RFA/Uon Chhin
អាជ្ញាធរខេត្តកំពតមិនទាន់ប្រកាសអាសន្នករណីជំនន់ទឹកភ្លៀងនៅខេត្តកំពតឡើយ បើទោះបីជាមានពលរដ្ឋប្រមាណ២ម៉ឺននាក់រងផលប៉ះពាល់ពីបញ្ហានេះក្ដី។
អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ឲ្យដឹងនៅល្ងាចថ្ងៃទី១៧ កញ្ញា ថាស្ថានភាពទឹកជំនន់បានស្រកបណ្ដើរៗហើយ ចំណែកអាជ្ញាធរខេត្ត និងអាជ្ញាធរស្រុកបានចុះត្រួតពិនិត្យគ្រប់ទីកន្លែង និងម្ចាស់ការខ្លួនឯងហើយ។
លោកបន្ថែមថា បើព្យុះពីប្រទេសជិតខាង អស់ឥទ្ធិពលនៅត្រឹមថ្ងៃទី១៨ កញ្ញា តាមការព្យាករណ៍របស់ក្រសួងធនធានទឹក និងឧតុនិយមនោះ ស្ថានភាពទឹកជំនន់នឹងលែងបង្កជាបញ្ហាទៀតហើយ៖ «ឥឡូវនេះអាជ្ញាធរគ្រប់លំដាប់ថ្នាក់ ត្រៀមចុះត្រួតពិនិត្យតាមដងទន្លេ និងមុខទឹក ដើម្បីការពារកុំឲ្យមានពលរដ្ឋស្លាប់ ជាពិសេសចាស់ជរា និងក្មេងៗ។ ទីពីរយើងមើលលទ្ធភាពដែលអាចយកបានដូចជាសត្វពាហនៈជាដើម»។
លោក ញឹម វណ្ណដា បញ្ជាក់ថា ពលរដ្ឋរងផលប៉ះពាល់មានប្រមាណពីរម៉ឺននាក់ និងផ្ទះប្រមាណ៤ពាន់ខ្នង ក្នុងចំណោមពលរដ្ឋ៣សង្កាត់ ក្នុងក្រុងកំពត និង៥ឃុំនៃស្រុកទឹកឈូ្ ប៉ុន្តែពុំមានគ្រោះថ្នាក់ដល់អាយុជីវិតឡើយ។
យ៉ាងណាក៏ដោយលោក ញឹម វណ្ណដា អះអាងថា ប្រភពទឹកដែលធ្វើឲ្យជន់លិចផ្ទះពលរដ្ឋ មកពីឥទ្ធិពលខ្យល់ព្យុះនៅប្រទេសជិតខាង ហើយបណ្ដាលឲ្យមានភ្លៀងធ្លាក់ច្រើន និងហូរធ្លាក់ពីតាកែនកោះស្លា ភ្នំបូកគោ វារីអគ្គិសនីភ្នំកំចាយ និងទឹកជោរពីសមុទ្រជាដើម៕
