គណៈកម្មាធិការជាតិគ្រប់គ្រងការប្រែប្រួលអាកាសធាតុ ដឹកនាំដោយរដ្ឋមន្ត្រីក្រសួងបរិស្ថាន នឹងប្រជុំលើកទី១៥ នៅថ្ងៃទី២០ ខែវិច្ឆិកា ដើម្បីពិនិត្យលើវឌ្ឍនភាពនៃការប្រែប្រួលអាកាសធាតុនៅប្រទេសកម្ពុជា។
ក្រសួងបរិស្ថាន មានគម្រោងកោះប្រជុំសមាជិកគណៈកម្មាធិការជាតិគ្រប់គ្រងការប្រែប្រួលអាកាសធាតុ ដើម្បីត្រួតពិនិត្យជារួមលើវឌ្ឍនភាពនៃអាកាសធាតុប្រែប្រួលនៅកម្ពុជា និងពិភាក្សាលើបញ្ហាពាក់ព័ន្ធនានា។
អ្នកនាំពាក្យក្រសួងបរិស្ថាន លោក សៅ សុភាព មានប្រសាសន៍នៅថ្ងៃទី១៨ ខែវិច្ឆិកា ថា រដ្ឋមន្ត្រីក្រសួងបរិស្ថាន ជាប្រធានគណៈកម្មាធិការជាតិគ្រប់គ្រងការប្រែប្រួលអាកាសធាតុ ដែលមានសមាជិកមកពីក្រសួង និងស្ថាប័នចំនួន២០ទៀត នឹងពិភាក្សាលើបញ្ហាអនុវត្តគោលនយោបាយ យុទ្ធសាស្ត្រ បរិធានច្បាប់ ផែនការ និងកម្មវិធីនានារបស់រាជរដ្ឋាភិបាល ឆ្លើយតបនឹងបញ្ហាប្រែប្រួលអាកាសធាតុនៅក្នុងប្រទេសកម្ពុជា៖ «ប្រជុំដើម្បីចែករំលែកព័ត៌មានបច្ចុប្បន្នភាពទាក់ទងទៅនឹងកិច្ចការដែលក្រសួងស្ថាប័នពាក់ព័ន្ធ កំពុងតែអនុវត្តរាល់ថ្ងៃហ្នឹង ទាក់ទងទៅនឹងការប្រែប្រួលអាកាសធាតុ ពិនិត្យទៅលើកិច្ចការធំៗដែលក្រសួងស្ថាប័នពាក់ព័ន្ធ ដែលជាសមាជិកគណៈកម្មាធិការជាតិគ្រប់គ្រងការប្រែប្រួលហ្នឹង កំពុងតែអនុវត្ត»។
ទាក់ទងនឹងការប្រែប្រួលអាកាសធាតុនេះ អង្គការមិនមែនរដ្ឋាភិបាលមួយចំនួន បានចូលរួមធ្វើសកម្មភាពទប់ស្កាត់ការប្រែប្រួលអាកាសធាតុ និងការឡើងកម្តៅផែនដី។
មន្ត្រីអង្គការសេដាក (CEDAC) លោក ឃិន ដារ៉ាវុធ ថ្លែងថា គម្រោងចំនួន១៨ របស់អង្គការនេះ បានអនុវត្តជាជំនួយក្នុងកម្មវិធីបម្រែបម្រួលអាកាសធាតុ ដើម្បីឲ្យកសិករចេះបន្ស៊ាំខ្លួន និងដាំដំណាំឲ្យស្របតាមកាលៈទេសៈក្នុងពេលអាកាសធាតុកំពុងប្រែប្រួលបច្ចុប្បន្ន។ លោកថា បានណែនាំកសិករឲ្យប្រើឡជីវឧស្ម័ន ដែលបន្ថយការកាប់ព្រៃឈើ និងឲ្យប្រើចង្ក្រានហ្គាស៍ដែលមិនបំភាយឧស្ម័នកាបូនិកទៅក្នុងបរិយាកាស។ លោក ឃិន ដារ៉ាវុធ បន្ថែមថា ឧទាហរណ៍ជាក់ស្តែង កសិករច្រើនខេត្តបានរងនូវផលប៉ះពាល់ដោយផ្ទាល់ពីការប្រែប្រួលអាកាសធាតុនៅក្នុងរដូវវស្សាឆ្នាំ២០១៤ នេះ៖ «ជំរុញទាក់ទងនឹងរឿងការធ្វើជីកំប៉ុស ហើយនិងដាំដំណាំគ្របដីអស់ហ្នឹង ទាំងនេះហើយជាការងារសេដាក ដែលកំពុងតែជំរុញយ៉ាងសកម្មទាក់ទងនឹងរឿងបម្រែបម្រួលអាកាសធាតុ»។
ចំណែក លោក ហេង រិទ្ធា អ្នកគ្រប់គ្រងអាជីវកម្មកសិដ្ឋានកាបូនកម្ពុជា អះអាងថា កសិដ្ឋាននេះបានជួយស្រូបយកសារធាតុកាបូនពីបរិយាកាស ដោយបានផ្តល់លុយដល់អ្នកដែលដាំដើមឈើនៅខេត្តចំនួន៥ មានដូចជា ខេត្តសៀមរាប ព្រៃវែង កំពត តាកែវ និងខេត្តកំពង់ស្ពឺ ដែលបានដាំដើមឈើចម្រុះពូជបានចំនួន ២៥ម៉ឺនដើម ហើយបង្កើនការដាំរហូតដល់ ៣៥ម៉ឺនដើម នៅបំណាច់ខែវិច្ឆិកា ឆ្នាំ២០១៤ នេះ។ លោកបន្តថា ដើមឈើដាំបាននេះ វាស្រូបយកកាបូនពីបរិយាកាសគិតជាមធ្យម ១៨គីឡូក្រាមក្នុង១ឆ្នាំនៃដើមឈើក្នុង១ដើម។ បន្ថែមលើនោះ កសិដ្ឋានកាបូនកម្ពុជា បានជួយណែនាំគ្រួសារជាច្រើន ឲ្យប្រើចង្ក្រានដែលមិនបំភាយផ្សែងទៅបរិយាកាស។ លោកថា ដើម្បីឲ្យដើមឈើស្រូបយកកាបូនបានច្រើនពីបរិយាកាស គួរដាំដើមឈើចម្រុះពូជ៖ «ប្រភេទដើមឈើផ្សេងគ្នា ជាការពិត លទ្ធភាពនៃការស្រូបយកជាតិកាបូនវាខុសគ្នា។ ប៉ុន្តែខាងខ្ញុំនេះ ដោយសារយើងអត់ចង់ឲ្យកសិករត្រូវបែងចែកប្រភេទដើមឈើ "ក" ស្រូបប៉ុន្មានគីឡូក្នុងមួយដើម។ ដើមឈើ "ខ" នោះ ស្រូបប៉ុន្មានគីឡូ។ អ៊ីចឹងយើងវាយជាមធ្យមភាគរួមទាំងអស់ យើងអត់គិតថាដើមឈើប្រភេទ "ក" ឬ "ខ" ឬ "គ" ទេ ដឹងតែស្រូបជាមធ្យម ១៨គីឡូក្នុង១ឆ្នាំក្នុង១ដើមឈើ»។
មន្ត្រីបរិស្ថានពន្យល់ថា កាបូនជាឧស្ម័នម្យ៉ាងដែលបង្កឲ្យធ្លុះស្រទាប់ការពារបរិយាកាស គឺធ្លុះស្រទាប់អូហ្សូននេះឯង ដែលធ្វើឲ្យពន្លឺថ្ងៃចាំងមកលើផែនដីគ្មានរបាំងការពារ។
លោក សៅ សុភាព អ្នកនាំពាក្យក្រសួងបរិស្ថាន បានឲ្យដឹងបន្ថែមថា កន្លងមកដើម្បីការពារការប្រែប្រួលអាកាសធាតុ និងការឡើងកម្តៅផែនដី ក្រសួងបរិស្ថាន បានលើកទឹកចិត្តអ្នកប្រើរថយន្តសេរីចាស់ៗ ទូទឹកកក ម៉ាស៊ីនត្រជាក់ ដែលវាប្រើហ្គាស៍ម្យ៉ាងធ្វើឲ្យប៉ះពាល់ដល់បរិយាកាស ឲ្យចូលរួមប្ដូរម៉ាស៊ីនត្រជាក់ចោល ដោយក្រសួងបរិស្ថាន បានផ្តល់ការបញ្ចុះតម្លៃជូនអ្នកប្រើរបស់ទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។