ពលរដ្ឋ​ជាង​១.៥០០​គ្រួសារ​ក្នុង​ស្រុក​ទឹកឈូ​កំពុង​រង​គ្រោះ​ដោយ​ទឹក​ជំនន់

ដោយ យ៉ង ចាន់តារា
2015-09-16
អ៊ីម៉ែល
មតិ
Share
បោះពុម្ព
ទឹក​ជំនន់​ជន់​លិច​នៅ​ភូមិ​កំពង់ក្រែង ឃុំ​កំពង់ក្រែង ស្រុក​ទឹកឈូ ខេត្ត​កំពត។ រូបថត​ថ្ងៃ​ទី​១៦ កញ្ញា ឆ្នាំ​២០១៥
ទឹក​ជំនន់​ជន់​លិច​នៅ​ភូមិ​កំពង់ក្រែង ឃុំ​កំពង់ក្រែង ស្រុក​ទឹកឈូ ខេត្ត​កំពត។ រូបថត​ថ្ងៃ​ទី​១៦ កញ្ញា ឆ្នាំ​២០១៥
LICADHO Photo

ទឹក​ជំនន់​កំពុង​បង្ក​ជា​បញ្ហា​ដល់​ប្រជាពលរដ្ឋ​ជា​ច្រើន​នៅ​ស្រុក​ទឹកឈូ ខេត្ត​កំពត។ ភ្លៀង​បង្អុរ​ឥត​ឈប់ រួម​ទាំង​ការ​បើក​ទ្វារ​ទឹក​ពី​ទំនប់​វារីអគ្គិសនី​ដែល​នៅ​ក្នុង​តំបន់​ផង បាន​ធ្វើ​ឱ្យ​ទឹក​ឡើង​យ៉ាង​គំហុក ជន់​លិច​លំនៅឋាន​របស់​ពលរដ្ឋ។

ប្រជាពលរដ្ឋ ១.៥៧១​គ្រួសារ ក្នុង​ឃុំ​មួយ​ចំនួន​នៃ​ស្រុក​ទឹកឈូ ខេត្ត​កំពត កំពុង​រងគ្រោះ​ដោយ​ទឹក​ជំនន់។ តាម​ការ​អះអាង​របស់​ពលរដ្ឋ ទឹកជំនន់​កំពុង​ជន់​លិច​ឃុំ​ចំនួន ៣ គឺ​ឃុំ​ម៉ាក់ប្រាង្គ ឃុំ​កំពង់ក្រែង និង​ឃុំ​ព្រៃឃ្មុំ ហើយ​កំពុង​បន្ត​ជន់​លិច​ផ្នែក​ខ្លះ​ទៀត​នៃ​ឃុំ​ស្ទឹងកែវ ស្រុក​ទឹកឈូ ខេត្ត​កំពត។

ពលរដ្ឋ​ម្នាក់​រស់​នៅ​ភូមិ​ស្នំប្រាំពីរ នៃ​ឃុំ​ម៉ាក់ប្រាង្គ លោក ជឹម ផល្លា បាន​អះអាង​ថា ទឹកជំនន់​នេះ​កើត​មាន​តាំង​យប់​ថ្ងៃ​ទី​១៥ ខែ​កញ្ញា និង​បាន​រាលដាល​ទៅ​តំបន់​ក្បែរ​នោះ ដោយសារ​តែ​មេឃ​នៅ​បន្ត​ភ្លៀង ជា​ហេតុ​ធ្វើ​ឱ្យ​បរិមាណ​ទឹក​ដ៏​ច្រើន​ហូរ​ចេញ​ភ្នំ​បូកគោ និង​ពី​ទំនប់​វារីអគ្គិសនី​កំចាយ។ លោក​បាន​បញ្ជាក់​ថា ទឹក​ជំនន់​នេះ​បាន​ធ្វើ​ឱ្យ​ប៉ះពាល់​ដល់​លំនៅឋាន ដំណាំ និង​សត្វ​ចិញ្ចឹម​របស់​ពលរដ្ឋ៖ «វា​រង​ហើយ ទឹក​កំពុង​តែ​ឡើង ខ្លះ​ណា​បាត់​មាន់​បាត់​ទា បាត់​អីវ៉ាន់​អី​ច្រើន​ណាស់ ហើយ​ពេល​ណា​ទឹក​ស្រក​ទៅ​វិញ ផល​ដំណាំ​យើង​ដូចជា​ធូរេន​ដែល​ជា​ដំណាំ​យុទ្ធសាស្ត្រ ហើយ​ដំណាំ​ផ្សេងៗ​ទៀត​ដូចជា​ចេក ល្ហុង អំពៅ​អី វា​អាច​រលួយ ហើយ​ជាពិសេស​ស្រូវ​វា​រលួយ​ហើយ​ពេល​ហ្នឹង»

ទាញ​យក​កម្មវីធី

ទាក់ទង​នឹង​បញ្ហា​ទឹក​ជំនន់​នេះ លោក អ៊ុក ឡាយ អភិបាល​ស្រុក​ទឹកឈូ បាន​ឱ្យ​វិទ្យុ​អាស៊ីសេរី ដឹង​នៅ​រសៀល​ថ្ងៃ​ទី​១៦ ខែ​កញ្ញា ថា អាជ្ញាធរ​កំពុង​មមាញឹក​ក្នុង​ការ​ត្រួត​ពិនិត្យ និង​ជម្លៀស​ប្រជាពលរដ្ឋ​ដែល​រងគ្រោះ។ លោក​បញ្ជក់​ថា អាជ្ញាធរ​មិន​ទាន់​អាច​វាយ​តម្លៃ​ពី​ផល​ប៉ះពាល់​នៃ​គ្រោះ​ទឹក​ជំនន់​នេះ​បាន​នៅ​ឡើយ ប៉ុន្តែ​លោក​បញ្ជាក់​ថា មិន​មាន​ពលរដ្ឋ​ណា​បាត់បង់​ជីវិត​នោះ​ឡើយ៖ «ជួយ​សង្គ្រោះ​ហ្នឹង កាល​ពី​ព្រឹក​មិញ​ខ្ញុំ​ជួល​ទូក ហើយ​ខាង​ជើង​ទឹក​ទៅ​ប្រចាំ​ការ​ដើម្បី​ជម្លៀស​ប្រជាពលរដ្ឋ ប៉ុន្តែ​ទឹក​វា​ឡើង​សន្សឹមៗ​ដែរ​ទេ ហើយ​កាកបាទ​ក្រហម​គាត់​ចែក​មី​ចែក​អី​ចំពោះ​ផ្ទះ​គ្នា​ដែល​ផ្ទះ​គាត់​អត់​មាន​អី»

អភិបាល​ស្រុក​ទឹកឈូ លោក អ៊ុក ឡាយ បាន​បដិសេធ​ការ​លើក​ឡើង​ថា ទឹក​ជំនន់​យ៉ាង​គំហុក​នេះ​បណ្ដាល​មក​ពី​ក្រុមហ៊ុន​ទំនប់​វារីអគ្គិសនី​កំចាយ​បើក​ទ្វារ​ទឹក។ លោក​បញ្ជាក់​ថា ដោយសារ​តែ​បរិមាណ​ទឹក​ច្រើន​ពេក ដូច​នេះ​ក្រុមហ៊ុន​ត្រូវ​តែ​បើក​ទ្វារ​ទឹក​ដើម្បី​កុំ​ឱ្យ​បាក់​ទំនប់ ប៉ុន្តែ​ក្រុមហ៊ុន​បាន​ជូន​ដំណឹង​ទៅ​អាជ្ញាធរ និង​ពលរដ្ឋ​រួច​រាល់​ហើយ ដើម្បី​ត្រៀម​ខ្លួន​ទុកជាមុន។ លោក អ៊ុក ឡាយ បាន​អះអាង​ថា អាជ្ញាធរ និង​ភាគី​ពាក់ព័ន្ធ​នានា ជា​អ្នក​ទទួល​ខុស​ត្រូវ​លើ​រឿង​នេះ៖ «ទទួល​ខុស​ត្រូវ​ហ្នឹង​អាជ្ញាធរ​ភូមិ-ឃុំ-ខេត្ត រួម​ទាំង​កាកបាទ​ក្រហម​ទាំងអស់​ហ្នឹង យើង​ចុះ​ទៅ​ទើប​ត្រឡប់​មក​វិញ។ ក្រុមហ៊ុន​ក៏​គេ​ជួយ​ដែរ គេ​ប្រាប់​មក​អាជ្ញាធរ​យើង រួច​យើង​ជូន​ដំណឹង​ទៅ​ប្រជាពលរដ្ឋ​ឲ្យ​ជម្លៀស​មក​រក​ទី​ទួល​មាន​សុវត្ថិភាព»

ទោះបីជា​យ៉ាង​ណា​ក៏ដោយ ពលរដ្ឋ​រងគ្រោះ​នៅតែ​អំពាវនាវ​ឱ្យ​អាជ្ញាធរ​ខេត្ត និង​មន្ត្រី​ពាក់ព័ន្ធ​ជួយ​អន្តរាគមន៍​ឱ្យ​បាន​ខ្លាំងក្លា និង​មាន​ប្រសិទ្ធភាព ដើម្បី​កុំ​ឱ្យ​ពួកគាត់​រង​ផល​ប៉ះពាល់​ច្រើន​ជាង​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

យុក សេងឡុង

ដើម្បីជាប្រយោជន៍ដល់ការសិក្សាពីផលប៉ះពាល់ជាអវិជ្ជមានពីទំនប់កំចាយ ដែលបណ្តាលឲ្យមានទឹកជំនន់នេះ សូមវិទ្យុអាស៊ីសេរី មេត្តាជួយសម្ភាសប្រជាពលរដ្ឋរងគ្រោះបន្ថែម ០៣ ឬ ០៤នាក់​ទាក់ទងនឹងការជន់លិចនេះ ថាតើកាលពីពេល​មុនមាន​ទំនប់កំចាយនេះ ធ្លាប់មានទឹកជំនន់ធ្ងន់ធ្ងរបែបនេះដែរទេ? សូមអរគុណ!

Sep 17, 2015 01:20 PM

គេហទំព័រ​ទាំងមូល