បាក់​ទំនប់​​​ក្រុមហ៊ុន​បូម​ខ្សាច់​ធ្វើ​ឲ្យ​ប៉ះពាល់​ទ្រព្យ​សម្បត្តិ​ឈ្មួញ​រាប់​សែន​ដុល្លារ

ដោយ ប្រាជ្ញ ចេវ
2014-12-03
អ៊ីម៉ែល
មតិ
Share
បោះពុម្ព
ទឹក​លិច​ក្នុង​បរិវេណ​ភោជនីយដ្ឋាន​បឹងមាស បន្ទាប់​ពី​បាក់​ទំនប់ នៅ​សង្កាត់​ជ្រោយចង្វារ ខណ្ឌ​ជ្រោយចង្វារ នៅ​ថ្ងៃ​ទី ០៣ ធ្នូ ២០១៤។
ទឹក​លិច​ក្នុង​បរិវេណ​ភោជនីយដ្ឋាន​បឹងមាស បន្ទាប់​ពី​បាក់​ទំនប់ នៅ​សង្កាត់​ជ្រោយចង្វារ ខណ្ឌ​ជ្រោយចង្វារ នៅ​ថ្ងៃ​ទី ០៣ ធ្នូ ២០១៤។
RFA/Brach Chev

ការ​បាក់​ទំនប់​បូម​ខ្សាច់​ក្រុមហ៊ុន អូ.ស៊ី.អាយ.ស៊ី (OCIC) បណ្ដាល​ឲ្យ​ខូចខាត​ទ្រព្យ​សម្បត្តិ​ភោជនីយដ្ឋាន​ពីរ​កន្លែង និង​ផ្ទះ​សំណាក់​មួយ​កន្លែង នៅ​ភូមិ​កៀនឃ្លាំង សង្កាត់​ជ្រោយចង្វារ ខណ្ឌ​ជ្រោយចង្វារ រាជធានី​ភ្នំពេញ។ ការ​វាយ​ដំបូងៗ​របស់​ម្ចាស់​ទ្រព្យ​ថា ការ​ខូចខាត​នេះ​អាច​អស់​ទឹកប្រាក់​ប្រមាណ​កន្លះ​លាន​ដុល្លារ។ ហេតុការណ៍​នេះ បាន​កើត​ឡើង​កាល​ពី​ម៉ោង​ជាង ១២​ថ្ងៃ​ត្រង់ នៅ​ថ្ងៃ​ទី​៣ ខែ​វិច្ឆិកា ខណៈ​ដែល​ក្រុមហ៊ុន​កំពុង​បូម​ខ្សាច់​ធ្វើ​ការ​សាងសង់​ធ្វើ​ទីក្រុង​រណប។

ភោជនីយដ្ឋាន បឹងមាស ភោជនីយដ្ឋាន ម៉ែក្មេក​២ និង​ផ្ទះសំណាក់​សារិការ ត្រូវ​បាន​អាជ្ញាធរ​វាយ​តម្លៃ​ថា រង​ការ​ខូចខាត​ធ្ងន់ធ្ងរ។ យ៉ាង​ហោច​ណាស់​ទ្រព្យ​សម្បត្តិ​របស់​ភោជនីយដ្ឋាន​បឹងមាស ត្រូវ​បាន​ម្ចាស់​ហាង​អះអាង​ថា រង​ការ​ខូចខាត​សម្ភារៈ ដែល​គិត​ជា​ទឹក​ប្រាក់​ជាង ៥០​ម៉ឺន​ដុល្លារ។

​លោកស្រី លឹម ស្រី អ្នក​គ្រប់គ្រង​ភោជនីយដ្ឋាន​បឹងមាស ដែល​ឃើញ​ផ្ទាល់​ហេតុការណ៍​នេះ​ឲ្យ​ដឹង​ថា ភោជនីយដ្ឋាន​លោកស្រី​រង​ការ​លិចលង់​តាំង​ពី​ក្រោយ​ហាង​ដល់​មុខ​ហាង ហើយ​បន្ទប់​ខារ៉ាអូខេ​ត្រូវ​ទឹល​លិច​ស្ទើរ​ទាំង​អស់។ លោកស្រី​ថា គ្រឿង​អេឡិចត្រូនិក​នៅ​ក្នុង​បន្ទប់​ខារ៉ាអូខេ ទាំង​អស់​ត្រូវ​ខូចខាត។ តំណាង​ភោជនីយដ្ឋាន​រូប​នេះ​ទាមទារ​សមត្ថកិច្ច​អន្តរាគមន៍​ទៅ​ក្រុមហ៊ុន អូ.ស៊ី.អាយ.ស៊ី ដើម្បី​ដោះស្រាយ៖ «យើង​ប្រៀបធៀប​ទៅ​ដូច​ស៊ូណាមី​ស្រុក​ថៃ អ៊ីចឹង គ្រាន់តែ​ក្មេងៗ​ថា អ៊ី​ទឹក​លិច​ហើយ ទឹក​ដល់​ជង្គង់​តែម្ដង»

​ប្រជាពលរដ្ឋ​ដែល​បាន​ឃើញ​ហេតុការណ៍​នេះ  ឲ្យ​ដឹង​ថា នៅ​ពេល​បាក់​ទំនប់ ទឹក​បាន​ហូរ​យ៉ាង​លឿន​ពី​ការដ្ឋាន​បូម​ខ្សាច់​មក​ភោជនីយដ្ឋាន​តែ​ជាង​កន្លះ​ម៉ោង​ប៉ុណ្ណោះ គឺ​ត្រូវ​លិច​គ្រប់​កន្លែង។ ខណៈ​ដែល​មាន​ទឹក​ហៀរហូរ​ដូច​នេះ ក្រុម​ប្រជាពលរដ្ឋ និង​កម្មករ​របស់​ភោជនីយដ្ឋាន​រង​ផល​ប៉ះពាល់​បាន​ប្រើ​ម៉ាស៊ីន​បូម​ទឹក​ចេញ ប៉ុន្តែ​គ្មាន​វត្តមាន​តំណាង​ក្រុមហ៊ុន​បង្ក​ចុះ​មក​អន្តរាគមន៍​បើ​ទោះ​ជា​ប្រជាពលរដ្ឋ​បាន​ជូន​ដំណឹង​ទៅ​ក្រុមហ៊ុន​ក្ដី។

​បន្ទាប់ពី​ចុះ​ដល់​កន្លែង​កើត​ហេតុ អភិបាលខណ្ឌ​ជ្រោយចង្វារ នៃ​រាជធានី​ភ្នំពេញ លោក ឃ្លាំង ហួត  ប្រាប់​ថា ការ​បាក់​ទំនប់​នេះ ដោយសារ​ការ​ខ្សាច់​នេះ​មាន​លាយ​ភក់​និង​មាន​ទឹក។ លោក ឃ្លាំង ហួត បន្ត​ថា ហេតុការណ៍​គឺ​បណ្ដាល​មក​ពី​ក្រុមហ៊ុន អូ.ស៊ី.អាយ.ស៊ី ដូច្នេះ ក្រុមហ៊ុន​ត្រូវ​តែ​ដោះស្រាយ​ជូន​ប្រជាពលរដ្ឋ។ លោក​អភិបាល​បន្ថែម​ថា អាជ្ញាធរ​នឹង​រឹត​បន្តឹង​ការ​ធ្វើ​ការងារ​របស់​ក្រុមហ៊ុន អូ.ស៊ី.អាយ.ស៊ី៖ «ហេតុការណ៍​នេះ វា​កើត​ឡើង​ដោយសារ​តែ​រឿង​ចៃដន្យ ប៉ុន្តែ​មក​ពី​ការ​ធ្វេសប្រហែស​មិន​យក​ចិត្ត​ទុក​ដាក់​គ្រប់​ជ្រុងជ្រោយ​របស់​អ្នក​គ្រប់គ្រង​ក្រុមហ៊ុន អូ.ស៊ី.អាយ.សី»

​វិទ្យុ​អាស៊ីសេរី មិន​អាច​សុំ​ការ​បំភ្លឺ​ពី​តំណាង​ក្រុមហ៊ុន អូ.ស៊ី.អាយ.ស៊ី លោក ទូច សំណាង បាន​ទេ នៅ​ថ្ងៃ​ទី​៣ ខែ​វិច្ឆិកា។ ចំណែក​ប្រធាន​ការដ្ឋាន​បូម​ខ្សាច់​នៃ​ក្រុមហ៊ុន​នេះ គឺ​លោក ម៉ី សារិន មាន​ប្រសាសន៍​យ៉ាង​ខ្លី​ថា រឿង​នេះ​អភិបាលខណ្ឌ​ដោះស្រាយ​ហើយ។ ក្រុមហ៊ុន អូ.ស៊ី.អាយ.ស៊ី គឺ​ជា​របស់​លោក​ឧកញ៉ា ពុង ខៀវសែ ទទួល​បាន​សិទ្ធិ​វិនិយោគ​ទីក្រុង​រណប​តំបន់​ជ្រោយចង្វារ ប្រជាពលរដ្ឋ​មួយ​ចំនួន​រង​ផល​ប៉ះពាល់​ដោយ​គម្រោង​នេះ​រាប់​រយ​គ្រួសារ​មិន​ទាន់​ទទួល​បាន​សំណង​ពី​ក្រុមហ៊ុន​នៅ​ឡើយ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Samrach Ket

ពី pailin

ក្រុមហ៊ុនគួតែមានភាពទទួលខុសត្រូវចំពោះបញ្ហាទាំងអស់នេះ។

Dec 05, 2014 09:03 AM

គេហទំព័រ​ទាំងមូល