មន្ត្រី​ជំនាញ​ជលផល​នឹង​ស្រាវជ្រាវ​រក​មូលហេតុ​ពិត​ដែល​ធ្វើ​ឱ្យ​សត្វ​ផ្សោត​ញី​មួយ​ក្បាល​ស្លាប់

ដោយ សន ចាន់រដ្ឋា
2019-05-11
អ៊ីម៉ែល
មតិ
Share
បោះពុម្ព
សត្វ​ផ្សោត​ញី មួយ​ក្បាល ដែល​គេ​បាន​ប្រទះឃើញ​ស្លាប់ នៅ​ក្នុង​សង្កាត់​ក្រចេះ​ ខេត្ត​ក្រចេះ កាល​ពី​ថ្ងៃ​ទី១០ ឧសភា។
សត្វ​ផ្សោត​ញី មួយ​ក្បាល ដែល​គេ​បាន​ប្រទះឃើញ​ស្លាប់ នៅ​ក្នុង​សង្កាត់​ក្រចេះ​ ខេត្ត​ក្រចេះ កាល​ពី​ថ្ងៃ​ទី១០ ឧសភា។
រូប​ពី​គេហទំព័រក្រសួង​ព័ត៌មាន

សត្វ​ផ្សោត​ញី មួយ​ក្បាល ដែល​គេ​បាន​ប្រទះឃើញ​ស្លាប់ នៅ​ក្នុង​សង្កាត់​ក្រចេះ​ ខេត្ត​ក្រចេះ កាល​ពី​ថ្ងៃ​ទី១០ ឧសភា។ ត្រី​ផ្សោត​ដែល​ងាប់​នេះ មាន​ទម្ងន់​ជិត ពីរ​រយ​គីឡូក្រាម និង​មាន​ប្រវែង​ជាង​ពីរ​ម៉ែត្រ។

វិទ្យុជាតិ​កម្ពុជា​បាន​ចុះផ្សាយ​ថា ត្រី​ផ្សោត​ដែល​ងាប់​នេះ គឺ​ពលរដ្ឋ​បាន​ប្រទះឃើញ និង​រាយការណ៍​ទៅកាន់​មន្ត្រី​ជំនាញ​ជលផល​ដើម្បី​មក​ពិនិត្យ និង​ធ្វើ​កោសល្យវិច័យ។ ពលរដ្ឋ​ដែល​បាន​ឃើញ​ហេតុការណ៍​នេះ សង្ស័យ​ថា ផ្សោត​នេះ​បាន​ងាប់​ជាង​ពីរ​ថ្ងៃ​មក​ហើយ ដោយសារតែ​ឃើញ​សភាព​សព​ត្រី​ផ្សោត​នេះ​មាន​សភាព​ហើម និង​មាន​របក​ស្បែក​ខ្លះៗ។

នាយ​ខណ្ឌ​រដ្ឋបាល​ជលផល លោក សៀន គិន បាន​ឱ្យ​សារព័ត៌មាន​ក្នុងស្រុក​ដឹង​ថា បន្ទាប់ពី​ពិនិត្យ​សាកសព​ត្រី​ផ្សោត​នេះ​រួច ក្រុមការងារ​រក​មិន​ឃើញ​មាន​ស្លាកស្នាម​អ្វី​នៅ​លើ​ដងខ្លួន​នោះ​ទេ​។ ប៉ុន្តែ​លោក​សន្និដ្ឋាន​ថា ត្រី​ផ្សោត​នេះ​អាច​ស្លាប់​ដោយសារ​តែ​មាន​អាយុ​ច្រើន ពីព្រោះ​មន្ត្រី​ជំនាញ​សង្កេត​ឃើញ​ថា​ធ្មេញ​របស់​វា​មាន​សភាព​សឹក​រេចរឹល ដែល​ធ្វើ​ឱ្យ​ត្រី​ផ្សោត​មួយ​ក្បាល​នេះ​ពិបាក​ក្នុង​ការ​ស្វែងរក​ចំណី ឬ​ម្យ៉ាងទៀត​អាច​បណ្ដាល​មកពី​ផ្សោត​នេះ​មាន​ជំងឺ។

ទោះ​យ៉ាងណា មន្ត្រី​ជំនាញ​បាន​បញ្ជូន​ត្រី​ផ្សោត​នេះ ទៅ​ទុក​នៅ​ទីស្នាក់ការ​របស់ អង្គការ​មូលនិធិ​សកល​សម្រាប់​អភិរក្ស​ធនធានធម្មជាតិ ដើម្បី​ធ្វើការ​ពិសោធន៍​បន្ថែម​ទៀត ដើម្បី​រក​មូលហេតុ​ច្បាស់លាស់​នៃ​ការ​ស្លាប់​ត្រី​ផ្សោត​ញី​មួយ​នេះ។

ផ្សោត​ទន្លេ​មេគង្គ​មានតែ​នៅ​ក្នុង​ខេត្ត​ក្រចេះ និង​ខេត្ត​ស្ទឹងត្រែង​តែប៉ុណ្ណោះ។ អង្គការ​មូលនិធិ​សកល​សម្រាប់​អភិរក្ស​ធនធានធម្មជាតិ បាន​ឱ្យ​ដឹង​ថា ចំនួន​ត្រី​ផ្សោត​នៅ​កម្ពុជា មាន​ទាំងអស់​ជាង កៅសិប​ក្បាល (៩២)​។ សម្រាប់​ឆ្នាំ ២០១៩​នេះ អង្គការ​មូលនិធិ​សកល​សម្រាប់​អភិរក្ស​ធនធានធម្មជាតិ​បាន​រក​ឃើញ​កូន​ផ្សោត​ទើប​កើត​ថ្មីៗ​មាន​ចំនួន ប្រាំមួយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល