អាជ្ញាធរ​ស្ដារ​ប្រឡាយ​បង្ហូរទឹក​ចេញ​ពី​ជង្ហុក​អូរ​នៅ​ក្រុង​ព្រះសីហនុ ឯ​ក្រុង​កំពត​ត្រូវ​លិច​ និង​បាក់​ទំនប់​មួយ

ដោយ ហេង រស្មី
2019-08-11
អ៊ីម៉ែល
មតិ
Share
បោះពុម្ព
សកម្មភាព​អាជ្ញាធរ​ខេត្ត​ព្រះសីហនុ ​ស្ដារ​ប្រឡាយ​នានា នៅ​ក្នុង​ក្រុង ដើម្បី​រំដោះ​ទឹក​ចេញពី​ម្ដុំ​អូរ​ដែល​ដក់​ទឹក​ជន់​លិច នៅ​ថ្ងៃ​ទី១១ ខែ​សីហា ឆ្នាំ​២០១៩។
សកម្មភាព​អាជ្ញាធរ​ខេត្ត​ព្រះសីហនុ ​ស្ដារ​ប្រឡាយ​នានា នៅ​ក្នុង​ក្រុង ដើម្បី​រំដោះ​ទឹក​ចេញពី​ម្ដុំ​អូរ​ដែល​ដក់​ទឹក​ជន់​លិច នៅ​ថ្ងៃ​ទី១១ ខែ​សីហា ឆ្នាំ​២០១៩។
រូប​រដ្ឋបាល​ខេត្ត​ព្រះសីហនុ

អាជ្ញាធរ​ខេត្ត​ព្រះសីហនុ ចាប់ផ្ដើម​ស្ដារ​ប្រឡាយ​នានា នៅ​ក្នុង​ក្រុង ដើម្បី​រំដោះ​ទឹក​ចេញពី​ម្ដុំ​អូរ​ដែល​ដក់​ទឹក​ជន់​លិច។ ស្ថានភាព​ជំនន់​ទឹកភ្លៀង​នៅ​ខេត្ត​ព្រះសីហនុ ក៏​ស្រក​ទៅវិញ​បណ្ដើរៗ តែ​នៅ​ឯ​ខេត្ត​កំពត ទឹក​កំពុង​ជន់​លិច​ខ្លាំង ហូរ​ពេញ​ក្រុង​កំពត និង​បាក់​ទំនប់ទឹក​មួយ បណ្ដាល​ឱ្យ​លិចលង់​ឃុំ​ចំនួន​៤ នៅ​ស្រុក​ទឹកឈូ។

គេហទំព័រ​ហ្វេសប៊ុក (Facebook) របស់​រដ្ឋបាល​ខេត្ត​ព្រះសីហនុ ចុះផ្សាយ​ថា អភិបាល​ខេត្ត លោក គួច ចំរើន នៅតែ​បន្ត​ចុះ​មើល​ទីតាំង​លិចលង់​ដោយ​ទឹកជំនន់ នៅ​ក្នុង​ក្រុងព្រះសីហនុ ស្រុក​ព្រៃនប់ និង​ស្រុក​កំពង់សីលា។ អាជ្ញាធរ​បាន​ដាក់​គ្រឿងចក្រ​ច្រើន​គ្រឿង ដើម្បី​ស្ដារ​ប្រឡាយ​នានា ក្នុង​ក្រុង​ព្រះសីហនុ រំដោះ​ទឹក​ចេញពី​ក្រុង ដូចជា ប្រឡាយ​នៅ​តំបន់​ភូមិ​អាចម៍​មឹក ភូមិ​៥ ក្នុង​សង្កាត់​លេខ​៤ ស្ដារ​ប្រឡាយ​អូរ​១ អូរ​ឈើទាល អូរ​សំអាត ឬ​អូរសុខា​ជាដើម។

សកម្មជន​បរិស្ថាន លោក ថុន រដ្ឋា ដែល​ចុះទៅ​ឃ្លាំមើល​ស្ថានភាព​ទឹក​នៅ​ខេត្ត​ព្រះសីហនុ ឱ្យ​ដឹង​បន្ថែម​ថា ស្ថានភាព​ជំនន់​ទឹកភ្លៀង នៅ​ថ្ងៃ​ទី​១១ សីហា បាន​ស្រក​ចុះ​ខ្លាំង ដ្បិត​ភ្លៀង​នៅ​បន្ត​ធ្លាក់​រប៉ាត់រប៉ាយ និង​យូរៗ មេឃ​ធ្លាក់​ភ្លៀង​ម្ដង។ លោក​ថា វិធានការ​ស្ដារ​ប្រឡាយ​របស់​អាជ្ញាធរ អាច​ទប់ទល់​បាន ចំពោះ​ការ​ធ្លាក់​ភ្លៀង​ក្រោម ២​ម៉ោង​។ ប៉ុន្តែ​បើ​ភ្លៀង​បន្ត​ធ្លាក់​លើស​ពី ២​ម៉ោង ពលរដ្ឋ​រស់នៅ​ម្ដុំ​ទំនាប​អូរ ក្នុង​ក្រុងព្រះសីហនុ នៅតែ​ប្រឈម​ការ​លិចលង់​។ លោក ថុន រដ្ឋា ប្រាប់​ថា ស្ថានភាព​ពលរដ្ឋ​រស់នៅ​ម្ដុំ​អូរ បាន​នាំគ្នា​យក​បាវ​ច្រក​ខ្សាច់​ដាក់​មុខ​ផ្ទះ ដើម្បី​ទប់ទឹក​ជំនន់​ហូរ​ចូល​ផ្ទះ ឯ​ពលរដ្ឋ​ខ្លះ មិន​ទាន់​ហ៊ាន​ប្រមូល​អ៊ីវ៉ាន់​ចូល​ផ្ទះ​នៅឡើយ​ទេ ព្រោះ​ខ្លាច​ភ្លៀង​ខ្លាំង លិច​ចូល​ផ្ទះ​ទៀត៖ «ខ្ញុំ​ឃើញ​មួយ​កន្លែង ដែល​គេ​កំពុង​ដាក់​អាអិច (គ្រឿងចក្រ​) ដើម្បី​ឈូស​ឆាយ​សំរាម​ចេញ​ផង ហើយ​និង​ស្ដារ​ប្រឡាយ​ផង។ តែ​អាច​ថា នេះ​គ្រាន់តែ​ជា​ការ​ដោះស្រាយ​បណ្ដោះអាសន្ន​សម្រាប់​ពេល​ភ្លៀង។ តាម​ផ្ទះ​មួយ​ចំនួន គាត់​ដាក់​បាវ​ខ្សាច់​មួយ​ចំនួន ដើម្បី​ធ្វើ​យ៉ាង​ម្ដេច​ឱ្យ​ផ្ទះ គាត់​ខ្ពស់ កុំ​ឱ្យ​ទឹក​បុក​ចូល​បាន។ កន្លែង​ខ្លះ ក៏​គាត់​ព្យាយាម​លាង​សំអាត ប៉ុន្តែ​មើល​ឃើញ​ថា គាត់​នៅតែ​បារម្ភ ព្រោះ​បើ​តាម​ការផ្សាយ​លឺ​ថា ពួកគាត់​និយាយ​ថា រហូត​ដល់​ថ្ងៃ​ទី​១៦ ឈប់​មាន​ភ្លៀង ហើយ​នៅ​កំពង់សោម ជាទូទៅ​គឺ​ភ្លៀង​អត់​ទៀត ហើយ​វា​តែងតែ​ភ្លៀង​ជា​ញឹកញាប់ សម្រាប់​រដូវ​វស្សា។ គាត់​នៅតែ​បារម្ភ​ភ័យ​ថា បើ​ភ្លៀង​ខ្លាំង វា​នៅតែ​បន្ត​លិច​ដដែល»

នៅ​ថ្ងៃ​ទី​១១ សីហា អគ្គិសនី​ខេត្ត​ព្រះសីហនុ ក៏បាន​ផ្ដាច់​ចរន្តអគ្គិសនី​បណ្ដោះអាសន្ន​នៅ​កាប៊ីន​ភ្លើង​មួយ​ចំនួន ស្ថិតនៅ​ផ្នែក​ខ្លះ​នៃ​សង្កាត់​លេខ១ សង្កាត់​លេខ​២ សង្កាត់​លេខ៣ សង្កាត់​លេខ៤ ក្រុង​ព្រះសីហនុ ដើម្បី​ការពារ​សុវត្ថិភាព​ពលរដ្ឋ ជៀសវាង​ការ​ឆ្លង​ចរន្តអគ្គិសនី។ អាជ្ញាធរ​អគ្គិសនី​ខេត្ត​ព្រះសីហនុ ប្រាប់​ថា ក្រុមបច្ចេកទេស​ភ្លើង​នឹង​ភ្ជាប់​ចរន្ត​ជូន​អតិថិជន​វិញ នៅ​ពេល​ជំនន់​ទឹកភ្លៀង​ស្រក​ចុះ។

ស្រប​ពេល​គ្នា​នេះ នៅ​ឯ​ខេត្ត​កំពត​វិញ ទឹក​បន្ត​លិចលង់​ហូរ​ចូល​ក្នុង​ក្រុង​កំពត និង​លិច​ផ្ទះ​ពលរដ្ឋ​កាន់តែ​ច្រើន​នៅ​ស្រុក​ទឹកឈូ។ សមាជិក​ក្រុមប្រឹក្សា​ជាប់ឆ្នោត​ខេត្ត​កំពត លោក កូវ យិតឡាយ ប្រាប់​ថា ទឹក​បន្ត​លិច​ក្នុង​ក្រុង​កំពត កម្ពស់​កន្លះ​ម៉ែត្រ។ ផ្សារ​សាមគ្គី​ខេត្ត​កំពត និង​តំបន់​ជាប់មាត់​ព្រែក​កំពង់បាយ ឬ​ព្រែកកំពត នៅ​បន្ត​ជន់​លិចលង់។

ចំណែក​ពលរដ្ឋ​រស់នៅ​តាម​ភូមិ បណ្ដោយ​មាត់​ព្រែក​កំពង់បាយ ដែល​រង​ការ​បង្ហូរទឹក​ទម្លាក់​ពី​វារីអគ្គិសនី​ភ្នំ​កំចាយ ក៏​នៅ​លិចលង់ មិន​ទាន់​ស្រក​ដែរ។ លោក កូវ យិតឡាយ ឱ្យ​ដឹង​ទៀត​ថា នៅ​ព្រឹក​ថ្ងៃ​ទី​១១ សីហា ទឹកភ្លៀង​បាន​វាយ​បាក់​ទំនប់​ប្រទាក់​ក្រឡា បណ្ដាល​ឱ្យ​ឃុំ​សង្កាត់ ចំនួន​៤ បន្ថែម​ទៀត នៅ​ស្រុក​ទឹកឈូ និង​ខេត្ត​កែប រង​ការ​លិចលង់ គឺ​ឃុំ​ត្រពាំង​សង្កែ ឃុំ​ត្រពាំង​ក្រសាំង ឃុំ​កូន​សត្វ នៃ​ស្រុក​ទឹកឈូ និង​សង្កាត់ អូរ​ក្រសារ ក្រុងកែប៖ «ទឹកជំនន់​នៅ​កំពត បាន​ស្រក​បន្តិច​ណា បាន​ស្រក​ជា​ពី​ម្សិលមិញ​បន្តិច។ ក៏ប៉ុន្តែ​នៅ​ទំនប់​ប្រទាក់​ក្រឡា​បាក់ បាក់​ទំនប់​ហ្មង។ នៅ​ក្រុង​កំពត ដូច​ខ្ញុំ​ថា អ៊ីចឹង លិច​ត្រឹម​កន្លះ​ម៉ែត្រ លិច​កន្លះ​ម៉ែត្រ ជាង​កន្លះ​ម៉ែត្រ វា​ដោយ​តំបន់ វា​មិន​ស្មើ​ទូទៅ​ទេ​។ ប៉ុន្តែ​នៅ​(​ឃុំ​)​កំពង់​គ្រែង ស្រក​ច្រើន​។ ស្រក​អស់​ប្រហែល​កន្លះ​ម៉ែត្រ​ដែរ នៅសល់​ប្រហែល​កន្លះ​ម៉ែត្រ​ទៀត អ៊ីចឹង​ណា»

គេហទំព័រ​ហ្វេសប៊ុក​រដ្ឋបាល​ខេត្ត​ព្រះសីហនុ និង​ខេត្ត​កំពត ចុះផ្សាយ​ថា អភិបាល​ខេត្ត​ទាំងពីរ បាន​ដឹក​អំណោយ ទៅ​ចែក​ជូន​ពលរដ្ឋ​រងគ្រោះ​ពី​ទឹកជំនន់​ដល់​មូលដ្ឋាន និង​អះអាង​ថា ការចែក​អំណោយ មិន​ប្រកាន់​រើសអើង​វណ្ណៈ ជាតិ​សាសន៍ ពណ៌​សម្បុរ ឬ​និន្នាការ​នយោបាយ​ឡើយ។

ក្រសួង​ធនធាន​ទឹក និង​ឧតុនិយម បាន​ជូនដំណឹង​ថា ខេត្ត​ជាប់មាត់​សមុទ្រ ពិសេស​ខេត្ត​ព្រះសីហនុ កោះកុង រួម​ទាំង​ខេត្ត​ជាប់​ព្រំដែន​វៀតណាម នឹង​មាន​ភ្លៀង​ធ្លាក់​ខ្លាំង ចាប់ពី​ថ្ងៃ​ទី​១០ ដល់​ថ្ងៃ​ទី​១៦ សីហា ហើយ​អាច​បង្ក​ជា​ជំនន់​ទឹកភ្លៀង ព្រោះ​តំបន់​ទាំងនោះ ត្រូវ​រង​ឥទ្ធិពល​ព្យុះ និង​ខ្យល់មូសុង​និរតី​។ ផ្ទៃសមុទ្រ ក៏​អាច​មាន​ភ្លៀង​ធ្លាក់​គ្រប់​ពេល ខ្យល់​ខ្លាំង និង​រលក​សមុទ្រ មាន​កម្ពស់ ១​ម៉ែត្រ ទៅ ២​ម៉ែត្រ​។ ថ្វីបើ​ក្រសួង​ធនធានទឹក ព្យាករ​ថា ភ្លៀង​​ខ្លាំង​អាច​ត្រឹម​ថ្ងៃ​ទី​១៦ សីហា តែ​អ្នកនេសាទ សង្កេត​ឃើញ​ថា ជាទូទៅ​តំបន់​មាត់សមុទ្រ មាន​ភ្លៀង​យូរ​ជាង​តំបន់​ដទៃ​។ ទន្ទឹមគ្នា​នេះ​ដែរ អាជ្ញាធរ​អំពាវនាវ​ដល់​ពលរដ្ឋ​នៅ​ខេត្ត​រតនគិរី និង​ខេត្ត​កោះកុង ឱ្យ​ប្រុងប្រយ័ត្ន​ចំពោះ​ទឹកជំនន់ ទោះជា​ទឹកបាន​ស្រក​ទៅវិញ​ហើយ​ក្ដី។ ជាពិសេស អាជ្ញាធរ​ក៏​សុំ​ឱ្យ​ពលរដ្ឋ​នៅ​ខេត្ត​បាត់ដំបង​ប្រុងប្រយ័ត្ន​ជាមុន​ដែរ ព្រោះ​ទឹកស្ទឹង​សង្កែ​កំពុង​ហក់​ឡើង ជិត​ដល់​កម្រិត​ប្រកាស​អាសន្ន ក្រោយ​ពី​មាន​ភ្លៀង​ធ្លាក់​ខ្លាំង​នៅ​តំបន់​ខាងលើ ក្នុងស្រុក​សំឡូត​ជាប់​ព្រំដែន​ថៃ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល