រឹក​ថ្ងៃ​ទី​៩ កុម្ភៈ។

អ្នក​សម្របសម្រួល​បណ្ដាញ​ព្រៃ​ឡង់​ខែត្រ​ស្ទឹងត្រែង លោក ជា សុខហឿន ពន្យល់​ថា ពិធី​បុណ្យ​នេះ​ដើម្បី​ឧទ្ទិស​ដល់​បុព្វបុរស​ខ្មែរ​ឲ្យ​ជួយ​ថែរក្សា​ធម្មជាតិ​នៅ​តំបន់​ព្រៃ​ឡង់​ឲ្យ​គង់វង្ស និង​បំបួស​ដើម​ឈើ​ធំៗ​ទុក​ជា​សញ្ញា​អភិរក្ស ព្រម​ទាំង​ធ្វើ​ពិធី​បែប​សាសនា​សូត្រ​មន្ត​ឧទ្ទិស​កុសល​រំឭក​គុណ​ព្រៃ​ឡង់ ដែល​បាន​ផ្តល់​ប្រយោជន៍​សម្បូរ​បែប​ដល់​សហគមន៍ និង​ជនជាតិ​ដើម​ភាគតិច។

លោក​បន្ថែម​ថា ពិធី​បុណ្យ​នេះ​ក៏​ជា​សកម្មភាព​រួម​ពញ្ញាក់​ស្មារតី​ឲ្យ​មហាជន​ចូលរួម​គាំពារ​សម្បត្តិ​ធម្មជាតិ ដែល​ជា​កាតព្វកិច្ច​យើង​ទាំងអស់​គ្នា។ លោក​ថា សហគមន៍​ព្រៃ​ឡង់​ខែត្រ​ស្ទឹងត្រែង បាន​ចែក​គ្នា​ជា​បី​ក្រុម​ធ្វើ​ដំណើរ​ទៅ​តំបន់​ព្រៃ​ឡង់។ ក្រុម​ទាំងនោះ​មួយ​ផ្នែក​មក​ពី​ស្រុក​សៀមបូក និង​ស្រុក​ថាឡាបរិវ៉ាត់ បាន​ប្រើប្រាស់​គោយន្ត​ជាង ១០​គ្រឿង និង​ម៉ូតូ​ជិត ១០​គ្រឿង៖ «យើង​មាន​ជំនឿ​ក្នុង​ការ​ជួយ​ថែរក្សា​ពី​គាត់ គឺ​យើង​ធ្វើ​ពិធី​បំបួស​ដើម​ឈើ ដើម្បី​កត់​សម្គាល់ ឬ​ទុក​ជា​សញ្ញា​មួយ​ថា ការ​ដែល​យើង​ការពារ​ហ្នឹង​វា​មិន​អាច​ដាច់​ឆ្ងាយ​ពី​ការ​ដែល​យើង​ត្រូវ​តែ​គោរព ត្រូវ​តែ​ធ្វើ​ពិធី​តាម​បែប​សាសនា​ហ្នឹង​ទេ»

អ្នក​សម្របសម្រួល​បណ្ដាញ​ការពារ​ព្រៃ​ឡង់ ខែត្រ​ស្ទឹងត្រែង លោក ជា សុខហឿន ផ្តល់​បទសម្ភាសន៍​ដល់​អាស៊ីសេរី នៅ​ព្រឹក​ថ្ងៃ​ទី​៩ ខែ​កុម្ភៈ ឆ្នាំ​២០១៧។ RFA/Men Sothyr
អ្នក​សម្របសម្រួល​បណ្ដាញ​ការពារ​ព្រៃ​ឡង់ ខែត្រ​ស្ទឹងត្រែង លោក ជា សុខហឿន ផ្តល់​បទសម្ភាសន៍​ដល់​អាស៊ីសេរី នៅ​ព្រឹក​ថ្ងៃ​ទី​៩ ខែ​កុម្ភៈ ឆ្នាំ​២០១៧។ RFA/Men Sothyr RFA/Men Sothyr

លោក ជា សុខហឿន បន្ថែម​ថា សហគមន៍​ព្រៃ​ឡង់​ទាំង​បួន​ខែត្រ នឹង​បន្ត​ជជែក​ពិភាក្សា​គ្នា​រក​យុទ្ធសាស្ត្រ​ទប់ស្កាត់​បទល្មើស​ព្រៃ​ឈើ ខណៈ​វិសាលភាព​ព្រៃ​ឡង់​ធំធេង ដែល​សហគមន៍ មន្ត្រី​ឧទ្យានុរក្ស និង​សមត្ថកិច្ច​ពាក់ព័ន្ធ នៅ​ពុំ​ទាន់​មាន​លទ្ធភាព​គ្រប់គ្រាន់​ទប់ស្កាត់​បទល្មើស​ឲ្យ​មាន​ប្រសិទ្ធភាព​ទេ ពោល​គឺ​ពួក​គេ​អាច​ការពារ​បាន​តែ​មួយ​ជ្រុង។

ព្រៃ​ឡង់​ឋិត​ក្នុង​ចន្លោះ​ខែត្រ​ចំនួន​បួន គឺ​ខែត្រ​ក្រចេះ ស្ទឹងត្រែង ព្រះវិហារ និង​ខែត្រ​កំពង់ធំ ត្រូវ​រដ្ឋាភិបាល​ប្រកាស​បង្កើត​ជា​ដែន​ជម្រក​សត្វ​ព្រៃ​កាល​ពី​ថ្ងៃ​ទី​៩ ខែ​ឧសភា ឆ្នាំ​២០១៦ មាន​ផ្ទៃដី​ជាង ៤៣​ម៉ឺន​ហិកតារ (៤៣១.៦៨៣​ហិកតារ) ដែល​ឋិត​ក្រោម​ការ​គ្រប់គ្រង​របស់​ក្រសួង​បរិស្ថាន។

អនុប្រធាន​បណ្ដាញ​យុវជន​កម្ពុជា (CYN) លោក ស ម៉ូរី ឲ្យ​ដឹង​ថា ក្រុម​យុវជន និង​និស្សិត​ប្រមាណ​ជិត ២០​នាក់ ក្នុង​នោះ​មួយ​ក្រុម​មក​ពី​តំបន់​អារ៉ែង​ខែត្រ​កោះកុង ក៏​ចូលរួម​ពិធី​បុណ្យ​ដ៏​មាន​សារសំខាន់​នេះ បំណង​សិក្សា​ស្វែងយល់​បន្ថែម​ពី​សក្ដានុពល​ព្រៃ​ឡង់ និង​ជីវភាព​រស់នៅ​របស់​ពលរដ្ឋ​នៅ​តំបន់​ព្រៃ​ឡង់។ លើស​ពី​នេះ ក៏​ជា​ការ​បណ្ដុះ​ស្មារតី​ឲ្យ​យុវជន និង​មហាជន​ចេះ​ស្រឡាញ់​ព្រៃ​ឈើ​កាន់​តែ​ខ្លាំង​ឡើង៖ «យើង​ឃើញ​ថា រាជ​រដ្ឋាភិបាល​ក៏​បង្ហាញ​ពី​ឆន្ទៈ​បើក​ឱកាស​ទូលាយ​ដល់​សហគមន៍ ដល់​យុវជន​ការពារ​ព្រៃ​ឈើ​ដែរ។ ខ្ញុំ​គិត​ថា វា​ជា​ឱកាស​មួយ​ដែល​យើង​ផ្ញើ​សារ​ទៅ​រដ្ឋាភិបាល​ក្នុង​នាម​យើង​ជា​ប្រជាពលរដ្ឋ។ យើង​ប្ដេជ្ញា​ចិត្ត​ក្នុង​ការ​ការពារ​ព្រៃ​ឡង់»

សមាជិក​បណ្ដាញ​ព្រះសង្ឃ​ឯករាជ្យ​ដើម្បី​យុត្តិធម៌​សង្គម ព្រះតេជព្រះគុណ អ៊ុន ឡុង មាន​ថេរ​ដីកា​ថា គោល​បំណង​ប្រារព្ធ​ពិធី​បុណ្យ​នេះ ដើម្បី​បង្ហាញ​ឲ្យ​រដ្ឋាភិបាល និង​អង្គការ​សង្គម​ស៊ីវិល រួម​គ្នា​ជួយ​ទប់ស្កាត់​បទល្មើស​ព្រៃ​ឈើ និង​រក​មធ្យោបាយ​អភិរក្ស​បន្ថែម​ឲ្យ​មាន​ប្រសិទ្ធភាព។ ព្រះអង្គ​មាន​ថេរ​ដីកា​បន្ត​ថា ពិធី​បុណ្យ​នេះ​ដើម្បី​ឧទ្ទិស​កុសល​ដល់​បុព្វការី​ជន​ដែល​បន្សល់​ទុក​ធនធាន​ធម្មជាតិ​មាន​តម្លៃ និង​បង្ហាញ​ឲ្យ​សាធារណជន​យល់​ពី​គុណ​តម្លៃ​ការពារ​ធនធាន​ព្រៃ​ឈើ៖ «យើង​ចូលរួម​ការពារ ហើយ​សុំ​បិណ្ឌបាត​ថា ឧកញ៉ា​មួយ​ចំនួន​ល្មម​នឹង​ឆ្អែត​កាប់​បំផ្លាញ​ព្រៃ​ឈើ​ហើយ។ ពលរដ្ឋ​ដែល​ចំណាក​ស្រុក​កាប់​បំផ្លាញ​ព្រៃ​ឈើ​ហ្នឹង សុំ​បិណ្ឌបាត បញ្ឈប់​កាប់​បំផ្លាញ»

សហគមន៍​ព្រៃ​ឡង់​មើល​ឃើញ​ថា បើ​ទោះ​បី​ជា​រដ្ឋាភិបាល​សម្រេច​ដាក់​តំបន់​ព្រៃ​ឡង់​ជា​ដែន​ជម្រក​សត្វ​ព្រៃ​ក្តី ក៏ប៉ុន្តែ​សកម្មភាព​កាប់​ឈើ​មាន​តម្លៃ និង​កាប់​ឈើ​រាន​យក​ដី​ធ្វើ​អាជីវកម្ម នៅ​តែ​បន្ត​កើត​មាន​ដដែល៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល