ពលរដ្ឋសង្កាត់វាលស្បូវខណ្ឌច្បារអំពៅដុតកង់ឡានសុំបញ្ឈប់ការបូមខ្សាច់
2014.11.23
ប្រជាពលរដ្ឋរស់នៅ សង្កាត់វាលស្បូវ ខណ្ឌច្បារអំពៅ បាននាំគ្នាតវ៉ា ដុតកង់ឡាន ប្រឆាំងអាជីវកម្ម បូមខ្សាច់ក្នុងទន្លេ ធ្វើឲ្យបាក់ដីប៉ះពាល់ផ្ទះសម្បែង ដំណាំ និងជីវភាពរស់នៅ។ ការបូមខ្សាច់នេះ ត្រូវអ្នកជំនាញបរិស្ថាន អះអាងថាបានធ្វើឲ្យចលនាទឹកហូរ នៃធម្មជាតិផ្លាស់ប្ដូរ ប៉ុន្តែត្រូវកំណត់ចម្ងាយបូមខ្សាច់ច្បាស់លាស់។
ប្រជាពលរដ្ឋទាមទារឲ្យកាណូតបូមខ្សាច់ បញ្ឈប់សកម្មភាពនោះ ជាបន្ទាន់។
អភិបាលរងខណ្ឌច្បារអំពៅ លោក រស់ សុភ័គ្រ បានចុះទៅសង្កេតការណ៍ផ្ទាល់ ដល់កន្លែងដែលពលរដ្ឋច្រើនភូមិ ក្នុងសង្កាត់វាលស្បូវ ដុតកង់ឡាន ទាមទារបញ្ឈប់ការបូមខ្សាច់ទាំងថ្ងៃទាំងយប់ បង្កការភ័យខ្លាច បាក់ដីនិងផ្ទះចូលទន្លេ និងសំឡេងម៉ាស៊ីនបូមរំខានខ្លាំងដល់ការរស់នៅ។
លោក រស់ សុភ័គ្រ អភិបាលរងខណ្ឌច្បារអំពៅ ឲ្យដឹងថា កាលពីខែតុលា អាជ្ញាធរខណ្ឌច្បារអំពៅ បានបញ្ឈប់កាណូតបូមខ្សាច់នៅទីនោះ រួចម្ដងហើយ ស្រាប់តែនៅព្រឹកថ្ងៃអាទិត្យ ទី២៣ ខែវិច្ឆិកា ពលរដ្ឋប្ដឹងថា កាណូតមកបូមខ្សាច់បន្តទៀត ទើបលោកចុះពិនិត្យជាក់ស្ដែង៖ «ខ្ញុំទប់ស្កាត់ហើយ គឺអត់មានការបូមខ្សាច់ទេ ប៉ុន្តែមួយថ្ងៃនេះមិនដឹងយ៉ាងម៉េច បានសាឡង់ វាមកបូមខ្សាច់ នៅកន្លែងនឹងទៀត មិនដឹងជាខាងណាមកដាក់»។
អ្នកភូមិវាលស្បូវ លោក សុខ សឿន ថ្លែងថាកាណូតធំៗច្រើនគ្រឿង កំពុងបូមខ្សាច់ ពីក្នុងទន្លេ ក្បែរផ្ទះគាត់រស់នៅ ជិតវត្តវាលស្បូវ។ លោកអះអាងថា កាណូតនោះជារបស់ជនជាតិវៀតណាម ដែលព្យាយាមបំផ្លាញច្រាំងមាត់ទន្លេមេគង្គ ព្រោះតែកាណូតនីមួយៗ ប្រើទុយយោមុខកាត់ធំៗ ដូចជាក្នុងកាណូតមួយ ប្រើទុយយោ៣ទៅ៤ទុយយោ ខួងយកខ្សាច់ក្បែរផ្ទះពលរដ្ឋ បង្កការភ័យខ្លាច បាក់ផ្ទះចូលទន្លេ៖ «ពួកខ្ញុំអត់សុខចិត្ត ព្រោះទី១ពួកខ្ញុំខ្លាចបាក់ច្រាំង ទី២វាថ្លង់បូមទាំងយប់ទាំងថ្ងៃ»។
អ្នកភូមិក្ដីតាកុយ លោក រិទ្ធី អះអាងថា អាជ្ញាធរខណ្ឌច្បារអំពៅ កាលពីខែមុន បានកោះហៅ ម្ចាស់កាណូតជនជាតិវៀតណាម ឲ្យធ្វើកិច្ចសន្យាឈប់បូមខ្សាច់ក្បែរភូមិ តែអនុញ្ញាត ឲ្យបូមនៅកណ្ដាលទន្លេ។ សកម្មភាពបូមខ្សាច់ផ្អាកជិត១ខែ ស្រាប់តែ ២ទៅ៣ថ្ងៃនេះ កាណូតធំៗ៣គ្រឿង មកលួចបូមខ្សាច់ គឺពេលថ្ងៃ វាបូមចម្ងាយ២០០ម៉ែត្រ ពីច្រាំងទន្លេ ប៉ុន្តែពេលយប់វាមកបូមក្បែរភូមិ បង្កសំឡេងទ្រហឹងមិនអាចសម្រាន្តបាន៖ «វាប៉ះពាល់ថ្ងៃក្រោយ បើសិនបាក់ដី នឹងបាក់ផ្ទះសម្បែងតើប្រជាពលរដ្ឋ បានដីធ្លីរស់នៅតទៅទៀត នឹង នៅកន្លែងណា»។
បន្ថែមលើនោះ លោក អ៊ុក វណ្ណតារ៉ា អះអាងថា ប្រសិនបើមិនមានដំណោះស្រាយ ឆាប់ៗទេ ពួកគាត់នឹងបាតុកម្មទ្រង់ទ្រាយធំ ដើម្បីបណ្ដេញកាណូតវៀតណាមនោះ ចេញពីទន្លេមេគង្គ៖ «បើសិនជានៅបូមបន្តទៀត អាទិត្យក្រោយ ប្រជាជននឹងធ្វើបាតុកម្ម បិទថ្នល់ជាតិលេខ១ ខាងមុខវត្តវាលស្បូវ ដុតកង់ឡានដែរ ដើម្បីឲ្យខាងខណ្ឌនោះរកដំណោះស្រាយឲ្យបាន»។
ចៅសង្កាត់វាលស្បូវ អ្នកស្រី យឹម ស៊ីម៉ន ថ្លែងថា សកម្មភាពបូមខ្សាច់នេះ ភាគច្រើនបូមនៅពេលថ្ងៃ កាណូត វាបើកទៅបូមនៅក្បែរកោះមួយ ដុះកណ្ដាលទន្លេមេគង្គ ចន្លោះស្រុកល្វាឯម និងខណ្ឌ ច្បារអំពៅ ប៉ុន្តែនៅពេលយប់ វាមកបូមក្បែរ វត្តវាលស្បូវ និង វត្តក្ដីតាកុយ៖ «ពួកនឹងវានៅតែលួច មកបូមចូលដីនេះទៀត លើកមុនវាបូមនៅពាក់កណ្ដាលទន្លេល្វាឯម ហើយនិងវាលស្បូវ ពេលខ្លះវាលួចចូលមកដល់ក្នុងដី វាលស្បូវអីចឹង ពួកនឹងវាចូលចិត្តតែលួចអីចឹង»។
នាយកប្រតិបត្តិវេទិកានៃអង្គការ មិនមែនរដ្ឋាភិបាលស្ដីពីកម្ពុជា លោក តឹក វណ្ណារ៉ា ថ្លែងថា អាជីវកម្ម បូមខ្សាច់គឺធ្វើឲ្យទឹកទន្លេលែងស្ទះ បង្កឲ្យចរន្តនៃទឹកទន្លេហូរ វាផ្លាស់ប្ដូរ។ ប៉ុន្តែការបូមខ្សាច់នេះ បើមិនអនុវត្តតាមច្បាប់គ្រប់គ្រងខ្សាច់ ដែលបូមបានក្នុងកាណូតនីមួយៗ ត្រូវតាមខ្នាតនោះទេ បណ្ដាលឲ្យវិនាសកម្ម នៃការបាក់ច្រាំងទន្លេ ដោយសារមុខទឹកហូរបុកប៉ះភូមិឋាន ដែលនៅពីមុខទឹកធ្ងន់ធ្ងរ។
លោកបន្តថា រដ្ឋាភិបាលបានផ្ទេរអំណាចឲ្យស្ថាប័នវិមជ្ឈការនៅមូលដ្ឋានគ្រប់គ្រង គួរតែផ្ដល់អំណាច និងសិទ្ធិឲ្យគាត់ផ្អាកឬបញ្ឈប់ អាជីវកម្មបូមខ្សាច់ នៅពេលមូលដ្ឋានកំពុងរងគ្រោះ ដោយការបាក់ច្រាំងទន្លេនោះវិញ ជាជាងការធ្វើអន្តរាគមន៍ពីលើ ជាហេតុបណ្ដោយឲ្យឈ្មួញ កាន់តែបានចិត្តលួចបូមទៀត មិនខ្វល់ពីការបាក់ស្រុតដីច្រាំងទន្លេ ដែលអ្នកជំនាញឆ្លើយថា គ្រោះធម្មជាតិ។
មន្ត្រីក្រសួងបរិស្ថាន លោក ស្រ៊ុន ដារិទ្ធ ថ្លែងថា ការបូមខ្សាច់ត្រូវបច្ចេកទេស នាំឲ្យបរិស្ថានល្អ និងប្ដូររបត់ចរន្តទឹកហូរ ប៉ុន្តែមិនត្រូវបន្ទោសថាគ្រប់សកម្មភាពបូមខ្សាច់សុទ្ធតែនាំឲ្យបាក់ច្រាំងនោះទេ៖ «នៅស្រុកខ្ញុំខាងក្រូចឆ្មារ កាលខ្ញុំនៅនោះអត់ឃើញមានបូមខ្សាច់ទេ ប៉ុន្តែរហូតមកដល់ពេលនេះ ច្រាំងទន្លេខាងស្រុកខ្ញុំនោះ បាក់ប្រហែល៣០០ម៉ែត្រ។ ផ្ទះខ្ញុំរើ២ដងហើយ បាក់ដីនោះអត់មាន គេបូមទេ តែវាបាក់អានឹងខ្ញុំសន្និដ្ឋានថា ដោយសារតែការប្រែប្រួលចរន្តទឹក វាមិនមែនដោយសារ ការបូមនោះទេ អីចឹងហើយដើម្បីចៀសវាងកុំឲ្យបាក់ គេត្រូវបូមមែនទែន បូមសម្រួចកុំឲ្យវាបុកទៅកន្លែងណាមួយគឺវាបាក់ អានឹងបើនិយាយពីបច្ចេកទេស»។
នៅក្នុងប្រទេសកម្ពុជា ក្នុងរដូវទឹកឡើងឆ្នាំនេះ ការបាក់ច្រាំងទន្លេ បានកើតឡើងនៅរាធានីភ្នំពេញ ខេត្តកណ្តាល កំពង់ចាម ខេត្តក្រចេះជាដើម ដែលមានការសង្ស័យថា បណ្តាលមកពីការបូមខ្សាច់។
វិទ្យុអាស៊ីសេរី មិនអាចទាក់ទង អ្នកនាំពាក្យសាលារាជធានីភ្នំពេញ ក្រសួងធនធានទឹក ជាដើម សុំការបំភ្លឺ ពីស្ថាប័នទាំងនោះ ពាក់ព័ន្ធសកម្មភាពបូមខ្សាច់បានទេ នៅថ្ងៃអាទិត្យទី២៣ ខែ វិច្ឆិកា។
ពលរដ្ឋនៅក្នុងសង្កាត់វាលស្បូវ ឲ្យដឹងថា នៅពេលអាជ្ញាធរខណ្ឌ ចុះពិនិត្យផ្ទាល់ កាណូតបូមខ្សាច់ ទាំង៣គ្រឿង បានបើករត់ចេញពីច្រាំងទន្លេ នៅម៉ោងជិត១២ថ្ងៃត្រង់៕