សហគមន៍​នេសាទ​នៅ​បាត់ដំបង​បារម្ភ​បាត់បង់​ព្រៃ​លិច​ទឹក

ដោយ ហ៊ុំ ចំរើន
2014-12-29
អ៊ីម៉ែល
មតិ
Share
បោះពុម្ព

ប្រជា​សហគមន៍​នេសាទ​ត្រី​នៅ​ឃុំ​ព្រែកនរិន្ទ ស្រុក​ឯកភ្នំ​ ខេត្ត​បាត់ដំបង​ សម្ដែង​ក្ដី​បារម្ភ​ចំពោះ​សកម្មភាព​របស់​ប្រជាពលរដ្ឋ​ដែល​ចូល​ទៅ​កាប់ឆ្ការ​ព្រៃ​លិច​ទឹក​តំបន់​ហាមឃាត់​អស់​រាប់​ហិកតារ​​ធ្វើ​ជា​កម្មសិទ្ធិ ដោយ​ពុំ​មាន​អាជ្ញាធរ​ណា​ទប់ស្កាត់​នៅ​ឡើយ​ទេ។ អ្នក​ភូមិ​បញ្ជាក់​ថា ​សកម្មភាព​នេះ​នៅ​តែ​បន្ត ហើយ​ប្រសិន​បើ​អាជ្ញាធរ​ពុំ​មាន​វិធានការ​ទាន់​ពេល​ទេ​នោះ​ ព្រៃ​ដែល​ជា​ជម្រក​មច្ឆាជាតិ​​តំបន់​នោះ​​នឹង​ហិនហោច​អស់​ក្នុង​រយៈ​ពេល​ដ៏​ខ្លី​ខាង​មុខ។

ប្រជា​សហគមន៍​នេសាទ​ត្រី​នៅ​តំបន់​ឃុំ​ព្រែកនរិន្ទ អំពាវនាវ​ឲ្យ​អភិបាល​ខេត្ត​បាត់ដំបង​ និង​មន្ត្រី​ពាក់ព័ន្ធ​ចាត់​វិធានការ​ទប់​ស្កាត់​ក្រុម​អ្នក​រុករាន​ព្រៃ​លិច​ទឹក​នោះ​ជា​បន្ទាន់ ដើម្បី​រក្សា​ព្រៃ​ដែល​ជា​សម្បត្តិ​ធនធាន​ធម្មជាតិ​របស់​រដ្ឋ ទុក​​ជា​ជម្រក​ត្រី និង​សត្វ​បក្សាបក្សី​រស់​នៅ​ពង​កូន​នៅ​ថ្ងៃ​អនាគត។

ប្រធាន​សហគមន៍​នេសាទ​ត្រី​ភូមិ​ព្រែកត្រប់ ឃុំ​ព្រែកនរិន្ទ ស្រុក​ឯកភ្នំ ខេត្ត​បាត់ដំបង លោក​ អ៊ុន ហាក់ ថ្លែង​ឲ្យ​ដឹង​ថា​ ក្រុម​ប្រជាពលរដ្ឋ​រស់​នៅ​តំបន់​ព្រៃ​លិច​ទឹក​នៃ​ភូមិ​ព្រែកត្រប់ នាំ​គ្នា​សម្រុក​កាប់​បំផ្លាញ​ព្រៃរនាម​ ឬ​ព្រៃលិចទឹក ដែល​ជា​ជម្រក​មច្ឆាជាតិ​នៅ​ចំណុច​ភូមិ​ព្រែក​ត្រប់ ដើម្បី​យក​ដី​ដាំដុះ​ធ្វើ​ជា​កម្មសិទ្ធិ​ដោយ​ខុស​ច្បាប់។

លោក​បញ្ជាក់​ថា​ ព្រៃ​លិច​ទឹក​ដែល​អ្នក​ភូមិ​នាំ​គ្នា​កាប់​ឆ្ការ​នោះ​ធ្វើ​សកម្មភាព​ប្រមាណ ១​ខែ​មក​ហើយ ដែល​មាន​ផ្ទៃដី​​​​ប្រមាណ ១០០​ហិកតារ ហើយ​រហូត​មក​ទប់​ពេល​នេះ​ពួកគេ​នៅ​តែ​បន្ត​ធ្វើ​សកម្មភាព​រុករាន​ដី​ជា​បន្តបន្ទាប់​នៅ​ឡើយ៖ «ខ្ញុំ​ស្នើ​ទៅ​ប្រជាពលរដ្ឋ​គាត់​ថា​បើ​គេ​រុករាន​ព្រៃ​បាន​ពួកគាត់​ក៏​មាន​សិទ្ធិ​ដូច​គ្នា​ដែរ ធ្វើ​ការ​កាប់ឆ្ការ​ព្រៃ​នោះ​ចេះ​តែ​រីក​រាលដាល​ធំ​ឡើយ​បន្តបន្ទាប់។ ចំណែក​អាជ្ញាធរ​ក៏​បាន​ដឹង​រឿង​នេះ​ដែរ​ ថា​ជា​សកម្មភាព​ចាស់​ហើយ​មិន​ចាត់​វិធានការ​ទេ។ សកម្មភាព​នេះ​បើ​អាជ្ញាធរ​នៅ​តែ​មិន​ទប់​ស្កាត់​ទៀត មិន​យូរ​មិន​ឆាប់​ព្រៃ​តំបន់​នោះ​ហ្នឹង​ហិនហោច​គ្មាន​សល់»

លោក​បន្ត​ទៀត​ថា តំបន់​ព្រៃលិចទឹក​ដែល​ប្រជាពលរដ្ឋ​កាប់​ឆ្ការ​នោះ​ ជា​ជម្រក​របស់​មច្ឆាជាតិ​និង​សត្វ​ព្រៃ​លិចទឹក​ជា​ច្រើន​ប្រភេទ​រស់​នៅ ហើយ​ប្រសិន​បើ​បាត់​បង់​ព្រៃ​នោះ​ សត្វ​ទាំង​តូច​ធំ​នឹង​ហិនហោច​អស់​គ្មាន​សល់​ជា​ពុំ​ខាន៖ «បើ​អស់​ព្រៃឈើ​តំបន់​នោះ​ទោ​ នោះ​សត្វ​​ជា​ច្រើន​ប្រភេទ​ដែល​ធ្លាប់​រស់​នៅ​ច្បាស់​ជា​គ្មាន​ទី​ជម្រក​ទៀត​ឡើយ»

សកម្មភាព​​កាប់​ឆ្ការ​ព្រៃ​លិច​ទឹក​នេះ មាន​សភាព​កាន់​តែ​ខ្លាំង​ឡើង​ជា​បន្ត​បន្ទាប់​ ហើយ​ប្រសិន​បើ​អាជ្ញាធរ​នៅ​តែ​បណ្ដោយ​ឲ្យ​បន្ត​ទៅ​មុខ​ទៀត​ ប្រជាពលរដ្ឋ​នៅ​តំបន់​នោះ​​នឹង​មាន​វិវាទ​កើត​ឡើង​ដោយ​សារ​ការ​ដណ្ដើម​ដី​គ្នា​ធ្វើ​ជា​កម្មសិទ្ធិ។

ប្រជាពលរដ្ឋ​នៅ​ភូមិ​ព្រែកត្រប់ ម្នាក់​ទៀត​ ឈ្មោះ​ លោក ហ៊ុត ហាន​ មាន​ប្រសាសន៍​បញ្ជាក់​ថា ប្រជាពលរដ្ឋ​នៅ​តំបន់​ភូមិ ព្រែក​ត្រប់​ជា​ច្រើន​គ្រួសារ​ដែល​ពុំ​បាន​រុករាន​ដី​ធ្វើ​ជា​កម្មសិទ្ធិ​ពួកគាត់​កំពុង​ទន្ទឹង​រង់ចាំ​មើល​វិធាន​ការ​របស់​អាជ្ញាធរ ហើយ​ប្រសិន​សមត្ថកិច្ច​នៅ​តែ​មិន​ទប់​ស្កាត់​ទៀត​ នោះ​ពួកគេ​នឹង​ចេញ​ធ្វើ​សកម្មភាព​កាប់​ឆ្ការ​ព្រៃ​​ក្នុង​ពេល​ឆាប់​ៗ​ខាងមុខ៖ «ដល់​អ៊ីចឹង​ទៅ​ប្រជាពលរដ្ឋ​មួយ​ចំនួន​ដែល​គាត់​បាន​ដី​គាត់​មិន​សុខ​ចិត្ត​នោះ​ទេ​ បើ​ក្រុម​សហគមន៍​ចាស់​ពី​មុន​មក​អាច​ធ្វើ​បាន​ពួកគាត់​ក៏​មាន​សិទ្ធិ​ដូច​គ្នា ហើយ​សហគមន៍​ថ្មី​គាត់​ព្រួយបារម្ភ​ខ្លាច​ដល់​ពេល អ៊ីចឹង​ក្លាយ​ជា​អានាធិបតេយ្យ​គ្មាន​ច្បាប់​ទម្លាប់ ហើយ​កាប់​អស់​ព្រៃ​នោះ​ទៅ។ អ៊ីចឹង​បើ​អាជ្ញាធរ​មិន​ទប់​ស្កាត់​ទេ ព្រៃ​តំបន់​នោះ​ហ្នឹង​ហិនហោច​អស់​គ្មាន​សល់»

លោក​បន្ត​ថា ប្រជាពលរដ្ឋ​ដែល​ស្រលាញ់​ព្រៃឈើ​ព្រម​ទាំង​សហគមន៍​នេសាទ​ត្រី​នៅ​ភូមិ​ព្រែកត្រប់ សម្ដែង​ការ​ខក​ចិត្ត​​យ៉ាង​ខ្លាំង​ចំពោះ​សកម្មភាព​ដែល​កើត​ឡើង​នោះ ហើយ​បាន​នាំ​រឿង​នេះ​ទៅ​ជម្រាប​អាជ្ញាធរ​មូលដ្ឋាន​ឲ្យ​ចាត់​វិធានការ​តាម​ផ្លូវ​ច្បាប់​ដែរ​ ប៉ុន្តែ​សមត្ថកិច្ច​ហាក់​មិន​អើពើ​នោះ​ទេ។

ឆ្លើយ​តប​នឹង​បញ្ហា​នេះ​ អភិបាល​ស្រុក​ឯកភ្នំ​ លោក​ មៀច សុំ មាន​ប្រសាសន៍​បញ្ជាក់​ថា អាជ្ញាធរ​ពុំ​មែន​មិន​ចាត់​វិធានការ​ក្រុម​អ្នក​កាប់​ឆ្ការ​ព្រៃ​លិច​​​នោះ​ទេ​ គឺ​ការ​យឺត​យ៉ាវ​នេះ​ ​ដោយសារ​មន្ត្រី​ថ្នាក់​ក្រោម​មិន​ធ្វើ​របាយការណ៍​មក​ដល់​សាលា​ស្រុក​នៅ​ឡើយ។ ទោះ​ជា​យ៉ាង​នេះ​ លោក​ថា​នឹង​តាម​ដាន​លើ​ការងារ​នេះ​ក្នុង​ពេល​ឆាប់​ៗ​ខាង​មុខ៖ «បើ​មេ​ឃុំ​គាត់​បាន​រាយការណ៍​មក​ឲ្យ​ខ្ញុំ​នោះ​ទេ។ តែ​មិន​អី​ទេ ចាំ​ខ្ញុំ​ស្រាវជ្រាវ​មើល​បន្ត​ទៀត»

ទាក់​ទង​នឹង​បញ្ហា​នេះ​ដែរ​ មន្ត្រី​សម្របសម្រួល​អង្គការ​អាដហុក (Adhoc) ខេត្ត​បាត់ដំបង​ លោក​ យិន​ ម៉េងលី មាន​ប្រសាសន៍​ថា​ ដី​ព្រៃ​លិចទឹក​នៅ​តំបន់​ដែល​ប្រជាពលរដ្ឋ​រុករាន​នោះ​ ជា​ដី​ព្រៃ​តំបន់​ហាមឃាត់ មិន​អាច​​ជន​ណា​​ម្នាក់​ទៅ​កាប់ឆ្ការ​យក​ដី​​ធ្វើ​ជា​កម្មសិទ្ធិ​បាន​នោះ​ទេ បើ​ទោះ​ក្នុង​រូប​ភាព​ណា​ក៏ដោយ។

លោក​ថា​ ការ​ទៅ​កាប់​ឆ្ការព្រៃ​នោះ​​ធ្វើ​ជា​កម្មសិទ្ធិ​ជា​អំពើ​ខុស​ច្បាប់​ ហើយ​អាជ្ញាធរ​ពាក់​ព័ន្ធ​គួរ​មាន​វិធានការ​ជា​បន្ទាន់​ដើម្បី​រក្សា​ដី​ព្រៃ​នោះ​ទុក​ជា​ជម្រក​មច្ឆាជាតិ​រស់​នៅ​ពង​កូន​ជា​ប្រយោជន៍​រួម​នៅ​ថ្ងៃ​អនាគត៖ «អ៊ីចឹង​អាជ្ញាធរ​ស្រុក​គប្បី​ធ្វើ​ការងារ​ឲ្យ​បាន​ល្អ​ជា​សហគមន៍​ ព្រោះ​សហគមន៍​គាត់​មាន​គាត់​ប្ដឹង​ទៅ​អាជ្ញាធរ​មិន​មាន​ប្រសិទ្ធិ​ភាព​នោះ​ទេ​ ដល់​អ៊ីចឹង​ពួកគាត់​ជា​អ្នក​ប្រឈម​បញ្ហា​ទាំង​អស់​ហ្នឹង​ទៅ​វិញ​ ហើយ​រំលោភ​បំពាន​នៅ​តែ​មាន​សកម្មភាព​ដដែល។ អ៊ីចឹង​ទោះ​បី​មិន​មាន​ដំណឹង​នេះ​ក៏​ដោយ​អាជ្ញាធរ​គប្បី​មាន​ចាត់​វិធានការ​​ឲ្យ​បាន​ឆាប់»

​​​​​​​លោក​បន្ត​ថា​ ព្រៃ​លិច​ទឹក​នៅ​​សហគមន៍​នេសាទ​ត្រី​​តំបន់​​ភូមិ​ព្រែកត្រប់​ មិន​ត្រឹម​តែ​មាន​មនុស្ស​ទៅ​កាប់​ឆ្ការ​ព្រៃឈើ​យក​ដី​ធ្វើ​​ជា​កម្មសិទ្ធិ​ខុស​ច្បាប់​ប៉ុណ្ណោះ​ទេ​​ នៅ​មាន​​អ្នក​​​ជីក​អណ្ដូង​នៅ​តំបន់​នោះ​ជា​ច្រើន​កន្លែង​ទៀត​ផង ដើម្បី​ទាញ​យក​ផលប្រយោជន៍​ត្រី​របស់​ខ្លួន ហើយ​ប៉ះពាល់​ដល់​សម្បត្តិ​ធនធាន​ធម្មជាតិ​របស់​រដ្ឋ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល