ប្រជានេសាទនៅតំបន់ទន្លេសាបស្រុកឯកភ្នំ ខេត្តបាត់ដំបង ចោទប្រកាន់អាជ្ញាធរពាក់ព័ន្ធក្នុងមូលដ្ឋានថា ឃុបឃិតគ្នាប្រព្រឹត្តអំពើពុករលួយ ដើម្បីជាថ្នូរបើកឲ្យជនជាតិវៀតណាមធ្វើនេសាទខុសច្បាប់ដោយសេរី។ ពលរដ្ឋអះអាងថា ការធ្វើនេសាទនេះបានប៉ះពាល់យ៉ាងខ្លាំងដល់ការរកប្រាក់ចំណូលរបស់ពួកគាត់នៅតំបន់នោះ ដោយសារពិបាកក្នុងការនេសាទ។
ពលរដ្ឋរស់នៅស្រុកឯកភ្នំ ដែលធ្វើនេសាទជាលក្ខណៈគ្រួសារនៅបឹងទន្លេសាបជាប្រចាំ លើកឡើងថា ជនជាតិវៀតណាមតែងតែបើកកាណូតអូសផ្ដាច់មងនិងឧបករណ៍នេសាទរបស់ពួកគាត់។ ប្រជានេសាទនៅភូមិក្បាលតោលឃុំកោះជីវាំងស្រុកឯកភ្នំម្នាក់សុំមិនឲ្យបញ្ចេញឈ្មោះដើម្បីសុវត្ថិភាពផ្ទាល់ខ្លួន ថ្លែងឲ្យដឹងនៅថ្ងៃទី២៧ កុម្ភៈថា ទូកនេសាទជនជាតិវៀតណាមប្រមាណ ២០គ្រឿង ដោយបែងមួយក្រុម ២គ្រឿងធ្វើនេសាទដោយប្រើយ៉ាងកាវ ឬហៅអូសអួនក្រឡាញឹក ហើយមានដាក់ជើងច្រវាក់ដែកឆក់ ដែលមានបណ្ដោយប្រមាណ៨០ម៉ែត្រ និងទទឹងប្រហែល៧ម៉ែត្រ បានធ្វើនេសាទនៅបឹងទន្លេសាបក្នុងភូមិក្បាលតោល ហើយគ្មានអាជ្ញាធរណាទប់ស្កាត់នោះទេ។ពលរដ្ឋរូបនេះអះអាងទៀតថា ជនជាតិវៀតណាមធ្វើនេសាទបានដោយសារអាជ្ញាធរពាក់ព័ន្ធក្នុងមូលដ្ឋានយកប្រាក់ពីអ្នកនេសាទក្នុងទូកមួយ ចន្លោះពី១០ ទៅ ២០លានរៀល (២០.០០០.០០០៛)ដើម្បីជាថ្នូរបានធ្វើនេសាទខុសច្បាប់៖ «ហើយនៅក្នុងមូលដ្ឋានក៏គេមិនជួយពលរដ្ឋដែរ ចង់អ្នកណាធ្វើអីក៏គេយកអីយកទៅ គឺយ៉ាប់ខ្លាំងណាស់ចំពោះពលរដ្ឋក្រីក្រ ខ្ញុំចង់និយាយថាដូចគេបានរៀបគ្នាជាប្រព័ន្ធទៅហើយ។ព្រោះអីកន្លងមកលឺតែអាជ្ញាធរចុះមកបង្ក្រាបតែបានជោគជ័យសោះ។ខ្ញុំសំណូមពរឲ្យជួយទប់ស្កាត់ជនអន្តោប្រវេសន្តកុំឲ្យបំផ្លាញមច្ឆាជាតិនៅបឹងទន្លេសាប » ។
អ្នកស្រីបន្តថា ទូកនេសាទវៀតណាមក្នុងមួយក្រុមអាចរកចំណូលពីរបបនេសាទបានប្រហែល ១៥លានរៀល (១៥.០០០.០០០៛) ក្នុងមួយថ្ងៃ ព្រោះពួកគេមានសិទ្ធិធ្វើនេសាទបានទាំងយប់ទាំងថ្ងៃ ហើយកន្លែងខ្លះមានសមត្ថកិច្ចយាមការពារទៀតផង។
ឆ្លើយតបនឹងបញ្ហានេះអភិបាលស្រុកឯកភ្នំ លោក ម៉ិល សុផល មានប្រសាសន៍ប្រាប់អាស៊ីសេរីថាអាជ្ញាធរស្រុកមិនមានពាក់ព័ន្ធនឹងការយកលុយកាក់ពីអ្នកនេសាទដូចការចោទប្រកាន់នោះទេ។ លោកអះអាងទៀតថា កន្លងមកអាជ្ញាធរបានចុះទៅបង្ក្រាបការធ្វើនេសាទខុសច្បាប់ជាញឹកញាប់ដែរ ដោយទើបតែអាក់ខានប្រហែល ២សប្ដាហ៍កន្លងទៅប៉ុណ្ណោះ៖ «អ៊ី ចឹងមិនអីទេចាំមើលខ្ញុំចាត់វិធានការ ព្រោះប្រហែលជាងមួយអាទិត្យនេះខ្ញុំរវល់ខ្លាំង កន្លងមកខ្ញុំមានវិធានការបានមួយចំនួនធំហើយ ដូច្នេះបើសិននៅតែមានទៀតខ្ញុំនឹងចាត់វិធានការបន្តទៀត។សុំឲ្យពលរដ្ឋផ្ដល់ព័ត៌មានពីការធ្វើនេសាទខុសច្បាប់នេះមកខ្ញុំឲ្យច្បាស់លាសមកខ្ញុំនឹងចុះទៅមើល » ។
ទោះជាយ៉ាងនេះក្ដីតំណាងប្រជានេសាទប្រចាំខេត្តបាត់ដំបងលោក ហ៊ុត ហាន អះអាងថា រឿងនេះបើប្រសិនមិនមានការប្រព្រឹត្តអំពើពុករលួយទេ ជនជាតិវៀតណាមទាំងនោះមិនអាចធ្វើនេសាទបានឡើយ ព្រោះកន្លងមកប្រជាពលរដ្ឋបានប្ដឹងឲ្យអាជ្ញាធរចាត់វិធានការទៅលើពួកគេជាច្រើនលើកហើយ ប៉ុន្តែមិនទទួលបានលទ្ធផលនោះទេ ហើយជនជាតិវៀតណាមអាចធ្វើនេសាទរហូតមកទល់សព្វថ្ងៃ៖ «ខ្ញុំឲ្យពង្រឹងការអនុវត្តច្បាប់ឲ្យបានតឹងរ៉ឹងឡើងវិញមកកុំឲ្យយកច្បាប់ទៅចោល ព្រោះការប្រើយ៉ាងកាវវាខុសច្បាប់ហើយ ហេតុអីបានចេះតែឲ្យគេប្រើប្រាស់តាមអំពើចិត្តដូច្នេះ ? ហើយអាជ្ញាធរគួរតែមានវិធានការចាប់ឬក៏ផ្ដន្ទាទោសអ្នកដែលប្រព្រឹត្តនោះទៅ។ ហើយសមត្ថកិច្ចខ្លួនឯងកុំទៅយកតែលុយដាក់ហោប៉ៅហើយអាណាធ្វើអីបំផ្លាញធនធានធម្មជាតិតាមតែអំពើចិត្តយ៉ាងនេះអត់កើតទេ » ។
លោកបន្តថា រឿងនេះប្រសិនបើអាជ្ញាធរមិនព្រមដោះស្រាយ ហើយនៅតែបណ្ដែតបណ្ដោយឱ្យការធ្វើនេសាទខុសច្បាប់ដូចសព្វថ្ងៃទៀត គឺត្រីទាំងតូចធំ នៅតំបន់បឹងទន្លេសាបនឹងហិនហោចក្នុងពេលដ៏ខ្លីខាងមុខ។ លោកព្រួយបារម្ភថា នៅពេលដែលអស់ត្រី នឹងមានផលប៉ះពាល់យ៉ាងខ្លាំងដល់ការរកប្រាក់ចំណូលរបស់ពលរដ្ឋរាប់ពាន់គ្រួសារដែលរស់នៅលើផ្ទះបណ្ដែតទឹកក្នុងខេត្តបាត់ដំបង ហើយពួកគាត់នឹងត្រូវធ្វើចំណាកស្រុកកាន់តែច្រើន ព្រោះពលរដ្ឋទាំងនោះពឹងផ្អែកទាំងស្រុង ទៅលើរបបនេសាទត្រីរកប្រាក់ចំណូលដោះស្រាយជីវភាពគ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។