គោក្របីអ្នកភូមិនៅខេត្តស្ទឹងត្រែងងាប់យ៉ាងហោចណាស់៥០ក្បាលដោយសារជំងឺ
2018.05.24
ក្របីរបស់ពលរដ្ឋនៅស្រុកសៀមប៉ាង ខេត្តស្ទឹងត្រែង ត្រូវបានអ្នកភូមិចងទុកនៅក្បែរលំនៅឋាន បន្ទាប់ពីមានគ្រោះរាំងស្ងួតកាលពីខែមេសា ឆ្នាំ២០១៦។
RFA/Men Sothyr
អាជ្ញាធរឃុំព្រែកមាស ស្រុកសៀមប៉ាង ខេត្តស្ទឹងត្រែងបារម្ភជំងឺសាហាវម្យ៉ាង បង្កឱ្យសត្វពាហនៈរបស់អ្នកភូមិស្លាប់យ៉ាងហោចណាស់ ៥០ក្បាល អំឡុងពេលប៉ុន្មានសប្ដាហ៍ចុងក្រោយនេះ។ បាតុភាពនេះបានកើតក្នុងឃុំចំនួន២ របស់ស្រុកសៀមប៉ាង គឺ ឃុំព្រែកមាស និងឃុំថ្មកែវ។
មេឃុំព្រែកមាស លោក ណយ ខួង ឱ្យដឹងនៅថ្ងៃទី២៣ ឧសភា ថា សត្វពាហនៈរបស់ពលរដ្ឋនៅឃុំព្រែកមាស ងាប់ជាង ១០ក្បាល និងមួយចំនួនរកមិនទាន់ឃើញ។ លោកថា មន្ត្រីជំនាញនៃមន្ទីរកសិកម្មស្រុកកំពុងអន្តរាគមន៍ចាក់វ៉ាក់សាំងការពារ និងអប់រំពលរដ្ឋពីវិធីសាស្ត្រការពារជំងឺរាតត្បាត។ លោកថា ពលរដ្ឋរស់នៅតំបន់នេះមានទម្លាប់ប្រលែងគោក្របី ចូលព្រៃនៅរដូវប្រាំងដល់ខែវស្សាទើបនាំគ្នាចូលព្រៃតាមរក ដើម្បីបម្រើកសិកម្ម៖ «អាហ្នឹងកើតភ្លាមងាប់ភ្លាម មិនមែនជំងឺយូរថ្ងៃទេ។ ក្នុងនាមខ្ញុំអាជ្ញាធរឃុំ ខ្ញុំបានផ្សព្វផ្សាយឱ្យគាត់ចាប់ចង ដើម្បីចាក់ថ្នាំ ឱ្យពលរដ្ឋបាន ២ភូមិហើយ»។
លោកបន្ថែមថា មន្ត្រីជំនាញបានសន្និដ្ឋានបឋមថា គោក្របីអ្នកភូមិកើតជំងឺ អុតក្ដាមដែលអាការៈ ឈឺមាត់ និងអណ្ដាត ស៊ីអាហារមិនកើត ព្រោះអ្នកភូមិប្រលែងឱ្យរស់នៅក្នុងព្រៃ មិនបានថែទាំដិតដល់។ លោកថា ក្រោយពីកើតមានបាតុភាពនេះ អាជ្ញាធរបានជូនដំណឹងឱ្យសហគមន៍ប្រញាប់ចូលព្រៃ យកសព្វពាហនៈមកលំនៅឋាន ដើម្បីចាក់វ៉ាក់សាំងការពារ។
ឃុំព្រែកមាស និងឃុំថ្មកែវ ស្រុកសៀមប៉ាង ឋិតនៅជាប់ព្រៃការពារសៀមប៉ាងខាងលិច ដែលមានអង្គការអភិរក្សសត្វស្លាបអន្តរជាតិ (Bird Life International) កំពុងបន្តដំណើរការអភិរក្សសត្វកម្រជាច្រើនប្រភេទនៅតំបន់នោះ។
មន្ត្រីអង្គការអភិរក្សសត្វស្លាបអន្តរជាតិ ធ្លាប់លើកឡើងពីក្ដីបារម្ភហានិភ័យខ្ពស់របស់សត្វស្លាបដ៏កម្រនៅតំបន់អភិរក្សដូចជា សត្វត្មាត និងសត្វត្រយងជាដើម។ សត្វស្លាបទាំងនោះ បានរកចំណីចិញ្ចឹមជីវិតមួយផ្នែកគឺពឹងផ្អែកលើសត្វស្រុករបស់អ្នកភូមិ ដែលមានទម្លាប់ប្រលែងចូលព្រៃរស់នៅជាមួយបក្សីកម្រទាំងនោះ។
កាលពីឆ្នាំ២០១៦ គោក្របីអ្នកស្រុកសៀមប៉ាង ងាប់ជាង ៣០០ក្បាល ដោយសារគ្រោះរាំងស្ងួត បណ្ដាលឱ្យខ្វះចំណី និងទឹកផឹក ខណៈបឹងបួ ឬត្រពាំងនៅតំបន់អ្នកភូមិលែងគោក្របីឱ្យស្វែងរកចំណីក្នុងព្រៃរីងស្ងួតគ្មានទឹក និងស្មៅសម្រាប់ចំណីសត្វ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ