មន្ត្រី​២​នាក់​នៅ​រតនគិរី​ត្រូវ​ឃុំ​ខ្លួន​បណ្ដោះ​អាសន្ន​សង្ស័យ​រួម​គំនិត​ប្រមូល​ផល​ឈើ​ទៅ​វៀតណាម

ដោយ រដ្ឋា វិសាល
2014-12-26
អ៊ីម៉ែល
មតិ
Share
បោះពុម្ព
គំនរ​ឈើ​ប្រណិត​ដែល​សមត្ថកិច្ច​ព្រៃ​ឈើ​ខេត្ត​រតនគិរី រក​ឃើញ​នៅ​ព្រៃ​ជិត​ព្រំដែន​ស្រុក​អូរយ៉ាដាវ ខេត្ត​រតនគិរី ជាប់​នឹង​ប្រទេស​វៀតណាម កាល​ពី​ថ្ងៃ​ទី​១៦ ខែ​តុលា ឆ្នាំ​២០១៣។
គំនរ​ឈើ​ប្រណិត​ដែល​សមត្ថកិច្ច​ព្រៃ​ឈើ​ខេត្ត​រតនគិរី រក​ឃើញ​នៅ​ព្រៃ​ជិត​ព្រំដែន​ស្រុក​អូរយ៉ាដាវ ខេត្ត​រតនគិរី ជាប់​នឹង​ប្រទេស​វៀតណាម កាល​ពី​ថ្ងៃ​ទី​១៦ ខែ​តុលា ឆ្នាំ​២០១៣។
Adhoc Photo

មន្ត្រី​ប៉ូលិស​ម្នាក់ និង​មន្ត្រី​យោធា​ម្នាក់ ត្រូវ​បាន​សមត្ថកិច្ច​ខេត្ត​រតនគិរី ឃាត់​ខ្លួន ក្នុង​បទ​ចោទ​រួម​គំនិត​ប្រមូល​ផល​ព្រៃ​ឈើ​ឆ្លង​ដែន​ទៅ​ប្រទេស​វៀតណាម។ នេះ គឺ​ជា​លទ្ធផល​ស៊ើប​អង្កេត​បឋម​របស់​អាជ្ញាធរ​ខេត្ត ទាក់ទិន​បទល្មើស​កាប់​ឈើ​នៅ​តំបន់​ស​ព្រំដែន​ស្រុក​អូរយ៉ាដាវ ខេត្ត​រតនគិរី។

ការ​ឃាត់​ខ្លួន​នេះ ធ្វើ​ឡើង​នៅ​ព្រឹក​ថ្ងៃ​ទី​២៦ ខែ​ធ្នូ បន្ទាប់​ពី​មន្ត្រី​អយ្យការ​បាន​កោះ​ហៅ​មន្ត្រី​ទាំង​ពីរ​នាក់​មក​សាកសួរ ក្នុង​បទ​សង្ស័យ​រួម​គំនិត​ប្រព្រឹត្ត​បទល្មើស​កាប់​ឈើ​ពី​ដី​ខ្មែរ ដឹក​ជញ្ជូន​ទៅ​ប្រទេស​វៀតណាម ខុស​ច្បាប់។

មន្ត្រី​ទាំង​ពីរ​នាក់ គឺ​នាយ​នគរបាល​ប៉ុស្តិ៍​រដ្ឋបាល​ភូមិ​ឡំ លោក ពូយ ច្រូក និង​ប្រធាន​យោធា​ប៉ុស្តិ៍​ការពារ​ព្រំដែន​ភូមិ​ភិ លោក រចំ អែម។

ព្រះរាជ​អាជ្ញា​រង​អម​តុលាការ​ខេត្ត​រតនគិរី លោក ម៉ម វណ្ណដា មាន​ប្រសាសន៍​បញ្ជាក់​ថា ជន​សង្ស័យ​ទាំង​ពីរ​នាក់ ត្រូវ​ចោទ​ប្រកាន់​ពី​បទ​រួម​គំនិត​ប្រមូល​ផល​អនុផល​ព្រៃ​ឈើ​ខុស​ច្បាប់។ ហេតុ​នេះ សមត្ថកិច្ច​កំពុង​រៀបចំ​កសាង​សំណុំ​រឿង​នេះ​បញ្ជូន​ទៅ​តុលាការ។ លោក​បន្ត​ថា ជន​ជាប់​ចោទ​ត្រូវ​ឃុំ​ខ្លួន​ជា​បណ្ដោះអាសន្ន​នៅ​បញ្ជា​ការដ្ឋាន​កង​រាជ​អាវុធហត្ថ​នៅ​ព្រឹក​ថ្ងៃ​ទី​២៦ ខែ​ធ្នូ៖ «យើង​សាកសួរ​ហើយ យើង​កំពុង​ឃាត់​នៅ​ប៉េអិម ហើយ​យើង​កំពុង​រៀបចំ​ឯកសារ​ដើម្បី​ចោទ​ប្រកាន់​គាត់។ ករណី​ផ្សំ​គំនិត​ក្នុង​សកម្មភាព​ប្រមូល​ផល​ព្រៃ​ឈើ»

កាល​ពី​ថ្ងៃ​ទី​១៧ ខែ​ធ្នូ អ្នក​ភូមិ​រស់នៅ​ជិត​តំបន់​ព្រំដែន​ប្រទេស​វៀតណាម ក្នុង​ភូមិ​ភិ ឃុំ​សេសាន្ត ស្រុក​អូរយ៉ាដាវ អះអាង​ថា ឈើ​មូល​រាប់​រយ​ដើម ត្រូវ​គេ​កាប់​នៅ​តំបន់​ជាប់​ព្រំដែន​ប្រទេស​វៀតណាម ក្នុង​ខេត្ត​រតនគិរី។ សកម្មភាព​កាប់​ឈើ​នេះ ធ្វើ​ឡើង​ដោយ​ពលរដ្ឋ​វៀតណាម និង​សង្ស័យ​មាន​មន្ត្រី​ប៉ូលិស​ការពារ​ព្រំដែន​នៅ​តំបន់​នោះ​ពាក់ព័ន្ធ​ឃុបឃិត។ ឈើ​ដែល​គេ​កាប់​នៅ​តំបន់​នោះ ជា​ប្រភេទ​ឈើ​មូល​លេខ​១ ត្រូវ​គេ​អារ​ជា​ឈើ​ជ្រុង​កាត់​ជា​កង់ ហើយ​ដឹក​ជញ្ជូន​ដោយ​រថយន្ត​ចូល​ទៅ​ទឹក​ដី​វៀតណាម។

វិទ្យុ​អាស៊ីសេរី មិន​អាច​ទាក់ទង​មន្ត្រី​ប៉ូលិស និង​យោធា​ទាំង​ពីរ​នាក់ សុំ​អធិប្បាយ​ជុំវិញ​ការ​ចោទ​ប្រកាន់​បាន​ទេ។

ក៏ប៉ុន្តែ អភិបាល​រង​ខេត្ត​រតនគិរី លោក លី វិន អះអាង​ថា ការ​ឃាត់​ខ្លួន​មន្ត្រី​ទាំង​ពីរ​នាក់ ធ្វើ​ឡើង​ស្រប​តាម​លក្ខន្តិកៈ​មន្ត្រី​រាជការ​ស៊ីវិល និង​យោធា។ លោក​បន្ត​ថា តុលាការ​នឹង​ធ្វើ​ការ​ស៊ើប​អង្កេត​បន្ថែម​ទៀត ទាក់ទិន​ការ​ចោទ​ប្រកាន់​មន្ត្រី​ទាំង​ពីរ​នាក់​នេះ៖ «បទល្មើស​យើង​ធ្វើ​តាម​សហ​លក្ខន្តិកៈ ដូច​លោក​សង្ឃ​អ៊ីចឹង យើង​ចាប់​ផ្សឹក»

ទាក់ទិន​ករណី​នេះ​ដែរ មន្ត្រី​ឃ្លាំ​មើល​បញ្ហា​ព្រៃ​ឈើ​សមាគម​អាដហុក (adhoc) ខេត្ត​រតនគិរី លោក ឆាយ ធី ចាត់​ទុក​លទ្ធផល​ស៊ើប​អង្កេត​របស់​អាជ្ញាធរ​ខេត្ត​រតនគិរី ពាក់ព័ន្ធ​បទល្មើស​ព្រៃ​ឈើ​ឆ្លង​ដែន​នេះ ថា​ជា​ជំហាន​វិជ្ជមាន​មួយ ដើម្បី​កាត់​បន្ថយ​សកម្មភាព​ពលរដ្ឋ​វៀតណាម លួច​កាប់​ឈើ​ក្នុង​ដី​ខ្មែរ។ លោក​កត់​សម្គាល់​ថា កន្លង​ទៅ​នេះ​ពលរដ្ឋ​វៀតណាម ជា​ក្រុមៗ បាន​ប្រើប្រាស់​ម៉ាស៊ីន​កាត់​ឈើ​ស្វ័យ​ប្រវត្តិ និង​រថយន្ត​ចូល​មក​អារ​រំលំ​ឈើ ហើយ​ដឹក​ជញ្ជូន​ចូល​ទៅ​ប្រទេស​វៀតណាម។ ចំណែក​ប្រជាពលរដ្ឋ​ជនជាតិ​ដើម​ភាគ​តិច​ខ្មែរ​រស់​នៅ​តំបន់​នោះ បាន​ចាប់​ឃាត់​ខ្លួន​ពលរដ្ឋ​វៀតណាម ចូល​មក​កាប់​ឈើ និង​វត្ថុ​តាង​មាន​រថយន្ត ត្រាក់ទ័រ ម៉ូតូ និង​ម៉ាស៊ីន​កាត់​ឈើ​ច្រើន​ករណី ក៏ប៉ុន្តែ​មួយ​ចំណែក​ធំ​នៃ​ការ​បង្ក្រាប​បទល្មើស​ព្រៃ​ឈើ​របស់​សហគមន៍ ត្រូវ​បាន​មន្ត្រី និង​សមត្ថកិច្ច​នៅ​តំបន់​នោះ​សម្រប​សម្រួល​ដោះ​លែង ក្នុង​ហេតុផល​សហប្រតិបត្តិការ​មិត្តភាព​ខេត្ត​ជាប់​គ្នា៖ «ការ​បង្ក្រាប និង​ចាត់​វិធានការ​ផ្លូវ​ច្បាប់​នេះ ប៉ះពាល់​ដល់​មន្ត្រី​មួយ​ចំនួន​ពិត​មែន តែ​ជា​ដំណើរ​ការ​ល្អ​ក្នុង​ការ​អនុវត្ត​ច្បាប់​របស់​តុលាការ​ខេត្ត​រតនគិរី»

កាល​ពី​ខែ​វិច្ឆិកា សមត្ថកិច្ច​ខេត្ត​រតនគិរី ចាប់​បាន​ពលរដ្ឋ​វៀតណាម ៦​នាក់ ពី​បទ​ឆ្លង​ដែន​កាប់​ឈើ​ក្នុង​ដី​ខ្មែរ។ ពលរដ្ឋ​វៀតណាម ទាំង ៦​នាក់ ត្រូវ​បាន​ចោទ​ប្រកាន់​តាម​ផ្លូវ​តុលាការ និង​ត្រូវ​ឃុំ​ខ្លួន​នៅ​ពន្ធនាគារ​ខេត្ត។ ដោយ​ឡែក​នៅ​ឯ​ឃុំ​ញ៉ាង ស្រុក​អណ្ដូងមាស កាល​ពី​ថ្ងៃ​ទី​២១ ខែ​ធ្នូ ក្រុម​ល្បាត​សហគមន៍ ១៥​នាក់ បាន​ព័ទ្ធ​ចាប់​ជនជាតិ​វៀតណាម ពីរ​នាក់ ខណៈ​ពួក​គេ​កំពុង​លួច​អារ​រំលំ​ឈើ​ក្នុង​ដី​ខ្មែរ ចំណុច​ភូមិ​តាំង​លោម ក៏ប៉ុន្តែ​ជនជាតិ​វៀតណាម ទាំង​នោះ​បាន​រត់​រួច រីឯ​សហគមន៍​រឹប​អូស​បាន​ម៉ាស៊ីន​កាត់​ឈើ​មួយ​គ្រឿង និង​ឧបករណ៍​ប្រព្រឹត្ត​បទល្មើស​មួយ​ចំនួន​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

ជនស្រឡាញ់លុយនិងស្នេហារបរទេសក្នងរបបផ្តាច់ការល្បីណា
ស់គ្មានប្រទេសណាដូចអាខ្មែរឡើយ!ខ្លួនប្រព្រឹត្តខុសមិនព្រម
ទទួលទេ!ពិសេសខ្លាចមានមនុស្សផ្តួលខ្លួនព្រោះខ្លួនធ្លាប់ផ្តួល
គេ!លើលោកនេះមានតែចោរធ្លាប់លួចទេដែលខ្លាចគេលួច
ទ្រព្យខ្លួន!មនុស្សក្លៅខ្លាចណាស់បងទ្រព្យព្រោះគ្មានចំណេះនឹ
ងរកទោះទៅទីណាក៍ត្រូវវេចស្ពាយទៅតាម!រីអ្នកមានចំណេះ
ពិតប្រាកដមិនត្រូវការអ្វីក្រៅពីអាយុជីវិតទេព្រោះមានសមត្ថ
ភាពក្នងការរកប្រាក់ចិញ្ចឹមជីវិតបានងាយ!មិនខុសពីសង្គម
ខ្មែរសព្វថ្ងៃក្លៅត្រូវប្រមូលសម្បត្តិជាតិអោយអស់និងប្លន់ទ្រព្យ
រាស្ត្រស្លូតត្រងទុកជាទ្រព្យខ្លួន!មិនចេះខ្មាស់មិនខ្វល់ទោះប្រ
ទេសល្បីក៍មិនឈឺក្បាល!សុំ=និងប្លន់!បងប្អូនខ្មែររស់នៅទូរ
ទាំងពីភពលោកចូរប្រយ័ត្ន!និងប្រទេសដឺកនាំដោយចោរ!
ចោរអាំងទែប៉ូលក៍រងចាំយើងដែរ!ដូចនេះយើងឈប់ក្រលេក
មើលក្រោយទៀតទៅ!ទុកអោយចោរវាប្លន់គ្នាវាទៅ!

Dec 26, 2014 02:58 AM

អ្នក​អាន​អនាមិក

ទំនងដែរ បើស្តាប់និងមើលទៅ តែស្តាយៗត្រង់ថាឈើដែលកាប់​នោះ​ពិតជាមិនអាចយក់ទៅដាំវិញទេ គឹមានតែយកទៅដូរយកលុយចែកគ្នា​ចាយតែប៉ុណ្ណោះ មែនទេលោក? បើលោក(អ្នកដឹកនាំលោក) ពិត​ជា​​ស្រឡាញ់ធម្មជាតិមែន ពេលឮសម្លេងរណា សម្លេងពូថៅ គឺ​ប្រញាប់​​ទៅឃាត់នេះបានចំជាអ្នកបំរើជាតិពិត តែបើរបៀបរាល់ថ្ងៃនេះ​គឺ​គ្រាន់​​តែ​​របៀបចែកគ្នាចាយ និងបម្រើហោប៉ៅ​និងជាបទ្ទចម្រៀងគេ​ច្រៀង​យកសម្លេងឆ្នោតទេ​ កុំខឹងអីខ្ញុំនិយាយលែងទេ។

Dec 26, 2014 02:53 AM

គេហទំព័រ​ទាំងមូល