ពលរដ្ឋ​ស្រុក​ស្ទោង​ខេត្ត​កំពង់ធំ​អាច​ប្រឈម​នឹង​ខ្វះ​ទឹក​ប្រើប្រាស់​ក្នុង​រយៈពេល​ខ្លី​ខាងមុខនេះ

ដោយ វ៉ែន សុមេធ
2019-02-09
អ៊ីម៉ែល
មតិ
Share
បោះពុម្ព
ស្រះ​ទឹក​ដែល​ប្រជាពលរដ្ឋ​នាំ​គ្នា​ជីក​ដើម្បី​ស្តុក​ទឹក​ទុក​ប្រើប្រាស់ នា​ភូមិ​អូរដូង ក្នុង​ឃុំ​ម្សាក្រង ស្រុក​ស្ទោង ខេត្ត​កំពង់ធំ។ រូបថត​​ថ្ងៃ​ទី​១៤ ខែ​មិថុនា ឆ្នាំ​២០១៥
ស្រះ​ទឹក​ដែល​ប្រជាពលរដ្ឋ​នាំ​គ្នា​ជីក​ដើម្បី​ស្តុក​ទឹក​ទុក​ប្រើប្រាស់ នា​ភូមិ​អូរដូង ក្នុង​ឃុំ​ម្សាក្រង ស្រុក​ស្ទោង ខេត្ត​កំពង់ធំ។ រូបថត​​ថ្ងៃ​ទី​១៤ ខែ​មិថុនា ឆ្នាំ​២០១៥
RFA

រដ្ឋមន្ត្រី​ក្រសួង​ធនធាន​ទឹក និង​ឧតុនិយម លោក លឹម គានហោ ប្រាប់​សារព័ត៌មាន​គាំទ្រ​លោក ហ៊ុន សែន ថា លោក​បាន​ទៅ​ពិនិត្យមើល​ទឹកស្ទឹង​នៅ​ក្នុង​ស្រុក​ស្ទោង ខេត្ត​កំពង់ធំ កាលពី​ថ្ងៃ​ទី៨ កុម្ភៈ ហើយ​ឃើញ​ថា ទឹកស្ទឹង​ស្ទោង​បាន​រីង​ហួត​អស់។

លោក​ថ្លែង​ថា ពលរដ្ឋ​ព្រួយបារម្ភ​អំពី​ការ​ខ្វះ​ទឹក​ប្រើ​ប្រចាំថ្ងៃ ពីព្រោះ​ទឹកស្ទឹង​ស្ទោង​ដែល​ជា​ប្រភព​ទឹក​ដែល​ពលរដ្ឋ​ធ្លាប់តែ​ទៅ​ដង​យក​មក​ប្រើ​ប្រាស់​នោះ កន្លែង​ខ្លះ​ត្រូវ​រីងស្ងួត ដាច់​ជា​កង់ៗ ដោយ​អន្លើៗ ហើយ​ដើម្បី​ដោះស្រាយ​បញ្ហា​ខ្វះ​ទឹក​ប្រើប្រាស់​ជូន​ពលរដ្ឋ​នៅ​តំបន់​នោះ​ឱ្យ​ទាន់​ពេល លោក លឹម គានហោ បាន​ឱ្យ​មន្ត្រី​ជំនាញ​ត្រៀម​អ៊ិចស្កាវ៉ាទ័រ មួយ​ចំនួន​សម្រាប់​ជីក​អណ្ដូងទឹក​នៅ​តាម​បណ្ដោយ​នៃ​ស្ទឹង​ស្ទោង​ជាច្រើន​កន្លែង​ដើម្បី​ទុក​ឱ្យ​ពលរដ្ឋ​ប្រើប្រាស់។

ការ​ព្យាករណ៍​របស់​ក្រសួង​ធនធាន​ទឹក និង​ឧតុនិយម​បង្ហាញ​ថា ក្នុង​រដូវប្រាំង​នៅ​ឆ្នាំ​២០១៩​នេះ កម្ពុជា​នឹង​ជួប​គ្រោះ​រាំងស្ងួត​ហួតហែង​ខ្លាំង ជាពិសេស​ក្នុង​អំឡុង​ខែ​មេសា និង​ខែ​ឧសភា​ខាងមុខ​នេះ​ហើយ កម្ដៅ​អាច​នឹង​ឡើង​ដល់​ទៅ​ជាង ៤០​អង្សា ដោយសារតែ​កម្ពុជា​រង​ដោយ​ប្រយោល ពី​ឥទ្ធិពល​បាតុភូត​អែលនីណូ (El Nino)។ ឥទ្ធិពល​នៃ​បាតុភូត​នេះ​នឹង​បង្ក​ឱ្យ​មាន​ភ្លៀង​កក់ខែ​តិច មាន​បាតុភូត​ផ្គរ​រន្ទះ និង​ខ្យល់​កន្ត្រាក់​កើតឡើង​ច្រើន​ហើយ​រដូវវស្សា និង​ចូល​មក​ដល់​យឺត​ជាង​បណ្ដា​ឆ្នាំ​កន្លងទៅ។

មេដឹកនាំ​របប​ក្រុងភ្នំពេញ​លោក ហ៊ុន សែន បាន​ចេញ​សារាចរ​មួយ​កាលពី​ថ្ងៃ​ទី​១៧ ខែ​មករា​កន្លង​ទៅ​ដោយ​អនុញ្ញាត​ឱ្យ​កសិករ​ធ្វើ​ស្រូវប្រាំង​បានតែ ១​ដង​ប៉ុណ្ណោះ និង​ត្រូវ​ដាំ​ដំណាំ​រួមផ្សំ​ផ្សេងទៀត​ដើម្បី​ទុក​ផ្គត់ផ្គង់​សម្រាប់​តែ​ការប្រើប្រាស់​ប្រចាំថ្ងៃ និង​អំពាវនាវ​ដល់​អាជ្ញាធរ និង​ប្រជាពលរដ្ឋ​ត្រូវ​ចាត់​វិធានការ​ថែរក្សា​ទឹក​ទុក​សម្រាប់​ប្រើប្រាស់​នៅ​ពេល​ចាំបាច់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល