ប្រជាពលរដ្ឋ​ព្រួយ​បារម្ភ​ថា សត្វចង្កៀលខ្យង​ងាប់ អាច​រាល​ដាល​ដល់​សត្វ​ចិញ្ចឹម​របស់​ពួក​គេ

ដោយ៖ ហេង រស្មី
2021-03-24
Share
ប្រជាពលរដ្ឋ​ព្រួយ​បារម្ភ​ថា សត្វចង្កៀលខ្យង​ងាប់ អាច​រាល​ដាល​ដល់​សត្វ​ចិញ្ចឹម​របស់​ពួក​គេ សត្វ​ចង្កៀល​ខ្យង ដែល​ជា​សត្វ​ស្លាប​កម្រ និង​ជិត​ផុត​ពូជ បាន​ងាប់​ជា​បន្ត​បន្ទាប់​ចាប់​តាំង​ពី​ថ្ងៃ​ទី១៧ រហូត​ដល់​ថ្ងៃ​ទី២៤ មីនា នៅ​តំបន់​បឹង​ស្នេហ៍ ស្រុក​បាភ្នំ ខេត្ត​ព្រៃ​វែង។
រូប៖ពលរដ្ឋ

ពលរដ្ឋ​មួយ​ចំនួន​លើក​ឡើង​ថា សត្វ​ចង្កៀលខ្យង​ដែល​ងាប់​ទាំង​នេះ មាន​អាការៈ​ស្រដៀង​គ្នា​នឹង​មាន់​ឈឺ​ងាប់​កន្លង​ទៅ ដែល​ក្រសួង​សុខាភិបាល​ធ្លាប់​អះអាង​ថា ជា​ជំងឺ​គ្រុន​ផ្ដាសាយ​បក្សី។ ពួក​គេ​ស្នើសុំ​ឱ្យ​មន្ត្រី​ជំនាញ​រក​មូល​ហេតុ​ពិតប្រាកដ​ឱ្យ​បាន​ទាន់​ពេល​វេលា ទាក់​ទិន​នៃ​ការ​ងាប់​របស់​សត្វ​ទាំង​នេះ។

តំណាង​សហគមន៍​បឹង​ស្នេហ៍​លោក ប៉ាន់ យ៉ន និយាយ​ថា សត្វ​ចង្កៀលខ្យង​ងាប់​កន្លង​មក​នេះ​ហាក់​ដូច​ជា ឆ្លង​ជំងឺ​អ្វី​ម្យ៉ាង​ បណ្ដាល​ឱ្យ​ងាប់​តៗ គ្នា ហើយ​រហូត​មក​ដល់​ពេល​នេះ​បាន​កើន​ឡើង​ដល់​ជាង​៣០០​ក្បាល​ហើយ(៣៤៥ក្បាល)។

លោក​បន្ត​ថា សហគមន៍​របស់​លោក​ដែល​បាន​ស្រាវជ្រាវ​នៅ​ជុំវិញ​បឹង មិន​បាន​រក​ឃើញ​ថា មាន​ប្រជាពលរដ្ឋ​ដាក់​ថ្នាំ​ពុល ដើម្បី​ទាក់​យក​សត្វ​ទេ។ លោក​ថា សត្វ​ចង្កៀល​ខ្យង​ងាប់​កន្លង​មក​នេះ មាន​អាការៈ​ស្រដៀង​គ្នា​នឹង​សត្វ​មាន់​ងាប់​កន្លង​ទៅ​ដែរ។

លោក​ស្នើ​ឱ្យ​ក្រសួង​ពាក់​ព័ន្ធ​ប្រញាប់​បង្ហាញ​លទ្ធផល​ពី​មូល​ហេតុ​ឱ្យ​បាន​ច្បាស់​លាស់ ពី​ព្រោះ​ពលរដ្ឋ​បារម្ភ​ខ្លាច​មាន​ជំងឺ​ឆ្លង​ចេញ​ពី​សត្វ​ចង្កៀលខ្យង​នេះ​រាល​ដាល​ដល់​សត្វ​ចិញ្ចឹម​របស់​ពួក​គេ៖​«ជំងឺ​វា បើ​សត្វ​ទាកាប៉ា​វិញ ដូច​ជា ជំងឺ​រំបល់​កាច់​អ៊ីចឹង។ កាច់​យក​តែ​ម្ដង មួយ​ភ្លែតៗ ត្រង់​កភ្លឹង ប្រកាច់​ បះ​ស្លាប​ឡើង​លើ ខ្លួន​នេះ​ទៅ​ដី​ ឬ​ក្នុង​ទឹក។ ជួន​កាល​ហើរ​នៅ​ខាង​លើ​ទាំង​ហ្វូង​ស្រាប់​តែ​ធ្លាក់​មក​ក្នុង​ទឹក​តែ​ម្ដង»។

សត្វ​ចង្កៀល​ខ្យង ដែល​ជា​សត្វ​ស្លាប​កម្រ និង​ជិត​ផុត​ពូជ បាន​ងាប់​ជា​បន្ត​បន្ទាប់​ចាប់​តាំង​ពី​ថ្ងៃ​ទី១៧ រហូត​ដល់​ថ្ងៃ​ទី២៤ មីនា នៅ​តំបន់​បឹង​ស្នេហ៍ ស្រុក​បាភ្នំ ខេត្ត​ព្រៃ​វែង។

ប្រធាន​មន្ទីរ​កសិកម្ម​ខេត្ត​ព្រៃវែង​លោក អ៊ុក សំណាង បញ្ជាក់​ថា ក្រសួង​កសិកម្ម​បាន​យក​វត្ថុ​វិភាគ​ទៅ​ពិនិត្យ​នៅ​មន្ទីរ​ពិសោធន៍​របស់​នាយកដ្ឋាន​បសុព្យាបាល​ហើយ តែ​នៅ​មិន​ទាន់​បាន​លទ្ធផល​នៅ​ឡើយ​ទេ។

លោក​បន្ត​ថា វិធានការ​​ដំបូង អាជ្ញាធរ​បាន​សម្រេច​បិទ​តំបន់​បឹង​ស្នេហ៍​មួយ​រយៈ​សិន ដើម្បី​រង់ចាំ​មើល​មូល​ហេតុ​ឱ្យ​បាន​ច្បាស់​លាស់​ថា តើ​ការ​ស្លាប់​របស់​សត្វ​ចង្កៀលខ្យង​បណ្ដាល​មក​ពី​មូល​ហេតុ​អ្វី​ឲ្យ​ពិត​ប្រាកដ៖«ជា​ទូទៅ នៅ​ក្នុង​រដូវ​ហ្នឹង សត្វ​មាន់​អី​តែង​តែ​ងាប់​ជា​ប្រចាំ ដោយ​សារ​កម្ដៅ​វា​កើន​ឡើង។ ខេត្ត​ព្រៃ​វែង​ឡើង​ដល់ ៣៧អង្សា​ហើយ។ ការ​កើន​ឡើង​នៃ​កម្ដៅ ការ​ប្រែប្រួល​អាកាស​ធាតុ ឬ​មួយ​ខ្វះ​ចំណី កត្ដា​វា​ច្រើន។ ប៉ុន្តែ​អ្វី​ដែល​យើង​ចាប់​អារម្មណ៍​ហ្នឹង គឺ​ខាង​មន្ទីរ​ពិសោធន៍ គឺ​គេ​ត្រូវ​យក​ទៅ​ពិសោធន៍ ឬ​ក៏​សិក្សា​ក្រែង​មាន​ជំងឺ​ឆ្លង​នានា»។

អាស៊ីសេរី​មិន​អាច​ទាក់​ទង​លោក នេត្រ ភក្រ្តា អ្នក​នាំ​ពាក្យ​ក្រសួង​បរិស្ថាន​បាន​ទេ​នៅ​ថ្ងៃ​ទី២៤ មីនា។ ប៉ុន្តែ​កាល​ពី​ថ្ងៃ​ទី២៣ មីនា លោក​មិន​បាន​បញ្ជាក់​ពី​មូលហេតុ​ដែល​នាំ​ឱ្យ​សត្វ​ស្លាប​ទាំង​នោះ​ងាប់​ឡើយ។

លោក​បន្ថែម​ថា ប្រសិន​បើ​ពលរដ្ឋ​ប្រទះ​ឃើញ​សត្វ​ស្លាប​នៅ​ក្នុង​តំបន់​នោះ​ងាប់​សូម​កុំ​យក​ទៅ​ចម្អិន​បរិភោគ គឺ​យក​សត្វ​ស្លាប ទៅ​កប់ ​ឬ​ដុត​​ចោល ដើម្បី​ចៀសវាង​គ្រោះ​ថ្នាក់​ដល់​សុខភាព។

 ទាក់​ទិន​នឹង​បញ្ហា​នេះ​ ប្រធាន​នាយកដ្ឋាន​ទប់​ស្កាត់​ជំងឺ​ឆ្លង​របស់​ក្រសួង​សុខាភិបាល​លោក​វេជ្ជបណ្ឌិត លី សូវ៉ាន់ មាន​ប្រសាសន៍​ថា មន្ត្រី​សុខាភិបាល​បាន​តាមដាន​សុខភាព​ពលរដ្ឋ​នៅ​ជុំវិញ​កន្លែង​កើត​ហេតុ​នោះ​ ហើយ​រហូត​មក​ដល់​ពេល​នេះ​មិន​មាន​ពលរដ្ឋ​ណា​ម្នាក់​រក​ឃើញ​ថា​ មាន​ជំងឺ​ឆ្លង​ពី​សត្វ​ចង្កៀល​ខ្យង​ដែល​ងាប់​នោះ​ទេ។​

លោក​ថា​ ប្រសិន​បើ​មាន​ករណី​សង្ស័យ​ណា​មួយ​កើត​ឡើង​ទៅ​លើ​ប្រជាពលរដ្ឋ ​មន្ត្រី​សុខាភិបាល​នឹង​យក​វត្ថុ វិភាគ​មក​ពិនិត្យ​មើល៖«​ក្នុង​ករណី​ដែល​ពលរដ្ឋ​មាន​ការ​ព្រួយ​បារម្ភ​ឬ​ មាន​រោគ​សញ្ញា​អ្វី​សូម​ទាក់​ទង​មក​លេខ​ ១១៥​មក​ យើង​នឹង​បញ្ជូន​មន្ត្រី​ជំនាញ​ក្រុម​ឆ្លើយ​តប​ជា​បន្ទាន់​ដើម្បី​ចុះ​ទៅ​ អង្កេត​ស្រាវជ្រាវ​ ហើយ​នឹង​យក​វត្ថុ វិភាគ​ដែល​គាត់​ ចេញ​រោគ​សញ្ញា​ទាំង​ឡាយ​នោះ។​ រោគ​សញ្ញា​ភាគ​ច្រើន​គឺ​ត្រូវ​តែ​មាន​គ្រុន​ក្ដៅ​៣៨.៥ អង្សា មាន​ក្អក ឈឺ​ក ហើយ​នឹង​រោគ​សញ្ញា​ផ្សេងៗ ទៀត​ដូច​ជា​រាគ​រួស​ ឬ​មួយ​ក៏​ឈឺ​សន្លាក់​ដៃ​ជើង»។

សត្វ​​​ចង្កៀល​ខ្យង​ ជា​ប្រភេទ​សត្វ​ស្លាប​ ដែល​មាន​ចំពុះ​វែង​កោង​ខុប​ តែង​រក​ចំណី​នៅ​តាម​វាល​ស្រែ​និង​នៅ​តាម​បឹង​ជា​ដើម។ សត្វ​នេះ​ភាគ​ច្រើន​រស់​នៅ​ក្នុង​ខេត្ត​ជាប់​បឹង​ទន្លេសាប ខេត្ត​ព្រៃ​វែង និង​ខេត្ត​តាកែវ។ ក្រសួង​បរិស្ថាន​កាល​ពី​ខែ​ឧសភា ឆ្នាំ២០១៦ បាន​ចេញ​អនុក្រឹត្យ បង្កើត​តំបន់​ការពារ​ទេសភាព​បឹង​ព្រែក​ល្ពៅ ទំហំ​ជាង ៨ពាន់​ហិកតារ (៨.៣០៥​ហិកតារ) ស្ថិត​នៅ​ក្នុង​ខេត្ត​តាកែវ ដែល​មាន​សត្វ​ចង្កៀល​ខ្យង​រាប់​ពាន់​ក្បាល​កំពុង​រស់​នៅ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​

មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល