រដ្ឋាភិបាលអនុញ្ញាតឲ្យក្រុមហ៊ុន គ្លូប៊ល ហ្គ្រីន (ខេមបូឌា) (GLOBAL GREEN (CAMBODIA) ENERGY DEVELOPMENT CO., LTD របស់កូនឧកញ៉ា ទ្រី ភាព គឺលោក ទ្រី ដាលុច រុករកនិងធ្វើអាជីវកម្មរ៉ែដែកទូទាំងប្រទេស ខណៈការជីកយករ៉ែដែករបស់ក្រុមហ៊ុននេះ ធ្វើឲ្យប៉ះពាល់ដីស្រែចម្ការរបស់ប្រជាពលរដ្ឋជាច្រើនកន្លែង។
យោងតាមឯកសាររបស់ទីស្ដីការគណៈរដ្ឋមន្ត្រី ចុះកាលពីថ្ងៃទី ២០ខែកក្កដា ឆ្នាំ២០២៣ ដែលចុះហត្ថលេខាដោយរដ្ឋលេខាធិការប្រចាំ លោក ហ៊ីង ថូរ៉ាក់ស៊ី បានអនុញ្ញាត និងគាំទ្រឲ្យក្រុមហ៊ុន គ្លូប៊ល ហ្គ្រីន (ខេមបូឌា) របស់លោក ទ្រី ដាលុច រុករកនិងធ្វើអាជីវកម្មរ៉ែដែកទូទាំងប្រទេស ក្រោមហេតុផលថា ដើម្បីជួយរដ្ឋាភិបាលក្នុងការអភិវឌ្ឍសេដ្ឋកិច្ចជាតិក្រោយកូវីដ១៩ ខណៈបច្ចុប្បន្នក្រុមហ៊ុនមួយនេះ កំពុងតែធ្វើអាជីវកម្មរ៉ែដែកក្នុងខេត្តព្រះវិហារ និងដឹកយកទៅលក់នៅក្រៅប្រទេស។
រដ្ឋាភិបាលក៏បានបញ្ជាឲ្យក្រុមហ៊ុនចំនួន ២ គឺក្រុមហ៊ុន ព្រះវិហារ-ស្មាច់ រ៉េលវេ អេន ផត ប្រជេក ខមភេនី លីមីធីត (PREAH VIHEAR-SMARCH RAILWAY AND PORT PROJECT COMPANY LIMITED) និងក្រុមហ៊ុន ហ័រ យ៉ុង សេង អ៊ិនធើណេសិនណល ម៉ាញនីង (Hor Yong Seng International Mining Co. LTD) កំពុងរុករករ៉ែដែកលើផ្ទៃដីទំហំ ១៧៣ គីឡូម៉ែត្រការ៉េ ក្នុងខេត្តព្រះវិហារ ត្រូវប្រគល់ទៅឲ្យក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន (GLOBAL GREEN (CAMBODIA) ENERGY DEVELOPMENT CO., LTD ធ្វើជំនួសវិញ។
មេការក្រុមហ៊ុន គ្លូប៊ល ហ្គ្រីន សុំមិនបញ្ចេញឈ្មោះ ប្រាប់វិទ្យុអាស៊ីសេរី នៅថ្ងៃទី ១៥មករា ថា បច្ចុប្បន្នក្រុមហ៊ុនកំពុងធ្វើអាជីវកម្មរ៉ែដែកលក់ឲ្យបរទេស ដោយក្នុងមួយតោន តម្លៃ៨៥ដុល្លារ ដែលមានជាតិដែកនៅក្នុងថ្ម៦២ភាគរយ។ លោកបន្តថា ក្រុមហ៊ុនត្រូវបំប្លែងថ្មដែលមានជាតិដែកទៅជាបំណែកតូចជាមុនសិន ទើបដឹកចេញលក់ទៅក្រៅប្រទេស តាមច្រកក្អមសំណរព្រំដែនកម្ពុជា-វៀតណាម។
ប្រជាពលរដ្ឋនៅខេត្តព្រះវិហារចំនួន៣ស្រុកគឺស្រុករវៀង ស្រុកជ័យសែន និងស្រុកឆែប កំពុងមានវិវាទដីធ្លីជាមួយក្រុមហ៊ុន ដែលបានរំលោភបំពានឈូសឆាយដីស្រែចម្ការ និងដីព្រៃរាប់ពាន់ហិកតារ ខណៈពលរដ្ឋតំបន់នោះ ស្នើឲ្យមានដំណោះស្រាយ និងសំណងសមរម្យ ប៉ុន្តែក្រុមហ៊ុនមួយនេះ មិនបានធ្វើតាមការស្នើសុំរបស់ប្រជាពលរដ្ឋនោះទេ។ លើពីនោះ អាជ្ញាធរពាក់ព័ន្ធ ជាអ្នកដើរតួក្នុងការបញ្ចុះបញ្ចូលពលរដ្ឋ ឲ្យលក់ដីស្រែចម្ការ និងជាអ្នកកាងការពារឲ្យក្រុមហ៊ុន គ្លូប៊ល ហ្គ្រីន ថែមទៀត។
ជុំវិញរឿងនេះ វិទ្យុអាស៊ីសេរី មិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងរ៉ែនិងថាមពល លោក អ៊ឹង ឌីប៉ូឡា ដើម្បីសុំអត្ថាធិប្បាយបានទេ នៅថ្ងៃទី ១៥មករា ដោយទូរស័ព្ទចូលគ្មានអ្នកទទួល ។
ទាក់ទិននឹងបញ្ហានេះ អ្នកសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន យល់ឃើញថា រដ្ឋាភិបាលគួរតែសិក្សាស្រាវជ្រាវអំពីផលប៉ះពាល់ឲ្យបានត្រឹមត្រូវ និងមានតម្លាភាព ព្រមទាំងស្វែងរកដំណោះស្រាយ និងសំណងឲ្យបានសមរម្យសម្រាប់ប្រជាពលរដ្ឋរស់នៅតំបន់នោះ ដើម្បីជៀសវាងកុំឲ្យមានការរំលោភយកដីធ្លីទាំងបំពាន និងបណ្ដេញពលរដ្ឋចេញពីលំនៅឋានទាំងបង្ខំ។ លោកបន្ថែមថា អាជ្ញាធរពាក់ព័ន្ធត្រូវគិតប្រយោជន៍ប្រជាពលរដ្ឋជាធំ ដោយសារពលរដ្ឋទាំងអស់នោះ បានបោះឆ្នោតផ្ដល់សេចក្ដីទុកចិត្តឲ្យរដ្ឋាភិបាលការពារផលប្រយោជន៍របស់ពួកគាត់។
លោក អូត ឡាទីន៖ «រដ្ឋាភិបាលគួរតែគិតគូរ ក្នុងការធ្វើការអភិវឌ្ឍ ឬក៏ធ្វើការផ្ដល់សម្បទានរ៉ែ ឬក៏ផ្ដល់អាជ្ញាប័ណ្ណក្រុមហ៊ុនមួយ ធ្វើការរុករករ៉ែ ហើយធ្វើយ៉ាងណារកដំណោះស្រាយផ្ដល់សំណងដល់ប្រជាពលរដ្ឋឲ្យរួចរាល់ហើយឲ្យមានភាពយុត្តិធម៌ឲ្យមានតម្លាភាព ហើយចាប់ផ្ដើមធ្វើការអភិវឌ្ឍយើងអាចទទួលយកបានទាំងអស់គ្នា» ។
ក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន (GLOBAL GREEN (CAMBODIA) ENERGY DEVELOPMENT CO., LTD កំពុងធ្វើអាជីវកម្មរ៉ែដែកចំនួន៣កន្លែងផ្សេងគ្នា នៅស្រុករវៀងនិងស្រុកជ័យសែន ខេត្តព្រះវិហារ និងបានដឹកជញ្ជូនរ៉ែដែកទាំងនោះ លក់នៅក្រៅប្រទេស តាមច្រកអន្តរជាតិ ក្អមសំណរ ខេត្តកណ្ដាល ដោយដឹកជញ្ជូនពីខេត្តព្រះវិហារមកដាក់សាឡង់នៅ ស្រុកកំពង់លែង ខេត្តកំពង់ឆ្នាំង ។
ឧកញ៉ា ទ្រី ដាលុច មិនមែនត្រឹមតែជាអ្នកគ្រប់គ្រងក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន (GLOBAL GREEN (CAMBODIA) ENERGY DEVELOPMENT CO., LTD)មួយនោះទេ លោកក៏ជាអគ្គនាយករងក្រុមហ៊ុន ទ្រី ភាព គ្រុបផងដែរ។ លោក ទ្រី ដាលុច ត្រូវបានលោកនាយករដ្ឋមន្ត្រី ហ៊ុន សែន ទូលថ្វាយទៅព្រះមហាក្សត្រឲ្យផ្ដល់គោរមងារ «ឧកញ៉ា» នៅថ្ងៃទី១៩ ខែមីនា ឆ្នាំ២០១៣។
ក្រៅពីទទួលបានគោរមងារជា «ឧកញ៉ា» ហើយ លោក ទ្រី ដាលុច ក៏ត្រូវបានតែងតាំងជាទីប្រឹក្សាផ្ទាល់អតីតប្រធានរដ្ឋសភាលោក ហេង សំរិន ជាអនុប្រធានយុវជនស្រុកកណ្ដាលស្ទឹង និងជាអនុប្រធានក្រុមការងារថ្នាក់ជាតិគណបក្សប្រជាជនកម្ពុជាចុះជួយឃុំត្បែង ស្រុកកណ្ដាលស្ទឹង ខេត្តកណ្ដាល។ លោក ទ្រី ដាលុច មានអាយុ៣០ឆ្នាំ ជាកូនប្រុសច្បងរបស់អ្នកឧកញ៉ា ទ្រី ភាព ដែលល្បីខាងរកស៊ីឈើនិងបំផ្លិចបំផ្លាញធនធានធម្មជាតិនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។